موضوع مميز طبخ الأعراس - الصفحة 17

روح مراد · 2015-08-17, 09:25

شكرا أختي ناجي رانا في الخدمة و يسعد جدا أني نقدم كل ما عندي باش نستفادو كامل و حبذا لوكان الأخوات ينتاقدوني و يقدمولي طرقهم هاكا باش نقدر نصحح أخطائي و طريقتي في الطهي

ManouraHilwa · 2015-08-19, 19:38

فكرة مليحة بصح اللي بصح لازم تكرري الوصفة باش تحصيها

روح مراد · 2015-08-20, 15:37

لازم تكرري الوصفة ولازم تعرفي العبر و بعدها ترجعي عينك ميزانك المهم تحافظي على الطريقة الصحيحة

اشواق اسراء · 2015-08-25, 17:05

موضوع مميز اتمنى تفيدونا لانه هناك شح كبير من المعلومات في هذا المجال واتمنى ان يكون هناك المزيد في هذا المجال
اتمنى منكم طريقة الرفيس القسنطيني للاعراس مثلا 2بلاطات رفيس كم نحتاج عسل وزبدة وكيف نحضروه و طريقة التفديم

روح مراد · 2015-08-26, 08:46

أختي أشواق شكرا على مرورك كيما قلتي كاين شح كبير راني نشوف الأخوات وحدة ما تحب تقدم معلومة جديدة
بالنسبة لطلبك اللي هو رفيس أحنا في العاصمة ما نديروهش أصلا أنا معرفتش واش هو بالضبط

afifa39 · 2015-09-10, 11:48

بآآآآآرك الله فيـك جاينا عرس بعد ورآآح نقوم بالسلاطة هههههههـ اسهل شي بصح عجبتني الصوص تاعهااا
شكرااا لك بارك الله فيك

روح مراد · 2015-09-13, 09:00

لا شكر على واجب البنات نتمنى كامل تدخلو و تنورو الموضوع و تنورونا بأفكاركم

ام ظافر · 2015-09-18, 16:00

اهلا اخواتي وتحية خاصة للاخت روح مراد
حبيت نسالكم عن طريقة طياب القهوة في المناسبات الكبيرة ماشي شرط عرس حتى ختان او نجاح او عقيقة
مستحيل نعتامد على البراس في كل دقيقة ولكن كاين الي يرمي القهوة على الماء سخون يعني يلقم القهوة
هنا ياريت تعطيونا المقادير تاع البن وتاع الماء
وسمعت انو يشريو جورب نسائي جديد يعني (ابا ) ويحطو فيه البن ومن بعد غير يخرجو الجورب وما يحتاجوش يصفيو القهوة خلاص
ممكن الي عندها فكرة تفيدنا

روح مراد · 2015-09-19, 08:58

صباح الخير أم ظافر شرف كبير ليا و للموضوع بالذات كي شاركتينا أفكارك
أم ظافر أحنا في أعراسنا و مناسباتنا نتاع الدار نستعملو 2 براسات كبار و عندنا ثاني 2 cafetieres electrique بالنسبة للبراسات نطيبو و نعمرو 2- 3 ترموات كبار قهوة و نزيدو نوجدو هم و نحطوهم يعني نعمرو فيهم الماء و القهوة و ما نطيبوش كي نشوفو مازال نحتاجو نحطوهم يطيبو و نديرو كفتيير نطيبوهم و نخلوهم باش يبقاو سخونين و عينك ميزانك على حاب الغاشي نتاعك
و لكن حضرت منابات و أعرا عند نا يطبو القهوة في القدرة يعمرو قدرة ماء تغلي و يلقمو القهوة هاذي ما نكذبش عليك ما نعرفش المقادير على خاطر أنا عجوزتي تشرب القهوة الملقمة الطريقة اللي نعتمدها أني ندير 2 مغارف قهوة صغار و نخليها تغلي و بعدها نشوف غذا لونها فاتح نزيد القهوة و إذا لونها غامق ما نزيدش
بالصح هذه الطريقة نتاع ليبا طريقة هايلة و لكن نقدرو نستعملو لفيلتر نتاع الكافتيير يكونو أكثر صحي على حب رايي

