دورة " ربات بيوت واثقااااااات" - الصفحة 2

nihal159 · 2017-09-11, 12:33

اقتباس:

المشاركة الأصلية كتبت بواسطة ام شمسو محمد

اهلا اهلا و هل يخفى القمر ...انتي عضو فعال و مؤثر و ياما قرينالك مواضيع و تسلينا بمشاركاتك و حضورك ...واذا كنتي سابقا زميلة في منتديات الجلفة فانا سعيدة جدا لاني راح نكسبك صديقة في قسم المنزل ....

انا متاكدة بلي راكي منظمة و قايمة ...و لكن الانضمام لمجموعة يزيد في الحماسة و قادر يحسن من اداءنا و هذا اللي يخلينا نجتمعو و مع التنوع و الجديد ااح يكون الفرق بالتاكيد ....في النهاية راح نشكلو لبعضانا فريق دعم ...

اهلا و سهلا بك مجددا حبيبتي نهال

شكرا حبيبتي أم شمسو على الترحيب؛ ترحّب بيك الجنة إن شاء الله.
شرف كبير و فخر ليا أني ننظم لمجموعة الفراشات ماشاء الله عليكم عندكم طاقة إيجابية و عزيمة و إرادة و أكيد بوجود قائدة مثلك ماشاء الله فلا مكان للكسل و الفوضى بيناتنا.

أم البراء 2017 · 2017-09-20, 23:03

السلام عليكم جميعا
توحشتكم كامل وخاصة اختي ام شمسو وام تينة ورندة واش اخباركم
انا كنت غايبة لظروف صحية.نتمنى تكونوا كامل بخير
بارك الله فيك اختي ام شمسو وكل الفراشات
انا كنت في عطلة وكي رجعت لداري جاتني صدمة الغبار في كل مكان....
حابة نظفها مرة وحدة والاكيد اني مانقدرش .هذا اللي جابلي الاحباط ....
وقلت نطل عالفراشات اكيد يحفزوني ويمدني بالطاقة

ام شمسو محمد · 2017-09-21, 14:49

اقتباس:

المشاركة الأصلية كتبت بواسطة أم البراء 2017

السلام عليكم جميعا
توحشتكم كامل وخاصة اختي ام شمسو وام تينة ورندة واش اخباركم
انا كنت غايبة لظروف صحية.نتمنى تكونوا كامل بخير
بارك الله فيك اختي ام شمسو وكل الفراشات
انا كنت في عطلة وكي رجعت لداري جاتني صدمة الغبار في كل مكان....
حابة نظفها مرة وحدة والاكيد اني مانقدرش .هذا اللي جابلي الاحباط ....
وقلت نطل عالفراشات اكيد يحفزوني ويمدني بالطاقة

مرحبا بعودتك اختي ام البراء هذي غيبة ..الحمد لله على سلامتك ...وربي يجيبلك الشفا ...بالنسة لشغل الدار ماتقلقيش منو ...ماترونتش في نهار و مش راح تقدري تنظفيها في يوم بلعقل على روحك خطوة خطوة ...فترة قليلة و تلقايها تشعل ...مرحبا بيك معانا ام البراء

شَمْسٌ اَلْأَدَبِ · 2017-09-30, 11:55

تم اختي العزيزة

ابني نور عيني · 2017-09-30, 12:30

ام شمسو شكون ام محمد الاولى والثانية ههه والله مافهمت فهميني

مامات لؤي · 2018-02-03, 20:45

السلام عليكن اود المشاركة من فضلكن

ام صفصف · 2017-09-11, 14:23

اهلا حبيبتي ام شمسو ليك وحشة انتي وكل الفراشات
بارك الله فيك على المبادرة ، الكل في حاجة الى اعادة تنظيم بعد العطلة والدخول الاجتماعي
سلامي للجميع وبالتوفيق

ام شمسو محمد · 2017-09-11, 15:20

اقتباس:

المشاركة الأصلية كتبت بواسطة ام صفصف

اهلا حبيبتي ام شمسو ليك وحشة انتي وكل الفراشات
بارك الله فيك على المبادرة ، الكل في حاجة الى اعادة تنظيم بعد العطلة والدخول الاجتماعي
سلامي للجميع وبالتوفيق

اهلا اهلا والف اهلا بام صفصوفة ...يا اختي ليك وحشة ...هذي ساعة مبروكة كي طليتي علينا ...ان شاء الله تكوني بخير في احسن الحالات انتي و البنات ...و هذاك اللي رانا نقولو فيه نرتبو رواحنا بعد العطلة و الفوضى تاعها ...تسعدني عودتك ام صفصف

ام شمسو محمد · 2017-09-11, 15:06

في انتظار التحاق بقية الفراااشااات نبداو نشاطنا ...بحدث الساعة ...الدخول المدرسي ...كيفاش ننظمو رواحنا مع عودة اولادنا للمدارس
دروس الفراشة
الدرس الاول ..العودة الى المدارس ..

