موضوع مميز وصفات من حراير مطبخ وش طيبتي اليوم - الصفحة 11

oum ibrahim · 2013-09-17, 10:21

souma.f
السوفلي

عجينة السوفلي تاعي ساهلة و مضمونة:
02 كاس فرينة + 02 مغارف كبار زيت + 02 مغارف صغار خميرة الخبز + مغرف صغيرة سكر + ملح حسب الذوق (أنا نعمل نصف مغرف صغيرة) و تبليها بكاس غير ربع حليب دافي تلميها و دخليها في بعضاها برك و تحطيها في كيس تخمر و كي تزيد في الحجم تحليها بالحلال و تشكليها كيما حبيتي

بشرى2008 · 2013-09-17, 17:45

oum anas 69
كابوتشينو
يه حنونة مجرباتو شحال من خطرة يهبل ناجح 100/100 و يديرلك كمية هايلة
كيلي بفنجان قهوة
ديري في في وعاء فنجان قهوة حبيبات +فنجان سكر عادي +فنجان ماء بارد من الثلاجة و طلعيه بالباتور خير حتى ترجع كريمة متماسكة مايديش الوقت ممكن 1دقيقة
فرغيها في بورت مونجي و خبيها في المجمد لازم باش ماتطيحلش من السخانة و ممبعد كي تسحقي نحي مغرفة حطيها فيكاس و صبي حليب يغلي ممممممم حقى راها ماتجمدش في المجمد تلقايها كالموس مممممم إذا حبيتي ممبعد نعملها و نصورهالك

kang hunna · 2013-09-17, 18:07

Merciiiiiiiiiiii

الدنيا · 2013-09-17, 22:16

بريق الامل

هذ الغوسات تجي مقرمشة تهبل كما لقريوش
4 بيض وقرصة فاني وقرصة ملح و60 غ مايزينة و60غ فرينة ضربيهم مليح بالباتور او ميكسور
وهاهو الطابع

وطريقة الطياب تسخنس الزيت وتحطي فيه الطابع يسخن مش بزاف وتغطسيه في العجينة الجارية طبعا كما الموسكوتشو
وتحطيه يتقلى وتنحي الحبة بمغرف غير بشوية
وتتعسل ورشي بجلجلان محمص
ما لازمش الطابع سخون بزاف راهي اطيحلك الحبة في العجين ولا بارد ما تلصقلكش العجينة في الطابع
وما لازمش تفوتي حافة الطابع فقط للنص

fati21 · 2013-09-18, 14:21

ام محمد تاج

لا تورت

العجينة: 400غ فرينة وأربع مغارف زيت ومغرف كبيرة حليب غبرة وزوج مغارف خميرة الكسرة ومغرف صغير سكر ومغرف صغيرة ملح وأعجنيها بالماء الدافىء خليها ترتاح وتطلع كي تطلع اقسمي العجينة على قسمين واحد أكبرمن واحد بقليل على خاطر لكبير راح تحليه ويطلع على الحواشي
أحشيه بالحشو التالي وزيدي ابسطي الجزىء الثاني بالفرينة كذلك وحطيه على الحشو أغلقي مليح وادهني الوجه بصفار البيض والجلجلانية وأعملي ثقبة في الوسط بواسطة الكوردون وحطيها تحمار
الحشوة: ذبلي نصف حبة بصل وأقلي ثلاث طماطمات متوسطين مليح حتان يتبخر الماء تاعها بالكامل باه ماتجيكش العجينة معجنة وتجيك تقرمش وزيدي اقلي زوج حبات بطاطا وزيتون أخضر بلا علف وفرماج الذايب وروج وشوي كرام فراش وشوي طون تاع الزيت ولا طماطم اختياري خلطيهم بلطف وحطيهم كحشوة للاتوغت وإذا حابة أي حشو من عندك فاختياري ومن ابداعك مثلا لي حابة صدر تاع الجاج تقليه وتفتتو ولا لحم مرحي لكن الاختيار

