لنتشارك للتحضير بهدوء للشهر الفضيل

[sarra5]

المشاركة الأصلية كتبت بواسطة أماني نور

أولا راكم سخفتوني خلاص و فاتوني صفحات بزاف ان شاء الله كا مانقعد نقرا شوية باه نستفيد معكن.....انا مازالنا ماوجدنا والو تقريب عندنا عرس في جوان تع سلفتي....كي يكمل ان شاء الله نوجد...هاداك هوا نكون لميت الافكار....خبينا برك الجلبانة و القرنون و خبيت شوية زاست تع البرتقال ....أكيد نضفت الكوزينة مليح (مازالت جهة برك) كي ان شاء الله يفوت العرس حابة ندير شوية حميض مشوي نخبيه لرمضان باه في رمضان مانضيعش فيه الوقت و ندير شوية عجينة مورقة تاني نخبيها منين نحتاج نجبد نخدم بيها....مازال اليمون ماخبيتش (نموت عليه) و بالمناسبة عجبني الثوم الغبرة بالاك ندير...يخي يصلح نضيفوه في الأكل (في البرمة) مش غير تع المشاوي؟؟؟ و ندير تاني هريسة خضراء شفتها هنا في المنتدى سخفت عليها......ربي يبلغنا رمضان بخير و عافية

بارك الله فيك

فكرتيني نعمل العجينة المورقة لانها تحكم اليد و رمضان مايكفيناش الوقت باه نعملوها

[sarra5]

حبيباتي

ماما جمدت الفول لفترة قصيرة يمكن اسبوعين لما خرجناه من المجمد باه نفوروه وناكلوه

طعمه اصبح ماسط و لونه تغير

لكنه غير فاسد

بصح ماشي مثل الاول

فنصيحة لا داعي لتجميده

على فكرة جمدته وهو مفرك ليس بقشوره

[yalaloulou]

وجدت الفريك برك الجلبانة عندي ومانقدرش ناكلها في رمضان والحمد لله رمضان يجي بخيرو

[< اللؤلؤة البيضآء >]

و عليكم السلام

هذه طريقة لحفظ اللوبيا الخضراء

طريقة الحفاظ على اللوبيا الخضراء في الثلاجة
في بعض الأحيان نريد الحفاظ على اللوبيا لا تكون في الموسم بأكمله ونريد الحفاظ عليها لكن بدون جدوى ،وموقع نسوة جاء بفكرة رائعة وصحية للحفاظ على اللوبيا الخضراء التي تستعمل غالبا في السلطات وكذا الأكل

نغسل اللوبيا الخضراء جيدا

نقطع الأطراف

ثم نقطع الأجزاء

نسلقها

نضعها في الثلج

نضعها في الثلاجة

[ndj]

السلام عليكم هذه اول مشاركة لي و بما ان الموضوع اعجبني و قد استفدت منه اردت ان اشارك بما اعرفه عسى تستفيد مني الاخوات الفضليات

بالنسبة للتحضيرات اول شيء التنظيف الكامل للمنزل le grand nettoyage كما نسميه نحن الجزائريات هذا بالنسبة للمنزل اما فيما يخص تحضير مستلزمات الاكل فانني اقوم عادة بشراء الثوم اربطها بعد تنقيتها من الاوراق الفاسدة و اعلقها في البالكون الى ان تجف - ثوم العلا- و من ثم اقوم بترحيتها في الميكسور مع كمية معتبرة من الملح حتى تحتفظ بطراوتها حين اجمدها في اكواب بلاستيكية الصغيرة تباع 20دج للواحدة هي رائعة للتجميد
اشتري ايضا الجلبانة اقوم بتنقيتها و حفظها في اكواب بلاستيكية متوسطة الحجم او في اكياس بلاستيكية و تجميدها
اشتري الحمص انقعه في الماء ثم اقوم بطبخه في طنجرة الضغط و حين يبرد احتفظ به في اكياس بلاستيكية
اشتري ايضا الشاي مهم جدا في رمضان القرنفل القرفة و النعناع اقوم بتجفيفه في الشمس و ارحيه عندما اعد الشاي استعمل المجفف اذا لم يكن لدي الطازج و عند التقديم استعمل الاوراق الناضجة ربطة نعناع 10دج او 15دج حسب الاماكن.
اعد ايضا العسل طريقة امي صراحة رائعة اذ تستعمل 1كغ سكر مع 1ل ماء + قرنفل + 1/2 حبة ليمون تغليه الى ان يكتسب اللون الذهبي انزعيه من على النار و اضيفي 1/2ل + 1/8ل ماء وارجعيه على النار دعيه يغلي قليلا و اطفئي النار. و الله عسل رائع جربوه و رجعولي بالخبر.

