دورة خطواتي الواثقة لأصبح ربّة بيت متألّقة

[~اسيل ريحانتي~]

اصبحنا واصبح الملك لله
اختي ام شمسو صباحك سعيد كيف الاحوال ان شاء الله دائما في رعاية الرحمان
شكرا وبارك الله فيك على كلامك الجميل قريت ردك اكثر من مرة طريقة كلامك تعجبني ما شاء الله ربي يباركلك في صحتك
حبيت نقول اختي ام شمسو انا ماعنديش خبرة كبيرة في مجال التجميل خبرتي على حسابي ههههههه بصح لي نعرفه ما راحش نبخل عليكم بيه راكم اخواتي عند ربي
صح كيما قلتي كرهنا من كثرة الوصفات والماسكات ومواد التجميل لي تضر وتضر جيبك اكثر من لي تنفعك
ماكانش كيما الطبيعي كيما يقولو لامانفعكش ماراحش يضرك
ومادامنا عايشين مادامنا نزيدو نتعلمو والحمد لله على كل حال

[~اسيل ريحانتي~]

ام البنين سقسيتيني امس على المسمن
هداك مسمن ام وليد تاع الفرينة اول مرة نديره على خاطر موالفة غير بتاع السميد والصراحة تاع السميد احسن منو

لبارح نظفت البيت في الليل عاودت لمعت الحمام والدوش وخملت على الخفيف الصالة وغسلت الماعين ولمعت الحوض صبح كلش نقي ليوم راح نفرغ الثلاجة نظفها ولا كتب ربي نصورها قبل وبعد التنظيف انتظروني

حقا نسيت ليوم ابني يقرا السنة الثانية دخلناه يتعلم اللغة الفرنسية يقرا ساعتين
وبنتي ايضا تقرا غدا عندها هدا العام تفوت السانكيام وراها ضعيفة شوية في الفرنسية

[omelbanin]

السلام عليكم، جمعة مباركة على الجميع.
انا اليوم نضت مع الاذان الاول شربت الماء، وقمت بالواجب الديني والحمدلله، مازالتلي سورة الكهف، بعد صلاة الظهر يكون شوية الهدوء.
الجانب الجمالي تم.
بعدما حضرت فطور الصباح وشربو كل افراد الاسرة، لميت الاواني، ورحت درت الملابس في الغسالة يوم الجمعة عندي غسيل تاع ملابس العمل تاع الزوج ومآزر تاع الأولاد.
نضفت المرحاض والدوش.
غسلت الاواني ونضفت الفرن. درت المرق تاع الكسكس تطيب.
خملت الشنابر وكنست ومسحت.
نشرت الغسيل وجيت نطل على النت.

[~اسيل ريحانتي~]

ام هزار بارك الله فيك على المعلومة لي تخص ماء الورد حبيت نقول انا نستعمل ماء الورد في البيت مانخرجش بيه هو ونيفيا
وشفت في اليوتيوب الكثير من النساء لي عاملين روتين يومي للعناية بالوجه يقولك تغسلي وجهك بغاسولك اليومي وبعدها توضعي التونر لغلق المسام وماء الورد راه بديل التونر وبعدها تحطي كريم النهار للترطيبه
وانا كي نكون خارجة مانستعملوش اكتفي بواقي الشمسي
وشكرا حبيبتي ام هزار ربي ينورك

[omelbanin]

اسيل انا جربت تاع ام وليد عجبني، وشنو لازم ينتكل هاذاك اليوم، كي يبات مايوليش مليح.
انا وليدي لكبير سنة الرابعة ابتدائي لحد الآن ما جابولهمش معلمة تاع فرنسية
راني مدخلاتو يقرا الفرنسية عند وحدةانا نقدر نقريه، بصح علابالي بلي ما ينظبطش عندي كيما عند شخص آخر . وعندي واحد سنة أولى.

