وصفات حراير الكوزينة الجزء الثاني

[idron0]

جواز بسباس مع بطاطا انا هي رزيقة

تقلي اطراف الدجاج مع بصلة صغيرة مقطعة رقيق وشوية معدنوس مقطع و حية طماطم مقطعة و ملح و فلفل اكحل و شوية سكنجبير و شوية قرفة و مغرفة صغيرة معمرة طماطم مصبرة و شوي فلفل عكري انا نحب المرق تاعي يكون حمر مع حبيتين زرودية مقطعين دوائر خشينة بعدما يتقلي كلش مليح مرقي قيس ما يطيب الجاج تاعك . بعد حوالي 15 دقيقة زيدي البسباس كل وحدة مقطعة الى 4 مع كمشة زيتون منزوع االنوي هو ما يطولش يطيب حوالي 20 دقيقة . في الاخير نحيت قطع الدجاج و حمرتها في مارغارين مع زيت و زدت طيبت بطاطا فريت دوائر و زينت بيهم الطبق

إضغط هنا لرؤية الصورة بحجمها الطبيعي.

[كريمة الجزائرية 48]

امممممممم بنينة هاذيك التارتة اختي رزيقة

[idron0]

الرفيس القسنطيني omrihem

كاين الرفيس يعني القتات نتاعو يتباع واجد يخدموه في قسنطينة راهو موجود هنا في سطيف وهاذي صورتو وما نحيلكش علي ريحتو تهبل .

إضغط هنا لرؤية الصورة بحجمها الطبيعي.


اما اذا حبيتي تديري العجين في الدار تديري كيما المقروط ثلاث كيلات دقيق بكيلة مخلطة زبدة وزيت بلي بالماء زهر والماء وشوي ملح كلي راح وجدي عجينة المقروط من بعد جيبي بلاطو نتاع فور وحطي العجينة نتاعك وقرصيه كيما خبز الدار علي قد البلاطو من بعد بالموس وهو في البلاطو اقسميه حبات باه يدخلو الطياب برك وطيبيه مليح حمريه من تحت ومن فوق من بعد يبرد فتيه وعاودي سيريه في سقاط يعني سيار عيونو كبار
هنا راح تتحصلي علي رفيس راهو كيما الي يتباع في الباطة الي حاطيتهالك نفس الشيء
من بعد تحطي برمة وكسكاس تفوريه المرة الاولي عادي من بعد تفليه بكاس ماء زهر والا عندك ماء ورد حطيلو شوي وفوريه مرة ثانية زيدي عاوديه بكاس حليب وشوي زبدة انا نفضل نتاع بقرات من اجل الطعم وزيدي فوريه انا نحب نفورو ثلاث مرات لا اكثر با ه ما يتعجنش كي تنحيه وتبقاي تقدميه ديري عسل وزبدة مذوبين مع بعض وخلطيهم في الرفيس وتذوقي انتي واش تحبي
اذا كان عندك اي نوع مكسرات خلطي معاه في الداخل وزينيه من برا بشوي مكسرات وسكر رطب اذا ما عندكش خليه هكاك بشوي سكر رطب وخلاص
وكي يبقالك واجد خبيه في الثلاجة مرة اخري عاودي فوريه فقط .

إضغط هنا لرؤية الصورة بحجمها الطبيعي.

[idron0]

الرفيس القسنطيني زينب 83

هاذي طريقتي تعلمتها من أمي و تقريبا هاذي الطريقة مشتركة بين الناس كامل
2 كيلات سميد متوسط مايكونش رطب
كيلة زيت ، انا ديما ندير اقل
تبسي الدقيق مليح و تطرحيه في بلاطو و تشكلي فوقو خطوط على شكل مربعات باع تقصيه مباعد و دخليه للفرن حتى يطيب مالازمش يحمارلك بزاف باه يجيك لونو ذهبي
ترحيه في الربو ملييييح ممكن بعدها تغربليه و ممكن لالا لانو الربو ريحيه ما شاء الله و تفوريه بين كل تفويرة و اخرى ترشيه بماء زهر و حليب بارد
في اخر تفويرة حطي قطعة زبدة كمية من السكر الخشن حسب الحلاوة لي حابتها
و كمية صغيرة من المكسرات المرحية احسن شي اللوز و الكوكاو و ترجعيه شوي للكسكاس على نار هادية ، عند التقديم زينيه بالعسل و المكسرات .