التحليق نحو سنة دراسية جديدة ..

العودة الى المدارس اصبحت مناسبة اجتماعية غاية في الاهمية ..تنتج حراكا اقتصاديا ..( التسوق ..الكسوة ..الادوات ..) و نشاطا ثقافيا ..(كتب تعليمية و مقالات عن التربية و التعليم و التلاميذ ...)
و لكن على الحقيقة شكون هو المعني الاول بالدخول المدرسي حتى قبل التلاميذ ...انا نقول الام ..ربة المنزل ...انتي اللي لازم تقومي و تحركي كل الاسرة كل صباح ...مسؤوليتك تتاكدي من ذهابهم الى السرير ليلا و الحصول على الراحة اللي يحتاجوها من اجل يوم غد منتج خصوصا بعد عطلة الصيف وين اختفى وقت النوم المحدد و ساعة الذروة الصباحية ...و حتى وقت الاكل ..كل واحد ياكل واش حب كي يجوع ...راح الهيكل تاع اليوم و غابت الروتينات ...

طبعا كاينين ناس منظمين بالفطرة ..نحب ننبههم الى انو اطفالهم يشوفو بلي طبيعي الحمام يكون نظيف و غرفة النوم مرتبة و كل شي منظم ...لذلك لازم دايما تنقليلهم الفكرة و تعلميهم كيفاش يكونو منظمين بانفسهم ...

بالنسبة لل80% منا اللي التنظيم هو عادة مكتسبة عندهم مش فطرة خلقوا عليها ...لازم نوضعو روتينات تنظملنا المنزل وتسهل لنا الحياة ...اكيد انو فعل نفس الشيء و بنفس الترتيب كل يوم يبان ممل و لكنو في الحقيقة يرجع علينا بمردودية عالية ...لانك باعتناءك بالحد الادنى من الاشياء تسهلي حياتك و تخليها ممتعة ...هذا واش رانا كامل نبغيوا ..نكونو مرتاحين و مبسوطين شوية ...و مانحصلوش على هذا الامر بالتاكيد كي يتاخرو الاولاد على المدرسة مرة بعد مرة لانك طولتي في الرقاد و راح عليك الحال ..

لصنع روتينات متعلقة بيوميات اطفالنا المدرسية نبداو بالضرورة بروتين ماقبل النوم ..لانو بغياب هذا الروتين ...كي يجي الصباح راح يضيع الوقت و انتي تحوسي على الحوايج اللي نسيتي وين حطيتوهم ...و يحكمك الرعب ...كي تديري روتين ما قبل النوم تبداي نهارك في هدوء....و سابقة بخطوة ..

1-نسقي الكسوة اللي راح يلبسوها في الغد او خليهم يخيرو وحدهم ...خير من الحيرة في الصباح مع ساعة الذروة ..الاستيقاظ و الافطار ...و كل واحد يعيط وحدو ...

2-فكري في كل واحد وش لازم يدي معاه الصباح كي يخرج ..ديريلهم " منصة " عند الباب حتى اذا كانت حاملة المعاطف او طابلة يرتبو فيها حوايجهم و اغراضهم ..المحافظ ..الملابس ...الاحذية ..الادوات ...باش ما يبقاوش في الصباح يحوسو على ملابسهم الرياضية مثلا اذا كانت عندهم حصة سبور ...حطيهم انتي او ببساطة اقترحي عليهم ذلك ..

3-النوم في ساعة محددة ..هذا اهم عنصر في روتين ما قبل النوم ...ما تسمحيلهمش باللعب لوقت متاخر باش مايضطروش في الصباح للنهوض من السرير بصعوبة و بدرجة اقل من الراحة اللي ممكن يحصلو عليها ....ماتنسايش بلي الصغار يحتاجو لساعات نوم اطول من الكبار ..

