فراشات تنطلق من جديد نحو نفسية راضية مسترخية همتها من حديد

[ام مؤمن]

المشاركة الأصلية كتبت بواسطة ام آدم

حبيبة الحمد لله كي عاد غيابك غياب خير وربي يباركلك في زواجك و يرزقك الذرية الصالحة ان شاء الله

ام مؤمن انا ثاني نظامي تلخبط شوي مع العيد و عقبت العيد صامط سيرتو كي عاد ابو العيال مريض حكماتو قريب قاوية عيد راقد في الفراش باباه ربي يحفظو هو لي ذبحلنا وسلخلنا
ان شاء نرجعو للنظام والنشاط لي تعودنا عليه مع حبيبة

كيف حالك ام آدم سلامة الزوج المصون و ربي يباركلك في صحة شيخك ربي يسترنا هذي لا قريب خلصت فينا انا أيضا و أولادي الاثنين جوزنا العيد مراض بلاقريب دارت فينا حالة انا و ابني اليوم تحسنا شوية لكن بنتي مازالت مريضة ربي يشافيها و الله سوفريت العيد هذا المرض و الفوضى حتى المورال صفر
و على هذا راني حابة نغير شوية من نفسيتي و نطلع مورالي و نبدأ حملة الفرز و التنظيف
درنا عرس سلفتي قبل العيد بأسبوع واش تقولك على الفوضى الدار تقلبت لفراش توسخ و المواعين مبعثرة و الخزائن كارثة راني نرجع بلعقل و كي لحق العيد و زدت مرضت كل شيء توقف
ان شاء الله استرجع عافيتي و ابدا من جديد
سلام رنيم
كيف حالك ام رتاج و كيف حال بنيتتك سلميلنا عى الوالدة و في انتظار رجوعك لبيتك و حماسك
منال طلي علينا توحشتك أنت و طمطومة و رقية و ام سلمى ام ياسين ام ايوب دائمة الشكر و القائمة طويلة

[منال100]

السلام عليكم
اهلا وسهلا بالجميع
ام مؤمن لابأس عليك وعلى وليداتك ورب يشافي بنيتك ان شاء الله
خدمي غ بشوية الفايدة في الصحة متقلقيش روحك كل شيء راح يرجع لمكانه نعرفك فحلة رب يعاونك
حبيبة مبارك عليك وان شاء الله رب يتمملك على خير وما تخافيش على الدورة راح تكون ناجحة كسابقاتها راك خليت نساء كل واحدة ب100 رجل والبركة في ام مؤمن وام صابرين والغالية ام نسيبة والباقيات كثيرات رب يحفظهم جميعا
ام نسيبة واش راك والقفطان لبستيه في العيد ؟
انا والله مالبست حتى شيء جديد راك عارفة حالة العيد طابلية الشغل والفولارة شوطت البوزلوف وغسلت الكرشة وسيقت وغسلت الاواني وقطعت اللحم ودرتو في الثلاجة وحدي ورب راه عالم
والبارح جاني لوسي وزجته الاجنبية تعشاو عندي راني نوريلكم تصاور فيما بعد

[أم ريتاج زهرة]

أهلا حبيبتي أم مؤمن على سلامتك أختي طهورا إنشاء الله و غير بشوية عليك يا الغالية راه كلش يفوت غير الصحة لا راحت ما توليش و إدا عاندنا الميناج راه مايكملش واش حوالك و الولاد و العايلة لاباس عليك ؟؟؟ منولتي الغالية يا رفيقتي واش دار فيك العيد بصح نعرفك شاطرة و تسلكيها ربي يخليك ديما ناشطة و العايلة لاباس عليها ؟؟ ما تنسيش التصاور نحن في الإنتضار حبيبتي بالتوفيق يا العزيزة

[غزالة1]

