~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[حياتي كلها امل]

ام لينا ربي يحفظلك وليدك وان شاء الله يزيدو يخدمو الفرنسية هما يتهناو واحنا نتهناو.
نتاءج تظهر يوم7جوان ان شاء الله اليوم الاول من رمضان

[سيرين 5]

بالنسبة للتحضيرات :
مساء الأربعاء :
جات عندي أختي تبات عملت فريت و سلطة و شريت دجاجة محمرة و كان عندي مطلوع بالمجمد زدت شريت عصير
كي جات اختي جابت معاها آتاي و قلب اللوز و قطايف
غير لحقت للدار فرزت البيت كانت مقلبة رأسا على عقب ؟ و حطيت الغسيل بالغسالة و رحت للمطبخ و بديت نقي في البطاطا حتى جات اختي من العمل مباشرة لعندي جهزتلها الحمام دوشت و جات قعدت معايا في المطبخ كملت غسلت السلطة و قليت البطاطا و حطيت العشاء عيطت لبنت لوستي تعشات معانا و باتت مع أختي بقينا نقصرو حتى 1 تاع الصباح غسلولي هوما الأواني
يوم الخميس :
رحت زعما نحي دم لحقت شويا روطار قولولي ما نحوش دم على 11 لازم الصباح ؟؟؟ رحت لدارنا زادت يما شرات دجاج محمر تغدينا بيه هههههه رانا طايحين على الدجاج ربي يستر ؟ في المساء رحت درت سويعة سبور تجريبية في لاصال مليحة درت كارديو تاع الماشينات ؟ بصح لايروبيك فيها الحماس أكثر
و العشاء جبت دوارة من دارنا أنا ما نحبهاش كي لحقنا قعدنا شويا عند عجوزتي و كي جينا طالعين قاتلي عجوزتي درنا لوبيا لا ما عندكمش العشاء قلتلها مديلي طبسي ليا هو ياكل الدوارة من بعد قلتلها خلاص حنا رانا جايين نطلعو الدوزان و نهبطو حطيت الدوارة تسخن و رفدت المطلوع لي كانت عندي و حبات حار و طماطم باش نعملوهم سلاطة و تعشينا التحت كي كملنا غسلنا الأواني أنا و بنت لوستي و طلعت لداري رقدت بنتي و أنا تهنيت ما طيبت عشاء ما درت ماعن ...
يوم الجمعة :
نضت مباشرة دوشت و صليت و رحت للمطبخ درت قهوة حليب استقهوينا رحت للبيت خرجت الفراش يتهوى مسحت الغبار و مسحت الزجاج و كنست و سيقت البيت و غسلت الأواني و رتبتهم و كان راجلي جابلي هذو تاع التوابل و أنا ما نحتاجهمش لذالك حطيت فيهم الأرز و العدس وووو و جاو ملاح أحسن من العلب لي كنت مستعملة و الأكياس المربوطة هههههه


و زدت الحميصة لي شمختها حطيتها في الأكياس و إلى المجمد


عملت مسفوف للغذاء بالجلبانة بعتتلي عجوزتي محمصة بالمرقة و أنا بعتلهم طبسي مسفوف ، بعد ما تغدينا خلطت بريوش تاع أم أماني ربي يحفظها جا هااااايل للأسف ما صورتوش لأني كنت مزروبة باش نروحو للبلاد نطلو على قريبة عجوزتي كانت مريضة ديتو معايا جا شباب شكلا لكن الذوق ما ذقتوش ؟ بقاتلي شويا عجينة خبيتها في الثلاجة و قلعنا و في المساء كي رجعنا تعشينا محمصة و زدت عملت تشكتشوكة باذنجال مشوي و فلفل حار و إلى النوم