روح مراد · 2015-10-04, 12:28

صباح الخيرات حبيباتي
اليوم جبت لكم طريقة جديدة نتاع الشربة ألذ من طريقتي الأولى و أضمن
و ثاني اللي ما تعرفش شحال تمرق نعطيلكم كمية صغيرة باش جربو الطريقة و تتقنوها و من بعد كي تككون المناسبة نضاعفو فقط المقادير
السر في الطياب هو أولا لازم نحبو الطبخ و ثانيا لازم التجربة و نعاود الوصفة مرات عديدة حتى نعرفو كامل الخبايا و نكتشفو طرق اسها و أبسط
أحنا نديرو مقدار 6 اشخاص
بالنسبة للكميات الكبيرة العبر اللي نستعملوه لكل كلغ فريك كلغ لحم + 1 صدر دجاج
بالنسبة للكمية صغيرة نعطيكم فكرة هايلة
نقطعو اللحم قطع صغار و نحطوهم في كاس و لكن نضغطو عايهم باش يرفد الكمية الازمة نعمرو الكاس مليح بقطع اللحم و نزيدو قطعة دجاج حسب الموجود و خلاص
نحطوهم في قدرة و نزيدو عليهم بصلة كبيرة مرحية و نحطوهم يتقلاو بشوية زيت على نار قليلة نشوفو اللحم طلق كامل الماء نتاعو نرمو عليها حبة قرعة و حبة جزر و نخلو كل شيء يتقلى و بعدها نزيدو 2 حجبات طماطم طايبة مليح مرحية و نصف كاس حشيش مقطع + ملح + فلفل أسود +2 ورقات نعناع+ نصف عود قرفة و كي نشوفو القدرة بدات تنشف نزيدو عليها ملعقة كبيرة طماطم مصبرة و نقلو مليح مليح و نمرقو بالماء المغلي غير قيس ما يطيب اللحم ما نمرقوش على مرة
و نزيدو نصف كاس حمص مشمخ و نخلو كل شيء يطيب
عمرنا كاس قطع اللحم نحكمو نفس الكاس نعمروه بالفريك الكاس ما يتعمرش فريك حتى للنهاية نخلو شوية و نغسلو الفريك مليح و نحطيه جيه يشرب
كي الطيب القرعة و الجزر نجبهوم نرحوهم و كي نشوفو اللحم بدا يطيب نفرغو عليه الفريك و نبقاو نحركو على خاطر ماكاش بزاف المرقة راهو يلصق نخلوه حتى يتشرب كامل المرقة و نمرقو بالماء المغلي و نحركو حتى نتحصلو على القوام نتاع الشربة اللي حبيناها و نزيد عليها مقدار 2 كيسان ماء قيس ما الطيب و نزيدو عليها نصف كاس كرافس مقطع رقيق و ربطة حشيش و نحركها مرة على مرة حتى يطيب الفريك و نطفو عليها مع رشة حشيش من فوق

oum imane83 · 2015-10-04, 15:11

بارك الله فيك ................... افادتينا بززززززززاف يا شاف ... انا الشربة موالفة نديرها افي الاخر بعدما نزيد الماء في القدرة ويكون كل شيء فيها طاب ونحي بعدها الكووجات والزرودية وحبة بطاطا صغيرة ونرحيهم ونخلي الشبة هاديك لبضع دقايق .............

روح مراد · 2015-10-05, 09:49

إنشاء الله الإفادة تكون عامة و ماذابيا كل وحدة تدخل تحط فكرة أو طريقة جديدة باش نتعلمو
شكرا على مرورك أم مان ربي يخليك

miroumirou · 2015-10-07, 15:37

اقتباس:

المشاركة الأصلية كتبت بواسطة ام ظافر

اهلا اخواتي وتحية خاصة للاخت روح مراد
حبيت نسالكم عن طريقة طياب القهوة في المناسبات الكبيرة ماشي شرط عرس حتى ختان او نجاح او عقيقة
مستحيل نعتامد على البراس في كل دقيقة ولكن كاين الي يرمي القهوة على الماء سخون يعني يلقم القهوة
هنا ياريت تعطيونا المقادير تاع البن وتاع الماء
وسمعت انو يشريو جورب نسائي جديد يعني (ابا ) ويحطو فيه البن ومن بعد غير يخرجو الجورب وما يحتاجوش يصفيو القهوة خلاص
ممكن الي عندها فكرة تفيدنا

أنا ما نعرفش كيفاه بصح الأسبوع لي فات كان عرس أختي وكي وصل وقت القهوة أنا تقلقت على الطباخة قلتلها راح الحال والقهوة ماهيش واجدة قاتلي ما تخمميش دورك نطيبها فالكوكوط وفعلا ماكانش 10 دقايق جابتلنا القهوةطايبة عمرت لي ترموس كامل !!!!!

روح مراد · 2015-10-10, 08:47

أختي ميرو ما قدرتش نخمم كيفاش و لكن ربما حطت الماء يغلى في الكوكوط بعدها قمت القهوة كيما يطيبوها في القدرة

sarah sirrata · 2015-10-10, 21:13

يعطيك الف صحة وعافية