ماهي طريقة نزع نواة التمر المرحية في الغرس

[ياسمين1990]

سلام اختي ام ياسمين
شكرا لكي اختي معنديش خبرة في هذا
نخاف نغسل التمر تقراص يعني تفسد كي تخبيها في لبيادن خاصتا في المناطق الرطبة ولو نشفتيها
اذا ممكن تقولي على هذي الطريقة بالتفصيل واذا مزال ممكن نقدر نديرها في اي وقت من العام يعني نشري التمر حب ونخدمها في اي وقت
واش نحط معاها باه ماتفسدش وبارك الله فيك

[ياسمين1990]

خلاص ام ياسمين بعدما شفت واش كتبت اختنا امازيغية وافتخر
مابقاش نزيد نشري هذا النوع خلاص ونوكل ربي على صحاب المصانع
بارك الله فيك هكذا نضن اننا افدنا الناس ونبهناهم للاخطار لراهي تهدد فيهم
شكرا

[امازيغية وفتخر]

و الله العظيم كل كلمة قلتها صحيحة رغم اننا انبيعوه لكن لا مفر من كلمة الحق بلاكو من الغرس المرحي وساخة في وساخة واتحدى اي وجدة تقول العكس الخبز اللي ابيض نلقاو فيه لعجب فما بالك غرس بني وداكن اللون او مرحي ما تدري ما فيه امانة بلغو لكل واحد يستعملو يبتعد عنو
اما غرس لبيادن متوفر عند بائعي التمورمثل بيادن الزيتون
من وزن 5 كيلو حتى ال50 او تقدري تشري بالكيلو راح تلقاي حباتو باهيين او كاملين لانو محشي باليد مش زي لبطانة تمرها ممحي داخل في بعضاه لانو يحشيوه برجليهم
والله والله غيرشفتهم في الدوار النساء يقضيو شغلهم وييصيقو و بدون ما يغسلو رجليهم يتوجهو للتمر يحشيوه في لبطاين ما يهمها لادخلت حشاكم للمرحاض ولا عفست على شيء وسخ ما نيش حابة ندور لكم قلبكم كثر

[امازيغية وفتخر]

لتحضير الغرس في البيت
اذا كنت بمنطقة مشمسة
خذي حبات الغرس كي ايعود وقتو امسحيه بكتانة مبلولة حبة حبة بعدها انشريه في مكان فيه لهواء على قطعة قماش او خيشة و غطيه بالتيلو من الذباب والغبار ليومين او اكثر حتى ينشف من الماء بعدها احشيه في بيدون بلاستيك او شيء قدر الفخار اذا عندك باش
باش ما يفسدلكش نقي شوي غرس من النوا وامرسيه بيدك مع شوي زيت ملعقة فقط يصبح عجينة حطيها من فوق كغطاء عازل من الهواء غطي قطعة بلاستيك اقفلي البيدون وخلاص
كي تجي تنحي للاستعمال ما تنخيش الطبقة اللي غطيتي بيها الكل لكن بالشوي نحي وارحيه و استعمليه حاجة نقية ومن صنع يدك
ام اذا كنت في مدينة جوها رطب
امسحي حبات الغرس بقطعة قماش ناشفة غير مبللة وواصلي كما سبق
وبالصحة او لهنا

[oum jasmine]

chokran dkhti amazighiya la9ad 9omti bilmohima 3ala a7sani wajh ja3alaho allah fi mizani hassanatoki wa akthara min amthaloki

[oumhana]

اختي أمازغيه و أفتخر :شكرا يعطيك الصحه وربي يجازيك نبهتينا لهذه الفكره تاع ليحشرو الغرس برجليهم مسخين على كل قلبي خرج مع أنني مناكلوش برك كندير المقرط نحبو بالغرس و نشري هذاك لي يتباع باكيلو ويجي لونو فاتح زعمه هذاك ثاني مشخ؟ خاطر هنا فالعاصمه مشفتش تاع البيدون جاوبيني ربي يجازيك راني قتلك انا مناكلوش باش مننخدعش و نطيب بيه سورتو ذرك راهو جاي الربيع المبرجة الناس كل تحبها .(قلبي خرج)

[أم محمد تاج]

يعطيك الصحة حبيبتي امازيغية وافتخر وتاع البيدون احسنهم حتى يجي طري ويذوب وحدو

[RANIA32]

