قلب اللوز لي خدمو فارس جيدي في قناة سميرة

[بشرى التيسمسيلتية]

السلام عليكم
اليوم شفت فارس و تقريبا الكل يعرفو
اطباقو ديما تهببببببببببببببل
المهم اليوم شفت طريقتو في صنع قلب اللوز كان صنع وحدة من قبل و ما شفتهاش للاسف لكن هاد المرة دونت الملاحظات كاااامل ههههه باش ننجح فيه
مقادير العجينة
6 كيلات سميد حرش
4كيلات سكر عادي
كاس صغير مارغرين
كاس صغير ماء زهر
كاس صغير لبن
ملاحظة نفس المكيال لي كيلنا بيه السميد نكيلو بيه السكر
مقادير الحشو
50غ جوز الهند
و للشربات
نحتاجو
3كيلات سكر عادي
6 كيلات ماء
نصف حبة قارص
كاس صغير ماء زهر

الطريقة
اولا و قبل كل شيئ نطيبو الشاربات لازم تكون واجدة كي يطيب قلب اللوز
نحطو في كسرونة السكر و الماء و النصف حبة قارص و نحسبو مور ما يبدا يغلي الماء 15 دقيقة و نفيو عليها و كي تولي قريب توجد نزيدو الماء الزهر من اجل العطر و باش تبقى الريحة و البنة
و الان في زبدية و لا اي حاجة تصلح نحطو السميد و الالسكر و نخلطوهم مليح باش يخلو في بعض و من بعد نزيدو المارغرين و لا الزبدة الذائبة و تكون باردة و نخلطو مليح مليح حتى تدخل في السميد و السكر من بعد نضيفو اللبن و نخلطو مليح و نزيدو الماء زهر و نخلطو شوية نتحصلو على عجينة شوية جارية، من الاحسن تكون في سنوية تاع نحاس و نخليوها خاصة لقلب اللوز .
ناخذو كمية قليلة من الزيت ندهنو بيها السنيوة ، و نقسمو العجينة تاعنا على زوج نحطو النصف الاول في وسط السنيوة و ما نحلوهاش بزاف نخليوها غير وسط و نحطو فوق العجينة جوز الهند و من بعد نعاودو نحطو فوقو النصف الثاني تاع العجينة ، نروحو نشمخو يدينا شوية و نكسلو العجينة في السنوية و لا نمشو هاكذا باش ما تلصقش يدك على السطح نحطو حبات لوز من اجل التزيين .
و ندخلوها للفرن على درجة 200 درجة لمدة 20 حتى 25 دقيقة .
باش تعرفي بلي طابلك من الاسفل ياخذ لون بني داكن و من بعد كي يطيب نخرجوه و ندهنو الوجه بشوية زبدةو لا مارغرين و نرجعوه للكوشو باش يكسب بريق و لون ذهبي .
كي يطيب قلب اللوز تاعنا نشربوه بالشاربات و هو سخون باش يشرب لانو لو برد ماراحش يشرب و من الاحسن ديرو شاربات بالزيادة لانو لو خلاصتلك الشاربات و ما جي تعاودي ديري وحدوخرا يكون برد و ما راحش يشرب الشاربات كي نفرغو عليه الشاربات نحطوه مدة قليلة في الفرن باش تقوى ريحة الماء زهر و جي بنين
ان شاء الله تعجبكم الوصفة و تدعمونا بردودكم الحلوة
اسفة هادا واش حصلت على صور هادي لقيتها في النت


و هادي صورتها انا من التلفاز