~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[arwa alaa]

ام هزار يعطيك الصحة على المواضبة
تقرير اليوم
نضت الصباح صليت سبحت ووجدت الفطور ورحت رتبت الغرف وكنست وغسلت حاشاكم الحمام ونوضت زوجي باش يفطر ويروح يخدم
درت الغداء بكوكس بالقديد ولميت مواعن الفطور ووجدت فطور اابنات ووليدي باش يروح يقرى عندنا السنة اولى يقراو على العشرة درتلهم مشلوشة صغيرة بيناتهم والحليب ودرت البارح بريوش
نوضتهم غسلت ليهم وبدلتلهم وفطرو
كي راح وليدي غسلت زربية نتاع بيت لبنات وسخوها وزاورة وغسلت القش في زلماشينة ومبعد فرغت البلاكار ناع الكولوار دايراتو منطقة ساخنة هاذي الايام الي بقاو في السمانة
وجدت الغداءللبنات غديتهم ومبعد جاء الزوج تغدينا وصليت ورتحت شوية وكي خرة فرزت شوية حوايج في البلاكار وغسلت الواعن ودرت قاطو صب الرشراش كيما تقول عجوزتي

[arwa alaa]

رتحنت شوية نضت طيبت حليل ووجدت للعشاء درت بيتزا .....ودرت الروتينات المسائية وراني نرقد في البنات
ومزال التسبيح والصلاة وقراءة سورةالملك
تصبحون على خير

[arwa alaa]

صباح الخير عليكم واش راكم كيفاش صبحتو

[جهينة اليقين]

اهلاوسهلا اروى راكي ناشطة الله يبارك المهم تقريري كيم المعتاد ومايتبدلش من الجانب الديني الصلاة كلها افي اوقاتها اللهم ادمها نعمة واحفظها من الزوال جانب البيت مرة على مرة منطقة ساخنة ما عنديش برنامج مسطر يعني وين ما نصيب وقت ندير حاجة والاشغال اليومية راهي باينة

[فراشات العمر]

السلام عليكم
ام وسيم ربي معاك اختي لازم تدعي ربي ليل نهار باه يهديه ربي هذا هاز معلومات خاطأة على النسايب
احنى جارتنا ماتزوجتش بكري حتى 27 سنة باه جاها خطاب ماتت مرتو وخلاتلو ولاد وكانت يتيمة ماعندهاش ابوها مات كي زادت هي المهم مايشوفش في امها سيرتو كي تحكيلها على ولادو كي ماقبلوهاش تحل مكان امهم يوميا بكاء سوى من عندها ولا من عند ولادو وهي امها كي تخبط عليه تقولو علاه تخلي بناتك يسبوها ولا يقباحو عليها قال لمرتو منسحقش امك تجي ولا الغيبة يقلها عندك نهار في الشهر ما يخليهاش يقلها والدار ولولاد ووووووو تعرضها امها تروح غي وقت تاكل وتروح مالا امها ولات كل جمعة صباح تكون عند الباب كره قالها علاه راكي تجي قاتلو نتوحش بنتي وانت ماتحبش تجيبها
مرة يخبط حوايج مرة يخرج وهو عبوس يبينلها بلي ماهوش قابل وهي ساكتة عليه المهم بنتها مازعكتهاش واحد النهار جابت كابة معاها قاتلها جاية نعقب يمات معاكم ينوض الراجل يجري قالها عندي غيبة اليوم رايح عند صاحبي واقيل نبات مالا قاتلو نروح لدارنا قالها ايه هيَ وجدي روحك قاتلو انا نبات عند يما يومين ولا ثلاث قالها خذي راحتك
الحمد لله تربى وتهنات

[فراشات العمر]

