الطبعة العاشرة لدورة الرقي بمدبرة منزل مثالية

[~ حراير ~]

أختي فاطمة ربي يسترك و شكرا على الدعاء و زيديلي منه ربي يحفظك
والله اليوم بالذات راني مش قادرة نتحكم في روحي ... و انا كيما شفتوني نضحك بزاف .. راني حتى الدموع عاطيتهم حقهم لا بديت نبكي ما نلقى شكون يسكتني
و كيما قتلكم في الأول كون غير جيت مشكورة و إلا محمودة .... راهو عنده الي اندير فيه كامل عادي أي امرأة اديرو ... و أنا في الحقيقة مانيش من الناس الي يستناو الشكر و مانيش من الناس الي يتكلمو على حوايجهم يعني هاني وش درت و إلا شوف وش سويت .... و لكن الي غاضني و بكل صراحة أولا بنتي ماجابتش نقطة امليحة في اللغة جابت 5.75 ... و امبعد اظهرت أنا الي مش امليحة و كلشي صرت أنا الي اندير فيه أي غلطة راني أنا الي نحصل فيها ... أختي فطيمة سامحيني عمرتلك رسك و والله من عادتي أني مانحكيش على روحي اطلاقا و ما نجبدش على مشاكلي .. ما نعرف كيفاش تفلقت اليوم

[ام امجد14]

المشاركة الأصلية كتبت بواسطة اريج المسك

شوفي لتليتلي ماهوش شربة و كي تسقيه في الطبسي يكون مجمول مثل الكسكسي
و هو يشبه شووووية للسان عصفور لكن الحبة تاعه مش مثلثة مثل لسان عصفور بل تجي طويلة
هاد هو شكلو قبل الطبخ

و لما تفوريه و تطيب المرقة
كيما قتلك صفي المرقة و لوحي فيها التليتلي المفور يعني تكون المرقة مغطياتاو ما تزيديش فوقها و خليه على النار مع التحريك حتان تشرب كامل المرقة و يصير مثل حب بدون مرقة ساعتها وضعيه في صحن و كملي الخطوات
و ما تخافيش منه ما يجيكش قاسي تبعي طريقة لتفوار انتاعي يجيك امليح

الله يحفضك اختى اريج و يخليلك بناتك و سمحيلى سالتك و انتى كنت فى حالة نفسية ماى مليحة اعتذر
ويااختى ربى يخليلك بناتك و ما يهمكش النقطة المهم فهامتهم تهلاى فى روحك وما تبكي وما دزيديش تقولى رانى وحدى رانا كامل معاك و يلا ارجعى كيما كنتى ربى يبارك فى اولادك و يعطيك على حساب تعبك ان شاء الله

[sondse1]

اسعد الله مسائكن حبيباتي
توحشتكم بزاف
ربي يخليكم ع الدعوات ربي يعزكم و يهنيكم
راني الحمد لله على كل شيء
ان شاء الله عن قريب رح نرجع ليكم و للدورة لاني توحشت لمتكم
والله يا لبنات ماهيش الخدمة اللي مرضتني بالعكس انا كي نقعد نمرض ديما نحب نخدم و نشغل وقتي
هي يمكن عين لانو كي رقيت روحي حشاكم تقييت وكي رحت للطبيب ليوم قالي راك تحسنتي بالخف و يومين ولا رح تنوضي كي العود هههه
الحمد لله على كل شيء وربي يبعد علينا العين و يحفضنا من كل شر

[sondse1]

حبيبتي ام ملوكة
ربي يجيبلك الشفا العاجل
والله حبيبتي راني نشوف في البنات بداو يمشيو في البرنامج مليح و مستمتعين بيه
اكيد كل وحدة و مقديرتها
لكن والله والفناك معانا
وكيما قالت حبيبتنا ليلي ابقاي معانا و اخدمي واش تقدري

بالتوفيق ليك حنونة

[sondse1]

حبيبتي ام اريج ذرك نرجع و نرد عليك ان شاء الله


تحياتي للجميع

[نافلة]

عزيزتي اريج المسك انا نقولك حاجة اذا حبيتي تبكي ابكي و بصوت مرتفع باش تخرجي الي في قلبك و كيتكوني تفضفضي معانا تكلمي و انتي تكتبي باش دgاجي اللي راه في قلبك و ردي عليا الخبر.و الرجالا راهم كيف كيف هاذي هي هدرتهم .المرأة حنينة و الراجل خشين .خممي في حوايج اجابية باش تفوتك هذه الغيمة و تشرق شمسك من جديد. ياريتني كنت بجانبك .