السلام عليكم و عيدكم مبارك
الفففففففففففففففففففففف الفففففففففففففففففففف مبروك يا حبيبة الكل حبيبة و ربي يرزقك و يباركلك في حياتك الجديدة و تكون علاقتك بزوجك و اهله على احسن وجه ( نعرفك فحلة و مانخافش عليك )
فراشاتي الغاليات ام مؤمن ام نسيبة ام صابرين منال100 ام ادم البحر الصافي ام تغاريد ترانيم المطر ام ريتاج زهرة ام وسيم amel
كيما قلتو لازم نشدو الهمة و نرجعو للنشاط و نحمسو بعض
انا اتابع اغلب الاوقات بصمت لسبب مرضي لا يعلمه الا الله فادعو لي بالشفاء و لكل مريض زيادة على ان لي طفل رضيع لكن هذا لم يمنعني من تطبيق اشياء كثيرة منها الاهتمام بنفسي فقد اهملتها كثيرا حتى اني اصبحت اطلع على قسم العرائس و التقليل من العصبية مع اولادي و اشياء اخرى متى استطعت ساكتب عنها
حبيباتي سلام لكن جميعا و لكل الغائبات
بعيدة المنال وينك توحشناك وعروستنا سمونة غبت علينا
ام ماريا ملاك دائمة الحمد وينكم
التي نسيت ذكرها تسمحلي
سلام

[منال100]

اللهم اشف غزالة وابعد عنها كل الامراض احمها لأبنائها وعائلتها ورد لها عافيتها واجعلها غزالة اسما على مسمى يارب ياحنان يا منان يا عالي الدرجات
والله لما قرأت كلماتك شعرت بقشعريرة دخلت شريان دمي فوجدت نفسي ادعو لك بكل جوارحي متضرعة الى الله عله يستجيب وان شاء الله يستجيب
ام ريتاج يا الغالية ساضع الصور حينما يتسنى لي الوقت راك عارفة حالة الخدام راني نطل عليكم ونعاود نهرب الله غالب احبكم كثيرا منقدرش نصبر عليكم
سلام

[amel...]

صباح الخير عليكم و ان شاء الله راكم كامل ملاح ...

غزالة ربي يشافيك ان شاء الله و فرحت كي لقيتك متفكرتيني باسمي

انا اليوم منخدمش ... راني معولة نكمل تنظيف الغرفو نعدل ادواتي و نفرز لي نحتاج و لي منحتاجهمش نخبيهم باذن الله و ان شاء الله ربي يقدرني مع لقريب لي محبتش تروح

ربي يوفقكم يا الفحلات ...

[om ahmed]

صباح الخيرات و المسرات ، حبيبة الغالية ألف مبروك ربي يهنيك يا بنتي و يسعدك . اهتمي بنفسك و بعريسك و ما تخميش علينا ، إنشاء الله رانا قد المسؤولية و خاصة إدا كانت معانا منال الحبيبة و كا الفراشات الحبيبات . ربي يوفق الجميع ، الجو أصبح باردا يعني لا بد من عودة النشاط و الهمة ، أنا أخذت إجازة 3 أيام لكي أكمل تنظيف منزلي ، بدا يبان شوية و لكن مازال مازال

[أم تغاريد]

السّلام عليكم ورحمة الله وبركاته
طاب يومكنّ جميـــــــعا أخواتي
بشــــرى كما وعدنا الغالية " حبيببة' نحن سنسير على الدّرب إن شاء الله ريثما تعود إلينا

دورة الاستعداد لفصل الشّتاء
https://www.djelfa.info/vb/showthread...post3994400198
أرجو من الإدارة تثبيت الموضوع

[oum sabrin]