هاذا هو التمر الملائم للمقروض والرفيس و ,,,,,,,,,,,,,,,,,,,,,,,,,,,,,
احنا عندنا نسموه تمر الحميرة
تغسليه ومن بع تفوريه ومن ثم تقلعي النواة او تزيديلو الزبدة وتدلكيه وبسهولة تقلع النواة

[امازيغية وفتخر]

المشاركة الأصلية كتبت بواسطة oumhana

اختي أمازغيه و أفتخر :شكرا يعطيك الصحه وربي يجازيك نبهتينا لهذه الفكره تاع ليحشرو الغرس برجليهم مسخين على كل قلبي خرج مع أنني مناكلوش برك كندير المقرط نحبو بالغرس و نشري هذاك لي يتباع باكيلو ويجي لونو فاتح زعمه هذاك ثاني مشخ؟ خاطر هنا فالعاصمه مشفتش تاع البيدون جاوبيني ربي يجازيك راني قتلك انا مناكلوش باش مننخدعش و نطيب بيه سورتو ذرك راهو جاي الربيع المبرجة الناس كل تحبها .(قلبي خرج)

للاسف كلوا صنعة وحدة
فاتح او غامق
تخيلي معاي
زعمة يفرزووهولك حبة حبة او يرحيوه
والله نصو حشرات
انت عن نفسك باش تحشي بيدون شوفي كم من الوقت والجهد يلزم
ياو نتخدعو وحنا نشوفو فما بالك واش يصرى من ورانا

[ام حنين الحنونة]

اخخخخخخخخخخخخخخخخخخخخخ يا اختي الامازيغية و الله ربي ايجازييك و يحفظك نبهتينا لحاجة كبيرة ...من الاحسن الواحد يشري التمر عادي و يخدمو ....صدقني من اليوم ماعاااااااااااااااااااد الغرس يدخل داااااااااااااااااااااااري

[امازيغية وفتخر]

فعلا صدقتي اختي

[ياسمين1990]

بارك الله فيكم اخواتي والله اني فرحانة اننا اليوم قدمنا حاجة مفيدة للمجتمع ان شاء الله تكون في ميزان حسنات كل وحدة شاركت
ولو بكلمة حق هكذا بلاك المعنيين بالامر يفيقوا مع راسهم ويخدموا خدمة نظيفة وبها يكون عندهم اجر عند الله
ارجو ان يطلع على هذا الموضوع اكبر عدد ممكن حتى تعم الفائدة على الجميع وينتبهوا من كل حاجة يشروها
وشكرا مرة اخرى

[امازيغية وفتخر]

يقول المثل ماندم من استشار وما خاب من استخار

[لينة نور]

السلام عليكم

( دخلت نحوس على الكسرة لقيت هاذ الكارثة, هاذ الغشاشين كي نديرو معاهم مايخفوش الله )

كما قلت أختي ياسمين أخر مرة اشتريت التمر كان هذا النوع وقد صورت العلبة



وأحمد الله على أنني تذوقته قبل ذلك

مصيبة للأسنان تخيلي قِطع النوى !!!! في غاية الحدة مهلكة للأسنان وان بُلعت خطرها أعظم

ممكن جدا أن تصيب الامعاء بجروح خطيرة ....والله كارثة

أما عما بلغت عنه الاخت أمازيغية مشكورة على ذلك فتلك كارثة

لو يعلمون ما يسببه شعر الحيوان لو بلع وتثبت في داث الانسان

( قلبي وجعني زعمة مسلمين .... الله يستر )

ليس هناك أفضل من أن نصنع العجينة لوحدنا من تمر الحميرة .

شكرا لك يسامين على هذا التسائل الذي جعلنا نعلم اضافات الاخت أمازيغية بارك الله فيها

عليك برفعه بين الفينة والاخرى كي يتعلم الناس.

بدوري سوف أنقل مشاركة الاخت أمازيغية الى موضوعي هذا بما أن المقروظ يصنع بالتمر .

وقد تعمدت ادخال القمح الفرنسيمن لجل الاسباب ذاتها ( الغش في بلادنا تعدى الحدود )

مقروظ , صنع جزائري بالقمح الفرنسي والتمر التونسي .

[أم عامر]

بارك الله فيك أختي امازيغية على التنبيه
الحمدلله هذه مدة وانا نستعمل التمر كامل الحبة نقيها من النوى و نرحبها في ماكينة اللحم
والله بنة هايلة و الفرق كبير