~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~ - الصفحة 133

omelbanin · 2016-05-30, 11:59

مرحبا بك ام عبد الرحمان بيننا ،البيت بيتك انشالله نستفادي منا ونستفادو منك حبيبتي.
حبيت نسقسيكم ،شريت لي مول نتاع لي كورني تاع الحديد، واش نديرلهم كي نجي نستعملهم اول مرة ،قالولي ما تغسليهمش يتصداو.

كاميلياس · 2016-05-30, 12:23

السلام عليكم اخواتي حبيت نشكرم على كل ماتقدموه في هادي الدورة والله استفدت منكم كثيرا رجعت كي الفراشة من حاجة الحاجة نقول علاه هوما خير مني انا واش خصني ونوض لدنيا اول حاجة نديرها كي نوض نطل عليكم نشوف اخباركم وتطبيقاتكم ونطمن عليكم وسرتم مثل عائلتي واول مرة نحس بحلاوة رمضان لاني بعيدة على اهلي ديما نحس روحي غريبة لكن بفضلكم جاني حلو بارك الله فيكم كل وحدة باسمها واتمنى ان تقبلوني معكم

omelbanin · 2016-05-30, 12:32

يا مرحبا اختي كاميلياس وكل من التحقت بنا.

كاميلياس · 2016-05-30, 12:41

بارك الله فيك اختي ام البنين على الترحيب ربي يعيشك اختي

ام صفصف · 2016-05-30, 12:48

صباح سعيد لكل الفراشات
ام هاجر الحمد لله كي راو يتحسن وليدك وربي يتممل الشفاء ويعينك
ام البنين بالنسبة لي ليمول كامل نغسلهم ونشفهم مليح مايصرالهم والو ويزيدو الاخوات ايفدوك
الاخوات الجديدات مرحبا بكن وانشاء الله تستفاد وتفيد

حياتي كلها امل · 2016-05-30, 13:02

اهلا اخت كاميلياس الدار دارك واحنا كلنا اهلك شكرا لك ام صفصف ربي يحفظلك وليداتك
ام هارون انا ليمول تاع التغتولات او الدزيريات كي نشريهم ندهنهم بالزيت ونديرهم مدة في فور سخون ثم نستعملهم ونولي كل مانستعملهم نمسحهم فقط ما نغسلهمش هكذا ما يتصداوش .

omelbanin · 2016-05-30, 13:11

شكرا ،شكرا حبيباتي ام صفصف،وام هاجر على الاجابة .
ام متين وين راكي حبيبتي ما بنتيش اليوم. انشالله تكوني مليحة انت والاسرة.
ام لينا طال غيابك علينا توحشناك.

arwa alaa · 2016-05-30, 13:30

السلام عليكم يا فراشات واش راكم دايرين فيها
تقرير اليوم
نضت صباح صليت ورجعت رقدت حتى لسابعة وجدت الفطور كي جينا نفطرو ناظو الفلاليس وليت نجري منا ومنهيه فطرتهم وفطرت لميت المواعن
ودرت حساء الجبن يعطيك الصحة سمراء على الوصفة ودرت كسرة محشية طماطم وتونة وزيتون وفرماج ومعدنوس ورحت لميت الدنيا ودخلت القش طبقتو
ورحت لدوش غسلت وغسلت لي تابي نتاعو وسيقتو ومنبعد رحت لتولات حشاكن وغسلتلو الحيطان وغسلتو مليح بعملاق وسيقتو ورحت للكولوار غسلت الحيطان وغسلت الباب من برى وكي كلت سيقت الدنيا وحطيت الغداء للاولاد ودخلت ادوشت وكي خرجت جاء الزوج تغدينا رايحة نرتاح في القايلة نرقدهم ونرقد معاهم .........باي لي عودة ان شاء الله

روضة 88 · 2016-05-30, 15:04

لبنات من فضلكن

راني ربة بيت مبتدئة اذا ممكن تقولولي كفاه تغسلو لاوات انتاع المخاد

نسمة صبح · 2016-05-30, 16:18

كيف حالكم فراشات..انا مريضة شوي..لا قريب..نضت ف الليل و شربت ماء بااارد

تقرير اليوم

غسلت الىباب و لكولواغ و الدروج ز نظفت الحمام اكرمكم الله لكن مش راضية على التنظيف مقدرتش نحك بضمير. متعبة قليلا..ريحت شوي مبعد نضت عقمت لفريجيدار...

