~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~ - الصفحة 107

غزالة1 · 2016-05-23, 08:53

صباح الخير للجميع
اللهم اعنا على ذكرك و شكرك و حسن عبادتك

سيرين 5 · 2016-05-23, 08:58

صباح الخيــــــــــــــر عليكم لبنات أصبحنا و أصبح الملك لله

سمراء الدنيا · 2016-05-23, 09:36

السلام عليكم و اسعد الله صباحكم
شكرا لكل من كتبت حرف ولها ان شاء الله حسنات و اجر
متابعة باهتمام لكن وانا واقفة لازم نفضي نفسي و نقعد مليح باش نكتب
راح نحجز مشاركات حتى نحرص عليها و نكتب احسن ما ننسى واش كنت راح نقول

بالنسبة للتنظيفات نورمالمون هاذ الاسبوع لغرفة الاولاد

سمراء الدنيا · 2016-05-23, 09:36

تطبيقاتي للايام الماضية

من بين التطبيقات للي قمت بيها هي تنظيف الكويزينيار تنظيف عميق

الصور قديمة لكنها نفس الشيء

بقاتلي الثلاجة يوم الاربعاء ان شاء الله

التنظيفات اليومية

خلصت غرفة البنات في يوم واحد لانها ما تعبش

خبيت ليهم ملابس الشتاء و جبدت ملابس الصيف

بالنسبة للطبخ جربت زلابية ام وليد روعة خسارة ما صورتش

سمراء الدنيا · 2016-05-23, 09:37

الجانب الجمالي

كنت حضرت ماء الورد في البيت و كنت سعيدة بالنتيجة لكن بعد اسبوع في الثلاجة فسد ما عرفتش السبب
المهم انا نعرض عليكم التجربة

سمراء الدنيا · 2016-05-23, 09:38

مشاركتي في النقاش في تربية الابناء

من الجيد ان تبحث الام في مجال تربية ابناءها و تقرا الكثير و تستمع لمحاضرات فهذا سيساعدها على التغلب على مشاكل الابناء و انا ساعدتني كثيرا هذه النصائح

*******************************

سمراء الدنيا · 2016-05-23, 09:38

مشاركة خاصة بالتدابير المنزلية

بغيت نشاركم بهاذ التدبيرة

شريت هاذ المنتج ب 25 الف للبيدون

مليح للارضيات و للافرشة
رايحة نغسل بيه الطابيات

عمرت منو في القارورة الخاصة بصابون اليدين و عملتو لرجلين الاولاد حاشاكم ...الصراحة تهنيت ...

سمراء الدنيا · 2016-05-23, 09:39

وصفاتي لهذا الاسبوع للاكل الصحي

اضافة الى السلطات و الحساء جربت هاذ المرة معقودة ام وليد في الفرن
تحضري البطاطا عادي كيما موالفة و ضيفيلها كمية من الخبز المطحون و تشكلي اقراص و ديريها في البيض ثم في لاشابلور و تسدفيها في صحن الفرن و تدهني بقيلي من الزيت باش ما تجيش البطاطا ناشفة

و هاذ الايام راني مع الشعير نفورو كيما الطعام مرات نسقيه بالحليب و مرات بالمرق

و ايضا عجنت خبز الشعير

على فكرة والدي ربي يرحمو كان فيه مرض السكر لمدة 30 سنة من للي فتحت عينيا في الدنيا و هو يتعشى دشيشة الشعير بالحليب عمرو ما كان عندو كرش و عمرو ما نحنى ظهرو حتى مات واقف ربي يرحمو

سمراء الدنيا · 2016-05-23, 09:39

في قراءتي لبعض المشاركات جا في بالي نرد عليهم
الاخت اسيا 25 ذكرت انك تفوري الجلبان .... ؟ من رايي تكونجليه كيما هو احسن ما يتغيرش لونو و يجي مليح ... و اذا عندك عفسة تفوريه و يبقى محافظ على لونو اعطيهالي نبغي نجرب كل الافكار