اليوم نضت صليت صلاتي وقريت وردي ورحت رقدت للسبعة نضت طيبت حليب فطرت وفطرت ولادي بعد ما وجدو رواحهم ناض ابني الصغير وليت رقدتو وجاتني في بالي نعدل الصالون هبطت في الاول كرهتو لقيتو مكركب كل خردة فيه وليت خرجت الزربي وهزيت كلش ونفت العنكبوت وسيقتو ومسحتو بعد ما مسحت الغبرة وعاودت رجعت كلش لبلاستو ورميت اواني مقبل الزواج ملي شريتها كرهتها ما ستعملتهاش طيشت ولي كرهتها كسرتها باه ماترجعش وخليت غير حاجة خفيفة برك وعدلت الكتب المهم كان شعاري هو الحاجة لي ماستعملتهاش نرميها وقراويع ودراقيل اخاه واش كنت مليمة وكذلكك كل حاجة ديريلها بلاصتها

[جهينة اليقين]

هههههههههههه والله ضحكت من قلبي نستعرف بيها جارتكم هكذا ديري لو ام وسيم يا انا نروح يا امي تجي الههم الله يكون معاكم
ام الابتسامة انت مشكلتك العكس واسمحي لي اذا قلت لك انانية كيفاه تهملي بيتك وتبقاي مربعة يديك معاها لو كان تخدميها بااااااااااااااالاك معذورة لازم تديرو حل والا العاقبة ما تكونش مليحة وفهمي راجلك بلي راك هاملاتو وما راهش عاجبك الحال ونشوفو حل للمشكلة على الاقل كي يفهمك ما يتغشش وما دام كاين الى يقوم بها تحججي او ادخلي لدارك بالتخبية وقولي لها زادو لنا في ساعات العمل وما قلتي لناش اذا باباك عايش راه عندو دور في حل المشكلة وذا عندك اخواتاتك او انت الوحيدة الله يجيب الخير

[arwa alaa]

السلام عليكم يالبنات واش راكم يعطيك الصحة يا فراشات على النقيض والله ساعات نخبيو حوايجمعندهم حتى معنا ......
جهينة واش راكي وواش راهم الاهل
ام ابتسامة كي راكي تقعدي برك ولي قوليلها احبطي يا يمى عندي تبدلي حتى شوية الجو وكي تكون معاك اخدمي شغلك ولا نوضي الصباح طيبي غداك وعشاك ووجدي حوالك وكي ترجعي من الخدمة متروحيش حتى تكملي حوالك وحوال ولادك وراجلك راهو ناس ملاح بصح دوام الحال من الموحال وكي تروحي عندها قوليلها هذا وين جيت المهم يماك من النوع الي لازم تستعملي معاها الحيلة ولا راح تخربي بيتك وتجي غيرفيك

[arwa alaa]

السلام عليكم يالبنات واش راكم يعطيك الصحة يا فراشات على النقيض والله ساعات نخبيو حوايجمعندهم حتى معنا ......
جهينة واش راكي وواش راهم الاهل
ام ابتسامة كي راكي تقعدي برك ولي قوليلها احبطي يا يمى عندي تبدلي حتى شوية الجو وكي تكون معاك اخدمي شغلك ولا نوضي الصباح طيبي غداك وعشاك ووجدي حوالك وكي ترجعي من الخدمة متروحيش حتى تكملي حوالك وحوال ولادك وراجلك راهو ناس ملاح بصح دوام الحال من الموحال وكي تروحي عندها قوليلها هذا وين جيت المهم يماك من النوع الي لازم تستعملي معاها الحيلة ولا راح تخربي بيتك وتجي غيرفيك

[ام الابتسامة]

السلام عليكن ياحائر

اشك كل من تفاعلت مع مشكلتي
اتا ابي متوفي ولديا اربع اخوات اثنين منهما معي في نفس المدينة
ويحصل هعهنا مثل ما يحصل معي
او نوعا ما اقل
في الاسبوع الماض اجرت امي تحاليل لانها مصابة بالسكري وانا كذالك فعضمت الامر وبدات في البكاء لانها سامت من التحاليل فلما سمعت اختي اتت لتبات عندها وبقيت انا كذلك هناك الي غاية العشاء لكن اختي لما جاءت تركت زوجها مريض جدا مع ابنه فقط وقال لي ابنه بات طول الليل يتالم
في الغد حضرت اختي الاخري فوبختها وخاصمتها لانها فضلت بيتها عنها
ام انا حاولت انلا اصعد بالامس فقد كنت متعبة نتيجة ارتفاع السكر ولما صعدت اليوم خاصمتني رغم علمها بمرضي وقالت لي الغداء قدرتي تطبخيه لاولادك
في الحقيقة امي تريد ان تكون مركز اهتمام الكل ىلا يسبقها احد
انها تزعل حتي اذا اشتري احدنا هدية لابنائه بمناسبة نجاح وتقول لتا اتا اولي من ابنائكم
رغم انه لاينقصها شيئ كل شهر كل واحد فينا يعطىها شهرية يصل مجموعها الي غاية مليون
هل انا عاقة ادا لم استجب لدلالها
فكما قلتم زوجي متفهم جدا حتي هو احيانا تزعل منه بدون سبب وارغمه ليطلب السماح منها رغم انه لم يذنب
ساعدوني من فضلكن هل انا مخطئة

