موضوع مميز وصفات من حراير مطبخ وش طيبتي اليوم - الصفحة 17

ladymillion · 2013-10-08, 10:08

مسكوتة ام كوثر

وصفة الموسكتشو تاعي حطيتها بكري موضوع هههههههههه بكري يعني مابقاتش باينة
4 بيضات
كاس سكر
2 مغارف كبار زيت
كاس فرينة
1 خميرة وفاني
الطريقة معروفة
بيض وسكر وفاني تضربيهم مليييييييح تم الزيت
الفرينة مع الخميرة
تدهني المول والى الفرن
تجي خفية تهبل ومش مزيتة

فايزة44 · 2013-10-08, 16:43

قآآطو les russes

إضغط هنا لرؤية الصورة بحجمها الطبيعي.

600غ زبدة +100غ سكر رطب +100غ كوكاو مرحي +400غ حلوة الترك +1خميرة +3بيض وتنشفي بالفرينة

وتشكليه قلوب او اي شكل وتطيبه

كي يطيب لصقي حبة فوق حبة ب: المعجون وحلوة الترك

ومن فوق شوكولا وزينيه بخطوط او اشكال بيضاء (قلاصاج)وقلوب صغيرة بالباتاموند..

ام ندى 87 · 2013-10-08, 17:53

ام رامي

اختي فايزة السباقيتي نحضرهابالطريقة التالية
نغلي السباقيتي في ماء وملح حتى تطيب نحطها في كسكاس ونصب فوقها الماء البارد باه ما تلصقش ونقطرها مليح

والمرق عادي حبة بصل ثوم ملح زيت توابل طماطم وقطعة دجاج ونمرق ونخليها تطيب ولازم تولي صوص خاثرة باه نرمي فيها السباقيتي نذوق الملح ونغلق عليها ونخليها تتشرب على الاقل ساعتين باه تي بنينة
سر البنة انها تبقى في الصوص مدة طويلة

الدنيا · 2013-10-08, 22:04

jia-smile

الطبق الاول عبارة عن مقرونة جي على شكل ****اجة ادا شفتيها تغليها
وتعمريها كيما حبيتي انا عمرتها بالفيونداشي وصوص طوماط ادا حبيتي زيتون ولا شومبينيو ممبعد في بلا تحطي صوص طوماط وتستفي ال****اجات ههه و فرغت عليها البيشاميل والفروماج والى الفرن نموووت عليها امممم
وتاني غراتان ساهل ماهل بقالي اسكالوب قطعتو قطع صغيرة وداويتو بالتوابل ممبعد قليت البصل شرائح حتى تعسل وتقلي بطاطا دوائر وتحضري البيشاميل ممبعد تحطيهم في بلا مع رشة فروماج والى الفررررن
ومع الفيونداشي والبصل يجي امممم
اما الثالث بطاطا كوشة عادية طيبي الجاج في مرقة بيضا مع الحمص وتقلي البطاطا شرائح كبار
في بلا تحطي الجاج والمرقة وتستفي البطاطا ...
تضربي البيض مع عصرة قارص وادا حبيتي خلطي معاه شوية مرقة وتفرغيه فوق الجاج والبطاطا مع رشة معدوس لاااازم والى الفررررن

الدنيا · 2013-10-08, 22:05

طومة او ايمانو و الله مانفر ق بيناتهم

غريبة الفستق

المقادير :
2 كيلات فرينة
كيلة زبدة { ذوبيها وخليها تبرد في الثلاجة ومن بعد نحيلها الماء ونشفيها لازم ميكونش فيها الماء }
كيلة سكر ناعم
نصف كيلة فستق مرحي رطب
قرصة ملح

الطريقة :
أولا الحاجة لي لازم ديريها شعلي الفرن لمدة 45 د بحرارة 250° وطفيه
ثانيا جيبي مول زجاج أو صينية حطي فيها 2 كيلات فرينة ورصيها في المول ودخليها في الفرن وهو سخون وطافي ماشي شاعل وخليها في الفرن لمدة ساعة كي تجبديها تلقايها من فوق مشققة يعني نجحت العملية { هذا هو سر الغريبة الطرية لي تذوب في الفم } وخليها تبرد وغربليها
ثالثا اخفقي الزبدة مع السكر مع الملح حتان يبياضو وزيدي الفستق وتقدري ديري كاوكاو ومن بعد زيدي الفرينة وحكي بيديك حتى تتحصلي على عجينة تقدر ي تشكليها كيما الصابلي
وشعلي الفرن 180° وطيبيها ورديلي بالخبر

