موضوع مميز طبخ الأعراس - الصفحة 14

sinner · 2015-05-09, 11:05

ايه اختي حنا عندنا نحلو المرقة تاع الطعام و الممرود بصح مش ياسر يعني كل واحد وذوقو كاين لي يحبها حلوة ياسر وكاين لي شوي

روح مراد · 2015-05-09, 13:01

شكرا سينر على المعلومة الجديدة عمري إذا كنت عرفتها من قبل

السوسن ا · 2015-05-11, 11:23

من المؤسف تجاهل طلبي..

روح مراد · 2015-05-12, 09:03

و ما هو طلبك يا ترى؟

السوسن ا · 2015-05-13, 09:11

السلام عليكم وجزاك الله خيرا على هذا العون والجهد المبدول.في الحقيقة مند مدة وانا ابحث على مسشار في الطبخ .عندي مجموعة من المطالب .1_مثال20 شخص كم يلزم من الماء والملح يعني الكمية عند الطهي.2_إذا طيبت العدس واللوبيا باللحم نطيبهم وحدهم والمرقة وحدها اوكيف لان العدس واللوبيا يطيبو قبل اللحم اي اللحم يطول.3_طريقةتحضير الحمص يعني نطيب الحمص من جيه والمرقة من جيه اوكيفاه4_ ملاحظة=عندي مشكل في كمية الماء عند التمراق.وشكرا

روح مراد · 2015-05-14, 12:15

صباح الخير سوسن رايحة نجاوبك على حسب طريقتي و ماذابيا لوكان كل أخت تمد طريقتها هاكا نتبادلو الخبرات و نعاونو في بعضانا
راني مديت من قبل طريقة القيس أحنا نطيبو عادي مثلا الشربة و نحسبو الكممية اللي نعرفو نطيبوها اشحال توكل و بهذه الطريقة تضاعفي كل شيء مثلا قدرة صغيرة توكل 6 اشخاص عودي أحطكي هاذيك القدرة هي الكيل كي يكون عندك 20 عبد ديري 4 قدرات صغار في قدرة كبيرة و الملح ما كاش الكيل عينك ميزانك و ذوقي و خلاص
بالنسبة للعدس و اللوبية و الحمص باللحم
أنا نحط اللحم يتقلى عادي في كوكوطا و من بعد نمرق و نغلق الكوكوط في هذا الوقت نحط العدس في قدرة أخرى مع شوية فقط ماء و شوية برك ملح و فلف اسود و عود كرافس و نخليه يطيب جيه كي قريب يطيب اللحم نفرغ عليه العدس و نرجع نغلق الكوكوط و نزيدلو 10-15 دقيقة و نطفي
نفس الشيء بالنسبة للحمص و اللوبيا فقط هاذو نضيف لهم الكمون
التمراق مشكل نتاع الكثير
المهم قبل ما تبداي طيبي أحكمي كيلي الماء في البداية مثلا ندير مرقة نتاع الكسكس اشحال من شخص ياكل و أشحال يستهلك كل واحد من مرقة نفرضوها بول نتاع شربة و عندي مثلا 5 اشخالص ياكلو كي تمرقي فرغي 5 بول شربة ماء في القدرة و زيدي 2 إذا كنتي طيبي في كوكوط و إذا في القدرة ديري زيدي 4 إضافيين قيس الطياب و في الأخير يبقالك 5 نتاعك اللي تستحقسهم غنشاء الله نكون قدرت نوصل لك الفكرة

nadiatlemcenia · 2015-05-14, 16:10

موضوع رااائع استفدت منه كثيرا بارك الله فيك

روح مراد · 2015-05-17, 12:31

و فيك بركة أختي العزيزة نورتي الموضوع

anais lily · 2015-05-19, 11:44

موضوع رااائع

روح مراد · 2015-05-20, 08:27

الموضع رائح بوجودكن

أم همام السلفية · 2015-05-25, 16:09

baraka allaho fik
ana omi w khaleti yetayebou f a3erassena akel rawe3a khassatena chorba w ki sekesitehoum kalo li faweri l ferik m3a za3eter w ze3itera tefewira waheda 9abl ma taremih f chorba

أم همام السلفية · 2015-05-25, 16:11

w thani hna f chereba nediro khedera zerodiya w couregette ww nerhiwhoum 9abl ma nermiw l ferik

أم همام السلفية · 2015-05-25, 16:12

w okhet nessit chekoun hiya kan 9alet lena f chetiteha nerhiw chewaya hmissa tayiba w nezidouha f mer9a

أم همام السلفية · 2015-05-25, 16:13

hada wach na3erf
baraka laho fik m
mawedho3 rawe3a
rabi yahefedhek

روح مراد · 2015-05-26, 12:34

أختي أم همام بارك الله فيك على المعلومات
تفوار الفريك عمري إلا سمعت بيه و لكنها فكرة جديدة رايحة نجربها إنشاء الله و نرجعلكم الخبر
بالنسبة للخضر أحنا ثاني مرات نزيدوها مع الشربة
بيناتنا كي نديرو الشربة في المناسبات العادية خاصة إذا كانت وفاة أو عشاء لللأقارب نضيفو الخضرة و لكن شربة في مناسبة كبيرة و مهمة ما نزيدوهاش
بالنسبة للحميصة المرحية ما سمعتش بيها و لكن نضن باش تخثار المرقة رايحة نجربها ثاني
أخواتي العزيزات أسعدني مروركن