السلام عليكم أخواتي
دائما مع الوصفات البسيطة والاقتصادية جبتلكم اليوم مقرقشات الوردة لكن بمقادير جديدة لان الوصفة القديمة يعملوها 4 كيلات فرينة بكيلة زبدة .
هذا الوصفة تجي هاااايلة وتذوب في الفم يمكن نحضرها في الايام العادية او في الافراح تقدم مع الشاي.
هذا الكمية تقطع حوالي40حبة
المقادير:
500غ فرينة
200غ زبدة او مرقرين بحرارة الغرفة انا استعملت مرقرين لابال
صفار بيضة
رشة ملح
م ص فاني
2م ك خل ابيض
ماء الزهر
حبات لوز او كاوكاو
زيت للقلي
عسل
جلجلانية
نحتاج ايضا الى هذا النوع من لي مول
https://
او هذا النوع
https://
الطريقة:
في جفنة نحط الفرينة +رشة ملح+الفاني والمرقرين الطرية نبسسها بواسطة الاصابع نضيف صفار البيضة نحرك ونضيف 2م ك خل ونلم العجينة بماء الزهر .
https://
انا هنا قسمت العجينة على اثنان نغطي العجينة ونخليها ترتاح على الاقل4 ساعات في الثلاجة ومن الاحسن نحضرها في الليل وفي الصباح نشكلها كيما عملت انا.
في الصباح نبدأ في تشكيل الحلوى
نرش طاولة العمل بشوية فرينة ونحلها بالحلال ماتكونش خشينة باه تطيب من الداخل وماتكونش رقيقة بزاف لانها مبسسة مليح باه ماتتكسرش كي نطيبها وتقولو ام اماني درتها بنا خخخخ
https://
ونقطع بلي مول لازم نعمل وردة كبيرة ومتوسطة وزوج صغار
انا استعملت هذا لي مول
https://
نحط الوردة الكبيرة ونحط فوقها شوية بياض بيض بالبانسو من بعد الوردة المتوسطة ونخالف البتلاتثم بياض البيض ثم وردة صغيرة ثم بياض البيض ثم وردة صغيرة ودائما نخالف البتلات مانحطهومش في نفس الاتجاه
https://
نرشق حبة لوز في المنتصف حتى مايتفتحوش اثناء القلي وممكن نعوضه بالكاوكاو وكاين لي يرشقهم بحبات قرنفل انا ماننصحكمش به صغير مايحكمش الوردات مليح وممكن يظهر ذوقه في المقرقشات بعد الطهي
غير نرشق حبة اللوز تتفتح الوردة
https://
نرش بلاطو بالفرينة او نعمل ورق الزبدة ونحط المقرقشات حتى نكمل كل الكمية
نخليها تنشف عدة ساعات باه تحاقظ على شكلها كي نطيبها لانها كيما قلتلكم مبسسة مليح
يعني تنشف كيما نعملو مع الحلويات المعسلة كيما المشكلة وغيرها
https://
انا شكلتها في الصباح وخليتها حتى للمساء تنشف
https://
نحط الزيت في مقلاة او كسرونة انا نفضل كسرونة تكون شوية كبيرة نخلي الزيت يسخن مليح من بعد نقص على النارونطيب المقرقشات هكذا تطيب من الداخل وماتبقاش معجنة
حبيت نبهكم انكم تقليو بزوج حبات لان اذا حطيتو بزاف والعجينة مبسسة الزيت راح يفيض ولتفادي ذلك نحط قطرات من الخل في الزيت ونقلي بالزوج
كي تاخذ لون ذهبي نحطها فوق ورق ماص حتى نكمل الكمية
https://
نخليوهم يبردو تمااااما من بعد نعسلهم في عسل مخفف بشوية ماء الزهر لازم يكون شوية ثقيل نحطهم يقطرو
من بعد نرش عليهم شوية جلجلانية ونقدمهم بالصحة والراحة
وهذا شكلهم
https://
https://
https://
عن قرب
https://
https://
ان شاء الله يكون الشرح واضح وخذيتو بعين الاعتبار الملاحظات حتى تنجحو فيها
ولاتنسوني من صالح الدعاء ولكن بالمثل
في امان الله
__________________
( تقرير عن مشاركة سيئة )، و الموجودة أسفل كل مشاركة .
2018-09-04, 18:44
العرض العادي
