الطبعة العاشرة لدورة الرقي بمدبرة منزل مثالية - الصفحة 109

فراشات العمر · 2012-12-17, 08:21

السلام عليكم ورحمة الله وبركاته
سبحان الله وبحمده عدد خلقه ورضا نفسه وزنة عرشه ومداد كلماته
اختي وفاء نصيحتي ليك هو انك ما تحسيش زوجك بانه موسوس حاولي ترجعيلو الثقة الوسواس يشبه العالم الخيالي وهع الطبيب الن شاء الله يكون بخير
راهي هذه المشكلة عند معظم الناس وانت خير طبيب خاصة كلامك معاه التعامل باين تعب مخو بزاف وملقا حتى واحد يساندو يعني راه كان باغي يدير حاجة وسكرولو كل الابواب
راني نوصيك بلاكي تخليه يحس بالمرض راني نعرف واحدة بنت الجيران الوسواس قطعلها لسانها

~ حراير ~ · 2012-12-17, 08:23

السلام عليكم و رحمة الله تعالى و بركاته
صباحكم بالخير و الهناء

أصبحنا وأصبح الملك لله وحده لا شريك له له الملك وله الحمد وهو على كل شيء قدير أعوذ بالله السميع العليم من الشيطان الرجيم من همزه ونفخه ونفثه بسم الله ذي الشأن عظيم السلطان شديد البرهان قوي الأركان ما شاء الله كان أعوذ بالله من كل شيطان أنس وجان اللهم أني أسألك خير هذا اليوم فتحه ونصره ونوره وبركته وهداه وأعوذ بك من شر ما بعده اللهم لا تدع لنا ذنبا إلا غفرته ولا عيبا إلا سترته ولا هما إلا فرجته ولا ديناإلا قضيته ولا حاجه من حوائج الدنيا و الآخرة هي لك رضا ولنا صلاحا إلا قضيتها ياأرحم الراحمين وصلي اللهم على محمد وعلى آله وصحبه أجمعين

اللهم ارزقناالجنة وحسن الخاتمه وأعذنا من النار والعذاب

اللهم اني اصبحت اشهدك و اشهد حملت عرشك وملائكتك و جميع خلقك انك انت الله لا اله الا انت وحدك لا شريك لك وان محمدا عبدكورسولك..

اللهم إن كان رزقي في السماء فأنزله وإن كان في الأرض فأخرجهوإن كان بعيدا فقربه وإن كان قريبا فيسره وإن كان قليلا فكثره وإن كان كثيرا فبارك ليفيه

اللهم إني أعوذ بك من الهم والحزن، والعجز والكسل، والجبن والبخل، وقهر الدين وغلبة الرجال

اللهم اكفنا بحَلالِك عن حرامك وبطاعتك عن معصيتك و اغننابفضلك عمَّن سواك

خبروني صليتو الصبح في وقته راهو صبح الشتاء ساهل على ما تصليه يجي وقت العمل و الجد ربي يتقبل منا و منكم

اللهم أنت ربي لاإله إلا أنت خلقتني وأنا عبدك وأنا على عهدك ووعدك ما أستطعت أعوذ بك من شرماصنعت أبوء لك بنعمتك علي وأبوء بذنبي فا أغفر لي فا أنه لايغفر الذنوب إلا أنت... "كيما قلتلكم من قبل هاد سيد الأستغفار داومو عليه"

راني هاد وين كملت شغلي و حضرت حوايج المحجوبة بالسلق على 11 نبدأ نطيب فيها قلت مابين ماناض مول الدار نشوف حباباتي وش احوالهم و كاش ما يدبرو عليا وش نطيب للعشاء حبيت ندير حاجة جديدة و ساهلة ماتديش الوقت
و لكني لقيت أختي وفاء في هاد الحالة غاضتني و غاضني حالها و حبيت نقولها حاجة و عاونوني فيها أو بينولي الصواب إن كان كلامي غالط

it's me · 2012-12-17, 08:33

صباح الخييييير كل وحدة باسمها وشراكم الزوينات لاباس؟
صح قهيوتكم
والله يا سعاد ماعرفت وش نقولك غير ربي يكون معاك و يشفيلك زوجك من كل داء
ضرك نحاول نحملك كتب حول داء الوسواس

