السلام عليكم
موضوع رائع يستحق التثبيت ليكون مرجع لكل الاخوات
زينب تحضيراتي بسيطة جدا
نقيت التوابل يقرب رمضان ان شاء الله ونرحي فقط كمية تاع 10 ايام لا اكثر كي تكمل نزيد نرحي ما تعطلنيش لانها منقية
غسلت السانوج والجلجلان و جففتهم ونقيتهم وخبيتهم
الطماطم ما خبيتهاش لاني نفضل استعمالها طازجة خاصة انو متوفرة واثمانها في المتناول
يعني حتى لشهر سبتمبر بحول الله ونخبيها مصبرة تقريبا نفس طريقتك الفرق الوحيد اني نطيبها بقشورها وبذورها
تعطي ذوق اقوى وتعقد مليح ثم نعاودها في المطحنة اليدوية في cd الرقيق للتخلص من البذور والقشور ونرجعها للنار حتى دير فقاعات كما تقول امي تبقبق
ونخبيها ونستعملها في مدة لا تفوق 4 اشهر
الثوم نشري كميات كبيرة ونعلقو ونخدم به طازج لما يفوت وقتو يبدا ينبت نفصلو من بعضو ونحطو في قارورة كبيرة ونحرك جيدا يتقشر بسهولة
نقطعو شرائح بالمندولين ونحطو فوق قطعة فايونس ونغطيه بقماش خفيف ولما ييبس نرحيه
الكسبر والمعدنوس نحي منهم الاوراق ونحطهم فوق ورق الزبدة ونسخن الفرن جيدا ونطفيه ونحط البلاطو في اعلى رف ونغلق الفرن ونكرر العملية
اذا ما يبستش الاوراق ولما يجفو مليح نرحيهم ونخبيهم نحتاجهم لما ما يكونش عندي الكسبر والمعدنوس اخضر اما الاغصان نقطعهم ونستعملهم كي نقلي الطبخة
من قبل كل ما يقضي الزوج رفتايما نحي كل مرة شوية يعني سكر قهوة زيت فرينة سميد زبدة...... يعني نقصان مصروف
خبيت البر تقال في المجمد لعصير الهام وخبيت معجون الفراز بكميات كبيرة ومعجون البرتقال ومعجون المندرين والسفرجل خبيتو معجون وجولي
غسلت الفريك وملحتو ولما يبس نقيتو مليح من الحجرات لي فيه وبعثتو للطاحونة وغربلتو وخبيتو المرمز نشريه واجد غير نعاود نغربلو فقط
نحيت المسفوف من البربوشة تاع العام لي فات هذا العام مازال ما درتش نستنا في العطلة
خبيت البرقوق والزبيب والمشماش المكسرات ومستلزمات الحلويات مازال ما قلتلوش حتى يترفه الجيب ونكتب القائمة
وكل ما تكون مستجدات نزيدها
اتمنى نكون افدتكم ولو بالقليل البسيط