الطبعة العاشرة لدورة الرقي بمدبرة منزل مثالية - الصفحة 15

فراشات العمر · 2012-12-30, 07:32

الامس مانظماش بكري صليت ورقدت خطراكش ابني كانت عندو السخانة من 3-حتى5 وانا قاعدة معاه مرضلي في الجنازة يدخل ليا وين نطيبو ويخرج لبرى صدرو شبك عندو كحبة جافة كي ناظ درتلو القارص والزيت الزيتون والعسل ومديتلو شربهم بالسيف حتى تقيء وخرج التشباك لي في صدرو هبطتلو السخانة باه رقدنا

فراشات العمر · 2012-12-30, 07:48

تطبيقي ليوم امس كي نوضني ابني لقيتها 9.30 طيبت لحليب بالرفيس كنت دايراتو للعشاء ورفدت القش وكنست الحالة رحت لحت القش في المشينة ودرت الغداء روز بالسلق تغدينا على 2.30 هههههههههه
قالي راني رايح نخرج قتلو خرج لولاد معاك كي طلعت للسطح ننشر القش لقيتهم خرجو سخفت نروح معاهم عيطتلو بالبرتابل قلي توحي قتلو راني واجدة ورحنا وروحنا الحمد لله شوية راجلي ما يعرفش يسوق السيارة لاكن لاباس
درت العشاء الكسكاس باللحم الدجاج من العيد ما شريناه ودزيت لبيت شيخي
الجانب الديني الصلاة في الوقت الوضوء قراءة القرءان 0 راه قول تحكم في الشيطان اعوذ بالله منو راه قلبلي الدار ظلمة راني كارهة داري سيرتو الكوزينة البرد والظلمة وزاد الشيء قليل كي ندخل ليها العطاس اكثر من 10 مرات الرطوبة
الجانب الجمالي درت عير كريم ترطيب الوجه

~~كبسولة الاحلام~~ · 2012-12-30, 07:56

والله ماني نزوخ عليكم بصح ليوم وين دخلت هنا لان هذا الوضوع جذبني
كون نقلكم ديت دوكتوراه تنظيف المنزل ملي كان فعمري ثناش سنة وضركا مزال الطبخ لازم اروح للمعهد بصح بعيد
وعندي موهبة الديكور على الطراز الغربي
ومايعجبنيش ديكور جزائري
نحب ديكور غربي سامبل وانيق وجذاب ولو كلفني ان انفق الملايير ونحب الحدائق والاشجار والزهور
مام ادوات التنظيف تقليدية وغير صحية
وعلاه ماتخشريش دراهمك على حاجة غالية ومتطورة كيما مكنسة كهربائية وغيرها من ادوات التنظيف
الصراحة ماكاش كيما الحياة المتطورة
دراهم لي تخسريهم لبايس يتحطو فلخزانة علاه ما تشريهمش روبو تاع خمس ملاين تاع الحلوى ولا كويزينيار ملكبار او اي شيء ينفعك على طول
نحب كلش على طريقة الغربية اما ماهو جزائري فمازال تقليدي لايخضع لمقاييس الفاشين والتكنولوجيا

~~كبسولة الاحلام~~ · 2012-12-30, 07:58

فراشات العمر · 2012-12-30, 08:27

هذه لي تهدر هكا زايدة في القطن روحي ابداي الدار من الحفرة حتى للراس ثم تعرفي تقدري تشري الالات المتطورة ولالالا
انا نفظل البالية والنشافة على الالات المتطورة وجاري الخبز ما حلمش بيه هذا لي تشريهم الات روحي اتصدقي بيهم الالات مش ظرورية عندك ايدك لاكن الصدقة بلقايها يوم الحساب

سمراء الدنيا · 2012-12-30, 08:57

اقتباس:

المشاركة الأصلية كتبت بواسطة bant khlil

السلام عليكم
يعطيكم الصحة راكم قايمين
اختي سمراء اجمل شيء عجبني هو تعليم بنتك ربي يحفظهالك راني شفتك في التلفاز حاملة البرتابل تصوري ههههههههههههه الله يبارك

صباح الخير اختي بنت خليل و عظم الله اجرك في فقيدكم
و لاباس على وليدك ربي يجيبلو الشفا ... و الله غير يغيضو هاذ لولاد بالخف يمرضو
شكرا ليك اللي نبهتيني على الصورة ما عبيتش بيها لا خاطر بنتي هي اللي تحطلي الصور
درك نروح نحييها.....

