احلى و اروع مطلوع في الكوشة لعيونكم+ اضافة صور - الصفحة 16

oum ibrahim · 2013-07-14, 13:32

السلام عليكم اخواتي
اليوم جبتلكم اروع مطلوع في الكوشة خفيف و طري ان شاء الله يعجبكم
المقادير
انا ندير عيني ميزاني بصح كاين مبتدئات يحبو كلش مظبوط
و كل وحدة تقدر تدير وصفتها المعتمدة نتاع المطلوع
2كيلات سميد (الكيلة ممكن كاس او علبة او اي حاجة تكيلي بيها )
كيلة فرينة
ملعقة اكل خميرة الخبز
ملعقة و نص اكل سكر
2ملاعق زيت
ملح
ماء دافئ للعجن

نخلط المكونات و نجمعهم بالماء الدافئ و نخلي العجينة ترتاح و تخمر

هنا بعد ما خمرت

نعجنها مليح حتى تولي عجينة طرية و ملساء
نشعل الكوشة من تحت حتى تسخن ملييييييييح ثم نطفي و نشعل من فوق و نحط معاها الصينية تسخن

الي عندها الفرن خاص بالخبز و البيتزا تشعل من فوق و من تحت مع بعض
نقسم العجينة كرات و نقرصهم و نخليهم يخمرو
بعد ما يخمر الخبز نتاعنا نبدا نطيب نحط القرصة و نغلق الفرن

راح نلاحظ بعد قليل انها بدات تنتفخ

شوفو هنا كيفاه تنفخت كما الخبز العربي

بعد ما تتحمر نقلبها على الوجه الثاني

و هاهي بعد ما نخرجها ندهنها بشوية زيت يعطيها لمعان و طراوة

شوفو من الداخل كيفاه خفيف و طري كي القطن

و قطعيه و قدميه مع صحن شربة و بالصحة و الهنا على قلوبكم

نتمنى يعجبكم و تجربوه خاصة مع السخانة كاين الي ما يقدروش على حرارة الطاجين
رمضان كريم و كل عام و انتم الى الله اقرب
دعواتكم في هذا الشهر الفضيل
الاخوات الي ما عندهمش صينية مثقوبة كما نتاع البيتزا يمكن يستعملو صينية عادية للفرن نحطها تسخن مع الفور مليييح باه تساعدنا في الطياب

لما يسخن الفور مليييح نشعلو من فوق و نبدا نطيب
شوفو هنا كيفاه تنفخت

وهذا هو الخبز واجد امممممممم يشهي

هذا هنا كنت طيبتو في مرة من المرات في الفور الكبير خاص بالبيتزا و الخبز يشعل من فوق و تحت مع بعض

نتمنى تكونو فهمتو و صح فطوركم