~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[omelbanin]

سيرينو يااايما شحال تشهي ديك تارت ،بصحتك حبيبتي.
سيرين ،انا عندي خويا يدير رجيم هو والاسرة نتاعو كامل سمان.هو لي قال على المعلومة انو لازملك يوم في الاسبوع تاكل عادي ،علاش ،لانو الجسم كي يوالف دايما بالرجيم يوالف هداك الغيتم ويولي ما يحرقش والميزان يتوقف ،مالا كي تعاولي تاكلي نهار عادي الجسم يولي يحرق سعرات اكثر.والله اعلم زيدي سقسينا.

[سيرين 5]

المشاركة الأصلية كتبت بواسطة hanamohamed

سيرين يعطيك الصحة وماشاء الله عليك جاءت روعة استعملت عجينة الهام
ام البنين من فضلك ذكريني بالعجينة راك تستعملي فيها لترتولات
اليوم راني مع غسيل غش الشتاء والمضرب راني متاخرة كثير لضروف المرض ومع التحاليل والامس نزعت الضرسة
الله يبعد المرض والبلاء عنكم و على كل مسلم

هناء محمد الله يسلمك ، لالا ما استعملتش عجينة الهام استعملت بات بريزي عجينة كيما تاع الصابلي راح نحط الوصفة للأسف ما صورتش الخطوات المرة الجاية ان شاء الله
العجينة : 125 غ مارغرين طرية + 2 م ك سكر + حبة بيض + ربع باكي لاليفوغ + و تلمي 250 غ فرينة و تخليها ترتاح في الثلاجة من بعد ابسطيها و حطيها في صينية و اتقبيها بالفرشيطة من كل النواحي ههههههه و نطيبها في الفرن على 180° حتى تحمار مليح باش تجي مقرمشة ما تخلوهاش بيضة كي تزيدو تحطوها في الثلاجة و تتندى بالكريمة تولي طيح
الكريمة : صفار 3 بيضات + 2 م ك مايزينة + 150 غ سكر + زاست تاع 2 حبات قارص + ربع لتر حليب و نحرك الكل على نار قليلة و لما تعقد نحيها من فوق النار و نحط عصير حبتين قارص + قطعة زبدة صغيرة و نخليها تبرد
المورانق : بياض ثلاث بيضات + قرصة ملح + 150 غ سكر نطلع البيض و نحط السكر بالشويا حتى تطلع و تثقال نحطها بالثلاجة و نرجع للعجينة لما طيب نحط عليها الكريمة و بواسطة لابوش آدوي نحط المورانق فوقها بأي شكل تحبو خلطو و تشخلطو المهم تستمتعو هههههههههههههه
ذرذرو عليها شويا سكر قلاص أنا هذا وين فقت بلي نسيتو هههههههههههه تجيكم حمرة أحسن من تارت تاعي و شعلو الفرن من فوق و هبطوها هي للتحت كامل و خلوها تحمار كامل كيف كيف
خلوها تبرد و قدموها بالصحة و الرااااااحة بزاااااف بنينة

[سيرين 5]

المشاركة الأصلية كتبت بواسطة omelbanin

سيرينو يااايما شحال تشهي ديك تارت ،بصحتك حبيبتي.
سيرين ،انا عندي خويا يدير رجيم هو والاسرة نتاعو كامل سمان.هو لي قال على المعلومة انو لازملك يوم في الاسبوع تاكل عادي ،علاش ،لانو الجسم كي يوالف دايما بالرجيم يوالف هداك الغيتم ويولي ما يحرقش والميزان يتوقف ،مالا كي تعاولي تاكلي نهار عادي الجسم يولي يحرق سعرات اكثر.والله اعلم زيدي سقسينا.