الدنيا · 2013-10-09, 16:15

ام عائشة

هذا الكروكي ..... عندي في البيت 2 صوالح دائما موجودين تقريبا الكروكي وليكراب
هذه الوصف خذيتها من وحد كتاب للطبخ المغربي ساهلة جدا

2بيض+بياض واحد (الصفار للتزيين+1/2 م ص كاكاو)
كاس سكر+كاس شاي زيت
1خميرة الحلويات+فانيليا
الفرينة حسب الحاجة لازم تكون طرية
انا نقسمعا 4كرات ونشكلهم أعمدة
2 أعمدة دهنتهم بالصفر ثم مررت الفرشاةعليه والجنجلان الأبيض
2اعمدة الباقيين مررت عليهم بالفرشاة ثم دهنتهم بالصفار
وإلى الفرن

الدنيا · 2013-10-09, 16:36

ام عائشة
كرنتيكا
250غ حمص مطحون
حبة بيض
كاس شاي زيت
م ص هريسة+ ملح
1 لتر ماء
وإلى الفرن مسخن من قبل

الدنيا · 2013-10-09, 16:41

ام نور و جمانة

البرانية

اثقبي حباةت الباذنجان وديرهم في الفرن ثم اقسميهم وانزعي اللب وربي عليه طماطم وفص ثوم وزيت زيتون وملح على نار حتى تنشف اشوية الطماطم وكي يبرد شوية الخليط زيديلو البيض والى الفرن

الدنيا · 2013-10-09, 16:57

الهام او ام محمد تاج

هاهو القلاصاج :
شوفي حنونة حطي في بول بياض بيضة وفنجال تاع قهوة حليب وفنجال زيت مخلط مع الزبدة يعني نص بنص وفنجال ماء الزهر ومغرف كبيرو اكتخي تاع اللوز ومغرف صغيرة فاني وملون ابيض لازم باه كي تضيفي اللون لي تحبيه يخرجلك ناصع ومايخرجش باهت ضرك نعتلك التشاراك لي قلاصيتو خرجلي ازرق خيرمن تاع البارح رووووعة ومبعد ضيفي السكر قلاصي مغربل حتان توصلي للقوام المطلوب وضيفي في الأخير الملون راه على ضمانتي روووعة

الدنيا · 2013-10-09, 17:00

ام محمد تاج

كروكي
شوفي كيلي كاس بيض وكاس ونص سكر وكاس ونص زيت وزوج خميرة وفاني كثري منها وزاست تاع القارص كثري منو ثاني ولمي بالفرينة لازم مايكونش يابس بزاف ومايكونش جاري بزاف يعني يبقى يلصق في اليد وشكليه حرابش نشتيهم رقاق وأدهني الوجه بصفار البيض مخلط مع شوي حليب مذوب فيه النيسكافي وأدهني الوجه ورشي السكر قلاصي ولا نواد كوكو ولا خليه عادي وأعمليلة رشمات بالفرشيطة وحطيه يطيب كي يحمار قصيه وقلبيه وعاودي رديه غير يشيح شوي برك

الدنيا · 2013-10-09, 17:01

الهام

كروكي

6 بيضات
3 خميرة
2 كيسان سكر ماشي معمرين مليح ( كاس متوسط نتاع القازوز ماشي كاس نتاع 200ملل )
فاني
2 كيسان زيت ماشي معمرين مليح ( كاس متوسط نتاع القازوز ماشي كاس نتاع 200ملل )
تشيحي بالفرينة ولازم تخليه يبقى جاري لايشتى يندبك المهم يكون جاري يجي هشوش يهبل