و قبل اسبوع من رمضان اشتري 24 حبة ديول و اعد الحشو كالتالي

لحم مرحي ماشي طايب +ملح+فلفل اسود+كمون+ارز طايب في الماء+ كثير من حشيش مقطفة الدبشة + كثير من المعدنوس + قليل من طماطم مصبرة + هريسة
غلي حبات بيض و فتتي الابيض وحده و الاصفر وحده
خذي ورقة ديول ضعي بالطول قليل من الحشو اضيفي قليل من الصفار و قليل من البياض ممكن حسب الذوق اضافة زيتون اخضر مقطع صغير و جبن و لفي البوراك.
خذي اكياس بلاستيكية و ضعي في كل كيس حسب عدد الافراد و ضعي في المجمد

في رمضان عند اذان العصر انزعي كيس واحد اتركيه يذوب ثم اقلي البوراك على نار هادئة جدا و الله رائع جربوه و ادعولها لامي بالصحة و طول العمر ان شاء الله.
كذلك يمكن لكن اعداد les cigares aux cacahuetes و تجميدها اسبوع قبل رمضان نفس طريقة البوراك اجبديهم تلقايهم واجدين مع الشاي.
اتمنى استفدتم من الموضوع

[< اللؤلؤة البيضآء >]

كيف تحافظين على الأطعمة لكي لاتتلف

الطماطم: قومي بتخزين الطماطم النهضجة في درجة حرارة الغرفة، لمدة ثلاثة أيام، لأنها تصبح أكثر طراوة و نضجا، و تفقد نكهتها عند وضعها في الثلاجة.
البطاطس و البصل: يمكن تغليفهما بورق، قماش أو خيوط شبكية في مكان بارد و مظلم لمدة شهر، و لكن قومي بتخزينهما بشكل منفصل، أي أن تقومي بتخزين البصل بعيدا عن البطاطس، لأن البصل يمتص الرطوبة من البطاطس، و يقوم ببعث غاز "الإثلين" مما يسرع من عملية نمو و تعفن البطاطس.
التفاح: يبقى التفاح مقرمشا لمدة ستة أسابيع، إذا تم وضعه داخل حقيبة بلاستيكية غير موضوعة في الثلاجة.
الأعشاب: يمكن وضع البقدونس و القزبر و النعناع، في حقيبة بلاستيكية مغلقة داخل الثلاجة لمدة أسبوع، أما الزعتر و اليازير و الثوم، فيمكن تخزينهما بتلك الطريقة لمدة أسبوعين.
الفاكهة: قومي بوضع معظمالفاكهة في الثلاجة دون غسلها، و اغسليها مباشرة قبل تناولها.

[كنت طفلة]

ماشاء الله عليكم
راكم قايمين بيها

مشكورة اختي صاحبة الموضوع و كل الاخوات

افكار جميلة

درتولي الهمة انا تاني تعرفو مازال ما وجدت والوووو

بالنسبة للفريك اختي هي اللي تشريه لي لانها تعرفلو مليح

اما الخضر راها متوفرة في هذا الصيف ان شاء الله الطماطم و الفلفل و الفاصوليا في وقتها في رايي ماكان لاه نجمدوها تفقد بنتها باطل
اما الجلبانة و القرنون راحت عليا ما خبيتش لانو حتى زوجي ما يحبش الكونجلي نعيا ما نكذب عليه بالصح يفيق لي ههههههههههه


