الى ام اسيد1 وكل وحدة حاصلة واش الطيب - الصفحة 133

crono · 2015-01-11, 15:23

اقتباس:

المشاركة الأصلية كتبت بواسطة ام الخير 05

صباح الخير ام حمزة crono شكرا على الترحيب انا سعيدة جدا بيكم احس انكم معيالانكم غيرتو الكثير من روتين حياتي بدون ما ننسى نحيي الجميع

crono · 2015-01-11, 15:31

اقتباس:

المشاركة الأصلية كتبت بواسطة ام سوهيل

اسلام عليكم وش راكم لباس ام حمزة بي الشفاء عليك سلامي للجمييييييييييييييييييييييييييييييييييييييع دون استسناء راني طولت عليكم الله غالب كنت في دارنا وكي جيت لقيت لنترنات مقطوعة وععععععععععععععع

المهم جبتلكم صور عيد ميلاد وليدي ربي يحفضه وطول عمره وجعلهلي منا الصليحين وابنا ئكم بي المتل اميييييييييييييييين

وهدا عشانا لبيري وسلاطة

على سلامتك ام سوهيل عندك الحق غالبا ما يكون السبب من مركز رفع الصور
من يومين و انا نحاول نحمل صور من مركز الخليج و يقولولي حدث خطا
راني سجلت في الجلفة للتحميل و ان شاء الله ما يخيبنيش خرجتلي صورة وحدة عيد ميلاد سعيد ربي يحفظو و يطول في عمرو و عمرك حتى تزوجي أولاده

crono · 2015-01-11, 15:32

اقتباس:

المشاركة الأصلية كتبت بواسطة ام اسيد1

السلام عليكم ورحمة الله و بركاته

وعليكم السلام ورحمة الله و بركاته

بيلسان91 · 2015-01-11, 18:16

شكرال كل واحدة جاوبتني

ام هاديل وياسين · 2015-01-11, 19:10

السلام عليكم

بشفى عليك ام حمزة والحمد لله كي طمناتك الطبيبة والنظرات ماشي عيب لازم نديروهم

قبل ما يطلب منا الطبيب الصحة متتعوضش وكي تجي العينين حاجة اخرى
الله يسلمك روح مراد واش راكي اختي نسلم على اخت كورنو صدفات ام اسيد ام سوهيل تغرينة وكل الاخوات الجدد

ان شاء الله منسيت حتى وحدة

غزالة الصّحراء · 2015-01-11, 19:22

مساء الأنوار والخيرات . محملّة بكلّ حبّ ووئام لكلّ من أضافت للصّفحة إشراقة ، وتركت اسمها يلمع بين أحضانها. سعيدة أنا بالعودة إليكنّ بعد غياب . واللّه والديّا طلبا منّي صنع الحلويات لأخوتي فانشغلت بالأمر. أعملتلهم البقلاوة + الشراك لمسكر + حلوة الجلجلانيّة بالنّيسلي أنتاع أم أماني. وخرجولي روعة. وبتت في دارنا يوم السبت ورجعت اليوم. وخليت أولادي بسلامتهم لوحدهم في الدّار. ولمّا أرجعت القيت كارثة الأعمال الشّاقّة تستناني. تعرفوا الذراري. بصّح ربّي يحفظهم من كلّ سوء ويسعدهم. معليش راني أنخمّل غير بالشويّة حتى انرجع الأمور لطبيعتها.
المهم. سلامي الحّار والخاص وتحياتي الخالصّة لأم حمزة، روح مراد، صدفات، كرونو، وكلّ جديدة. ولكلّ جديدكنّ. دون أن أنسى أيّة واحدة .
فقط أريد أن أقول للأخت سلمى: ربّي يعوضك . وخير اللّه واسع وكبير. وكاليوم أتفرحينا بمولود جديد ياربّ . لكن عليك أن تتعلّمي من الخطإ.

غزالة الصّحراء · 2015-01-11, 19:29

اقتباس:

المشاركة الأصلية كتبت بواسطة ام حمزة22

ربي يعوض عليك حبيبتي سلمى
والله تالمت لهاد الخبر
شوفي حبيبتي انا فقدت طفلان وربي عوضني ب4 والحمد لله
ما نكدبش عليك المرة الاولى انا تان بكيت بكاء شديد بصح مع الوقت راح تنساى لم تحملي المرة الجاية بادن الله

حبوبتي أم حمزة سلامة اعيونك ياربّ والحمد للّه على انّك بخير. وياربّ العائلة أنتاعك ثاني اتكون بخير.. واللّه الواحد لازم يعمل مراقبة طبيّة . وسلامة زوجك. ياربّ ما يجيك غير الخير لدارك.