[idron0]

أصابع زينب زينب 83

للأمانة لقيتها في موقع شهية و جاتني امممممممم
3 كوب طحين
1 كوب زبدة، وزيت
رشة ملح
1 كوب ماء الزهر
1 ملعقة صغيره خميرة فورية
1 بيضة مخفوقة
1 كوب زيت نباتي للقلي
قطر
سمسم للتزيين
طريقة تحضير اصابع زينب
1. تذوب الخميرة في ماء الزهر وتترك تتخمر لمدة 10 دقائق.

2. يوضع الطحين مع رشة الملح ثم الزيت والزبدة المذوبة ويفرك جيداً، تضاف الخميرة ويخلط جيداً.

3. توضع البيضة على الخليط ويعجن حتى الحصول على عجينة طرية.

4. تشكل من العجين كرات بحجم حبة الكرز، بواسطة الابهام تمرر كل كرة على المبشرة للحصول على شكل القنفذ اوشكل قوقعة.

5. تقلى في الزيت حتى تكتسب اللون الذهبي، تغمس القطر وتزيين بالسمسم.

[idron0]

السفنج cilia
ماما هي اللي دارته و قاتلي انا ندير عيني ميزاني راكي عارفة الكبارات ماشي كيما اخنا كل شيئ بالعبار
قاتلي درت فرينة حوالي كيلو +2 مغارف كبار خمارة نتاع الخبز + ملح + 1 خمارة كيميائية + مغرف كبيرة سكر و تخلط كل شئ بالماء الدافئ الخليط مايكونش جاري و مايكونش ثقيل بزاف و تبدا تضرب فيه كي شغل طلع و تهبط و من بعد تخليه يخمر و مين يخمر خسريه و خمريه للمرة الثانية و من بعد بداي تدهني يدك بالزيت و تاخذي كرية و ثقبيها في الوسط و قليها لازم الزيت ميغطيش الحبة من فوق انتي تقعدي ترفدي الزيت بالملعقة و تفرغ فوق الحبة حتى ينتفخ.

[idron0]

كيكة مياسم الصمت

الحقيقة كنت ناوية ندير بسكوي رولي
ومن بعد ما نعرف كيف جيت نرولي تقطع لي طرف وفسد شكله
من بعد جبت صحن غامق شوية تاع شربة
انا استعملت صحنين متوسطين
المهم فرشت نيلون على الصحن ودهنته بالكريم شونتي من كل الجوانب
ورحت للبسكوي نقسم قطع حسب الحاجة ونرتب على الصحن ونحط اكيد الكريم شونتي بين كل طبقة طبقة حتى كملت

من بعد اخرطبقة حطيت فوقها النيلون ' 'ساشي عادي فتحتها''
وضغطت مليح
ومن بعد قلبتها فوق لوح تقطيع وخليتها كما هي دون نزع الصحن حتى تحكم روحها
ودخلتها الثلاجة ممكن عدة ساعات
انا كنت خليتها لغدوة من ذاك لاني درتها العشية

ومن بعد جبت طابلة شكولة ذوبتها وعاودت حطيتها على غلافها بعد ومشيت بالسكين على شكل طبقة رقيقة
ولما جمدت الشكولة قصيتها قطع عشوائية
ومن بعد خرت التارت تاعي
ونجبد الصحن بسهولة لانه اصلا مقلوب ويجي معه النيلون و تكون الطبقة السفلية تولي هي الوجه طبعا كنت حطيتي لها الشونتي قبل في المرحلة الاولى
تعدليها شوية اذا احتاجت بالسكين فقط
ومن بعد قطع الشكولة تغرسيهم بطريقة عشوائية
نوع من التغيير لكن حقيقة طعمها روعة.

