يوميات عضوة

[نخله.]

ام عبوده اول مره نسمع بالر ب مع السفه كي حبو راجلك ديري الرب و زيدي العسل و الدهان اللي حب حاجه يسربي منها

الطاجين اشريه واجد ولا كوموندي عليه

بالنسبه للعدد على حساب الكبر

الجدي يكفي 5/7 رجال و العلوش10 اما النعجه تجي زاكيه 10/15

يعني 4 ما يكفوش على الاقل 8 و الله اعلم وماتكثريش السفه و الشوربه راهم يطيحو على المصور برك

السفه كل 1 كيلو لـ10 رجال بصح راهم يشبعو لحم يعني ديري 6 او 7 يكفو


قولو ناس لغواط يضحكو على الرب ماديروهش وحدو

سبعي راه حذايا سقسيتو قالي عمري ما سمعن بيه مع انو يتعرض على المشوي اكثر من مرتين للشهر راكي تعرفي الاطارات وجمايعهم

المشوي ما يتقطعش يتحط في سنيوتو اللي طاب فبها تع 2 ماتر و راهو اللحام يداويه اذا حبيتو يعمي ما ديريلو والو تفاهمو معاه تدو كلشي واجد لكوشة السنوسي

بصح دبرو فالسنيوات وغلفيهم بالالومنيوم لخاطر الحطوط فيهم


ربي يعاونك ابداي من اليوم وجدي ودسي كاين للي طيبو المراقي من الليل تطلق بنتها و السلايط ما تكثريش سلاطه خس وممكن تزيدي حميص او دنجال

العرضات الكبار ما يكثروش فيهم


قوليلي وينا زاويه راهم قع تاوعنا هههههههههههه

[ام عبودة]

نخولة يا نخولة
الزاوية تاع عين ماضي
والسفة سولت زوجي قالي في افلو
على خاطر انا عمري ما سمعت بالرب في السفة بصح على خبرك ندير العسل واخر رب واخر عيل سينو يبعثني مخملة لدار بابا في المعمورة
وحنا دايما نطيبو عند السنوسي من كنت عند دارنا ودواء يعجبني ويجي بنين يهبل
وعلى المشوي دايرين الخروف نظن اربعة كبار يكفو
هو صحيح لازم يتكل كامل مجمول بصح انا دايرة 17 في كل واحدة 6 اشخاص يعني كيفاش ندير
لو كان غير 50 نقدر ندبر راسي في التسربي
المهم الله يجعلو معروف مقبول علينا اجمعين والطاجين قالي راجلي ما كلاه
دايرة سلاطة وحميص وشربة انا من ناحية النصيب لا لا ما نتقلقش الغد باذن الله نجيب المواعن نغسلهم ونمسحهم مليح وعندنا الوسع نرتبهم
الخميس الصباح بكري نوجد الشربة والسفة والوالح السلاطة العشية نبد نوجد مليح يبقى غير يدو الشاي عندي سلفي يحطو عجب غدوى بربي نخرج نشري المكسرات ونحمصهم صوالحي كامل شريناهم اليوم من خضر لوازم الديسير الخميس الصباح
العرضة الكبيرة والصغيرة ماشي كيفكيف
خليني اليوم نلهى براوية والغد ساهل الحال

[نخله.]

صباح النور ام عبوده حسبتك على الزوي تع هنا

كي عادت لهيه لازم ديريلهم الرب تاعهم


على فكره راكي كنتي جارتي انا ثاني متربي فلامعموووووووووووووووووورهه ههههههههههه


اليوم نضت 7 صليت وفالمعمره وجدت الفطوووور زبده معجون برك اهيش نافحه هاذ الايام ودرت العدس يشمخ فطنت الغاشي فطرو وراحو وانا طلعت حفظت آيات من الذاريات و 5 من البقرة

و جيت للميكرو قبل ما نبدا الصوالح

في لمان يوم سعيييييييييييييييييييييد و نشييييييييييييييييييييييط

[ام عبودة]