غزالة الصّحراء · 2015-01-11, 20:10

اقتباس:

المشاركة الأصلية كتبت بواسطة بيلسان91

مساء الخير
نشالله يا رب نلقا عندكم الاجابة
حنا فالشرق ديما فمنساباتنا نديرو المقرود بصح منزيدولوش الفرينة
اليوم درت مقرود النقاش تاع ام اماني هي الوصفة كما تعنا زايد فيها غير الفرينة
اكم تلقاو الوصفوفالرابط هادا
https://www.djelfa.info/vb/showthread.php?t=1175289
جاني الغرس كي طاب شوية يابس
قولولي وش لازم ندير بش يجيني طري

أهلا بيك أختي بيلسان91 ياربّ اتكوني بخير. قوليلي يادرا عاودتي جرّبتي حلوة الجلجلانيّة بالنيسلي؟؟غير جربيها راهي هايلة.
أما عن سؤالك عن المقروط. أنا ثاني حبيت أنجربو بطريقة أم أماني ربّي ايخليهالنا. بصّح أنا حاليا نعملو كيما نعمل لمثقبة ايجيني ايذوب في الفم. اما عن الغرس أنا أنفورو . ثمّ أنقيه. ونضيفلو اشويّة مارغارين + الفاني . أنموت على لافاني. هاذا ماكان أولادي مايحبوش كثرة العطور في المقروط. . المقروط ايحبوه بالكاوكاو. أما لمثقبة نعملها بالغرس أناتع الميزان. ماشي هذاك ألي يطحنو فيه حتى لعظام. لالا. ولازم لمّا اتطيبي المقروط اتكثري الزيت. يعني اتغطي الحبات.

غزالة الصّحراء · 2015-01-11, 21:41

اقتباس:

المشاركة الأصلية كتبت بواسطة روح مراد

صباح الخير أم حمزة، corno، صدفات، غزالتي، أم اسيد و هديل و espoirووووووو نتمنى تكونو كامل بخير

أين أنتنّ؟؟؟؟؟؟؟؟؟؟؟ياربّ اتكونوا كامل بخير. واللّه غير الصّفحة بدونكنّ مثل الصّحراء القاحلة. او السّماء بدون نجوم . ياله هي تنتظر منكنّ التّنوير . أو على الأقلّ زيارة خفيفة بردّ يردّ الرّوح.

غزالة الصّحراء · 2015-01-11, 21:47

اقتباس:

المشاركة الأصلية كتبت بواسطة mon espoir

سلام الله عليكن يا الغاليات.. ان شاء الله تكونوا بخير.. واش راكي اختي ام حمزة يارب تكون جميع العائلة في صحة جيدة.. أعرف أنك مشغولة بكثرة في المنزل و معانا الله يعطيك الإعانة.. بما انو الصفحة هاذي لكل وحدة حاصلة واش طيب..عندي حبيبتي بنتها عندها السكري.. اسال الله تعالى ان يشافيها هي و جميع المرضى.. هي تبحث عن وصفات لسكري الاطفال ..ارجوا كل من عندها معلومات ما تبخلش عليها..اذا رايتي ان االصفحة ليست هي المكان المناسب للموضوع..اين اضعه..مع الشكر مسبقا

أهلا وسهلا بيك أختي =mon espoir. ياربّ اتكوني بألف خير. تصفحي هذه الصّفحة لعلّك تجدين منها جوابا لسؤالك.
https://www.djelfa.info/vb/showthread.php?t=513111 مع تمنياتي لها بالشّفاء العاجل. ولو أنّ الأمر ليس بالسّهل . لكن القليل من الرّجيم + الرّياضة يمكنها التخفيف من حدّة المرض.

بيلسان91 · 2015-01-11, 22:16

اقتباس:

المشاركة الأصلية كتبت بواسطة غزالة الصّحراء

أهلا بيك أختي بيلسان91 ياربّ اتكوني بخير. قوليلي يادرا عاودتي جرّبتي حلوة الجلجلانيّة بالنيسلي؟؟غير جربيها راهي هايلة.
أما عن سؤالك عن المقروط. أنا ثاني حبيت أنجربو بطريقة أم أماني ربّي ايخليهالنا. بصّح أنا حاليا نعملو كيما نعمل لمثقبة ايجيني ايذوب في الفم. اما عن الغرس أنا أنفورو . ثمّ أنقيه. ونضيفلو اشويّة مارغارين + الفاني . أنموت على لافاني. هاذا ماكان أولادي مايحبوش كثرة العطور في المقروط. . المقروط ايحبوه بالكاوكاو. أما لمثقبة نعملها بالغرس أناتع الميزان. ماشي هذاك ألي يطحنو فيه حتى لعظام. لالا. ولازم لمّا اتطيبي المقروط اتكثري الزيت. يعني اتغطي الحبات.