النصائح :
*أخفقي مليح البيض مع الفاني وإذا عندك زاست أحسن كثري من لخفق والفاني رايحة ماجيش فيه بزاف ريحة البيض وإذا عندك عجانة ديريه بيها يجي روعة
* خليه جاري ماتنشفيهش راهو يبانلك مازال يحتاج ف رينة لالا خليه سائل شوية راهو كي يقعد 10د يزيد ينشف
* ديريه رقيق باش مايجيش معجن
* الطياب على 180 وماتغفليش عليه يتحرق ثم ثم
* إذا تحبيه كيما الجينواز طري كي يطيب وتقطعيه بالموس مباشرة في بورت مونجي وأغلقي عليه يبقى طري يهبل
* إذا تحبيه مقرمش خليه في كسكاس على برا حتى يبرد خلاص باش تخبيه وممكن تحبي كي تقطعيه تزيدي تحمريه على الجوانب يجي مقرمش أكثر
* ماتظريش بزاف سكر من فوق خفييييييييييف لاخاطر كي جي تقطعيه يتكسر السكر اللي يدير قشرة من فوق ومايجيش شكلو مليح يتفتتلك
* من الأحسن طيبيه في بلاطو او صينية ثقيل يجي يهبل خفيف ومايتحرقش بسرعة
* كي تخرجيه من لفرن مباشرة تقطعيه وهو سخون وإلا يتكسرلك ويتفتت

الدنيا · 2013-10-09, 17:04

ladymillion

قلاصاج الشوكولا انا نستعمل منى مثلا في 600 غ نذوبها ونزيدلها ساشي صغير نيسكافي ، صفار بيضة ، ونحرك مليييييح ونزيدلها الماء ونحرك راح تقسى شوي لكن مع التحريك ترجع سائلة وشوفي القوام لي تحبيه

الدنيا · 2013-10-09, 17:06

ام كوثر

لكروكي المقصوص
وصفتي

6بيضات ضربيهم مع رطل سكر نقصي منو زوج مغارف كبار---راني على رطل السكر---

ضربي مليح ضيفي على دفعات نص لتر زيت وابقاي تضربي
ضيفي الفاني تع الميزان او زاست تع القراص
ولمي بالفرينة +2 خميرة كيميائية الفرينة يستهلك حوالي كيلو وشوية لازم يكون يتلاصق باليد
استعملي الزيت وديريه حرابش طوال زبنيه بفرشيطةبالطوال يعني ديري خطوط
ادهنيه ببيضة ومغرف كبيرة قهوة طايبة وفاني دخليه يطيب
قطعيه وهو سخون
تم حمريه على الجوانب

الدنيا · 2013-10-09, 17:07

ام محمد تاج

كريمة بساطك الريح
لايدي شوفي ذوبي في بان ماغي بات أقلاصي بيضاء كي تذوب ضيفيلها باطة نيستلي تاع الكارامال ولا العادية طايبة وضيفيلها خمس مغارف لحظة وزوج مغارف اكستري تاع الكارامال وخلطي راهي رايحة ترجع عجينة حطيها على بساط الريح وسوي الوجه بالقنوط وخليها تشيح كي تشيح ذوبي شيكولا بيضاء وضيفيلها شوي ماء بارد باه تولي بيضاء مايش صفراء كيما لابات أقلاصي وديريها على القاطو وخليها تشيح مليح وزيني باه تحبي

الدنيا · 2013-10-09, 17:14

ladymillion

خبز الدار

ندير كيلة سميد وكيلة فرينة (( نكيل بصحن الشربة ))
م ك حليب بودرة
م ك خميرة الخبز
م ص ونصف سكر او عسل
2 م ك زيت

نلم العجين مليييح بالماء الدافي ويكون شوي متخوم ونخليوه ينخمر على حساب درجة حرارة الكوزينة نتاعك

كي يتخمر نعجنو مليييييييييح حتى يرجع أبيض نوعا ما ونسقيه بالماء + ماء زهر دافيين ونعجن
ونضيف بياض بيضة وندخلو مليييح في بعضاه راح يكون يلصق شوي لكن نكمل العجن حتى تتكونلي عجينة طريه ونخليها تختمر مرة ثانية

من بعد تخميرة ثانية راح نضيف الزبدة ذائبة او مارغارين حوالي 100 غ ونعجنو شوي مع الزبدة
ندهن الصينية بالزبدة ونجط العجينة في الصينية ونخليها تتخمر للمرة الثالثة مدة 10د من غير مانمسها

ونقرصها في الصينية نساعد يديا بالماء الدافي ونوسعها في الصينية كامل ونخليها تتخمر للمرة الرابعة لمدة 20 د

ونسخن الفرن ملييييح 180° ونحطها طيب بعد ماتتخمر
نخليوها تطلع شوي في الفرن ونتشف من فوق ونخرجها ندهن البيض + حليب ونعاود نرجعا للفرن تكمل الطياب

اذا جربتيها حاولي تخلي العجين متخوم شوي ومشبع ماء