وصفات حراير الكوزينة الجزء الثاني - الصفحة 11

idron0 · 2014-12-31, 11:55

تزيكزاكي Simassim

سلطة يونانية سهلة
تقطعي الخيار مكعبات تزيدي معاه جبن طازج او بتي سويس او ياغوت طبيعي
عصير ليمون ملح زيت زيتون وثوم مطحونة او مرابية رقييييييق
وتزيري عليها نعناع ومعدنوس مقطع رقيييييييييييق وخلاص تجي بنينة تهبل.

idron0 · 2014-12-31, 12:36

كريمة الجبن ام محمد تاج

زوج كيسات تاي حليب نكسر عليهم بيضة ورشة ملح ورشة فلفل اسود وزوج مغرف كبار فرينة ونحطهم على النار حتان يخثارو مليح ونحيها وهي سخونة نزيدلها خمس فرماجات ونخبط بالباتور صدقوني راح تتحصلو على اروع كريمة جبن .

idron0 · 2014-12-31, 12:57

التحلية في الأكواب او les coupes royales بالموز و اللوز lyzzabel

طريقتي هي اولا نحضر جينواز او موسكوتشو انا ضربت عصفورين بحجر واحد ،، الاولاد يبغو حاجة يسموها كيك ولا موسكوتشو ولا مادلان ،، تسمى درت موسكوتشو خدمت التحلية بنصه و النصف الاخر خليته لحبايب قلبي هههه ،، و ممكن نعتمد اي وصفة للجينواز او الموسكوتشو
انا درت 5 حبات بيض و كاس مشي معمر سكر عادي و لافاني و ضربت مليييييح بالباتور حتى رجع الخليط ابيض و زدت عليه نص كاس زيت و ضربت و نص كاس حليب و ضربت و من بعد الفرينة مغربلة مع كيس و نصف خميرة الحلويات و نخلط حتى نشوف الخليط ثقال شوية يعني يجي شوية جاري على تاع الكيك ،، و طيبته في فرن سخون على درجة 180
من جهة اخر، حضرت الكريمة لي هي لتر حليب مع 4 ملاعق اكل فلان ذوق فانيلا و زوج ملاعق اكل مايزينة و نخلط و نحط الكاسول فوق النار و نخلط بملعقة خشبية حتى يثقال الخليط و يبدأ يدير فقاعات ،، ننحيه و نغطيه بالفيلم اليمونتاغ باش ما يديرش قشرة من فوق و نخليها تبرد ملييييح ،، كي تبرد نضيفلها ملعقتين اكل معمرين غبرة الشانتيي و نضرب بالباتور و نخليها فالثلاجة
نزيد نحضر الشاربات او السيرو كاس و نصف تاع ماء و كاس سكر عادي و عصير ليمونة نحطه يغلي فوق النار و مين يبدأ يغلي نحسب عشر دقائق و نطفي و نخليه تاني يبرد
نعاود نرجع للجينواز ولا الموسكوتشو لي يكون برد و نقطعه مكعبات صغيرة بالموس و نوجد الأكواب لي نقدم فيهم و حبات موز و شوية لوز محمر فالزيت و مقطر و مرحي خشين و ديكوجال كاراميل و كمية من الشانتيي مطلعها مع كاس حليب بااااارد و حبات سوغيز
نحط كمية صغيرة من قطع الجينواز فالاكواب و نسقيها بمقدار ملعقة اكل شاربات و نحط فوقها رشة من اللوز المدشش و نزيد ملعقتين تاع اكل من الكريمة و فوقها قطع الموز نكون قطعته دواءر و نزيد رشة لوز و نعاود كمية من الجينواز و نسقيها بالشاربات كيما المرة الاولى و نحط فوقها رشة لوز و كمية من الكريمة و قطع الموز حتى نقرب نوصل لنهاية الأكواب و نحطهم فالثلاجة يبردو على الأقل ساعتين حتى تتشرب كل النكهات مممممم ،، و قبل التقديم نكمل بقطع من الموز ما نديرهمش قبل ما نحط الأكواب فالثلاجة باش ما يكحالش ،، و نزين من فوق بكريمة الشانتيي و ندير خطوط بالديكوجال باستعمال كيس مثقوب و نرش كمية من اللوز المدشش و اخيراً نصف حبة من الكرز المعلب ،، تحلية راااااءعة و سهلة و بخيزونتابل.