صباح الخير على حبيبات قلبي الففراشات النشيطات الرائعات
واش راكم توحشتكم بززززززاف
حبوبتي الغالية عروستنا الرائعة مبارك عليك و الله فرحت بززززززززززززززاف بهذه الأخبار السارة ربي يباركلك في حياتك الجديدة و يسعدك و يهنيك امين يا رب
ربي يجازيك عني و عن كل ربات البيوت على كل ما قدمته و تقدمينه من أجل الرقي بها و جعلها تتمتع و هي تخدم عائلتها و ترعى أبناءها و تعتني بنفسها لتسعدها و تسعد زوجها ربي يخليك لينا يا أروع قائدة نحن بانتظارك ريثما تندمجين مع اهللك و حياتك الجديدة
أنا أيضا اشتقت للتواصل معك حبيبتي متى سنحت لك الفرصة أنا هنا علابالي وقتك ضيق ربي يعينك أي استفسار او مساعدة لا تترددي انا في الخدمة بما استطعت غاليتي
حبيبتي أم مؤمن على سلامتك و بالشفاء عليك و على اولادطهور ان شاء الله انا تان بداني لاقريب بداني نحاول نقاوم شويا مازال ما طيحنيش
راني معاك حبيبتي في كل ما قلت لازم نديرو اليد في اليد و نواصل ما تعلمناه مع قائدتنا نريحو شويا و نديرو برنامج بلاستناد لدورة الفراشات السابقة و معطيات كل فراشة و نحمسو بعضنا البعض بالتقارير اليومية و الأفكار المنزلية اتمنى التحاق كل الفراشات القديمات و الجديدات
اختي غزالة ربي يشفيك شفاءا لا يغادر سقما امين ربي يخليك معنا فراشة جميلة في احلى بستان فراشات
حبيباتي ام نسيبة واش راكي و نسوبة كيف حالها منال 100 ربي يكون في عونك معليش وقت ما قدرت طلي علينا أم تغاريد على سللامتك بالنسبة للاقتراح هو مليح و خاصة مع ادراج الصور ..الخ لو كان خاص للنساء يكون أحسن
م ريتاج زهرة ام ادم ام وسيم امال ترانيم المطر البحر الصافي على سلامتكم يدا بيد الى الأمام سر تحياتي لجميع الفراشات الالغائبات

[hafidha20010]

السلام عليكم
ما احلى هذه اللمة كل يوم تحلى في عيوني وراني نطل عليكم ونقرى واش تكتبو
عجبتوني بزاف وعجبني تآزركم مع بعض الله يبارك فيكم والله غ تبانو خيات تتعارفو من زمن بعيد
انا استاذة متفاعدة يعني وليت ماكثة بالبيت راني نتبع فيكم وندعيلكم حاس روحي كيماكم لتقبلوني طبعا
راكم تفكروني في صغري وراني ملتزمة بالدورة كما انتم
ام مؤمن ام صابرين ام نسيبة منال غزالة ام احمد ام ريتاج ام ياسين امال الندى والبحر الصافي والمطر كل هذه الاسماء الجميلة تحببني فيكم ونحب ننظم اليكم واشعر اني احظنكم جميعكن كبناتي
الله يدوم قوسطونا على رأي الشيخ فرحات

[ام آدم]

السلام عليكم حبوبات قلبي
اولا ربي يشافي كل مريض راه الجو تبدل و برد فجاة ربي يسترلنا وليداتنا و يبعد عليهم وعلينا المرض
انا راني خدمت هاذ لعشية و عندي ساعة منين روحت
الحمد لله درت الصباح غدا وعشا و غسلت لماعن قبل ما نروح نخدم ولمعت الحوض ودرت ميناج خفيف برك لغرفة الاولاد و الصالة و المطبخ و الهول و نظفت التوالات والدوش حاشاكم يعني روحت لعشية لقيتها تبرق كيما خليتها
لكن مشكلتي هي غرفة نومي مهما نظمتها في لحظة تتبهدل و ترجع كارثة سيرتو كان جبدت حاجة من الخزانة نهبطها كامل ظرك راهي مقلوبة راسا على عقب وعييت نبداها راهي دارتلي عقدة ههههههه ان شاء بعون الله وعونكم تتنحى
يلا لبنات كل وحدة تحط تقاريرها اليومية والبرنامج لي ماشية عليه خلي نستفادو من بعضانا يلا ولعو الدورة يا احلى فراشات

[amel...]

مساء الخير عليكم ...

