وصفة لقريوشة ...... بآلة جديدة

[fatimazahra09]

السلام عليكم



في الحقيقة هادا نوع من قريوشة تكونو اكيد شفتوه من قبل .... انا جربت الوصفة بالسمن وماصلحتليش .... قررت اني نقعد نجرب ونجرب ونجرب في الوصفات حتى تجيني مليحة ومفخفخة وبنينة اكيد كيما يحب الخاطر ... المهم اعتمدت هادي الوصفة و لي هي . 3 عبارات فرينة اي 1 عبر فرينة بالكيل = 125 غ اي انا حطيت 375 غ
و 1/2 عبر زبدة التوريق دائبة = 113.5 غ .................اي 1عبر زبدة يساوي 227 غ ..... وعلى فكرة ماناش نقرو في الرياضيات .... وكيما يقولو
faire des gâteaux ce n 'est pas résoudre des problèmes mathématiques
بغيت برك نفهمكم الكيلات بالميزان فقط
فاني + 1/4 كيس خميرة كيمائية . انا مانديرش الملح في القريوشة لي تفادي الفقاعات ... بالاك راكم مجربينها مع بورك العجين .... تخلطي كامل المواد وتبليها بماء دافيء وماء زهر بش ما ديرش الحبيبات . و هنا تبغي ديري البيضة او لا ... رايحا تجيك + كروستيونت اكثر بلا بيضة ... بفعل زبدة التوريق لي ولاو يديرو بيها تقريبا كلشي ... ... و شوية شوية هشوشة بالبيضة ....مليحة برك ..... لان كيما نعرفو الصفار وحدو يطري الحاجة وكي ولات بيضة كاملة مارايحش يبان مفعول بياض البيض لي هو في الاصل وين ما ديريه وفي اي وصفة رايح يقرمشلك الحاجة ... علاه مثلا في الصابلي نستعملو غير الصفار .......قلت مفعول بياض البيض ماريح يدير والو امام زبدة التوريق .......
تلميها برك تكون عجينة ماهي يابسة ما هي طرية بزاف ......ماتعجنيهاش رايحا تعجني في الة البقلاوة من بعد ...
هنا نمدلك المقادير بكمية كبيرة : 9 كيلات هي بالظبط 1 كلغ و 25 غ مقدار 1/2 م ك .... و الزبدة تحطي ...1/2 عبر مكرر ثلاث مرات بالمعنى = 340.5 غ ....اوزني مباشرة 350غ ودوبيها ...+1كيس كامل خميرة كيمائية .
وتحطيها في كيس بلاستيكي او تلميها في فيلم اليمونتار .....تخليها تريح في الثلاجة على الاقل 4 ساعات ... وتحلي بالحلال هو الاول ثم بالماشينة نتاع البقلاوة ... تبداي برقم واحد ... تحلي العجينة فيه وانتي في نفس الوقت راكي تعجني فيها ...بالمعنى حلي و عاودي طبقي و حلي وعاودي طبقي كيما تبقي البارمي .... عاودي هادي العملية على الاقل 4 مرات وفي رقم 3 لي تبداي ترشي وتحلي بالمايزينة ... كملي وحلي في الرقم الاخير لي هو 5 .
انا استعملت هادي الآلة لي سهلت عليا بزاف المهمة وبها مارايحاش دوري لا ادروات لا اقوش ....ههههههههههههه.
المهم فوتي هادي الالة على شريط العجينة في الوسط تماما واضغطي شوية باش تتمركا الخطوط ... مارايحاش تقطعهم لاكن تمركي فقط .... انتي عاودي بالجرارة فوتي ... وحاولي تحلي على الاقل تشوفي بعينك راهو باقي 0.5 سم على الحاشية ...
هادي الطريقة رايحا تخلي القريوشة في القليان تتفتح اكتر وتصيب ليتساع باش تتنفخ ...... و ما يجوكش الاطراف خشان ...
المهم انا جربت حليت 16 شريط و كي قليت الحبة جاتني مليحة لكن كبيرة بزاف ...بالمعنى ضخمة ... تقعدي نصف ساعة باش تكمليها في دارك ... وعند الناس اكيد تقعدي ساعة ...ههههه.
المهم حليت 12 شريط فقط و طويت .... كل مرة احسبي 4 شرائط واقلبي ... رايحا هنا تقلبي 2 مرات فقط ....افتحيها في الوسط تماما ... ودخلي الجهة العلوية في الوسط ووخرجيها ... والله بدون قصد نسيت باش نصور هادي المرحلة .... ولا كنتي موالفا تمشطي للبنات اكيد رايحا تعرفي الطريقة .....هههههه
المهم اقليهم في زيت سخونة و ماشي على نار قاوية و دايما جربي قطعة من لي شوت اقليها هي الاولى .... وما تخسريش حبة .














انا هادي نصيحة مدتهالي ما حبيبة و لي هي جداتي ... الله يرحمها برحمتو ... كانت دايما تقولي عمرك ما تعسلي القريوش في نهارو ... خليه يبات وعسليه ..... وحقيقة كاين فرق بين تعسلي تم تم وتعسلي الغد من داك .
رشي شوية جلجلان وحتى باييت اليمونتار دوري يجو يهبلو ....... ان شاء الله تكونو ستفدتو من الطريقة .
هادي الحبة نتاع 12 شريط

هادي الحبة نتاع 16 شريط


وعلى فكرة الالة رايحا ان شاء الله نديرلكم وصفات اخرى بيها ترقبو ان شاء الله .
سلامي الحار ليكم ....
وعلى فكرة هادي الالة ثمنها 350 دج
ماتنساونيش في دعوة خير حبيباتي .... من القلب طبعا