حبيت نزيد على أختي و نحكي على قصتي في باك 2006
بسم الله الرحمن الرحيم
أنا شاب كنت في مرحلتي الإبتدائية و الإكمالية من المتفوقين و الحمد لله كانت عائلتي تفتخر بي و أيضا كي وصلت السنة الأولى ثانوي و السنة الثانية ....بصح كي وصلت للباك عائلتي كرهتني و فقدت الأمل مني أني ندي الباك .... حتى أساتذتي في الثانوية حيث أني ما كنتش مقلق روحي بيه و ما كنتش خايف بصح كنت نقرالو بأعصاب باردة ....سجلت لدروس الدعم في الرياضيات و الفزياء و العلوم........بصح صدقوني حضرت تقريبا 20% من إجمالي الحصص و الفزياء كنت نحضر بمعدل مرة في الشهر......و بالنسبة للثانوية وقفت الدراسة في فيفري....... حذاري التقليد غير للي يقدر.......بصح أنا كنت على بالي واش قاعد ندير ....درت برنامج أني نخير مادة أساسية و نقراها مليح بصح لازم نضمن فيها فوق 15 باش هي اللي تنجحني في الباك .....و نعاود حذاري التقليد.......خيرت المادة اللي نقوي فيها هي الرياضيات بالدرجة الأولى....العلوم في الدرجة الثانية ثم الفزياء في الدرجة الثالثة......و وراهم المواد الأدبية ........المهم جبتها وقت ننهض على العشرة تاع الصباح و صحابي يقراو في الليسي ...نبدا نقرى في الرياضيات حتى الظهر .....و نروح نصليه في المسجد باش نديفولي...و نرجع نقرى العلوم ..و بالمناسبة خيرت محور في العلوم عاودتو في العام 3 مرات هو الخلية و الطاقة و ركزت عليه بزاف......المهم نكمل العلوم حتى العصر و نروح نصلى في المسجد....و نرجع للدار نقرى رياضيات حتى المغرب نروح للمسجد نحفظ القرآن حتى ورى العشاء ......و من بعد نتفرج في التلفاز حتى 00:00 تاع الليل....حذاري التقليد غير للي شايف روحو قادر.....و كي تعود ال 00:00 نبدا الرياضيات حتى 02:00 تاع الليل......و هكذا كل يوم بصح الفزياء ماركزتش عليها غير الديناميك حكملي و الإهتزازات و الكحولات و الأسترة في الكيمياء وقت و حطيتها ساهلة على حساب مواضيع الباكالوريا اللي شفت.....المهم بقيت هكا حتى نهاية السنة.....أسخايلو العربية قستها ليلة الباك تاعها و الفلسفة و الإجتماعيات قبل الباك بأسبوع و الفرونسي و الإنجليزية قبل الباك تاعهم بساعة!!!!!! حذاري التقليد......المهم عقبت الباك و ديت في
الفزياء 5.5
الفلسفة 7.5
الفرنسية 8.5
العربية 8.5
الإنجليزية 11.5
الإجتماعيات 10
نقاط متدنية .......على خاطر ماقريتهمش مليح
بصح في العلوم جبت 12
و الرياضيات 16.....و نجحت في جالت هاتين المادتين بمعدل 10.59 و فرحت والدي و أبهرت أساتذي حيث كنت من الأقلية اللي نجحو في قسمي
و الله في حصص الدعم نجحو تقريبا من الذكور أنا و زوج ولاد في العام اللي نسبة نجاح العلميين فيه لا تتعدى 26%
و زدت عاودو حر في باك 2007 مع قرايتي الجامعية بيولوجيا ..و ماقريتلوش بزاف
و جبت معدلي 12.92 درت بيه هندسة معمارية حيث كانت الطب بمعدل 12.99
و الحمد لله....بصح من قصتي تشوفو وجهين :
وجه العبد المثابر الي درس مواد و تعب فيهم تحصل بيهم على الباك
وجه العبد الكسول اللي مايروحش يقرى و يفرج التلفاز ....و أهمل معضم المواد اللي في جالتهم ما تحصلش على معدل مليح.......و إن شاء الله تاخذو إيجابياتي و تعملوش بسلبياتي
المهم ...أقراو كل مادة على حساب معاملها .....بصح أقراو كلش
ما تضيعوش وقتكم في الخروج لدروس الدعم بزاف و عولو على أنفسكم ...و توكلو على ربي
صليو كل صلاة في وقتها باش تستريحو و تعاودو تشحنو أنفسكم.......و ربي ينجح الجميع