ام ادم عندك الحق انا العشوة ان شاء الله نحط برنامجي و نبداو مع بعض بالتقارير اليومية ... ربي ان شاء الله يباركلنا في لمتنا

معا نكونو احلى فراشات

[ام هزار]

حبيت نهنيك ونباركلك على عرسك ....... الله يجعلو بداية الافراااح و النجللح و الاستقراااار و العاقبة للذرية الصالحة .اللهم اميييييييين

[فراشات العمر]

الف مبروك
حسيت بيك والله لكان ترجعي للرد نتاعي قتلك كاش خطاب وطحت فيها صح
ياختي ربي يهنيك ويسعدك ويحققلك ما تتمنيه من الخير
اللف مبروك
توحشتك

[ام مؤمن]

صباحكم عسل و همة و حيوية و نشاط حبيباتي كيف حالكم

منال الله يسلمك حبيبتي الحمد لله نحن نثماثل للشفاء و يعطيك الصحة يا الفحلة كي تهليت في اللحم و قطعتيه انا زوجي يقطع و انا نخبي الكرشة و الامعاء لازمهم طابلية و فولارة طبعاانا مانديرهاش العيد هذا ماش تاع حطات
بصحتكم الوليمة ربي يزيدك من نعيمه و رانا في انتظار الصور او ما تسمح ظروفك ان شاء الله

حبيبتي زهرة ام رتاج ربي يخليك زهرة منورة في بستان الفراشات و يديم عليك نعمة الصحة و العافية

غزالة ربي يشافيك حنونة شاركي معانا حسب مقدورك و ظروفك و ان شاء الله مايكون غير الخير راني شفت دورة الجمال في قسم العرائس و ناوية نشارك فيها ان شاء الله علاه احنا زعما كي تزوجنا و درنا الاولاد ماتصحناش نتزوقو رانا اكثر ناس محتاجين للعناية و تغيير اللوك خليك معايا نديرو نيو لوك جديد مايعرفوناش ازواجنا

amel... راني منعرفكش مليح لكن و الله حصلي الشرف حبيبتي و راكي تبانيلي فحلة و عندك همة ديري يدك في يدنا و الى الامام سر و ربي يشفيك من لاقريب راهي دايرة حالة فينا

مراحب ام احمد توحشناك ربي يعين و يوفق ان شاء الله

غاليتي ام صابرين الله يسلمك و ربي يجعل مرضك خفيف و عابر راحة نكتب اقتراح في رد اخر نتمنى نعرف رئيك انت و كل الفراشات

hafidha20010 مرحبا بيك حبيبتي و حضنك دافي و حنين ربي يخليك ام و اخت كبرى لينا رانا خياتك الصغار و نتشرفو بوجودك بيننا و كاينة حبيبتنا بعيدة المنال ايضا استاذة و مقامها عندنا كبير

و ماننساش نسلم على ام ادم و ام هزار و فراشات العمر و كل فراشات المحبة

نسوبتي طلي عينا رانا توحشناك انت و ام و سلمى ام ايوب رقية دائمة الشكر ام ياسين ام فاطيمة الرجاء الاماني و الكثيرات ماكتبتش الاسامي لكنكم في القلب


راني عييت من الكتابة و عندي اقتراح نكتبو في رد منفصل باش يكون واضح و نتمى نعرف ارائكم و اقتراحاتكم




للتو انتهيت من التنظيف العميق للمرحاض اعزكم الله الفايونس و الارضية و ايضا قمت بتفريغ 5 بلاكارات للمطبخ غسلتهم بالصابون والجافيل و كي ينشفو نرتب فيهم المواعين و نرجعهم لمكانهم ان شاء الله
البارحة ايضا قمت بتنظيف عميق للحمام الفايونس و الارضية و و غسل كل محتوياته بالصابون و الجافيل
و فرغت 5قجورا بلاستيكة كنت جامعة فيهم الاحذية الغير مستعملة حاشاكم غسلتهم بالصابون و الجافيل و كي نشفو رجعت ليهم الاحذية بعد فرزهم و ترتيبهم
و نظفت سيشوار صغير كنت اخدت راحتي فيه في تقسيم اللحم و غسل الكرشة و الامعاء نهار العيد غسلت الفايونس و الارضية و كل المحتويات الموجودة فيه من كراسي و مستلزمات بلاستيكية دلو و ووو

راني نعمل بشكل عشوائي لكن ان شاء الله ندير جدول تنظيفات و نلتزم به باش نحافظ على نظافة منزلي