سمراء الدنيا · 2012-12-30, 09:02

بالنسبة للاخت كبسولة الاحلام .....
احنا ما دابينا نديرو كيما راكي تقولي .... بصح حنا تقاليدنا ما شي كي الغرب
حنا عندنا الضياف بزاف و الفميلة اللي يجو يجوزو العطلة على بيها لازم نكثرو
لفراش و الماعين ..... و الديكور الغالي ما دام عندي لولاد الصغار مانشريهوش
ديجا كسرولي شحال من حاجة شابة.... و مرات يجو ضياف بولادهم في نهار يوخدوك...
الوسط اللي تعيشي فيه هو اللي يحكم عليك كيفاش تتصرفي....
و حنا لعرب دراهمنا تروح غير في الطوب و السيما .....

~ حراير ~ · 2012-12-30, 09:08

صباحكم بالخير و الهناء حباباتي كي راكم دايرين
سامحوني امبارح ما دخلتش قلت نعاود لانسطالسيون تاع الميكرو ولالي تقيل مووووووت
كي ديزانسطاليتو جاتني خالتي خيرة مسكينة قعدت تشكيلي من بنت ولدها تهدر في التيليفون بزاف و امها تضحكلها و مخليتها هيهيهيهيه والله ما لقيت وش نقولها لنه كنة خالتي خيرة "جارتي العجوز" نحبها بزاف و صحابات بزاف
المهم كي انسطاليت الويندوز ما حبش يشتغل و ما عرفتش عييت ما ندخلو نيميرو دو سيري والو ايا عيطت لولد جيرانا داه للمختص ما رجعهولي غير على 11 و خلعني قتلني بالخلعة لاخاطر موصية جيراني ما يجونيش بعد المغرب
المهم اليوم راني الحمد لله معاكم

~~كبسولة الاحلام~~ · 2012-12-30, 09:10

زدت فالصوف مش فلقطن
عندك الحق في هذي
وش منحفرة ماعندناش حفرة
صح هذو نسا تاع البيت ولا مجرد دروس باش تعلمونا
والله غير حسيتها مما راها تبهدل فيا
زيدي بالاك نفهم شوية

~ حراير ~ · 2012-12-30, 09:22

تطبيقاتي تاع أمس
على ما نضت قريت وردي "راني واصلة لسورة طه وينكم نتوما"
و صليت الصبح و ذكرت و دعيت دعيت لقيت روحي قلبي مقبوض و الدعاء حاجة من الحوايج الي يريحوني
و بعدين درت الفطور و فطرت و نوضت البنات فطرو هوما لهاو مع بيتهم و انا دخلت للدوش رشيتو بالخل و الكربونات و الماء السخون و عطيتو حكات للبينوار و لافابو و الحيوط رجع كي المراية و زدت نظفت القجور الي فيه و غسلت المناشف و حطيت مناشف نظاف و مسحت المراية طلعت تضوي و نظفت المشينة لافي سيقتو و رشيتو بالمعطر
و بعدين رحت لغرفة الجلوس خرجت فراشاتها كامل و نظفت ليفينق تاعها من الغبررة و سيقتها و جوزت نشافة على الدار بعدين رجعتلها فراشها
و رحت للكوزينة طيبتلهم أرنوبة محشية و روز
راني كي نلقى البلوتوث راني نحط كامل وش نطيب
و حاولت ندير بيش صغيييييرة جاتني شوية شوية بصح كلاوها اليوم نعاود نحاول حتى نجيبها سوا سوا
في العشاء طيبت قراتان او كيما يقولو المصاروة مصقعة