إضغط هنا لرؤية الصورة بحجمها الطبيعي.

sheherazed · 2014-12-31, 13:30

Merciiiiiii hbiba Idron Rabi yhafdek w ybarek fin

idron0 · 2014-12-31, 16:47

قلب اللوز حنان yasmalek

شوفي الكيلة هي كاس تاع تاي
7 كيلات دشيشة 5 كيلات سكر و خلطيهم مليح و بسسيهم مليييح بكيلة زيييت و شمخيه بكيلة حليب و كيلة ما زهر و شووووووية خميرة تاع الحلوى و فرفعيييه ملييح بيدك كيما الطعام و حطيه في ساشي و اغلقي مليييح و خليه يبات ليلة كاملة
غد منداك ستفيه فالسنيوة ما تعليهمش بزاف و علمي الحبات تاع بالموس غير من فوق برك
طيبييه 15 دقيقة و خرجيييه احكمي شوية سمن و عقبيه فوقو السخانة تاعو راح تدوبو
و رجعيه يطيييب و حمريه مليييييييييييح قاتلي اسر البنة تاعو التحمار ما تقوليش تحرق
و تكوني وجدت الشارباتت تاعك غير يخرج سقيه
قاتلي مع الاولى يجي يابس مي وحد 5 دقايق يبدا يطرااااا
و مادابيك تخليه ليلة كاملة قبل ما تقسميه.

idron0 · 2014-12-31, 18:21

وصفة البطاطا بالأعشاب في الميكروووند Simassim

قطعي البطاطا مكعبات. وتضيفي ثوم مرابية وملح فلفل أسود. وتديري أعشاب انا نخدم بالأعشاب الجافة. إكليل وقصبر ومعدنوس وادا تحبي زيدي حتى الزعتر
شوي موتارد ووقطيرات تاع الماء ماشي بزاف وتخلطيه وغطيها بالفيلم اليمونتار. كاين واحد تقدري تستعمليه فالمكرونود واذا ماعندكش ديريها في علبة تدخل المكروووند وغطيها باش تطيب بالما تاعها. حوالي ربع ساعة على حسب حجم البطاطا
جبديها وحاذري تحرقي روحك بالبخار حلي عليها وحطي شوي دهان ورجعيها دقيقة او اقل
حطي في مقلات شوي دهان او زيت زيتون يسخن مليح وحطي البطاطا تاعك وحركي المقلاة وقلبيها
منبعد طفي عليها وذوقي الملح وزيدي عليها شوي مايونيز وعصرة ليمون وشوي بصل مقطع رقيق ادا تحبي وطماطم وقدميها مع الجاج او اللحم او السمك او كسلطة

ام سراج وملاك · 2014-12-31, 21:48

شربة العدس التركية omaymen

شوفي لازم تشري العدس الاحمر هو اللي يستعملوه الاتراك ام ريهام
تحكمي حبة بصلة كبيرة تقليها في شوية زيت ماشي بزاف خطرش ضيفي شوية زيت زيتون في الاخيرمن بعد ضفيلها 2 مغارف طماطيش مصبرة قلي كلش واسكرفجي حبة زرودية زيدي الملح والفلفل الاسود وفلفل دريس اذا تحبي الحاروتكوني وجدتي كاس كبير عدس شليه مليح وضفيه مع المقادير السابقة زيدي 2 مغارف برغل رقيق اذا ماعندكش معليش عوضيها بحبة بطاطا صغيرة جدا مسكرفجة زيدي نعناع ناشف مع زعتر ناشف قيس ملعقة صغيرة و اذا عندك ثوم يابسة بودرة ديري ملعقة قهوة وزيدي قطعي المعدنوس رقيق
مرقي ب 3كيسان ماء وخلي كلش يطيب راه ماياخدش وقت طويل حوالي 20 ال 25 دقيقة
كيطيب اذا جاك عاقد بزاف زيدي شوية ماء برك وارحي كلش على حسابك نتيا كما تحبيها مرحية مليح ولا متوسطة
تجيك ماعاقدة بزاف وماشي مايهة بزاف ان اشاء الله تكوني فهمتيني
كطفي الفرن زيدي 3مغارف زيت زيتون نعناع يابس مع زعتر يابس شوفي الكمية كما تحبي لانك درتي في الاول
وشهية طيبة