الدنيا · 2013-09-18, 23:07

islam1aya

المقادير

400غ سميد رطب نوع مممتاز جاني حوالي بول تع شربة
300غ فرينة حوالي 2كاس
ملعقة كبيرة خميرة الخبز
ملعقة كبيرة حليب بودرة
ملح ملعقة صغيرةماش معمرة
2ملاعق كبيرة زيت
3بيض حجم متوسط
نصف كاس حليب
1خميرة الحلوة
ماء دافئ

طريقة التحضير

درت السميد والفرينة ووخميرة الخبز والسكر والملح وبودرة الحليب وخلطتهم مليح اضفت الزيت وبديت نبل العجينة بالماء ماجرتهاش بزاف وبديت نعجن عادي كما نعجن اي عجينة باش السميد يدير الخيط ويجي مليح بعدين بديت نجري العجينة بالماء كل مرة ندير الماء ونعجن براحت اليد ثم زدت البيض حليتهم بالاصابع في العجينة واضفت نصف كاس حليب ونعجن دائما براحة اليد
حتى نتحصل على خليط جاري نوعا ما
نحط الخليط في قدر نغطيه ونتركه قدام الطبونة شاعلة ونحط الكرلاجة نوع gرانيطونوع الخشين ماشي رقيق و تسخن مليح بعد نصف ساعة نلاحظ الخليط دار فقعات نخلط الخليط بالغراف ونزيد عليه 1خميرة الحلوة ونخلط ببطئ
بعدها تكون الكرلاجة سخنت مليح ادهنيها بصابون الطرف مليح ثم امسحي بطرف قماش فيه شوية زيت وامسحي جيدا ثم ابداي اطيبي وكري العملية بين كل 3 حبات
الزبيب تخليه يتنفخ في الماء الساخن حوالي ساعة منقبل ثم صفيه ونشفيه وغير تحطي العجينة اطيب حطي حبات تع الزبيب من الفوق

قدمتو مع العسل والزبدة

حنين40 · 2013-09-19, 16:48

مخايتوش والو كل شئ يهبل ما نعرف انطيب معليش نسرق من عندكم

الدنيا · 2013-09-19, 22:46

touta2010

في كوكوط ضعي لحم غنمي زبدة وبصل مرحي وقليه مليح ضفي قليل من طماطم حب وملح وسقي بالماء وزعفران وفلفل ورند وعود قرفةوخليها تطيب قبل ما تنشف المرقة ضعي بطاطة دوائر مملحة في صينية فرن والحم وسكبي فوقها المرقة وخليها حتى تطيب البطاطة وتضخثر المرقة

الدنيا · 2013-09-20, 10:17

بريق الامل

شوفي غلي البطاطا وارحيها وزيديلها حليب وزبدة وفرماج وشوية ملح راعي ملوحية الفرماج
وحطي نصفها في بيركس مدهون بزبدة نحب ذوق زبدة البقرة او لابال
نجو للمرقاز اقليه وفتتيه واحدميلو صوصو تومات ترابي طماطم وثوم وتحطيهم في مقلو مع شوية زيت وملح وتزيدي المرقاز المقلي لمقطع
وتحطيه كطبقة بعد البطاطا
والنصف الاخر تاع البطاطا تديريه في لابوش وتشكلي وريدات تغطي الحشو
تحبي بلا لابوش تحطي البطاطا وفرماج رابي او تخططيها بفرشيطة
الحشو تقدري اتنوعي فيه ممكن بصدر الدجاج او لحم مرحي وممكن بلا لاصوص تومات
وطبعا الى الفرن وتحمريها شوية من فوق
ممكن ترشي فلفل احمر مرحي من فوق