اليوم راني نظفت عادي و جوزت نشافة على كامل الدار لبنات راهم في غرفتهم يراجعو وحدهم
و راني نخزر في الصالة نقول يمكن نديرها نتهنى منها
وش رايكم ؟؟؟؟؟
لعشية نخبركم درك نروح نطيب لغداء راني راح ندير شوفلور
هيا سلام

سمراء الدنيا · 2012-12-30, 09:25

صباح الخير ليلى كيراكي و كيراهم لبنات و كيراها الوالدة
شفتي شفتي البارح جا راجل فطيمة و الله غير فرحتليها كيما فرحتلك....
وانا نخبر في ولادي ...راجل فطيمة جا..... و هوما مخلوعين و باباهم يقوليهم
خلوها هاذيك مسكينة راها عايشة في العالم الافتراضي... حتى حنا راها قريب تفرط فينا ههههههه

سمراء الدنيا · 2012-12-30, 09:28

ليلى البيكاربونات تنظفلك مليح...؟
خبريني باش تنقي لمرايات.....؟
انا تاني راني رايحة ندير شوفلور هههه

~ حراير ~ · 2012-12-30, 09:31

كبسولة وش كاين هدا واحد ما يبهدلك حبوبة
قوليلي تباني راكي صغيرة في السن
هنا مش دورة للتعليم هنا دورة للتطبيق مباشرة يعني رانا نتعاونو باش نظفو ديارنا على اكمل وحه و نحافظو على جمالنا الي هملناه بسبب الدار و لولاد و نحافظو على ديننا
يعني كأننا نتنافسو على هاد الحوايج
بالنسبة لكلامك هو صح الغربيين مسهلين حياتهم و يا ريت نكونو مثلهم في أمورهم الإيجابية لكن ابدا ما تقدريش تستغناي على تقاليدك و عاداتك
و كي تتزوجي و تجيبي لولاد صدقيني تزيدي تلصقي في تقاليدك و عاداتك لأنك تلقايها هاديك هي الأساس في علاقاتك و في طريقة تربية الأولاد
غير بالشوية عليك حبوبة و واحد ماراح يزعفك انت قولي رايك و نسمعوه و احنا نعطولك راينا و خذي بيه لأننا اكبر منك و الي كبر منك بليلة فاتك بحيلة

فراشات العمر · 2012-12-30, 09:32

ليلى واش راهي امك ياك لاباس والميقري راه بخير والبتان راهم يراجعو في الدروس راني حايرة في ولدي كيفاش راجعلو نشريلو حوليات ولا كيفاش

~ حراير ~ · 2012-12-30, 09:32

كبسولة وش كاين هدا واحد ما يبهدلك حبوبة
قوليلي تباني راكي صغيرة في السن
هنا مش دورة للتعليم هنا دورة للتطبيق مباشرة يعني رانا نتعاونو باش نظفو ديارنا على اكمل وحه و نحافظو على جمالنا الي هملناه بسبب الدار و لولاد و نحافظو على ديننا
يعني كأننا نتنافسو على هاد الحوايج
بالنسبة لكلامك هو صح الغربيين مسهلين حياتهم و يا ريت نكونو مثلهم في أمورهم الإيجابية لكن ابدا ما تقدريش تستغناي على تقاليدك و عاداتك
و كي تتزوجي و تجيبي لولاد صدقيني تزيدي تلصقي في تقاليدك و عاداتك لأنك تلقايها هاديك هي الأساس في علاقاتك و في طريقة تربية الأولاد
غير بالشوية عليك حبوبة و واحد ماراح يزعفك انت قولي رايك و نسمعوه و احنا نعطولك راينا و خذي بيه لأننا اكبر منك و الي كبر منك بليلة فاتك بحيلة