[نافلة]

اختي سندس شرفتي البرنامج و الحمد لله على سلامتك.قبلاتي.

[Minnnaaa]

البسملة1
اسفة على التاخير
تطبيقاتي نتاع البارح لعشية واليوم هي كالاتي
الجانب الديني الحمد لله شادةفيه بيديا وسنيا ربي يتقبل منا ومنكم صالح الاعمال
الجانب التجميلي شوية زيادة على النورمال درك نقوللكم علاه
الجانب التنظيفي ترتيب يومي وروتيني ما درتش برنامج اليوم علاخاطرش البارح جا عندي خويا ومرته وبنته بايتين عندي وراحو اليوم مور العصر
على هاديك ما نقيتش الدخلة عند الباب بصح يا حباباتي شا نقوللكم راني حاسة بوحد الفرحة وراني غير نحمد في ربي ونشكرفيه باش مانضربش روحي بعين
تعرفو علاه راني فرحانة "كي دخلو والدار تشعل بالنقا وكلش يبريي وفي بلاصته حتى مرت خويا مسكينة ما فهمت والو دخلت للكوزينة زعما تعاوني قالتلي بدلتي الكويزينياغ قلتلها هادي غير اللي كانت عندي (وفي قلبي قلتلها غير البارح ضربت تحميمة) وراحت للصالة مالقاتش نقطة نتاع غبرة كنت غير الصباح نمسح ونقي فيها .دخلت لبيتي كيف كيف بصح الفضل يعود لربي سبحانه اللي قدرنا وللغالية مريومة اللي طلعت النيفو وليكم حباباتي كل وحدة باسمها تطبيقاتكم ونشاطكم يبعثفينا النشاط والعزيمة
بصح ولادي دارو شوية قبايح وانا قاعدة نعض في شواربي باش ما نزعف عليهم والحمد لله فوتناها وفاتتعلى احسن مايرام
"يا رب لك الحمد كالذي نقول وخيرا مما نقول"
ودرك يا حباباتي راني غادجي نبدا نقرى فالمشاراكات ونرد اللي نقدر عليه بيلاما حطيت لعشا
ايه حقى ماتنسوش الي ناوية تصوم معانا غدوة نبيتو كامل النية نتاع الصيام

[Minnnaaa]

لا حول ولا قوة الا بالله العلي العظيم
الحمد لله الذي لا يحمد على مكروه سواه
لا باس عليكم خواتاتي
ام مالاك لا باس عليك حبيبتي ما تفورسيش على روحك اخدمي الشي الي تقديله وكي تكمليه وتلقي روحك ما زال باقي فيك لا شاغج روحي للحاجة الزاوجة سليي راني مسامحاتك فالعرضة ما تديريلي الحوت ما نجي غير تريحي اختي
مريومة لا باس عليك تاني نتي حبيبتي وماعندك علاه تنوضي اتصنتي لعظيماتك شوية وربي يبعد عليك العين ويسترك حبيبتي
احكمي الميكرو واقري شا فاتك غادي تلقي روحك تنقزي وترقصي فالعلاوي كيما ليلوشة لعزيزة
ليلوش مالها اختي ؟لا باس عليك استغفري واسمعي للقران راه بليس الله يلعنه غار منك ما تديري والو في بالك اتفكري الكوتي بوزيتيف في حياتك وكيما يقولو نتاع علم النفس "مين يكون قدامك نص كاس ما ,ماتشوفيش النصف الخاوي بل شوفي فالنصف المعمر"
ورانا عادا فالفصل الاول ماراهش امتحان نتاع الباكالوريا واللي ينتاقدك ويرد فيك اللوم راه الحر يهدر فيه وراكي حققتي شاماقدرش هو يحققه
ربي معك حبيبتي