صباااااااحكم سعيد
نخولة تبارك الله راكي نشيطة
والله يبارك عليك في الحفظ انا راني هاذو الايامات ننسى بزاف حتى قلت للطبيب المرة اللي فاتت مدي دواء للتركيز والذاكرة
المهم اليوم الحمد لله الغبار ما كانش بصح مغيمة
عولت نغسل الحوايج نلقى بختة فاسدة وااااااع راني غير بيدي اهناهناهناهناهن
وارفدت الغرف كاملين نسيق ونمسح الغبرة فتحت الشبابيك وراني نزرب باش نخرخ نكمل صوالحي قلت غدوة بربي ندخل غير للكوزينة
الفطور اليوم خاطيني
هيا نروح نكمل ونوليلكم تهالاو في ارواحكم

[ام عبودة]

السلااام عليكم خياااتي وينكم ياسمين وعيدة ووووووووونهى وووووووو والله حكمتني الزهايمر وااااع
الحمد لله العرضة دايرينها يوم الجمعة هكا اليوم كملت مع راوية المراجعة
الصباح خرجت جبت مواعيني عولت نغسل ونوجدهم كي عيتلطي زوجي قالي بدلت النهار ايا قلت نحكمها برقدة. طحت بحذايا ميمي فطنت نلقى راوية وحقو طايحين حتى هما نظت مع المطر اممم روووعة
شربت العصير مع الاولاد وطبقت الحوايج ورجعتهم لبلايصهم
درت منا ومنا وراجعت مع راوية شوي رجع الزوج وجدتلو الشاي هو خرج رحت الى المطبخ باش ندير العشاء لقيت التليتلي فاظل من الفطور ايا قلت ما نطيبش
وراني نحمل في صور باش نحطهم ههههه

[ياسمين1990]

السلام عليكم ورحمة الله
اهلا الاخت ام عبودة يعطيك الصحة يا الفحلة ما شاء الله مرة ونص ربي يكون في عونك مزية تأجلت العرضة هكذا تقدري توجدي براحتك
رانا غير هنا ههههههههههه
نحاول نخدم واش نقدر عليه مع المطبخ والماعن ميخلصوش والغسيل نتاع الحوايج ومشاكل الاولاد المهم ربي يكون في العون
بعد ما نكره من هذوا نهرب الى الخياطة نفش فيها غلي ونبرد على قلب هههههههههههه
شكرا على السؤال :

[ام عبودة]

هاذي تمرميدة لا بانتور




اوووف بعد ما تنقات الحالة



وهذا المكتب. بعد ما نظفتو قبل ما صوارتوش







وهذه الغرفة كنت شمستها





وهذه اليوم رفدت كامل الغرفة وسيقت


والعشية مسحت المرايات والموبل هذا واش لحقت نصور

[ام عبودة]

ياسمين حنونة واش راكي كي قلتيلي الخياطة تنهت ااااااااااااا
على زمان فاااات
جاء زوجي وقالي حطيلي العشاء قلتلو دايرين تليتلي تاع الفطور وهو مبرق عينيه فيا رووووحي دبري عشاء اخر
الحمد لله قليت شوي بطاطا ودرت صوص تومات وحمرت شوي لحم في الكوكوت مزية صغير طاب بالخف وحطيتلو مع العصير والديسير وانا ماقدرتش نتعشى الله يحفظكم راهو فمي قاتلني من ليزافت شريت الصباح الدواء وما صبرتش لا فطور ولا عشاااااء واااااااااااااااااع
هياااا نروح نجول شوي في الاقسام ومن بعد دوووووودوووووو

[ام عبودة]