الله يسلمك أم البنين
أنا كنت ندير فاصل باش نصبر روحي أيا مليح كي عاد فيه الفايدة ههههههههه

[omelbanin]

تقرير الفترة الصباحية : .
نضت شربت الماء ،صليت الفجر وبعدها ،الاذكار ، زدت رقدت نضت على 7نوضت وليدي يقرا طيبت الحليب وشربو الاولاد وراح وليدي للمدرسة وزوجي للعمل ،رتبت البيوت ورحت للمطبخ غسلت الماعن جبدت السنيوات غسلتهم. ودرتهم ينشفوفي الشميسة .
غسلت الكويزينيار من الداخل وومن الفوق ،درت الفطور كارانتيتا، فطرنا وغسلت الاواني ،
خدمت شوية حلوة لوحدة وصاتني . و طيبت الحليب للاولاد وشربوا . وقعدت نريح شوية .

[ام صفصف]

المشاركة الأصلية كتبت بواسطة sarsoura23

سلام لبنات أنا راني من مدة نتبع فيكم بصمت وكل مرة نقول نرد وملقيتش الوقت هدي الدورة رائعة ونتمني تستمر لاحضت غياب الأخت حبيبة ان شاء الله خير وعندي بزاف أشياء نقولهم درك تفكرت غير حاجة وحدة هي انو لفقر الدم وحدة مدت وصفة الكبدة و العصير ووحدة سقسات عليها ادا نية ولا لالا وهل لازم العصير طبيعي انا حبيت نوضحلك وعلاه لازم معاها العصير بالنسبة للكبد يحتوي علي الحديد لي ينحي فقر الدم ولكن لكي يثبث الحديد في الجسم ويستفاد منو لازم الفيتامين س لهادا لازم كي توكلو مصدر للحديد كالكبد ولا العدس وووو لازم توخدو معاه في نفس الوقت مصدر للفيتامين س والا ملقيتيش خله اشري فيتامين س لي يتباع عند الفرماسي و الكبد في رأي تقدري تشويه ,
عندي اقتراح وعلاش متديروش موضوع هنا في رمضان وكل وحدة تحط صور وتدابيير وووو وهو عبارة عن دورة جديدة تكون بعنوان روتيني في رمضان,

يعطيك الصحة اختي على المعلومات وحبيت نضيف للاخت انو اذا ماتحبش الكبد يمكن تعوض بالدواء le fer ايضا العدس ترحيه وتاخذ ملعقة مع عصير او ماء و تحاول التركز على الاطعمة الغنية بالحديد ومنها اضافة للكبد والعدس اللحوم الحمراء المعدنوس السلق يعني عموما الي يكون الاوراق تاعها خضراء داكنة الزبيب......واهم شئ اثناء العلاج تبتعد عن الاطعمة الي فيها الكالسيوم كيما الحليب وايضا تنقص من القهوة لانهم ياثرو على امتصاص الجسم للحديد

[arwa alaa]

اسلام عليكم واش حواكم يا الفراشات

[arwa alaa]

تقرير اليوم نضت الصباح صليت ورجعت رقدت
ونضت على السابعة درت الحليب شربت انا والزوج وغسلت المواعن درت الغداء لميت الدنيا وفرزت البيوت ومنبعد سيقت خفيف غير باش نبرد الدنيا ونقفلها راهي السخانة
ومنبعد ناضو الاولاد غسلو وفطرو برتهم بدوش خفيف وبدلتلهم وقعدو يلعبو
كنت معولة نغسل الدوش والكولولر شوية راح الضوء يعني حبست المضخة نتاع الماء وجا في وقت متاخر مقدرتش نغسل رحت فرزت قجور الرافيطايمة ورحيت الخبز اليابس وخبيتو وحطيت معجون الفراز يطيب كنت وجدتو البارح
وكي جا الضوء غسلت طابي خفيف
ومنببعد تغداو الاولاد وغسلت المواعن رتحت شوية ونضت نشرت القش الي غسلتو الصباح وطبقت الي دخلتو ووجدت الحليب شربنا وراني معاكم الان ..............