ام سراج وملاك · 2015-01-02, 14:49

الطمينة nami 31

تجيبي طاجين نورمال و ديري فوقه سميد متوسط وتبدي تحمري فيه فوق النار كي تشوفي بالي اللون نتاعه تغير طفي النار عليه يصح قبل قعدي تخلطي فيه بملعقة خشبية كيما قتلك كي تشوفي اللون تغير قلعيه من فوق النار وجهزي كاسرونة فيها شوية دهان خليه يدوب منبعد ديري عليه السميد المحمر وزيدي خليه يتشرب منبعد زيديله العسل علي حساب السميد نتاعك و واصلي الخلط كي تكملي طفي النار وغطيه وخليه يشرب في غرده مدامك تخليه يشرب و يبرد مدام الدوق يولي احسن منبعد لا شتيه ناشف علي طاوة سخني الدهان و العسل قدر كاس لاتاي و فرغيهم علا السميد و باشري المزج و لتزين قرفة و كاوكاو مطحون و ارجوك لاقريتي التعليق التاعي الاول ساعديني و ان شاء الله بصحة و الهناء

LINA 97 · 2015-01-02, 22:44

ربي يجازيكم كل ما هو خبر.

idron0 · 2015-01-03, 14:21

طريقة عمل حبيبات الشيكولاتة في البيت ام ساجد

نذوب شيكولا من الاحسن تاع العلب كيما منى من غير اضافات ونحطها

في كيسحلواني جوتابل او اكياس ليكورني لي يستعملوهم في الاعراس ونفتح

ثقب صغيرونحط نقاط الحجم لي نحب فوق ور الطهي ونخليها ختى تنشف

ونجمعها ونحطها في علبة لوقت الاستعمال

إضغط هنا لرؤية الصورة بحجمها الطبيعي.

وهنا عملت بيها المادلين

إضغط هنا لرؤية الصورة بحجمها الطبيعي.

ام ندى 87 · 2015-01-04, 10:30

نيستلي كاغاميليزي لعبير الحب

هذا وين خرجت من المطبخ والنيسلي مازالو سخون ورآه يبان روووووووعة دوك نقولكم على المقادير

المقادير هي
في نصف لتر حليب كامل الدسم نضع 300 غرام سكر عادي ، ملعقة صغيرة خميرة حلوى وملعقة صغيرة نشا نخلط الكل ونضعهم في كاسرول غامقة فوق النار ونخلط عند الغليان نقص النار نتركه على نار هادية حوالي 45 دقيقة ونبقاو مرة على مرة نخلطو كي يعقد ويصبح اللون ديالو بني كراميل نصبه في آنية زجاج ونغطيه ونتركه يبرد وبهكدا النيسلي راهو جاهز