ام البنين (ام هارون) طلبتي برنامج للاطفال ... راكي تعرفي تختلف الافكار حسب سن الاطفال .... نعطيك الافكار للي مطبقتهم على اولادي و شوفي اذا تناسبك ...... اهم شيء مدخلتهم لمدرسة قرانية و اصعب وقت عندي هو وقت القيلولة نفصلهم على بعضهم يعني الولد نعطيه العاب في النت و البنت نعمليها بسينة في الدوش و نخليها تعوم هههه نرقد هاذيك الساعة و نوض ندوشليها و نبدليهم الادوار يدخل هو للدوش و هي تقعد في النت نحطليها قصة من قصص حكايات ما احلاها و هاذ الايام راني نحطليها المناهل .... عندي الولد صار عندو 12 سنة من قبل كنت نلاهيه بالعاب بازل و الكارطا لكنو كره منهم ... هاذ الاسبوع من نهار كمل الدراسة راني نطيبلو الماييس و يوقف يبيع قدام الباب ههههه 5 دينار للكوب راه يظل لاهي معاه و متمتع كليا منا يزيد يومين و يكره قيمة ما نخمملو في فكرة اخرى ..... الاولاد لكبار ....الولد مقسم الوقت يرقد شويا يتفرج شويا يكونيكتي شويا و يخرج شويا (و يقضي للبيت و يخرج معايا مشاوير) ..البنت الصباح ممنوع النت تقضي معايا في البيت ساعتين في القيلولة تكونيكتي بعدها تخل للمطبخ تلبز لازم نمديلها تعمل تحلية او شيء ما و لو خبزة ... بعد العصر نعلمها اشغال يدوية لحد الان تعلمت الطرز بالشرائط و تعلمت تخدم اكسسوارات و راهي تتعلم عجينة السيراميك و المغرب تساعدني في المطبخ ...نحاول دايما نجمعهم و نتحاورو يا اما نختار فيلم عائلي و نتفرجوه مع بعض يا اما نخرجو مع بعض
و سالتيني ايضا على جدول الاكلات لازمني نعمل جدول و في الليل نطل عليه نختار منو حسب واش موجود في البيت و اذا احتجت شيء نطلب من الزوج يخليلي الدراهم ليوم الغد و كل مرة نغير فيه كي نجرب وصفة و تنجح نضيفها
ام ساجد قلتي انو ابنك متعبك في التوالات راهو جاي الصيف يساعدك شويا احسن من الشتا لازم تتعبي شويا و كي يتعلم تتهني لبسيه شورت خفيف و ابقي دايما مراقباتو و كي يعملها في المكان المخصص فرحي بيه و صفقيلو يبدا يعرف انو عمل حاجة مليحة و بالنسبة للكوزينة ما تقنطيش روحك اهم شيء الصحة و لحوايج الاخرى تجي غير بالشوي انا عانيت 8 سنوات بدون بيت و لا مطبخ و لا اجهزة كهرومنزلية غير نسلك حتى فرجها ربي و الحمد لله ... ربي يفرج عليك انت ايضا لازمي الاستغفار و ابشري .
اروى شكيتي من ابنك راسو خشين .... معظم الاولاد كيما هاك لكن بذكاءك تقدري تتحايلي عليه اهم شيء ما تشاحنيهش لما يعيط ما تعيطيش معاه ... استعملي معاه دائما الهدوء و الصوت المنخفض و احضنيه و انت تكلميه و حاولي دايما تغيري الموضوع لما تشوفيه يعاند
ام متين شكرا على الادعية و جزاك الله خيرا .... و شكرا على نصائح التخسيس ... راني رجعت كي الكادر بسبب الغدة الدرقية و هاذيك هي الاعراض نتاعها .... كي يتقبل الانسان المرض راهو قطع نصف طريق العلاج ربي يشفينا و يشفي مرضى المسلمين
ام هاجر شكرا على سرد يومياتك و ربي يباركلك في صحتك ... كنت متحيرة على اصحاب امتحان و كنت مشغولة بزاف غير لقيت نص الامتحان سهل حطيتو و ما كتبت والو لاني كنت نكلم صديقاتي لي اولادهم يمتاحنو طمنتهم و اطمنت عليهم
ام ارو لاباس على لولو اعتقد انو انت للي سالتي على زيوت الشعر ..... احسن شيء جربتو هو زيت الخروع لا مثيل له سنوات و انا نعملها ليا و لبناتي ... نعمر الشعر بزيت الخروع و نشمخ فوطة بالماء الساخن ة نلف فيها الشعر لمدة ساعة و من بعد نغسلو و الشعر يكون مبلول و غالبا نعملها في الحمام
الاخت هناء محمد ربي ينجح و لدك و بنتك و يفرحك بيهم
الاخت منال 16 ان شاء الله رمضان الاول وحدك يكون رمضان خير و بركة و الحمد لله انك استركتي نفسك نوصيك ما تسمحيش في روحك ابدا ابدا و شكرا جزيلا على وصفة انبات الشعر )نحتاجها لابني)
بالنسبة للشعر الدهني للاخت اروى ديري اضيفي خل او ليمون لماء التشلال في الاخير شعري دهني و هذا واش نفعني
اهلا بيك الاخت روضة 88 و شكرا على وصفات الشعر
ام ابراهيم الخليل طلبت نصيحة على ابنها للي فاقد الشهية .... هذي مشكلة عند معظم الاولاد .... حاولي تشهيه في الاكل بطرق جميلة في التقديم .... دايما اعطيه ياكل اول ما يطلب حتى ومايكونش وقت اكل و خلي دايما اكل على طاولة المطبخ او فوق البوتاجي ممكن في اي وقت يجي في بالو ياكل اذا يقدر يبلع حبات حلبة بالماء يوميا يكون افضل تساعدو على فتح الشهية و ما يحسش بطعمها
غزالة بالنسبة لوصفة الشيب جربت شحال من وصفة يخرج لون الشيب برتقالي ووصفة الكاكاو خرج بني و عجبني و هاذ الايام رايحة نعاودها لازم تتعاود عدة مرات و ان شاء الله نبعثلك صورة في رسالة
بالنسبة لانيمي حكمتني العام للي فات و انا بالحمل جربت وصفة مرة وحدة و الحمد لله ضربة بضربة .... جيبي طرف صغير كبدة غنمي قد 4 مورصويات شوكولا و قطعيها رقيقة و ضيفيلها كاس عصير برتقال طبيعي او مشري و ضربيهم في الميكسور و اشربي تمتم يعني مش لازم يبقى يفسد بعد دقائق و كل يوم حضري كاس و اشربيه و النتيجة رائعة
سيرين ان شاء الله التحاليل تكون مبشرة و ربي يتمم شفاءك انا نقولك على معلومة سمعتها مؤخرا من عجوزة شافت الناس يعانيوو من الحساسية قالتليهم تبخرو ب حاشاك وسخ لبعير (الجمل) و قالت انها عملتها لاولادها و براو و الله اعلم
و يا ماما على هذاك البريوش الصورة راح تنطق يعطيك الصحة و يسلم هاذوك ليدين