[غزالة1]

السلام عليكم
مساء الخير للجميع وحدةوحدة
شكرا جزيلا ام صفصف على الاهتمام و المعلومات و الاخت سرسورة و سمرا شكرهم من قبل
اني نشرب في الحديد و زيد ناكل العدس مع العسل الحر
القهوة نشربها لانو بدونها نكون في قمة التعب حتى الاعمال الخفيفة لا اقدر عليها لولا القهوة لكن من الان راح انتبه اكثر
سيرين بصحتك التارت تشهي لكن لا تاخذي عادة افراغ الغضب في الاكل لانو راح تنضري في فترة من حياتي كنت افرغ غضبي في الاكل خاصة الحلويات يامي يامي نبرد قلبي هههه لكن الآن دفعت الثمن في اسناني
سلامي لكل واحدة

[أ م ساجد وسيم]

سلام عليكم كيراكم لبنات

[نسمة صبح]

يااااه سيرين شحال نحب تارت الليمون سخفتييييني...و شكرا على الوصفة..انا معتمدة تاع أم سامي..

بصح نجرب تاعك حبيبتي.

واش احوالكم كامل

ام هاجر طلي علينا ..طمنينا عليك
هناء محمد توحشناااك

وينهي ام هزار حبيبتي

[omelbanin]

تقرير الفترة المسائية
بعدما شربوا اولادي حاليبهم، كانت عندي زيارة لمريض قلت نروح وما نطولش اخدت معايا الحلوة لي خدمتها الصباح ، لانو اهل المريض راهم يجوهم ضيوف بزاف قلت نعاونهم بلي قدرت ،رحت لعند المريض وطمنت عليه ، وليت للبيت ،لقيت المطبخ معمر ذباب غريب ، لانو المطبخ عندو نافذة على جنان نتاع الجيران وهوما مربيين الكباش ،المهم لقيت المطبخ يخلع ،والله كنت عيانة ،كنت معولة ندير عشا خفيف،خرجللي شغل اخر ،درت الفليتوكس للدبان وغسلت الفبونس على سعدي وسيقت بالعملاق قلت باش ما يزيدش يويولي ،وزوجي كان دا الولاد يحفو شعرهم ،جاو دوشتلهم ،
درت لعشا خفيف ،تعشينا ومن التعب ما غسلتش لماعن ،خليتهم للغد انشاءالله .
غدا الاثنين ،صيام انشاء الله.

[أ م ساجد وسيم]

المشاركة الأصلية كتبت بواسطة omelbanin

تقرير الفترة المسائية
بعدما شربوا اولادي حاليبهم، كانت عندي زيارة لمريض قلت نروح وما نطولش اخدت معايا الحلوة لي خدمتها الصباح ، لانو اهل المريض راهم يجوهم ضيوف بزاف قلت نعاونهم بلي قدرت ،رحت لعند المريض وطمنت عليه ، وليت للبيت ،لقيت المطبخ معمر ذباب غريب ، لانو المطبخ عندو نافذة على جنان نتاع الجيران وهوما مربيين الكباش ،المهم لقيت المطبخ يخلع ،والله كنت عيانة ،كنت معولة ندير عشا خفيف،خرجللي شغل اخر ،درت الفليتوكس للدبان وغسلت الفبونس على سعدي وسيقت بالعملاق قلت باش ما يزيدش يويولي ،وزوجي كان دا الولاد يحفو شعرهم ،جاو دوشتلهم ،
درت لعشا خفيف ،تعشينا ومن التعب ما غسلتش لماعن ،خليتهم للغد انشاءالله .
غدا الاثنين ،صيام انشاء الله.

اهلا ختي ان شاء الله زيارتك امرة اجر وحسنات لاهل المريض وربييتقبل صيامك والله يعينك على ذبان انا نكرهه ههههههههه يبهدل الحالة ...يعطيك صحة ختي

[غزالة1]

السلام عليكم
اصبحنا واصبح الملك لله
اللهم صل وسلم وبارك على سيدنا وحبيبنا محمد وعلى آله وصحبه أجمعين
اللهم اعنا على ذكرك و شكرك و حسن عبادتك

[غزالة1]

صباح الامل و التفاؤل
صباح النجاح لكل الممتحنين :-)😊
صباح الهدوء لكل الأمهات :-p 😜
صباح الورد لكل المتزوجات @):-😆
صباح الياسمين للعازبات<3 💝
صباح الامل و الجمال لكل انثى😍😘😀
سلام

[omelbanin]

السلام عليكم ،وصباح الخير يا اخواتي وصديقاتي وحبيباتي واسرتي الثانية.
يارب وفق كل الطلاب في الامتحان اليوم.