انا رايحه نحضر ان شاء الله العجينة المورقة و نقطعها قطع بالطول و نفصل بينها بالساشي تاع الكونجيلاسيون ومنبعد نحطها كامل فوق بعضها في p m كي نسحق نجبد منها بالشوي

عجبتني تاني فكرة ليتاغتولات توفر الوقت

و تاني كون نسبقو في الحلوى في الايام الاولى مليح
مثلا الحلويات الجافة و مقروط الكوشة كل ما يقعد يولي بنين اكثر



طبعا فكرة الحصالة هااااااااااااااااايلة

وان شاء الله نوفرو تاني شويا حسنات و نشدو فامنا احنا النسا في هذا رمضان


بالتوفيق

[nokia111]

السلام عليكم هدا وين صحلي نريح المهم انا وجدت اللوبياء الخضرا شريتها رخيصة ووجدت لاصوص تومات وتاني شريت البشاميل غير 5 علب راكم عارفين رمضان العباد يحبو يكلو لارض واتاني شريت الفرماج كنت كل مرة نشر ونقص ومنبعد البدل القديم بالجديد وهكا حتى تولي عندي كمية مليحة شر يت انواع تاع السمك المجمد ودرتها في الكونجلاتور وزيد الجلبانة
انا في رمضان منكش بزاف غير الحريرة والسلاطة بصح نعرض بزاف ونحب الملمة على داك نخاف ميكونش عند راجلي ويروح يدير الكريدي
اما الدجاج فانا نشري وكل مرة نوخر حق الضيف مرة فخد ومرة سردة ومرة على مرة نبدل كي يجي رمضان نكون مخبيا شي 15 جاجة لحم نشري انا وشيخي ونقسمو الخروف نقطع الهبرة وحدها والعضم للحريرة والبزلوف والدوارة لنهار العيد مانشريش لحوايج تاع العيد نلبس غير حوايجي وتاني الماعن نستغرب منين نلقى العباد كامل يشرو نقول هدو فاش كانو يطيبو لي زيبيس نشريهم من قبل حب ومن بعد نطحن روحي الخضرا نشري الجزر نمسحو مليح ونخبيه في الفريجيدار وتاني البطاطا نردمها في الرمل تبقى جديدة

ان شاء الله نستفادو من بعض والله غير رمضان شهر العبادة اللهم بلغنا رمضان

[*ام عبد الكريم*]

السلام عليكم
الموضوع عجبني بزاف شكرا للاخت راضية
و كما قالت الاخت nokia111 رمضان هو شهر للعبادة و لكن هدا لا يمنع من تحضير بعض الاشياء له على سبيل توفير الوقت او الدراهم
انا اغسل الجلبانة و انشفها مليح و نوضعها في علب انتاع ياقوا (يايورت حجم كبير) و نحطها في الثلاجة ...و نفور الفول (لزم يكون طري بزاف) كي يبرد نكونجليه في علب كي الجلبانة وصفة مجربة و مضمونة ...و نحضر لحميص قبل رمضان نشوي الفلفل و الطماطم و الثوم نغسلهم لكن نحاول ما نكثرش الماء باش ما يمصاتش ثم نقصو و نخليه يقطر مليح و نحطو في علب في الثلاجة كي نجبدو نضيفلو الزيت و الملح و يجي بنين .
وصفة مجربة و توفر الوقت ...اما الاعشاب نيبس النعناع (راهو 50د في قسنطينة) و نشري التوابل .دواء البرمة و الفلفل لحلو والكمون و الزنجبيل و الكركم (الفلفل الكحل ما يبغيهش راجلي )...و بقية الاعشاب مثل المعدنوس و الدبشة و الكرافس نقطعهم قطع صغيرة و نحطهم في مكعبات اانتاع الثلج و نملهم بكمية من الماء و كل مرة نجبد مكعب (هده الطريقة استعملها لكمية انتاع اسبوع فقط لكي لا تفقد مكوناتها)
و كدلك احضر لعسيلة و نشري لفريك نغربلو و نقيه ...و فيما يخص اللحم كل رمضان رجلي يشرك مع صحبو في خروف و قد وجدنا هده الطريقة احسن من شراء اللحم كل مرة ...و اشري الدجاج (على حساب ما عندنا دراهم) و اضع كل قطع مع بعض مثلا لفخاد مع بعض و الصدور مع بعض...و نكوجليهم متفرقين شكرا لكم...و فكرة الحصالة اكثر من رائعة
اللهم بلغنا رمضان