شكرا كي تفكرتيني وسقسيتي عليا
لا لا معاودتوش منهار هاداك اللي حكيتلك فيه على القاطو هاداك
زدت جربت خبز بالياوورت الطبيعي صلحلي بصح جا مزيييت بزاااف طيبتو مرة قبل غلطت فطريقة الطياب تاعو بصح كي صححتها جاني مليح
قاطو تاع الجلجلانية او فبالي نشالله نهار نعاودو ويصلحلي نصورو ونحطو هنا تشوفيه

صدفات · 2015-01-12, 09:54

صباحكم سعيد يا بنات
و بصحتكم العام يا رب يكون عام الخير على كل المسلمين و ينصرنا على من عادانا يا رب
أم سوهيل كل عام و ليدك بألف عافية و تفرحي به
أم هديل روح مراد أم حمزة غزالة كرونو ربي يهنيكم و كل وحدة من حبايبنا ما ذكرتش إسمها تسمحلي

غزالة الصّحراء · 2015-01-12, 09:57

اقتباس:

المشاركة الأصلية كتبت بواسطة بيلسان91

شكرا كي تفكرتيني وسقسيتي عليا
لا لا معاودتوش منهار هاداك اللي حكيتلك فيه على القاطو هاداك
زدت جربت خبز بالياوورت الطبيعي صلحلي بصح جا مزيييت بزاااف طيبتو مرة قبل غلطت فطريقة الطياب تاعو بصح كي صححتها جاني مليح
قاطو تاع الجلجلانية او فبالي نشالله نهار نعاودو ويصلحلي نصورو ونحطو هنا تشوفيه

ولو أختي بيلسان91 واللّه غير دائما صاحبات الصّفحة الرّاقيّة هذه في قلبي حتّى وإن لم أسجّل الدّخول. أصبحت كلّ واحدة منكنّ مثل أختي. أمرها يهمنّي كثيرا. والحمد للّه أنّه نجحت معاك الطّريقة أنتاع إعداد خبز الياغورت لأم أماني اللّه يحفظها. ومرّة أخرى قبل أن تبدئي في أيّة وصفة تصفحيها جيدا. أنا أقوم بطبع الوصفة بعد تعديل الصور . مثلا طريقة إعداد خبز الياغورت قد تكون في 4 صفحات . لما أنقلها على الوورد أجعلها في صفحة واحدة. المهم أتبّع الطريقة والورقة تحت مراقبة عيوني. باش مانغلطش. مادام القاطو انتاع الجلجلانيّة في بالك أكيد رايج ينجح معاك. أنا أعملتو لأخوتي. جاني هايل.. فقط نصيحة لما تنزعيه من مول السيلكون ديري صينيّة فوق المول. يعني أقلبي المول على الصينيّة باش مايتكسروش الحلويات. وأدهني مسبقا المول بقليل من المرغارين. وإذا كانت الحلويات ناقصة الطياب ضعيها على شباك الفرن لتواصل النّضج. وبالتّوفيق.

غزالة الصّحراء · 2015-01-12, 10:03

اقتباس:

المشاركة الأصلية كتبت بواسطة صدفات

صباحكم سعيد يا بنات
و بصحتكم العام يا رب يكون عام الخير على كل المسلمين و ينصرنا على من عادانا يا رب
أم سوهيل كل عام و ليدك بألف عافية و تفرحي به
أم هديل روح مراد أم حمزة غزالة كرونو ربي يهنيكم و كل وحدة من حبايبنا ما ذكرتش إسمها تسمحلي

يا أهلين وسهلين . وجودك نوّر الصّفحة، واللّون الأخضر زادها بهاء وروعة . وكلماتك عسّلتها . وأعاد اللّه علينا كلّ الأعوام بالخير والبركات والصحّة والهناء. وسلامي الحار حرارة الجمر إلى كلّ واحدة تنتمي إلى هذه الصّفحة بالذّات وإلى كلّ جديدة تنضمّ إلينا لتغترف من الصّفحة مايفيدها في حياتها ، طبخا . حلويات . نصائحا....

صدفات · 2015-01-12, 10:07

شكرا على الرد الحار يا غزالتي الطيبة