دورة فراشات تزهو بالألوان بيوتهن قمة في النظافة و التنظيم و التدبير و الاتقان

[دائمة الحمد]

احلى صباح حبيبتي ليزابيل ومرحبا بيك حبيبتي فيما يخص الباب الخارجي من الخارج بيت اهلي عندهم نفس المشكل لانو دارنا جت على الطريق وطريق وطني
نغسلوالباب لعشية خلاص مع المغرب عندما تقل الحركة ويوقف لينا واحد من الاولاد خير من ماكانش خلاص

[ناهدوران]

ياصباح الخير والخيرات والفل والياسمين ويا احلى ناس في حياتي الي تاخدني الى السعادة وتنظيم وقتي وتوجهني الى ديني ماتنساونيش راني جاية باه نركب معاكم الطائرة
ايزابال صح ليك الخرجة انتاع لعشية
دائمة الحمد تعيشي اعطيني خلطة الزبدة الي نديرو بيها الجاج كنت كاتبتها في الكمبيوتر وراحتلي وسامحيني في عدابك ولامقدرتيش نتلاقاو في الطائرة هداك هو اجيب معايا ورقة وقلم يخي معليش
اليوم خسلت الثلاجة وخلصتوا في 15دقيقة كيما قلتوا وللغداء درت بروكولي مقلي وكسرة وديسار

[شوشو 11]

السلام عليكم

صباح سعيد على اسعد فراشات يحلقن في طائرة السعادة الى رضوان الله تعالى....كل يوم يزداد تعلقي بالدورة وبحبكم وبالشعور النتبادل باستشعار الاخوة و العمل معا كان اجسادنا متواجدة في نفس المكان ولكنها تالف الارواح

حماسكم رائع فراشاتي واسلوبك اروع حبيبتي حبيبة

اليوم نضت على الفجر لقيت روحي بالعدر غاضتني بزاااف ماكنتش دايرتها فالحساب ....قريت الادكار واستغفرت و شربت ماء بالعسل وهدا من عادتي ....رقدت حتى ل7و الحمد لله كان المطبخ نقي طيبت القهوة وعمرت الماء وفتحت الماشنة تغسل وفطرت اولادي وخليت غدايا لوبيا يطيب

ومن بعد رجعت لسلة المنظفات وتوجهت للباب غسلتو من داخل وبنتي ربي يحفظها من برا ...وزدت غسلت باب الكولوار ولات الحالة تعوم بالماء سيقت بالمرة وعقبت على الدوش والشنابر والكوزينة ...ولله الحمد الاستغفار والتسبيح والصلاة على النبي دائما ونحس روحي نشيطة معاه

للعاملات ممكن البرنامج في الايام القادمة يكون مضغوط عليهم ....لهدا هل يمكن تكييفه ؟؟؟

فراشاتي المغتربات ...ربي يعينكم ورانا معاكم قلبا وقالبا وماراح تحسوا بالغربة هنا فالدورة اصلا راح تشغلو وقتكم باهداف جماعية معانا وبالتاي ما تحسوش الا بسعادة التغيير وتحقيق الاهداف ....ربي يحفظ حبيبة وكل الفراشات

ما يجعني ويدفعني ان تعبنا هدا لنا فيه اجر وثواب فاطرد الكسل والخمول...وادعو الله ان يتم علينا نعمة الصحة والعافية

[شوشو 11]

[color="rgb(0, 191, 255)"]حبيت اقترح عليكم فراشاتي الحبيبات انه كل وحدة الله يبارك عندها خيرة واسرار مفيدة كلما دخلت هنا تنقلنا حاجة وتعم الفايدة حتى ممكن انت تشوفيها عادية ولكنها تكون جديدة على اخريات ومهما كان المجال...التنضيف...الطبخ...التجميل....التربية....

كما قالتلكم وحدة من الفراشات نسبت اسمها..سائل سحري ...صابون سائل+ خل+ خمارة كيمياوية او بكربونات +الماء نحطهم في بخاخ ونغسل به كلش على الرداد يتوزع مليح ومايخليش خطوط .حتى الارضيات ونسيق به ...انا من اكبر المستهلكين للخل وصابون السائل ههههههه راجلي قالي راكي تاكلي فيهم ههههه[/color]

[lalo24]

اختي حبيبة انامن معجبيك مند مدة طويلة فانت بصيص الامل في وسط الظلمة الحالكة جزاك الله كل خير ارجو ان تقبلو بي
خصوصا و انا بامس الحاجة لهده الدورة لاني انعزلت عن العالم الخارجي تماما مند 3 سنوات بعد ان فقدت الامن و الامان فصديقي الوحيد هو النت المهم لقد بدات بتطبيق الحوض والاماكن الساخنة الجانب الديني والجمالي مقصرة قليلا لكن الاهداف الاسبوعية والشهرية لم استوعبها حبدا لو مثال لا انسى ان اشكر الاخوات اللاتي اثرين الموضوع بتجاربهن وارائهن النيرة جعلها الله في ميزان حسناتهن