[Minnnaaa]

المشاركة الأصلية كتبت بواسطة فاطمة بشار

اختي بنت خليل تبارك الله عليك راكي في تقدم ملحوظ ما عندي مانقول فيك تبارك الله عليك .بالنسبة لصابون دزاير حنا راه يطايش عندنا ياريت نقدر نرسلك وفي ما يخص الماشينة لافي مبروكة عليك و خليها فوق الارض حتى تخدميلها سوبر و لا اشريه واجد.
اختي سارة يعطيك الصحة انتي و اختك الله ينجحك في الدراسة نتاعك يا رب.

اختي وفاء سعاد لاباس على ابنك هذاك غير الضغط نتاع القرايا .كيما اليوم راه الخميس حاولي تخرجي الدراري يبدلو شوية الجو .
اختي اريج المسك راكي تباني شاقية منك راجل منك مرا ربي يعاونك و يفرج عليك و بالنسبة لبنتك لاباس عليها و نفس الكلام لي قلت لاختي وفاء سعاد راني نقول هولك كيما اليوم راه الخميس حاولي تخرجي الدراري يبدلو شوية الجو .
اختي مينة وين راكي ياك ما زعفتي مني حبيبتي سمحيلي.او ربما راكي مريضة لاباس عليك راني تحيرت عليك بزاف .

شا راكي تقولي؟ انا نزعف منك؟ ياك رانا خواتات عند ربي والا بطلنا؟
انا والله يلا راني دايرتكم اخواتاتي وما نزعف من حتى وحدة كل وحدة دايرتلها تصويرة في خيالي وبلاصة في قلبي
ربي يخليك احبيبتي من هدرتك راكي تباني حنينة فوق اللازم وما راكيش نتاع تعديب هاهاها
ربي يطول عمرك ويخليك

[sondse1]

حبيبتي ام اريج
شوفي حنونة بالنسبة لبنتك معليهش خيرها في غيرها و حاولي تزيدي معاها مجهود اكبر باه تطلع اكثر
بالنسبة لراجلك ما تنتضريش منو انو يشكرك ولا يثني عليك لانو هذي هي طبيعة الراجل
يا لوكان تديري واش تديري تبقاي معاه ماكي دايرة والو
و انا تاني كانو يديرولي هكذا خاوتي و حتى ماما لكن هذا زاد من عزيمتي و همتي وليت نخدم ثريبلي ههههه
يمكن انك تقولي بزاف عليا و لا ما نقدرش اكيد كل وحدة و مقدورها مي الا كانت العزيمة كاينة و الاصرار ماراح يوقف حتى حاجة في طريقنا

ربي يحفضك اختي و يبعد عليك كل شر و ينزل السكينة في بيتك

[~ حراير ~]

السلام عليكم و رحمة الله تعالى و بركاته
شكرا جزيلا حباباتي على وقفتكم معايا
و ما تلوميش رويحتك يا أم أمجد راكي ما عندك وش درتيلي بالعكس كي تكلمت امعاك شوية ريحت
و زيد كلام أختي فاطمة ريحني .. و البكاء راني مخلياتو لمبعد حتان يرقدو لبنات .. ما عندهم حتى ذنب مساكن نقلقهم معايا
عموما أنا صح نضحك فوق القيمة و ثاني الي يعرفني يعرف بلي دمعتي قريبة تخيلو مرة كنا في السوق شفت قطة يتلف يعني يطرد فيها الجزار و هي تماوي تماوي قطعتلي قلبي دخلت مور الكونطوار و لحتلها طرف دوارة مقطعة ..... و الجزار نعرفوه ولد جارتنا صار هو يضحك و جاراتي الي كانو معايا يضحكو و أنا غير نبكي هيهيهيه و امبعد كي فقت مع روحي و مع لهبال انتاعي مت بالضحك و الدموع طايحين ... الي عندها دوا تقولهولي ما تقولوليش برك دوا نسيبة دايم الله يعني كاس ماء على الوجه هيهيهيهيه
سندوسة سامحيني حبوبة ماكتبتش تطبيقات أمس و اليوم

