بداية يوم جديد

[oum sabrin]

صباح الخير على الجميع
حبيبتي ام هزار ربي يبارك فيك على الكلام و الدعاء الجميل
بالنسبة للارز درتو بلحم البقري حمرتو في اكياس الشواء بعدما دوزنتو بلاموتارد و الثوم و التوابل و الملح و نديرلو شويا ماء و لما يطيب ناخذ الصوص المتحصل عليه نضيفها للارز لي اكون طيبتو عادي و درتلو شويا زبدة و نوضع الطبق في اناء خاص بالفرن و نستف فوقو لحم البقر و نوضعو في الفرن درجة حرارة منخفضة ليتشرب الصوص و شهية طيبة و موالفة نطيبو عادي ندير مرق احمر بلحم البقري و البصل و الثوم و التوابل و الحم يكون طري باش يطيب تم تم و الصوص تكون ثقيلة و نسقي بيها الارز المطبوخ ابيض و مدهون و شهية طيبة
اتمنى تكوني فهمتيني و اي سؤال لا تترددي في طرحه حبيبتي
يوم موفق للجميع نروح نحضر بنتي

[ام آدم]

صباح النشاط والنجاح والفلاح لاحلى فراشات
ام هزار ام صابرين شكرا لاهتمامكما الحمد لله راني مشيت في المراجعة والحمد لله لبارح كملت 3 محاور بفضل الله ثم بفضل الزوج لانو بقى مع الاولاد وانا غلقت على على روحي البيت وبقيت نراجع بتركيز من صغري كون يزغد واحد قدامي نفقد التركيزههههه
اليوم نهضت على 7 الحقيقة الصلاة عندي عذر الاذكار هذا وين تفكرتهم حطيت لغدا يطيب وقلت نطل عليكم ونرجع نغسل الاواني وندير شوي رخسيس من 9الى 10
ونجوز النشاف حاشاكم +مسح الغبار من 10الى 11
ومن بعد نتلهى بروحي قبل ما يجي ولدي وزوجي
احبكن في الله دامت صحبتنا الطيبة مدى الحياة ان شاء الله

[صابرة محتسبة]

[ام آدم]

ام متين اين انت حبيبتي اين قهوتك الصباحية التي ادمناها
امولة وين غبت واش راكي مع المراجعة
نسمة عسى المانع خير
هنا محمد جهينة اليقين صابرة محتسبة فراشات العمر................اين انتن
اروى آلاء واش راكي ان شاء الله يكون تنحى عليك لعيا وانتهى الاضراب عن العمل هيهيهي
واشراهم بنوتاتك

[صابرة محتسبة]

أَصْبَحْنَا وَأَصْبَحَ الْمُلْكُ لِلَّهِ وَالْحَمْدُ لِلَّهِ لَا إِلَهَ إِلَّا اللَّهُ وَحْدَهُ لَا شَرِيكَ لَهُ ،
لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ

[صابرة محتسبة]

عندما تلامس عيناك وجه السماء فى الصباح .. فلتحمد الله لوهبك الحياة ليوم جديد ..
ولتبدأ من جديد .. فالحياة فرص مستمرة فلا تضيعها هباء ...

[صابرة محتسبة]

اللَّهُمَّ بَارِكْ لَنا فِي السَّاعَاتِ وَالأَوْقَاتِ.. وَبَارِكْ لَنا فِي أَعْمَارِنا وَأَعْمَالِنا

اللَّهُمَّ تَقَبَّلْ مِنَّا صَالِحَ الأَعْمَالِ وَاجْعَلهَا خَالِصةً لِوَجْهِكَ الكَرِيمِ.

[arwa alaa]

صباح الخير عليكم واش راكم دايرين فيها الاضراب راهو مزال وراني ندير غير في الروتينات
والقلقة راهي تنحات شوية لاني نضت الصباح مخدمت والو وكتبت نص درس الخياطة طلعلي المورال شوية لاني حسيت بلي مراني ندير في والو وهذا الشيء يقلقني بزاف الدنيا خمجوها البنات ورجعت كيما كانت ومخدمتش والو بيدي ومطبقتش درس الخياطة هذا كل زاد عليا
كي ناظو البنات حبست ورحت تلهيت فيهم ومبعد درت الغداء روز بالدجاج في الفور ودرت شربة فريك للعشاء تبقا غير الرخساس لعشية نديرها
شكرا ام صابرين على الرد بصح راهم يبقاو يبكيوعلى الالون حتى نمدلهم ومنحبش نحرمهم من حاجة يحبوها وراهم عندهم بزاف اللعب بصح يحلالهم غير التخربيش ويوليو كالم امال بباهم باش ميكسرولوش راسو يمدلهم الالوان
ويقولي خلي الذري تلعب

[arwa alaa]

واش راكم دايرين فيها
صح غداكم

[ام متين]

السلام مليكم كيف الاحوال يا فراشات ان شاء الله راكم بصحة جيدة وعافية اما انا راني في حالة خمول كبيرة لا اعلم السبب حابة نرقد وما نعمل والو لكن راكم تعرفوا الي عندها الاولاد حتى اذا ريحت تريح بقلق المهم ربي يعيني ويعين الكل انا الان راني حاطة كاس شاي وزدت معاه نصف حبة ليمون لعلي اشعر بالنشاط قليلا

[ام متين]

الفراشات الي راهم داخلين على المسابقة انشاء الله تكون من الاوائل وتفرحوا وتفرحون معاكم لان النجاح في اي مجال جميل ورائع ويعطي للواحدة قوة وثقة بالنفس

[ام متين]

ام صابرين ما شاء الله عليك ربي يحفظك من العين ويعطيك الصحة والهنا وينجحك في المسابقة انت وكل الفراشات المشاركات
ام هزار راكي بتقريراتك وطلتك اليومية الي ترد الروح ربي يعينك اختي على العمل في الداخل والخارج وربي يشفي الوالدة الكريمة ان شاء الله
اروى انا وياك راه الحال كيف كيف نعملو في الواجب فقط ربي يبعد عنا الكسل والتعب والقلق

[ام متين]

ام ادم نعرفك شاطرة وفحلة ربي يعينك على المراجعة وتكوني من الناجحات الاوائل

[ام متين]

هنا ام محمد صابرة محتسبة كلامكم يرد الروح ويزرع الامل والفرحة في النفس ويبعث على النجاح بارك الله فيكن
جهينة اليقين ان شاء الله راكي مليحة وهانية

[ام متين]

غزالة كلامك وروحك المرحة تنحي على القلب ان شاء الله تبقاي دائما مرحة وسعيدة ونشيطة
امال النشاط والفحالة ربي يبارك ويكملك في زواجك محبة النقاب غابت وغاب حسها ان شاء الله تكون لباس
نسمة زادت غابت من جديد اين انت