مسكوتة سوغبخيز لعيونكم

[أم محمد تاج]

حبوباتي كتغيير لشكل الموسكوتشو جاتني فكرة جهنمية قلت نجربها ونفيد بيها لبنات وخرجت روعة روعة روعة جربوها وتشوفو هام ليكم الصور ومبعد الطريقة والمقادير








نبداو مع المقادير والطريقة
الطبقة الأولى يعني التحتانية: 2 بيضات + 3مغارف كبار سكر عادي+ 5 مغارف كبار زيت+ باطة ياؤورت دانون تاع ألف ذوق فراز + باكي خميرة و6 مغارف كبار فرينة ولافاني خلطيها عادي مثل المسكوتة عادي حطيها طيب كي طيب حطيها في صحن التقديم
الطبقة الثانية: 2 بيضات + 3 مغارف سكر عادي + لافاني+ باطة ياؤورت دانات شيكولا + 5 مغارف كبار زيت+ باكي خميرة+ 6 مغارف كبار فرينة و 2 مغارف كبار كاكاو خلطيها عادي كيما المسكوتة وطيبيها في نفس المول لي طيبتي فيه الطبقة الأولى وطبعا مدهون بالزبدة والفرينة للطبقتين
الوقت لي طيب فيه الطبقة الثانية جهزي القاناش لي هو عبارة عن باطة شيكولا ( أنا استعملت الشابة نوار) ذوبيها وخلطي معاها فنجال كرام فراش وإذا مايش متوفر نديرو باطة ياؤورت دانات شيكولا ونقسم القاناش على زوج جزء ندهن بيه الطبقة الأولى من فوق وجزء ندهن بيه من الفوق كي طيب وتبرد ونزينها بخطوط بقلاصاج السكر قلاصي والحليب وشهية طيبة لكن.