[Spring Flower]

المشاركة الأصلية كتبت بواسطة nokia111

السلام عليكم هدا وين صحلي نريح المهم انا وجدت اللوبياء الخضرا شريتها رخيصة ووجدت لاصوص تومات وتاني شريت البشاميل غير 5 علب راكم عارفين رمضان العباد يحبو يكلو لارض واتاني شريت الفرماج كنت كل مرة نشر ونقص ومنبعد البدل القديم بالجديد وهكا حتى تولي عندي كمية مليحة شر يت انواع تاع السمك المجمد ودرتها في الكونجلاتور وزيد الجلبانة
انا في رمضان منكش بزاف غير الحريرة والسلاطة بصح نعرض بزاف ونحب الملمة على داك نخاف ميكونش عند راجلي ويروح يدير الكريدي
اما الدجاج فانا نشري وكل مرة نوخر حق الضيف مرة فخد ومرة سردة ومرة على مرة نبدل كي يجي رمضان نكون مخبيا شي 15 جاجة لحم نشري انا وشيخي ونقسمو الخروف نقطع الهبرة وحدها والعضم للحريرة والبزلوف والدوارة لنهار العيد مانشريش لحوايج تاع العيد نلبس غير حوايجي وتاني الماعن نستغرب منين نلقى العباد كامل يشرو نقول هدو فاش كانو يطيبو لي زيبيس نشريهم من قبل حب ومن بعد نطحن روحي الخضرا نشري الجزر نمسحو مليح ونخبيه في الفريجيدار وتاني البطاطا نردمها في الرمل تبقى جديدة

ان شاء الله نستفادو من بعض والله غير رمضان شهر العبادة اللهم بلغنا رمضان

يعطيك الصحة بصح ما فهمتش كيفاش تردمي البطاطا في الرمل يا ريت تفهميني ولك جزيل الشكر

[نواليت]

السلام على الحبيبات أنا أول شيئ نقوم به هو شراء التوابل من الشرق مع الفريك خاصة من مدينة برج بوعريريج قبلها نكون كونجليت الجلبانة و نشر الاواني و نوجد كل الكيفيات و نقسم اجزاء القران حتىى نختمو اكثر من مرة انشاءالله

[نواليت]

السلام على الحبيبات أنا أول شيئ نقوم به هو شراء التوابل من الشرق مع الفريك خاصة من مدينة برج بوعريريج قبلها نكون كونجليت الجلبانة و نشري الاواني و نوجد كل الكيفيات و نقسم اجزاء القران حتىى نختمو اكثر من مرة انشاءالله

[قطر الندى00]

شكرا للجميع.... لقد استفدنا الكثير والاحمل هو التفاعل بين العضوات ....اللهم بلغنا رمضان

[سامية حكيم]

السلام عليكم واش راكم لبنات راني حابة ندير العجينة المورقة حبيت نسقسي ممكن نديرها بالزبدة العادية والا لازم زبدة التوريق شكرا

[أم ريمة*]

المشاركة الأصلية كتبت بواسطة سامية حكيم

السلام عليكم واش راكم لبنات راني حابة ندير العجينة المورقة حبيت نسقسي ممكن نديرها بالزبدة العادية والا لازم زبدة التوريق شكرا

وعليكم السلام العجينة المورقة لازم مرقرينالخاصة بالتوريق مثلا- صالحة او لذيذ او