صببببباحكم سعيد ونشيط
الحمد لله طلعت الشمس. راني مازال في بلاصتي والله ما قدرت نوض البارح باية قاعدة مع ماهر صدرو داير فيه حالة وعلى خطرات قلت نوض باباه ندوه الى السبيطار غير م الاذان الاول رقدنا ايا نوض الى المطب باش نوجد القوة لقيت عزوجتي سبقتني بصح الدنيا مقلوبة يا لطيف من هذا النهار نلقى الفول طاير في كل بلاصة يا وخذي واش كاين. دخلت عزوجتي قلتها غير الخير قالتلي الكوكوت انفجرت مزية هي كانت في غرفتها. الله يستر راهي قبل عامين انفجرت عليها وحرقتها وربي سترها
انا دايما نسمع من الكثيرات يقولك الكوكوت قنبلة ونخافو منها ردوو باااااالكم انا ما نخافش منها قاع بصح اليوم توووبة. توووبة
وحتى انتم ردو بالكم
ظرك نحفظ شوي الا قدرت ونوض نخمل الحالة وبلاك ندي ماهر الى الطبيب مع راوية. ختى هي راهي في حالة
المهم الله يعينا ويعينكم

[ichrak03]

سخفتيني نتاع الصح انا عندي زوج بيوت وكوزينة في دار شيخى ما تدخلهمش الشمس
كيما نفرز ما يبان والو ماديق
ربي يهنيك ويباركلك في دارك
ادعيلي ربي يعطيلي دار و نحكيلكم على يومي كيما راني متمنيا ان شاء الله

[ام عبودة]

المشاركة الأصلية كتبت بواسطة ichrak03

سخفتيني نتاع الصح انا عندي زوج بيوت وكوزينة في دار شيخى ما تدخلهمش الشمس
كيما نفرز ما يبان والو ماديق
ربي يهنيك ويباركلك في دارك
ادعيلي ربي يعطيلي دار و نحكيلكم على يومي كيما راني متمنيا ان شاء الله

ان شااااء الله خيتي بصح راني نسااالك ههههه في دار شيخك
عيشي يومك حتى يجي غدك
باش تبقاي ناشطة الى غاية ما يجيك دارك
والله يصبرنا ويصبركم على الشغل

[ام عبودة]

راهو اليوم يهبل
هذا الربيع بمعنى الكلمة
هذه اول صورة من قلب الحدث





[/IMG]

[نخله.]

صباح النووووووووووووووور

ام عبوده وش من نوحكيتي عليها لبارح؟؟؟ وينك؟؟

انا لليل كي جا راجلي هبطت نستقبلو طحت في الدروج مزيا بنتي في يدي ما صرالها والو

انا بايته في حاله من ضهري واسفلو وصبحت فلفراش راهي دنيا مقلوبه

وذرك جا وليدي جاب علامه نع اختبار دارو لبارح نفس السوجي للي راجعنا فيه من النت دا 8 المعلم غالطو على الاقل 9/30 نروحلو ولا لالا وش رايكم؟؟؟

[ام عبودة]

يا وخذي نخولة ياخي غير الخير
سلامااات عليك وما تشوفي شر
وانا نقول نخولة غاااايبة اليوم
انا على عرضتك غدوة برك. قالولي نجو الجمعة من بعد العصر قلتلو نديرالقاطو مع القوة والشاي قالي ما يحبوش ؟؟؟. ما فهمت والو
قال ديري لاتاي مع حويجات ومن بعد يبداوو في الهلالة تاعهم انا مافهمتش واش هي الهلالة
ومن بعد غير يكملو مع المغرب نبدو نسربو في العشاء اليوم زدت كملت واش ناقصني من المواعن. والعشية نخرج مع السبع على قولتك هههههه نشري زرابا ومطارح وفراشات عندنا غرفة كبيرة من لهيه جهة العمال واسعة بزاف. قلت نفرشها بالمطارح في الارض والطوابل هكا باش تكفي الغاشي

[ام عبودة]

نخولة اذا كان الموضوع كامل فتحو صحيح وخط وليدك مفهوم ومنظم غير روحي على خاطر اذا ينح على الخط والتنظيم ينح نص نقطة مش نقط.ة ونص