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

[souso07]

المشاركة الأصلية كتبت بواسطة idron0

ماشي هادي

https://www.djelfa.info/vb/showthread...12996&page=103
رقم المشاركة : 1537

اسمحيلي حتوتة بصح ماشي هادي تقريبا كيما هاك بصح مافيهاش كاكاو

[idron0]

صابلي كيندرللاخت عبير مسلمة بالفطرة

250 غ مارغرين طرية 150غ سكر رطب 3 صفار بيض و بيضة كاملة 175 غ نشا 7 ملاعق كبيرة كاكاو ( انا درت 4 فقط لأنو الكاكاو تاعي غامق بزاف ) فرينة حتى تتحصلي على عجينة طرية حليها بالحلال و قطعي مستطيلات بالطابع و طيبيهم بالنسبة الكريمة خلطي كمية من حلوة الترك و العسل و قوفريط مرحي انا ما زدتش القوفريط أوجات بنينة لصقي كل حبتين بهاذ لكريمة و في الأخير غلفي الحبة كاملة بالشوكولا الذائبة و زينيها بخطوط الشوكولا.

[idron0]

السباقيتي باليمول ام سارة 18

البصل رابي +التوم مرابي+الزيت ونقليهم شوية تحطي التوابل نتاعك والملح ورقة رند +طماطم مرابية +شوية طماطم مركزة نخليهم يتقلاو شوية من بعد نزيدلها شوية ماء
ونخليها تطيب على نار هادية
نغلي السباقيتي من جهة خليها تقطر ولما طابت الصوص زدتلها لي مول هادو نتاع العلبة طايبين نحطهوم في الاخير ويغلو شوية نطفي وساعات ندير الكونجلي مبصح نحطهم من قبل لا تطيب لاصوص
كي نكمل خلاص ندير السباقيتي تتشرب في هديك لاصوص.

إضغط هنا لرؤية الصورة بحجمها الطبيعي.

[idron0]

البوزلوف نور الاسلام 26

بالنسبة لطريقة طبخ البوزلوف انا كي نغليه قطعيه طراف طراف
ندير في القدرة الحمص البوزلوف نقطع عليه القرعة و نسكرفج الطماطم والثوم ونويدلو الزيت اما التوابل ندير راس الحانوت و الملح هدا ماكان ومن يعد ندير الماء قيس ما طيب القرعة يعني منكترش
وفي الاخير رشي فوقها الحشيش
هادي الوصفة تاع عجوزتي الله يرحمها ويوسع عليها.

[منال ومنير]

لبنات شكرا علي هده الوصفات روعة سهلتو علينا

[idron0]

سلطة البرتقال انا هي رزيقة

قطعي البرتقال تاعك دوائر و ستفيها في الطبسي اونبعد زيدي قطعي البنان بصح غطسي القطع في عصير ليمون مسكر باه يحافظ على اللون تاعو و زيديه مع البرتقال ثم رشي شوي سكر على قطع البرتقال و زيدي رشة قرفة تعطيها بنة هي منعشة جدا.

[idron0]

الارز بالشومبينيون ام سراج و ملاك

درت روز لمفور نحب نخدم بيه غسلتو وغليتو مليح كي طاب صفيتو من الماء ودرت طرف زبدة فيه وشوي ملح لصوص هذيك هيا مرق عادي المرقة بصل وتوم وفلفل اسود ودواء مخلط وكسبر مرحي وملح وزيت وطماطم الباط وصدر دجاج كي يطيب فتي الدجاج ولازم المرقة تنشف شوي لوحي الدجاج لمفتت والزيتون الاخضر تكوني قطعتيه وغليتيه والشومبينيون اغسليه ولوحية كي تخثار المرقة مليح سقي بيها .

[idron0]

سلطة المقارونة ام سراج و ملاك