هذي الخطوات الثلاثة لصنع روتين ما قبل النوم تخليك تحصلي على صباح مسالم يمشي على نحو سلس ..

الروتين الصباحي ..

1-انتي المسؤول الرئيسي عن روتين الصباح لذلك لازم تستيقظي قبلهم ....ما تتهاونيش في منح نفسك 15 د اهتمام ...البسي ..تعطري ...تزيني ..( خلي روحك دائما مستعدة للحالات الطارئة ) ...هذاك الاحساس الجميل اللي ينتج عن كونك جميلة راح يدفعك بقوة..

2-كي تنوضي الاطفال اول حاجة يديروها بعد تنظيفات الصباح هي انهم يلبسو حوايجهم ...هذي قاعدة " كل ما بدلو حوايجهم بكري يكون الامر اسهل و اسرع ...كل ما طولو في بيجاماتهم يكون اخراجهم منهم اصعب " ..ماتتقلقيش اذا تناولو الفطور و تاشاو طابلياتهم ...راهم مخصصين لذاك الشي ..

3-حددي وقت معين للخروج من المنزل ...ديري في الاعتبار عامل المواصلات ...حتى اذا كانو مبكرين هذا خير من التاخير ..

الروتين الثالث ...روتين العودة من المدارس ..

الاطفال مش راح يحبوه ...و لكن انتي المدير هنا ..

1-قد ما قدرتي خليهم يبداو في واجباتهم المدرسية بمجرد او في الفترة الاقرب بعد دخولهم من المدرسة ..( طبعا بعدما يريحو شوية و ياكلو لقمة ..) ..اذا خليتي ل" مبعد " مبعد يكون في الليل وين كاين التعب و النعاس ...يديرو واجباتهم الان و ينحوهم من الطريق ...و في الليل يقضيو الوقت في جلسة عائلية بلا ضغط او توتر او حل تمارين ..

اكيد انو تمضية اليوم في المدرسة يصعب هذي المهمة و لكن هذا في مصلحتهم ...باش الاطفال يتقبلو الفكرة خليها ممتعة ....استعملي الكرونو ...اعطيهم 15 د مراجعة ...اذا خدمو مليح... " مش بسرعة "... راح يحصلو على 15 د لعب ..

كوني صارمة ..15 د مراجعة ...15 د لعب ..

و ابقاي عاوديلهم هذا التناوب حتى يخلصو واجباتهم المدرسية ..

استعمال المؤقت و الدقائق يساعدهم في التركيز من جهة و يعطيهم متعة التحدي و يمكنهم من الاحتفال باللعب عند نهاية كل واجب من جهة اخرى....عصفورين بحجر واحد ..

الروتينات راح تساعد حتما في تحريرنا من الضغط و تساهم في حصولنا على نمط حياة صحي و سليم ...

ا

جهينة اليقين · 2017-09-11, 15:12

اهلا حبيبتي ام شمسو واش راكي انت والاولاد ما شفتش الموضوع حتى قالت لنا اروى فالدردشة
المهم جا في وقتو والله اليوم بديت نلملم فالبيت من مخلفات الاستعمار هههههههه الضياف ووليداتهم والعطلة والعيد والقصرة والضحك والخرجات والاكلات اللذيذة ولكن كي راحو ما عندي ما نحكي من لفراش للاغطية للماعن الزيادة للكوزينة كول واردم في الحقيقة حفزني البارح فيديو تدابير دداح رائع اصبحت اليوم قافزة شوي غسلت شوي فراش نقيت الدوش مع روتيني اليومي بافي لي البعبع تاع المطبخ والثلاجة ووووو نتمنى نرجعو لنشاطنا والبركة فيك

ام شمسو محمد · 2017-09-11, 15:27

اقتباس:

المشاركة الأصلية كتبت بواسطة جهينة اليقين

اهلا حبيبتي ام شمسو واش راكي انت والاولاد ما شفتش الموضوع حتى قالت لنا اروى فالدردشة
المهم جا في وقتو والله اليوم بديت نلملم فالبيت من مخلفات الاستعمار هههههههه الضياف ووليداتهم والعطلة والعيد والقصرة والضحك والخرجات والاكلات اللذيذة ولكن كي راحو ما عندي ما نحكي من لفراش للاغطية للماعن الزيادة للكوزينة كول واردم في الحقيقة حفزني البارح فيديو تدابير دداح رائع اصبحت اليوم قافزة شوي غسلت شوي فراش نقيت الدوش مع روتيني اليومي بافي لي البعبع تاع المطبخ والثلاجة ووووو نتمنى نرجعو لنشاطنا والبركة فيك