و نبدأ باليوم
راني نظفت الهول و كل المزروعات الي فيه و مسحت لحيوط لأنهم مازالو نظاف من العيد و لبست خماري و نظفت الباب من برا و نظفت الجزامات في زوج و مسحت الكومود صار كي لمراية تشوفي فيه وجهك و مسحت كامل بيبان الدار و عقبت مسحة على كامل لحيوط كلشي هاد بالماء و الكربونات و معطر و شووووووية جافيل رغوي و عاودت بمنشفة مبلولة بالماء يعني بدون ما نسيح الماء
كي كملت درت على الدار كامل و نظفتها و نظفت الطابيات كامل في السيشوار و امبعد طيبت مقرونة بلي كوت و درت معاها سلاطة مشوية ... و درت موسكوتشو كبيييييرة بعثتها لوالدتي و ابعثت معاها سلام أم أمجد "قلتلها جارتي حشمت انقولها صحبتي من الأنترنت اديرلي درس و هي تكره النت"
و امبعد قعدت كتبتلكم المشاركة انتاع الصباح حتان جات بنتي تبكي على النقطة قلتلها كيما قالت حبوبتي مينا ... ماهوش باك و ماكيش موالفة بهاد النقاط و راهو مجرد فرض و ان شاء الله تعوضيه في الإمتحان لكنها أصرت تشاتي مع باباها ... و الظاهر أنه كان تعبان أو لاهي بالخدمة و تقلق و في عوض يحدثها .... صرى الي صرى
المهم كي راحو يقراو استنيت يأذن الظهر و قعدت انسبح "لأني معذورة" و في عادتي ما نضيعش وقت الصلاة نقعد فوق الزربية و نتخمر و نحكم السبحة ... ديرو كيفي باش ندي الأجر معاكم
أيا كي كملت قلت نتكا شوية و انا مش عادتي نقيل فرقدت ما نضت لقيتها 3 و البنات طولو تحيرت اعليهم و راني حكيتلكم الباقي .....

أمس فات عليا نهار طوييييل بكثرة أشغاله

الصالة راني بديت بالفوتاي نفضتو مليح بالمكنسة الكهربائية "و أنا ما نحبش نستعملها بزاف" و امبعد خرجت حوايجو للشمس مع الزربية و نحيت الريدو و الكاش ريدو غسلتو و نشرتو "لقيتو نظيف لصقتو غير في العيد" يتنفسو و بديت بليفينق و هي كبيييييرة و طويييييييلة مسحت راسها من الفوق و زدت هبطت كامل الكتب حاطتهم في الطاج الوقني مسحتهم و مسحت جيهتهم و رجعتهم و بعدين نحيت كامل ليسرفيس الي فيها و كامل الفازات و الزينة و كلشي ...غسلت النابات و نشرتهم و امبعد غسلت كلشي حوايجها و مسحتهم حطيت نابات أخرين و رجعت الباقي مسحت مراياتها و كارواتها و مسحت الثريا و كامل الطوابل و ليفاز و الفيوزات انتاعهم و الكادرات و الساعة .... و مبعد درت على الطابل أ مونجي غسلت فراشها و غلافات الكراسي و مسحتها و بدلتلها غلافها و غلافات الكراسي و بدلت غلافات ليجوتي على حسب الكاش ريدو الجديد صيقت الأرض بعد ما غسلتها كيما مينوشة بالفيسال و لبست خماري و زدت فوت على البالكون الي سمعتو و هو يرَحَم على سندس راهو صار كل يوم يتسيق بعد ما كان مرة في السمانة و رجعت كلشي و زدت عطيتها بتبخيرة جابولي البخور من سوف الزينة
علابالكم امبارح طولت فيها و درك جاتني الأعمال غير شوية حرت في روحي كيفاش طولت فيها امبارح هيهيهييهه
المهم زدت جوزت نشافة على الدار كامل
الغداء امبارح كي ما لقيتش كيفاش نخرج نشري الحوت كلمت جارتي قلتلها تقول لولدها جزار يبعثلي فيلي البانقا "حوت أبيض" كونجلي ... مسكين ماكانش من العاطلين في نص ساعة جا يطبطب على الباب أيا مابين ما كملت شغاللاتي و طيبت الكسرة رخساس كان هو ديكنجيلا فوحتو و طيبتو في الشواية و زدت معاه السلاطة جا روعة
و العشاء امبارح درت بربوشة بالحليب و طريقتها عندنا في بسكرة كالآتي و تجي روعة لازم تجربوها
تفورو الكسكسي عادي و المرقة تحطو فول يابس مقشر أو أخضر و بطاطا يغليو في شوية ماء ... هوما يطيبو و انتوما تلوحولهم بزاف بصلة خضراء مقطعة و حبة طماطم و شوية ملح و قرن فلفل حار للي يحب كي طيب طفي عليها تصبيلها حليب فايض و سخون يغلي "مالزمش يغلي الحليب مع البرمة راهي الطماطم تكلل " و سقيها امليح يعني تكون جارية تجي بنة عظيمة