~ حراير ~ · 2012-12-17, 08:44

أختي لعزيزة و لحبيبة وفاء لازملك توضعي حد لهاد التمسخير
شوفي عزيزتي انت ثابتة و رزينة و تنجمي تفهمي كلامي و توزنيه بعقلك قبل من قلبك ... انا مارانيش نفتن و لا نبعد في هل زوجك عليك و لكن لكل شيئ حد فاصل و زيد لا يكلف الله نفسا إلا وسعها
شوفي باش يجوك في كل وقت و يزيدو عليك و على زوجك هاد امر غير مقبول حتى الحبيب المصطفى عليه الصلاة و السلام وصى زاير المريض باش ما يطولش و ما يكثرش الهدرة و هادو الي جاو من نص نهار و ما حبسوش من الهدرة امر غير مقبول
شوفي حبيبتي اذا زوجك قابل بالأمر و عاجبينو "و هو امر طبيعي لأنهم خواتاتو و ماراحش يحبولو الشر بالعكس" هنا لازم تكوني صارمة في كلامك فقط يعني
مثلا تقولك مسكين وش هاد المرض .... ما تقبليش هاد لكلام و لازم تبينيلها أنه مش مشكل عندك و أنه مش مرض و إن كان مريض فالناس كامل مرضى بالوسواس و بالإكتئاب قوليلها الناس كامل بالدوايات الآخر فينا يشرب دواء الراس أو الكالسيبرونات
و بالنسبة للتوسويس قولهم شكون ماعادش موسوس في زماننا حتى أنتوما بعد ما تفرمو الباب تعاود تجربو تفتحو من التوسويس و كي نطفي على البرمة نعاود نرجع نشوفها طفيتها و الا مازال حب يقول ما تبينيلهمش بلي كاين مشكلة و نفس الشيئ مع زوجك هونيلو الأمر و كيما قلتي لازم الطبيب و زيد حاجة عاونت زوج أختي كثير و هي الرياضة أو بالأحرى يملء وقت فراغو

اما اذا كان زوجك مزعوج من حضورهم عندك فكوني صارمة بلباقة و بدون "عيب" سامحيني في الكلمة علابالي بلي ماكيش تاع عيب ولكن باش تفهميني بينيلهم بلي عندك شغال و نوضي اخدمي خدمتك و ما تقعديش تهزي في سني و تحطي في أوخر هكداك راح يستحلاو القعدة

أما كان تكلمولك على الرقية بيني بلي امر عادي جدا و الإنسان المومن هو الي يرقي روحو كل ليلة و اي انسان يحتاج يلوح عمالو و تكالو على ربي باش يوقف معاه و حتى الرسول صلى الله عليه و سلم كان يرقي نفسو و اهلو كل ليلة
يعني باختصار بينيلهم بلي ماكان حتى مشكل و أنه امر عادي عند الناس كامل و لكن بدرجات هك راح ينقصو عليك
علابالي بلي كثرت بصح زيدي اسمعي مني هاد الحاجة ماعدتيش تبني حوايجك كامل استري رويحتك باش تبعدي العينين عليك و الي يسألك مش تكذبي عليه و لكن ردي عليه سؤالو و خليه يشتغل بنفسو
انا عندي زوجة أخي كانت فيدار باباها الخبز مشتاقاتو و درك تشوفي دارها قصر مش فيلا ربي يبارك و يزيد و وليداتها كامل ناجحين رغم أنها م تعرفش تفك الحروف من بعضها ... المهم ربي يهدينا و يهديها و لكن دايما متبعتني وش نشري وش ندير رغم انها خويا معيشها افضل مني ماديا بألف خطرة و ديما تقولي وش دارو لبنات في الدراسة و نبدأ انا راني قريت و شريت لكتابت و وووووو ... لكني فقت مع روحي من ناحية هي افضل مني من ناحية تحسدني في حوايجي البسيطة لدرجة أنه مرة قاتلي انت عايشة السعادة التامة ... تخيلي غير كي يعودو بناتي متوحشين باباهم وش من سعادة المهم بلا ما نطول عليك صرت كل ما تسألني على حاجة نردهالها بسؤال "و انت كيفاش درتي" باش تلهى بروحها و تخطيني و فعلا جابت نتيجة
على هك ديما تفكري "و استعينو على قضاء حوائجكم بالكتمان"

it's me · 2012-12-17, 08:51

عندك الحق ليلوشتي
سعاد زرينة ومولات عقل و واقفة مع راجلها الله يبارك ربي يخليها بصح مالازمش تخلي زوجك يحس بلي راه مريض و يبقى يخمم في حالتو الوسواس حاجة عادية خلااااص انا مازلت صغيرة في اول عمري و ساعات يحكمني الوسواس حتى نتوسوس ههههههههههههههههههههههههههههههههههههه
ايا في خاطر سعاد العزيزة رانا رايحين نلمو بعضانا كامل و نجو نعملولك زيارة لدارك نقصرو عالكيف و نسيوك في هم الزمان
ولا وش قلتو ؟؟

~ حراير ~ · 2012-12-17, 08:55

[color="rgb(75, 0, 130)"]فطيمة و مينا مازلتو هنا ؟؟؟؟
منى يصبحك ربي بالخير و الهناء
رغم أنك اصغر مني و ما عندكش خبرة زعم كيما انا .... لكن لازم نقولك بارك الله فيك على هاداك الموقع رائع منين طحتي بيه يا مجرمة هيهيهيه
اختي لعزيزة بنت اخليل وش احوال وليداتك هداو شوية
شوفي القاطوات الوردي و الي بالشيكولا و المدور كامل عجنة وحدة تاع الصابلي و التشاراك راهو باين و لوخر بوسو قوليلي الي عجبك نعطيك الغوسات تاعو راهم كامل ساهلين و ما يدوش الوقت[/color]