الاخت شي بيبا شكرا جزيلا على البطاقات الرائعة و ان شاء الله ننظم ليكم في المجموعة
ام لينا ربي يوفق ابنك و ينجحو و يفرحك بيه واضح انك تاعبة معاه ربي يخليك ليه ... تحية كبيرة لكل ام توقف و تدعم اولادها و تسهر على انشاء جيل يفتخر بيه الاسلام ...شكرا على المعلومة الخاصة بالاكل سجلتها عندي
موضوع الشجار بين الاولاد موضوع شائك و كبير و قريت فيه الكثير
اولادي عندهم مدة ما تشاجروش اخر مرة قعدت نبكي بطلووووو هههههه
راني حطمت رقم قياسي في الكلام

سيرين 5 · 2016-05-23, 09:40

بما أنو اليوم مخصص للتغذية و الصحة و الرشاقة حبيت نحطلكم برنامجي لي مدتهولي الأخصائية تحت إشراف طبي و بعد قيامي بتحاليل و الآن راني نزيد نعاود في التحاليل لذلك نقول و نعاود أنني أخلي مسؤوليتي من كل وحدة طبق هاذ البرنامج و هي ما علابالهاش واش عندها و واش ما عندهاش ؟ و تصرالها كاش حاجة ؟
حطيتلكم البرنامج باش تاخذو فكرة عن الأغذية المسموح أكلها و الأغذية لي لازم نتناولوها بحدود و شكرا لكن صديقاتي

