بينيي نيولوك امممممممم

[زينب 83]

السلام عليكم و رحمة الله و بركاته

بما ان البينيي من المعجنات المفضلة عند الكثيرين خاصة الاطفال ، قلت نوعو فيه شوي حتى يكون جذاب اكثر و نخرجو من الروتين و نقدموه لعائلاتنا و ضيوفنا في أبهى حلة
اولا راح نبداو مع

بينيي الحلزون بالتفاح رائع
هذا بينيي محشو بالتفاح ، انا مانحبش التفاح المطهو لكن في البينيي صراحة جا ذوق رااااائع
المقادير
200ملل حليب دافئ
2بيض
ملعقة كبيرة زبدة او زيت
ملعقتين سكر
ملعقة خميرة خبز
نصف كيس خميرة كيميائية
500غ فرينة ممكن اقل او اكثر
فانيلا
ملح
تفاح مقطع رقيق
قرفة نرشوها فوق التفاح ، انا مادرتهاش

نطلعو الخميرة مع الحليب الدافئ و السكر و نزيدو باقي المكونات و اخيراً الفرينة حتى نتحصلوا على عجينة طرية و تلصق
نرشو الفرينة و نطرحو العجينة و نستفو فوقها قطع التفاح حتى نغطيو كامل العجينة ، نروليوها ثم نقطعوها كيما في الصورة ، نخمرو هم ربع ساعة و نقليوهم في زيت سخون و نعاونو بالملعقة باه الزيت يوصل للحبة كامل
بعد طيب نرمدها في السكر او ندهنها بجولي التفاح






صدقوني بنينة رووووعة













بينيي بعصير البرتقال

250 ملل عصير البرتقال

بيضة 1

نصف ملعقة زبدة او ملعقة زيت

فانيلا

نصف كيس خميرة حلوى

ملح

ملعقة كبيرة مبشور قشر البرتقال

ملعقة كبيرة خميرة الخبز

ملعقة سكر

الدقيق حسب الخليط

نخلطو الخميرة و السكر مع العصير الدافئ و نزيدو باقي المكونات ثم الفرينة و نعجنو مليح ، العجينة لازم تكون رخوة و تلصق نخليوها تطلع و مباعد نشكلوها كيما نحبو
انا شكلت الشكل العادي
و الشكل الثاني كان فكرة جديدة لي هي فكرة بينيي كرواسون و حشيتهم بالنوتيلا
رائحة البرتقال مع الشكولا اممممممممم










و بيني الكرواسون












بينيي بالشوكولا

استعملت نفس وصفة بيني التفاح لكن نقصت اربع ملاعق فرينة و حطيت اربع ملاعق كاكاو و قطعتهم و خليتهم خمرو ربع ساعة و قليتهم في زيت سخون


و بعد ما طابو حشيتهم بالنوتيلا

هاذو بالذات ماتوقعتش يكون بنان هكذا ، جاو تحففففففة











و اخير بروشيت البينيي لحبايبي الاطفال

هاذي فكرة تقديم جديدة للبينيي تفرح الاولاد
نقصو العجينة شرائح و نلصقو أولها في العمود و ندورو العمود بلا مانرفعوه و بلا ما نشدو العجينة لانها تتمدد
عند الانتهاء نلصقو الأطراف بواسطة الماء في نهاية العمود









نخمروهم شوي و نقليوهم في زيت سخوووون و نزينو هم بالسكر او الشوكولا ،،،،،،،،

فكرة جميلة و لذييييذة








ان شاء الله تكون عجبتكم أفكاري حبيباتي
حبيت نزيد ملاحظة فقط فقط للاخت لي سالتني اذا ميجيوش مزيتين
ابدا غاليتي بالعكس و الله كانهم ماشي مقليين نهاييا
انا نقلي في زيت سخووون و مباعد نحطو متوسط و نرمي بالملعقة البينيي دقايق طيب و تاني ريحة القليان تكون في الزيت المقلي به اكثر من مرة دو نزيدك فكرة اخرى ممكن تنسمي الزيت بالفانيلا و نجمة الارض
في امان الله و حفظه