[~اسيل ريحانتي~]

انا والله نقريهم في البيت حتى راسي يوجعني نتنارفا عليهم ههههههه ايا قلت ندخلهم يتعلمو خير حتى بنتي ماراهمش يقرو الفرنسية معلمهم راح يبدلوه مزال مابداو من غير درس واحد ولا زوج وخلاص

[~اسيل ريحانتي~]

كيما وعدتكم هدا وين كملت تنظيف الثلاجة بقاتلي الفريقو حتى لغدوا ان شاء الله
شوفو قبل ما نخملها كانت مكركبة هههههه

وهنا بعد ما رديتها تشعل ههههههههه

[~اسيل ريحانتي~]

حبيباتي جبتلكم تشوفو منظمات خدمتهم وحدي يجو فوق التسريحة وتحطي فيهم البارفانات ولي تحبيه ههههه
ان شاء الله يعجبوكم

[~اسيل ريحانتي~]

وتاني هدو تاع ليزيبيس استعملتهم لتزيين التسريحة
وحدة رابيت فيها الصابون ودرتلها حاشيا وحدة فيها الكوطونديسك وحدة فيها الكوطونتيج نسيت ماصورتهاش

[omelbanin]

اسيل يعطيك الصحة على الأفكار عجبتني بزاف تاع علب التوابل، تآمني انا راحلي كامل الصبر
باش نخدم حاجة، انا مقلقة، علاش في أهدافي، راني حابة نتخلص من القلق اليومي، الحقيقة راني نقصت منو من الدورات لي فاتو وراني حابة نتخلص منو نهائيا.
الله يبارك الثلاجة رجعتيها تشعل

[ام شمسو محمد]

مالا هذيك الثلاجة مكركبة اسيل ههههه...حتى الفوضى تاعك منظمة.اشغالك هايلين ..انا مانستعملش الكوتونتيج راهم يقولو بللي ماهمش ملاح طبيا...وانا كيعودو عندي مانصبرش كل دقيقة نستعملهم

[خوخة02]

اصبحنا واصبح الملك لله والحمد لله
ماشاء الله اسيل كلشي هايل الله يعطيك صحتك انا نحب نخدم اكسسوارات بنفسي افكارك هايلة
وان شاء الله ندعمو تطبيقاتنا بصور
ام تغاريد حبيبتي شكرا على التوجيه ان شاء الله اليوم نكتب روتيناتي وبارك الله فيك

[حياتي كلها امل]

السلام عليكم اهلا ام محمد ومريم معانا نورتي
شكرا لك اسيل على واش راكي تمدينا وثلاجتك رجعت تشعل وهذوك افكار مليحة للتزين
المسمن تاع ام وليد جربتو لكن صراحة تاع السميد احسن

[خوخة02]

اليوم نضت صباح الجانب الديني عذر شرعي
الجانب الجمالي تم بصح نسيت البارح مارطبتش رجليا مع وليدي راه مريض بلاغريب
من بعد طيبت القهوة وشربت انا وزوجي باه يروح للعمل اليوم مايجيش نبات وحدي
ونظفت الصالون والشمبرة ووكلت ابني وغيرتلو ملابسو وخليتو يلعب شوية
ورحت نضفت المظبخ وكنست وسيقت الغرف ونزعت الملابس دوك نروح نطبقهم
والغذاء مانديرش عندي كسكس تاع البارح مع راني وحدي ميهمنيش الاكل
لي عودة

[حياتي كلها امل]

انا اليوم شربت الماء على الريق عملت تزين خفيف لاني كنت راح نعمل دوش
وجدت الفطور والاذكار ونضفت المطبخ والغرفة والصالة وسيقت وعملت دوش
عملت تقشير للوجه وماسك وانا نستعمل السدر المرحي للجسم وللترطيب الجسم زيت جونسون هايل
من بعد عملت سيشوار للشعري ودرت مكياج خفيف وعطر
انا يوم الجمعة يتغير روتين بنسبة للايام الاخرى لان الزوج في البيت ورجال مايحبوش ادزرزيق والمرا غاطسا راسها في الشغل وهما في الدار
واما تنظيف العميق للمطبخ راح نبداه الاسبوع القادم وكيما قالت ام تغاريد راح كل يوم نظف شيء عميق جدا باه منعاودش نولي ليه حتي لو بقيت اسبوع وانا غير مع المطبخ