و بالنسبة ليوم السبت كان الجهاد الأعظم ههههههه بديت بالبيت رتبتها و أعدت مسح الغبار خفوفي و كنست الأرض و رحت للصالون خرشت الشورى تتهوى و مسحت الغبار و رفدت الزربية مسحت الأرضية و رجعت للبيت التانية كنت عاملتها صالون ثاني لكن فرغتها و نقلت الفوتاي للصالون الأول و جا معمر شباب هذي مدة ملي نقلته و البيت الثانية تعمرت خردة كلش زائد نحطو فيها حتى تعمرت فرغتها كامل و مسحت الغبار من النوافذ و سيقت الأٍضية و رجعت بعض الأشياء و الباقي فرزتهم كل حاجة حطيتها في مكانها شريت لبنتي كوموند تاع بلاستيك شابة نحطلها فيها ملابسها حتى نهار يفرج ربي و هي تكبر شويا و نشريلها خزانة ، مازال ما رتبتهمش ملابسها راهم في أكياس ؟
بعدها انتقلت للحمام و غسلت لافابو و البينوار و مسحت الجدران بالخل و سيقت الأرضية و رتبت خزانة الحمام ، بعدها غسلت المرحاض و سيقتو و كملت مع الكولوار و مسحت خزانة الأحذية من برا فقط مازال من الداخل نخصصلها وقت ان شاء الله و بعدها سيقت أرضية المطبخ و خرجت للبلكون جات لوستي قاتلي نعودو البريوش تاع البارح قاتلي نعمل رطل فقط قلتلها نكمل الرطل الآخر و نتقاسموه هي غسلتلي الأواني و أنا عجنت البريوش و كي طاب رفدت السنيوة و جات رايحة ههههههههههههه قلتلها اعطيني لابار تاعي واش راح تصحريني حبت تحشيهالي هههههههه هاوليك رابط التطبيق https://www.djelfa.info/vb/showthread...post3995610060




و هذي العجينة لي كانت بقاتلي و حطيتها في الثلاجة حطيتها المول تاع الكيك



جا هاااايل بريوش خفيف خفيف رووووعة ما عندي ما نقول فيه و عملت عصير القارص بالنعناع منعش مليح في رمضان


و في الوقت لي كان يخمر و يطيب كنت نزيد نخطف كاش خدمة كملت سيقت البلكون و نشرت حوايج غسلتهم و مسحت الفرن و حمصت خبز بايت باش نعملو شابلوغ بعدها رحت تحممت و لبست جبة بخيزونتابل حطيت فلفل حار و حلو و طماطم في الفرن باش نعمل شليطة أو حميش للعشاء بعد ما كانت لحقتني مطلوعة سخونىة من عند عجوزتي ربي يدوم المحبة ان شاء الله نبقاو هكذا و ما يكونوش المشاكل ههههههههه



و هبطت عند عجوزتي علاجال كانت جاية لوستي لعندهم و جابتلي معاها باطة دقلة نور


و ما كملتش صورت الحميس علاجال هبتو هكذاك نقيناه لتحت و تعشينا التحت قصرنا شوي و طلعنا نرقدو ههههههههه هذي هيا يومياتي في الويكآند هههههههه

[حياتي كلها امل]

سرين راكي الله يبارك مرا ونص ربي يعونك ويقويك انشاء الله،ويارب يدوم المحبة بينك وبين عجوزتك واتهلاي فيها تتهلا فيك والواحد مراح يدي والو من هذه الدنيا يربح دعاوي الخير ليه وليوليداتو

[omelbanin]

سيرين،يعطيك الصحة واش خدمي، وبصحتك واش كليتي (الرجيم والوا)انت وضيافك وعجوزتك .ربي انشالله يدوم المحبة بيناتكوم ،شحال نحب هكدا كي تكون لعروسة ولعجوزة متفاهمين الله يبارك.

[سيرين 5]

المشاركة الأصلية كتبت بواسطة omelbanin

سيرين،يعطيك الصحة واش خدمي، وبصحتك واش كليتي (الرجيم والوا)انت وضيافك وعجوزتك .ربي انشالله يدوم المحبة بيناتكوم ،شحال نحب هكدا كي تكون لعروسة ولعجوزة متفاهمين الله يبارك.