ام ندى 87 · 2015-01-04, 14:03

طريقة ليزابال

هدا السمك يقولولك الراية و بالفرنسية la raie و طيابه ساهل

اوكي حبيبة إليك الطريقة
طبعا بعد ما تنقي سمك الراية و تغسليه وجدي التتبيلة لي هي ملح ما تكثريش السمك عامة ما يبغيش الملح بزاف و فلفل اسود و شوييية كمون مقدار نصف ملعقة صغيرة و نصف ملعقة ص فلفل احمر حلو و عصرة ليمون و زيت زيتون او زيت عادي
حطي أطراف السمك في هاد التتبيلة خلطي مليح بيدك و دخليه للثلاجة يتشرب على الأقل نصف ساعة
و حضري الصلصة لي هي سنات ثوم مقطع رقيق او رابي انا نفضله مقطع رقيق قليهم في شوية زيت و حطي عليهم ملعقة صغيرة مملوءة طماطم معلبة و حبة كبيرة او زوج حبات متوسطين طماطم رابي تبلي بالملح و الفلفل الأسود و خلي الصلصة تعقد شوية
حطي السمك في بلا تاع فرن من الأحسن يكون تاع زجاج مدهون بالمارغرين و فرغي عليه الصلصة لي حضرتيها و زديدي مقدار كاس تاع شاي من الماء و غطيه بالالمنيوم و دخليه لفرن ساخن على درجة 200 مين يطيب نحيه و الصلصة تكون خاثرة قدميه مع الليمون و رشة معدنوس من فوق و بألف صحة و هناء

idron0 · 2015-01-04, 15:55

لغرايف تاع البيض مريم الاميرة

طيبي حبة نورمال و الثانية كي تحطيها و تبدى تجمد ضربي زوج بيضات و كبيهم فوقها و اغلقي بالحبة لي كنتي طيبتي و خليه يطيب مليح و كي يطيب اثقبيه بالفرشيطة و ديريلو الزبدة و لعسل.

إضغط هنا لرؤية الصورة بحجمها الطبيعي.

idron0 · 2015-01-04, 16:26

سفنج ام مرام 1987

كيلتين سميد عادي
شوي ملح عينك ميزانك
مغرفة ونص كبار تاع خميرة الخبز
نبل بالماء الدافئ ونبقى نعجن ونعجن ونعجن ههههههه تخويف هههههه كي تلقايه معجون اسقي بشوي ماء دافئ ديما يعني اسقي واعجني باش يدخل الماء في العجين كي تلقايه وصل للقوام تاع ماهوش جاري كيما الغرايف وماهوش كيما المطلوع يعني بين وبين
نكسرو فيه زوج بيضات ونعجن باش يدخل في العجين هنا يكون القوام تاعو وصل لحد أنك كي تهزي العجين بيديك راح يهبط وحدو بالعقل يعني ماشي جاااري كيما الغرايف
من بعد ندهنو صحن غميييق ندهنوه بالزيت ونحط فيه العجين تاعي ونغطيه ونخليه يخمر كي نلقاه خمر نبدا نهز بالشوي ونحلو فوق المايدة بشوي زيت ونعمل ثقبة في الوسط ونقليه في زيت غزير .
بالصحة والهنا

idron0 · 2015-01-04, 17:55

طمينة lyzzabel

نحمص السميد الخاص بالطمينة في مقلة كبيرة و نحرك باستمرار على نار قليلة حتى نشوفه اكتسب اللون الزهري الماءل الى البني ههههه و كل وحدة و اللون لي تبغيه ،، و نفرغه في حاجة واسعة و نخليه يبرد ،، في هداك الوقت ندوب الزبدة او المارغرين و العسل مع بعض و تكون كمية الزبدة اكثر من العسل باش ما تجيش حلوة بزاف ،، ما نخليهمش يغلو و نفرغ السميد على خليط الزبدة و العسل غير بالشوية و نخلط مليح بالملعقة الخشبية ما يجيش ناشف و مايجيش جاري يعني كي نهز الطاجين لي خلطت فيه تبقى الطمينة تلعب a gauche et à droite هههههه و نخليها تتشرب وحد نصف ساعة مع البرد ما تطولش و نحطها في طبق التقديم تبقى طرية ما تجيش يابسة ،، انا نديرها في لي مول كيما تاع اليوم درتها في مول دائري و زينتها باللوز محمص و مرحي خشين فالحواف و لوز حب بالقشرة و شوية فستق او بيستاش تاني مرحي خشين و جوز و حبة كرز معلب كيما في الصورة و كل وحدة و طريقتها في التزيين و طبعا حسب الموجود و مين نكون مزروبة نحطها مباشرة في الطبق خخخخ ،، و راني صورتلكم القوام تاعها كي تبرد.
ملاحظة
السميد لي يوالم الطمينة هو تاع المقروظ يعني لا خشين و لا متوسط و لا رقيق .

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.