قولولي حبيباتي المختصات ف الترحاااال ههههه راني راح نبعث حوايجي جهة راجلي لا شومبغ و فريجيدار ز شوي حوايج..خاطر نص اداه لمرة لي فاتت ف طونوبيل ..كيفاه ندير باه نحافظ على لحوايج ميتكسروش و فريجيدار كيفاه نديرلو؟؟ اعطوني افكار

روضة اهلا بك حبيبة ..حبيبتي انا نلوح لمخدة كيما راهي ف لماشينة خاطر غلافهم رهيف..كي تتغسل و تشيح افتحيها و حلي اللواط كيما نحلو الصوف و عاودي احشيهم .

نسمة صبح · 2016-05-30, 16:22

ما شاء الله أروى على النشاط..نتحفز كي نقرا يومياتك..و نحسك تتعبي بزااف..ربي يباركلك في صحتك..واش اخبار لكروشي كاش خدمة جديدة.

حياتي كلها امل · 2016-05-30, 17:16

بشفا عليك حبيبتى نسمة وبنسبة للمواعن باه ميتكسرولكش لمديهم في الجرنان وديريهم في الكراطن او لمديهم في للملابس وديريهم في الكراطن.
وكيما الثلاجة ماعنديش فكرة في النقل بصح كي تهبطيها وتحطيها في مكانها متشعليهاش حتى تمر 6ساعات حتى يهبط الغاز تاعها.ان شاء الله انكون افتك

ام صفصف · 2016-05-30, 17:32

اختي نسمة انشاء الله نحول نفيدك بتجاربي البسيطة فالرحيل
ارمي او مدي الاشياء الي ماتحتاجيهاش باش تخففي على روحك
لمي لكراطن بمختلف الاحجمم والجرنال قد ما تقدري و شريط لاصق وقلم يكتب عريض
شوفي لفريجيدار نحيلو الاجزاء الي داخل ولهوثيهم فالجرنال وحطيهم في كارطون ولفريجيدار لهوثيه في زورة قديمة وربطيها مليح باش مايتخبش
وكذلك بانسبة للاشمبغ بعد ماتفككيها اي جزء تخفي عليه كيما لمرايا ديريه في حاجة قديمة وربطي عليه مليح
جميع الاشياء الي تخفي تتكسر ديريهم فالجرنال ثم ستفيهم فالكرطون الاكا نثقال علبة صغيرة الا خفاف كبيرة
واكتبي فالعلب باتفصيل مثلا اواني القهوة(المطبخ) كتب (الصالون) وهكذا وحتى كي تستعملي الاكاس الكبيرة نفس الشئ اكتبي بطاقة ولصقيها مثلا ملابس الشتاء
هكذا تعرفي وين تحطي العلب والاكياس وواش تفتحي حسب الاولوية
وربي يسهلك واي سؤال تفضلي

كاميلياس · 2016-05-30, 17:52

مساء الخير اخواتي شكراعلىالترحيب ربي يخليكم اختي نسمة حبيت نفيدك فالرحلة لاني كل عام في بلاصة المهم لماعن لي ماتحتاجيهمش بزاف ديريهم في كارطون وحدهم بعد ما تغلفيهم ب الجرنان واكتبي فيه واش حاطة باه كي تحتاجي حاجة ماتقلبيش الدنيا كامل انا كنت القش ونحطو فالكراطن ونكتب تاعي ولا تاع زوجي والثلاجة كنت نديرلها السكوتش فالبيبان باش با يتفتحوش وحاولوا تحطوها واقفة وماتمشيهاش حولي ست ساعات حتى يركح الغاز ومثلا البتية كي تكون كبيرة نعمرها حوايج باش نقص الكرطن ونستغل الاماكن الفارغة كنت الكوكوط نحط فيها مثلا لفناجل او لمغارف المهم انقص الحوايج قد مانقدر وحاولي القش كامل تلميهم في اكياس كبار واكتبي فيهم او لصقي ملصقات باش تعرفي واش فيهم وكاش متتفكرت نقولك

كاميلياس · 2016-05-30, 17:55

بعد ما كتبت قريت رد ام صفصف يعطيك الصحة على الافادة
تفكرت نسمة قولي لزوجك يجيبلك الكرطن من الشركات انا لكراطن لي جابلي معاهم بونجات كنت نديرهم في جناب الكارطون باش مايتكسروش لماعن