هام بداو يرجعو لحباب بالوحدة ...و هاي دخلت اختنا الكبرى الغالية جهينة ..ضحكتيني على مخلفات الاستعمار هههه....بصح راهم 3 اشهر توقف فيهم الزمن ...العطلة و المناسبات ...و الاولاد في الدار ...و الزوج كونجي ...و زاد كملها العيد و الضياف ...رجعت الدار بركان من المناطق الساخنة ...الدخول المدرسي انقذنا ..ذرك نركزو مع الدار شوية ...نتعاونو و نونسو بعضانا ...و بالشوية على روحك جهينة الشغل ما راحش يهرب ...نتوازنو شوية بعد زلزال العطلة و ننطلقو باذن الله ...مرحبا بيك بيناتنا مجددا حبيبتي جهينة

ام شمسو محمد · 2017-09-11, 16:14

نموذج عن جدول روتينات ...تقدري تقترحيه على طفلك من اجل تسهيل يومياتو ..

روتين المساء ...قبل النوم بنصف ساعة ..

1-تنسيق و تجهيز ملابس و احتياجات و مستلزمات الغد ....

2- التنظيف لمدة 5 دقائق ...ترتيب الخزانة ...تنظيم المكتب ..

3- تغيير الملابس ..وضع الملابس المتسخة في السلة ..

4- غسل الاسنان و الوضوء و الصلاة ...

5- الذهاب الى السرير ...ينبغي تذكير الابناء باذكار النوم ..

6- طفي الضو في ساعة النوم المحددة ... و احصل على نوم هانئ ..

روتين الصباح ..

1- الاستيقاظ و ترتيب السرير ..

2- تنظيفات الصباح و غسل الاسنان و الوضوء و اداء الصلاة ..

3- تناول فطور صحي ..

4- بعد تناول فطورك نظف طاولتك و اغسل صحنك و خبيه ..

5- تاكد من ملء قارورة الماء و اخذها معك الى المدرسة ..

6- اجمع اغراضك و تجهز للذهاب الى المدرسة ..

7- تفقد محفظتك للتاكد من عدم نسيان اي شيء ..

8- انطلق الى المدرسة ...

روتينات العودة من المدرسة

1- تغيير الملابس ....اذا كانت هناك ملابس رياضة وضعها في سلة الغسيل او في الغسالة ..

2- تناول وجبة صحية ...و اشرب الماء بكثرة ..ثم استرح قليلا استعدادا لحل الواجبات المدرسية ..

3- جهز مؤقتك ....برمجه على 15 د

4- انجز واجباتك المدرسية لمدة 15 د بكل تركيز ثم احصل على 15 د لعب او لمشاهدة التلفزيون ..

5- برمج مؤقتك مجددا و عد للمراجعة بمعدل 15 د في كل مرة حتى نهاية الواجبات ...

6- اذا كانت لديك مشاريع مدرسية انجز القليل كل يوم ...لا تنتظر لاخر لحظة ...

هذا جدول نموذجي لروتينات طفل متمدرس اكبر من 10 سنين يمكن لك الاستفادة منها و اقتباسها حسب حالتك الخاصة ...فقط لاخذ الفكرة ..

سحابة باردة · 2017-09-11, 16:29

يعطيك الصحة والعافية أختي أم شمسو ديما تبعثي فينا النشاط والهمة ونا ثاني حابة نكون معاكم غير نرتاح من المرض أن شالله

ام شمسو محمد · 2017-09-12, 16:11

اقتباس:

المشاركة الأصلية كتبت بواسطة سحابة باردة

يعطيك الصحة والعافية أختي أم شمسو ديما تبعثي فينا النشاط والهمة ونا ثاني حابة نكون معاكم غير نرتاح من المرض أن شالله

اهلا و سهلا بالسحابة الدافئة ...سلامتك من المرض ..ربي يشفيك و يعافيك و يعطيك صحتك ...انضمامك مكسب لينا ما تغيبيش علينا ...ما تخليناش نفتقدو النسمة الباردة المنعشة ..

ghazalt assahra · 2017-09-11, 17:52

هل يمكنني الانضمام لكن
ام لطفل واحد و عاملة