سيرين 5 · 2016-05-23, 09:55

اخترت لكم من موضوعي الخاص بالوصفات الصحية شطيطحة سردين ممممممم بنينة و صحية أنا شخصيا نموت عليها و على السردين غير اليوم الصباح هدرت عليه قلت ما خلاوناش ناكلوه غلاوه ؟

1- في طنجرة حطي بصلة رابي + ملح + فلفل أسود + فلفل دريس + كمون + عكري + راس الحانوت + م ك زيت زيتون و قليهم على نار قليلة

2- + في باسينة صغير نحط السردين تاعنا المنقي + ثوم + شويا بصل رابي + معدنوس + ملح + فلفل أسود + كمون + م ك فرينة + نجمع ببيضة

3- نضيف حبتين طماطم رابي + عرف زيترة + م ك طاطم مصبرة + ثوم + معدنوس و نزيدو نخلوهم يتقلاو

4- نمرقو شويا برك و نخلوها طيب على نار قليلة

5- نشكل كريات من السردين و لما قريب طيب لاصوص (أنا ميكسيتها باش تجي شابة) نحط كرات السردين طيب

6- و قدميها بالصحة و الراحة مع رشة معدنوس من فوق ممممممم بنينة و صحية و غنية بالفوائد

سيرين 5 · 2016-05-23, 10:08

و اخترت لكم أيضا من موضوعي عصير الجزر
الوصفة منقولة لأخت في المنتدى تسمحلي لأني والله نسيت اسمها من مدة كنت نحوس على عصير الجزر و قريتها في المنتدى و نسيت على اسم صاحبة الوصفة جاتني الوصفة ساهلة حفظتها و طبقتها و النتيجة كانت رائعة يعطيها الصحة صاحبة الوصفة

1-كيلة جزر منقي و مقطع و مفور

2- في مكسور نرحوها مع كيلة من الماء لي فارت فيه الزرودية

3- نزيدولو عصير 2 حبات قارص + 5 م ك سكر+ 2 ياوورت بذوق الخوخ أنا استعملت وحدة خوخ و وحدة مشماش

4- فرغيه في طاس كبير و زيديلو كيلة أخرى من الماء العادي و خليه يبرد في الثلاجة مليح

5- و قدميـــه بالصحة و الراحة مقادير مضبوطة جدا يعطيها الصحة صاحبة الوصفة ما يجي مايه ما يجي عاقد و الذوق جدا رائع خير من العصائر المصنعة لي فيها مواد حافضة و سكر بزااااف أنا استعملت 5 م ك و جاني حلو و صاحبة الوصفة استعملت 10 م ك ؟ و كل شخص و الذوق تاعو و خرجلي كمية مليحة واحد لتر و نصف

omelbanin · 2016-05-23, 10:30

شكرا ختي سيرين ،على الوصفات ،حبيت نسقسيك ،يقولك كي ديري رجيم عندك يومك في الاسبوع تقدري تاكلي عادي يعني واش تحبي.:؟
كاين منها؟

سرور2 · 2016-05-23, 10:33

سلام لبنات يعطيكم الصحىة

انا راني لا علاقة بالنضافة لامن قريب ولا من بعيد

بعد منضفت غرفتيوالصالون رجعو كيما كانو املا قررت منمس الو من التسياق حتان نهارين قبل رمضان لحيانا ربي

اليوم غسلت الزور تهنيت منهم

والعشوة كشما نفرز برك خفافي حتان يلحق وقت التسياق

سيرين 5 · 2016-05-23, 10:37

اقتباس:

المشاركة الأصلية كتبت بواسطة omelbanin

شكرا ختي سيرين ،على الوصفات ،حبيت نسقسيك ،يقولك كي ديري رجيم عندك يومك في الاسبوع تقدري تاكلي عادي يعني واش تحبي.:؟
كاين منها؟

الله يسلمك أم البنين هذيك من عندنا باش نقدرو نشدو هههههههههههههههههههههههههههههه نثبرو روحنا كي يلحق نهار الراحة ناكل واش نحب هههههههه