ههههههههه كنت راح نوض كي قريت تعليقك قلت نردلك قبل ما نروح ههههههههه الريجيم واش نقولك بردت قلبي اليامات لي فاتو بصح اليوم والله مريجمة الصباح قهوة حليب بلا سكر وحدهم + حبة بيض مغلية + شويا دلاع و الغداء كليت حميس + حبة بيض كاملة و بياض بيضتين + دلاع و دركا راني غير نتشهى آه لوكان نقدر ناكل يا لوكان طرف خبز هههههه
الله يسلمك الله يسلمك حشمتوني ههههههه

[سيرين 5]

المشاركة الأصلية كتبت بواسطة حياتي كلها امل

سرين راكي الله يبارك مرا ونص ربي يعونك ويقويك انشاء الله،ويارب يدوم المحبة بينك وبين عجوزتك واتهلاي فيها تتهلا فيك والواحد مراح يدي والو من هذه الدنيا يربح دعاوي الخير ليه وليوليداتو

الله يسلمك ههههههه حشمتوني حشمتوني هههههههههه
تن شاء الله يا ربي هانا حنا نتهلاو فيها و هي تتهلالي في بنتي هههههه

[ام براهيم الخليل]

اهلا بكم اخواتي تقرير الويكاند تنضيف عميق للمطبخ وتنضيف الثلاجة والفرن تنضيف عميق بنتي الله يحفضها عاونتني

[روضة 88]

ربي ينجح وليداتكم ان شاء الله.

سرين ماشاء الله عليك يا الفحلة قوليلي تعيشي كفاه راك تلحقي لخدمة الدار و بنتك صغيرة ياك انت كنت في دردشة امهات انا ابني عام وشهرين ما نلحق معاه لوالو .

شفتكم تستعملو الخل اسكو العادي او الابيض وما هي الفائدة انتاعه

واهم حاجة قولولي المديتي تتنحى من البساطات او لالا و كفاه نقدر نغسلهم باه تتنحى المديتي

واعطيوني معطر افرشة يكون مليح

[جهينة اليقين]

الله يبارك سيرين راكي بنت اصل الله يدوم المحبة يا بختو زوجك عندو ام وزوجة كيم انتما مهني في راسو هههههه والله الصراحة الدرك عليك انت حتى وان كانت العجوزة قبيحة تعيا وتنحط والله وكاين الكناين انانيات يا لطيف مهما كانت العجوزة مليحة معلها لو كان تصيب ما ما تقابلهاش الله يهدي بردت فلبي الهدرة علي والمعنى على جارتي هههههههههههههههههههههه

[حياتي كلها امل]

اختي روضة بنسبة للخل من الاحسن الخل الابيض وهو يساعد على لمعان الفاينس والكلاج وايضا عندما تضعي قليلا في المرحاض او الحمام من غير اللمعان فهو يقضي علي الرواءح الكريهة وايضا يساعد في تلميع الزجاج وايضا عند غسل الاواني ضعي قليلا من الخل في الماء الذي تشلي فيه يلمعهم ويقضي على اي راءحة مزعجة.بنسبة للمديتي في الفراش ممكن على حسب نوع القماش اذا يتنحا منه وممكن اذا كان قماش ميحولش اسعملي ماء جافيا.

[حياتي كلها امل]

اصبحنا واصبح الملك لله ولا اله الا الله ولا حول ولا قوة الا بالله اللهم اني اسالك خير هذا اليوم وخير مابعده واعوذ بك من شر هذا اليوم وشر مابعده.

[حياتي كلها امل]

[hanamohamed]

اسعد الله صباحكم

اللَّهُــمَّ أذق قلوبنا برد عفوك وحلاوة حبك، وافتح مسامع قلوبنا لذكرك وخشيتك، واغفر لنا بكرمك وأدخلنا جنتك برحمتك

اللَّهُــمَّ أدخل السكينة في قلوبنا، والمحبـة في نفوسنا، والإبتسامـة في وجوهنا، والسعادة في بيوتنا


اللَّهُـمَّ إِنَّكَ عَفُوٌّ كَرِيمٌ تُحِبُّ الْعَفْوَ فَاعْفُ عَنَّـا

[حياتي كلها امل]

[حياتي كلها امل]

هذا فنجان قهيوة باه تفطنو شويا