Minnnaaa · 2012-12-17, 08:57

حبيبتي وفاء اسمحيلي اللولة نقول لليلوشة بارك الله فيها على الكلام الصواب
ونضم صوتي لصوتها رانا كامل موسوسين بصح باش يلتمو عليك ويديرو حيحاية على والو هذا شيء غير مقبول وكيما قالتلك ليلوشة ماتكثريش الترحاب حتى يولو يديروك قبلة
واطلبي من زوجك يبدل جو ويدي كونجي وروحو بدلو البلاصة هاكا يبعد على الاونتوراج الليراه فيه
ولما تتكلمي معاه اهدري على كامل المواضيع ماعدا المرض ما تمديلهش اهمية كبيرة
واهم حاجة استعيني بالله هو مفتاح الفرج وادعيه باش يقدرك فالتعامل مع "الزوارات "
وما تخميش رانا هنا نزيفطولك اونتي توسويس تفاجي خاطرك بيه هاهاها ولا واش قلتي عليها؟

~ حراير ~ · 2012-12-17, 08:58

نبض الفؤاد يعطيك الصحة حنونة رغم تعبك الا انك ما خليتيش مشكلة وفاء تفوت بلا ما تنصحيها .... يعطيك الصحة هاد هو المؤمن الي يوقف مع خوه تاع الصح
ربي يشفيك حنونة و يمتعك بالصحة و الراحة

it's me · 2012-12-17, 09:00

اليوم ديري تارت ملييحة لزوجك تشربو بيها حليب العشية و اقترحي عليه انكم تدو الاولاد و تروحو تتعشو برا ولا نبعثلو راجلي يجي يريقلو ههههه
حقا هذاك الدكتور النفساني لي قتلك عليه راه يجي على 10 اليوم في الاذاعة قوليلو يسمعلو

Minnnaaa · 2012-12-17, 09:02

ما رسي استاذة الله يكملك بعقلك
البارح كنت باغية نقول كلمة وحدة ملي قلتيهم وقعدت نخمم قريب ساعة كي نبداها حتى فاقلي قالي "عندك حاجة باغيا تقوليها ما تقوليليش غير على الخرجة "ايا سرطت كلامي (بلعته) ورقدت هاهاهاهاها

it's me · 2012-12-17, 09:04

اقتباس:

المشاركة الأصلية كتبت بواسطة minnnaaa

ما رسي استاذة الله يكملك بعقلك
البارح كنت باغية نقول كلمة وحدة ملي قلتيهم وقعدت نخمم قريب ساعة كي نبداها حتى فاقلي قالي "عندك حاجة باغيا تقوليها ما تقوليليش غير على الخرجة

"ايا سرطت كلامي (بلعته) ورقدت هاهاهاهاها

هههههههههههههههههههههههههههههههههههههههههه الله يعطيك الربح كان غير قلتيها خليتيه شوية دايخ

Minnnaaa · 2012-12-17, 09:08

ليلوشة عينيا ربي يصبحك بالخير
انا ما ننصحكش تتعشي برا تبانلي راه متوحش الماكلة نتاع الدار من يديك كي لعسل لوكان كاش طبق تقليدي يكون في خاطره افضل
(مانش عارفة على نبغي نسقسيك ؟هاهاها)قوليلي والديه تماك في بسكرة؟ ولا لا شفتك ماجبدتيش عليهمهاهاهاهاها
ما نطلقكشحتى نجاورك في بسكرة وتشبعيني تمر

Minnnaaa · 2012-12-17, 09:11

اقتباس:

المشاركة الأصلية كتبت بواسطة it's me

هههههههههههههههههههههههههههههههههههههههههه الله يعطيك الربح كان غير قلتيها خليتيه شوية دايخ

وقفهالي عليها ماقلتهاش انا نخمم كي نزوق الهدرة وهو خايف نقوله باغية نخرج

it's me · 2012-12-17, 09:12

ديريلو حاجة يحب ياكلها بزاف و هني راسك هههههههههههههه

~ حراير ~ · 2012-12-17, 09:13

lمنى والله يعطيك الصحة فكرة روعة لعشاء برا من الصيف ما درناهاش
انا عن نفسي دوختو و دخت معاه قلت قلت قلت قلت قلت كلشي حفظتو قلتو و زيد شوية من هاداك الموقع هزيت أفكار هاداك هو
حتان عاد يقولي والله يليق بيا نبعث رسالة شكر لصحابابتك راني حسيتك تبدلتي رجعتي ليلوشة تاع بكري زاهية و تزهي لعباد معاها هيهيهيهيهيهيهيه
قتلو في قلبي صحاباتي مساكن خاطيهم هادي القرعاجة الصغيرة وش يخرج منها هيهيهيهيهيهيه