[ام الابتسامة]

ام وسيم
عندك الحق ضروفنا متعاكسة
لكن اقول لو جاء زوجي مثل زوجكي لتحججت به
انا كل ما اخافه عقوق الام لذلك ابحث عن حل لارضي امي دون اهمال بيتي
الله يهدي زوجك

[ام متين]

السلام عليكم كيف الحال يافراشات لم استطع الدخول بسبب سفري امس وتراكم بعض الاعمال لكن استطعت قراءة ماكتب من طرف الاخوات ماشد انتباهي هو حالة ام الابتسامة والله الحالة محيرة فعلا لكن رايي انا انواذا كانامشي الانسان مخطئ واحنا امشينا معاه في الخطاالامور رايحةتسوء اكثر اختي لوكان ماعندكش مسؤولية الزوج والاولاد فانت تتحملي امك كيما تحبي اما في حالتك فانت راعية في بيت زوجك ومسؤولة عن رعيتك ويجي اليوم الي تندمي على ذلك بسبب ربما ردةفعل الزوج بعد نفاذ الصبر او ابتعاد الاولاد عنك ومحاسبتك لانك لم تهتمي بهم ونظن انك انت واخواتك ساهمتم بقدر كبير في( ان صح التعبير) طغيانها عليكم والاكيف تتحكم في الزوج وتطلبيي من ان يطلب السماح وهو لم يفعل شيئ لانكم بهذه التصرفات تقولولها انت على حق وتواصل في اسبدادها لانها اذاكانت فعلا تحبكم وحنينة ما ترحمكش وانت مريضة والسكر مرتفع ربي يهديها ولازم استعمال الحيلة معها والكذب احيانا والمواجهة احيانا اخرى ربي يكون في العون والمشكل الثاني في الزوج انتاعك لان لازم يفرض راي في البيت وقدامها حتى يعرف كل واحد حدود وحقوق وواجبات

[جهينة اليقين]

كنت حاسة بلي الاب متوفي لو كان تجيبو لها واحد من العايلة تحشم منو يفهمها بلي راهي غالطة فهي تستغل طاعة الوالدين لتشبع انانيتها اسفة على التعبير ربما عندها فراغ عاطفي فتحاول ان تبعدكم عن ازواجكم ما استطاعت مع المرض والله مشكلة ما يحلها غير اصحاب الاختصاص ربي يكون فالعون

[جهينة اليقين]

لبنات اليوم رحت عند بايع التوابل باش نشري شوي توابل سقسيتوعلى الكركم قال لي راه مية الف للكيلو بعد ما كان خمسة وثلاثين انخلعت وعلاه قال الانترنت عادو ما يشروش زعفران الاصطناعي وراهو لي ما هش يمشي لي والكركم كي عاد صحي راه مطلوب وعادو يصنعو منو الصابون والزيت يا خي حالة كيم السردين وانواع الحوت غير سمعوا بلي صحي طيروه فالسماء والله الزوالي مسكين يا حليلو

[arwa alaa]

عندك الحق ياجهينة كلشي زاد والبياعة عرفو بلي الناس ولات تشري قبل رمضان بمدة طويلة زادو في السلعة
وهاذوك النهار خرجت نشري شوية قش ناقص للبنات لقيتو غلا بزاف علي السمان الي قبل والناس هاجمة على القش يشريو في قش العيد من ضرك