ام ايمان16 · 2013-09-20, 18:39

يعطيكم الصحة

فايزة44 · 2013-09-20, 20:26

فيوزة القاطو الاخير ههههههههههه لووووووووووكان نقولك درت جينواز نتاعي عادي كي طاب فتتو ولميتو بمعجون الفراز و مرمدتو في نواد كوكو مرحي اخضر هههههههههههههههه خالوووووووطة

مرقة البربوشة بالقديد هاذي بيضا هاهي وصفتها

نرحي البصل حبة تكون كبيرة و6 فصوص ثوم
القديد يخي تعرفيه نغليه 3 د في الماء ونطفي عليه باش ننزعلو شوي الملح ونغسلو بالماء سخون
نحط شوي زيت في الكوكوط ونحط البصل مرحية مع الثوم ونقليوهم على نار متوسطة ونحط عليهم القديد والتوابل (( ملح حسب الحاجة + 2 م ص كسبر + م ص ونصف فلفل أسود + نصف م ص كروية )) ونقلب شوي ونخليهم يتقلاو مليح

بعد 5 د نضيف الفول يابس والحمص منقع بليلة قبل ونمرق بالماء السخون كي تغلي نغلق الكوكوط ويطيبوا كامل لمدة 45د

كي نفتح الكوكوط نحط البطاطا مقطعة قطع متوسطة ونزيد نغلق الكوكوط باش طيب البطاطا

في الاخير زيدي للمرق كاس حليب وخليها تغلي شوي حوالي 3 د وطفي وتكون جاهزة المرقة

الدنيا · 2013-09-20, 22:29

hanane220

لمكونات :
500غ فرينة
100 غ سكر ناعم
2 ملاعق كبيرة من السمسم المحمص
ملح
10 سل من الزيت. فنجان
15 سل زبدة ذائبة
كيس خميرة كيمائية

التحضير :

اخلطي الفرينة، السكر الناعم، قرصة ملح، بذور السمسم.

أضيفي الزيت و الزبدة.

اخلطي جيدا ثم غطيها بغلاف بلاستيكي و اتركيها تستريح في الثلاجة لمدة ليلة كاملة.

أخرجيها من الثلاجة أضيفي الخميرة و اخلطي العجينة جيدا.

اتركي الفرن يسخن في درجة حرارة 180°.

شكلي كريات صغيرة و ضعيها في قالب ثم اتركي الغريبية تطهى في الفرة.

lamiak1 · 2013-09-22, 13:12

يهبل مشكورة

tokio hotel · 2013-09-23, 07:34

هاد التارت انتاعى ماهيش تارت التفاح اختى سلامت الشوف هههه

maloo · 2013-09-24, 15:35

oum anas69

بزاف أخوات طلبو طريقة الكراميل السائل لي يجي فوق التحليات خاصة الأخت القبطية نقلها أسمحيلي طولت عليك
نحتاجو ;
250 غ سكر عادي
5 سل ماء +10 سل وحد أخرى =
ملعقة كبيرة خل أوعصير الليمون
للعلم 5 سل = 4 ملاعق أكل ماء
10سل = 8 ملاعق ماء
في طاوة ندير السكر +الخل +5 سل ماء
نخلطو مع الأول ثم نخليه حتان يولي كراميل أحمر ماشي أسود خطرش يولي مر
إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.
مابين الكراميل وجد نوجدو 8 ملاعق ماء و نحط قدامي غراف نسحقو

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

هنا صايي أصبح كراميل ... نطفي النار و نصب هداك الماء 8 ملاعق بواسطة غراف خطرش يطير و يحرق و بسرعة أجبدي يديك حذاري

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.
خليه يغلي ثواني و طفي عليه رايحة تتحصلي على كراميل لذيذ جدا لتزيين ليقلاص أو التحليات ... إلخ
إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.
خبيه في قارورة أو علبة و إستعمليه وقت الحاجة
إذا جاك ثقيل بزاف زديلو ملعقتين ماء باش يخفاف