الجانب الجمالي : امبارح ما درت والو حتان لليل جات العين لحت ميهة سخونة على لحمي و درت اللوسيون لجسمي و درت مرطب لرجلي و كحلت عويناتي و جبدت ريحتي المفضلة درت منها
اليوم نحمد ربي الي ستهليت في رويحتي الصباح كون درك والله ماندير حاجة هيهيهيه قالك عريان لـ ..... و في يدو خاتم .... و هاداك المثل والله نسيتو تاع عورة و الكحل .... المهم راني لبست قندورة انتاع قطيفة شريتها جديدة صح غالية شوية و لكنها جميلة جدا و جبدت شعري من القدام و درتلو دابر أملا الي قاتلي عليه سندوسة و زيد مرطب الرجلين و لولي لليدين "مانحبش نمكيي بزاف" درت مرطب الشفاه

الجانب التربوي امبارح قراو كي العادة و احكيتلهم في الليل و احنا قاعدين نقصرو و ناكلو في البطاطا الحلوة "شويتها في الفور" على بعض الألعاب الي كنا نلعبوهم بكري و شبعنا ضحك ... اليوم خليتهم يريحو راهم يلعبو في الوي في بيتهم مع بنات الجيران لأني أنا مانخليهمش يروحو للديار

الديني الحمد لله على كل حال
زيدو كاش ما نسيت ..... سمعتك يا مينوشة راكي تقولي بركاي من الهدرة دوختيلنا راسنا هيهيهييه عجبني بزاف كلامك ياريت تزيدي تهدري معايا شوية :d:d:d

[نافلة]

كيراكي اختي مينة الحمد لله لي ما راكيش مريضة وماشي زعفانة انا قلت برك . و درك كي عرفتك مليح ما نعودش نذكر الزعاف يا العباسية .

[نافلة]

كيراكي اختي مينة الحمد لله لي ما راكيش مريضة وماشي زعفانة انا قلت برك . و درك كي عرفتك مليح ما نعودش نذكر الزعاف يا العباسية .

[~ حراير ~]

يا فطيمة وش درتي فيا راني بديت نكتب و نتكلم ... أيا حبست من الكتيبة و قعدت نهدر .... عاودت رجعت للكتيبة و انسيت وش كنت انقول هيهيهييه دخت عاودت ضميت فمي و كي بديت نراجع وش كتبت بديت نقرأ بصوت مرتفع ... حسيت بالدوخة من البكا الي بكيتو قبيلاتي أيا عاودت اسكت هيهيهيه قعدت غير نضحك في ضحكة لعلاوي خفت بنات الجيران يعايرو وليداتي يقولولهم أمكم مهبولة تضحك وحدها هيههيهييهيه
حق راني عندي مشكل في حرف الـ ف كي تلقاوه مخصوص زيدوه من عندكم