[أم ريتاج زهرة]

السلام عليكن أجري و أجركن عند الله سبحانه و تعالى و ربي يرحم جميع موتى المسلمين المهم الطائرة أقلعت و راني ركبت أختي حبيبة و الله قد ما كنت نكره حاجة إسمها ميناج الدار قد ما حببتيني ليه ربي يخليك لينا و نشكر كل وحدة عزاتني في عم زوجي يعطيكم الصحة

[دائمة الحمد]

صحة غداكم فراشات
حبيبتي نهاد هاي ليك التدبيرة درت ليها كوبي كولي وحبيت نحط الرابط للفراشات يستفادو منو تاع تحضيراتي للشهر الفضيل تاع العام ليفات لقيت الصور ماكانش تمحاو

كاين تدبيرة ماعلاباليش تعرفوها ام لا
علبة لابال تاع500غ نخليها بحرارة الغرفة ونفرغها في اناء كبير ونزيد ليها فنجال تاع قهوة زيت عادي ونزيد ثوم مرحي قارص موتارد ملح معدنوس مرحي رقيق توابل مغرفة ص فلفل احمر حلو ريحان ميبس ومرحي ونمزج مع بعضاه ونرجعها لعلبة لابال والى المجمد كي نجي نعمل روطي دجاج او لحم في الفرن اوبطاطا في اكياس الشواء نجبدها قبل بشوي ونحي كمية تكون ساجية نفوح ونحط طول في الفور

[rahma2014]

مساء النور عللى اخواتي ف الله اختي حبيبة بارك الله فبك على النشاط الى زرعتيه فينا انا ايوم نظفت الباب من الداخل ودرت الغداء الاماكن الساخنة خليتها لبعد الظهر والبارح غسلت الحوض ولمعته جيدا والذكر عل لساني والحمد لله

[بعيدة المنال]

مساء الأنوار على أحلى لمة وأنشط الفراشات راه عاد عندي إدمان على النت وين نحس بيها مقطوعة تخرج روحي تذكرتكن وقت الفجر وأحسست بعبق التشارك في العبادة ما شاء الله كأنني نصلي فعلا في جماعة وكنت أسمع أصواتكن أثناء الورد الله يبارك الله يبارك كأن الملائكة تحفنا وتدعو لنا جو إيماني افتقدته منذ أيام الجامعة وهاهو يعود مع حبيباتي في الله حفظكن الله وتقبل منكن صالح الأعمال
نمت بعد الفجر قليلا ثم باشرت أعمالي الروتينية قهوة - لميت لماعن - عجنت شوي معارك لأولاي يحبوهم بالرايب - خليتهم يرتاحوا - 15 د اليوم كانت مع البلاكار تاع المطبخ ماكملتش قلت نديرلها يوم آخر نظفت المطبخ وخرجت نغسل في الباب من برة ومن داخل - ساكنين في آخر دور وجيرانا غايبين - لكن فاجأني زوجي بطلب تحضير الغداء لمجموعة من أصدقائه ولأنني عودته على الطاعة رفض حتى اقتراح ما يمكن أن أطبخ ( دبري راسك) بسرعة أخرجت الدجاج من المجمد ونصبت زيتون وعاونوني البنات في السلطة زدت درت كسرة مبسسة وأجلت المعارك للعشاء راني هذا وين كملت المواعن وصليت وقلت نضرب طلة على حباباتي

[rahma2014]

جيادا حبيبتي اعطيني الخلطة تاع الروز ودوف

[ناهدوران]

شكر اختي دائمة الحمد اخت مثلية

[منال100]

والله غير شاطرات وشوقتوني كي انظم اليكن واركب الطاىءرة لكن مع الاسف لا جواز سفر عندي فهل تقبلنني معكن انا انتظر الرد من صاحبة الموضوع والسلا م

[دائمة الحمد]

الله يخليك ناهد حبيبتي
كنت قلت ليكم انو عندي هدف راني نسعى ليه بحول الله الا وهو التواصل اكثر مع اهل الزوج
راني رايحة بحول الله لدارعجوزتي هذا المساء نجيبها تقعد عندي ايامات نستبارك بيها هي مرى كبيرة وتقية وورعة ومواظبة على الطاعات والعبادات وقيام الليل
ونروح نطل على بنت عم زوج دارت عملية تسكن بجانبهم
الى الملتقى فراشاتي
الي حابة تنشط تهز كويس تاي منعنع

[أم فاطيمة]

امممممممممممممممم دائمة الحمد راني بديت انا الاولى بسم
الله الله ينورك و يزيذك من بركاته و شكرا على الوصفة
و ربي يخليلك عجوزتك هي الخير و البركة و ربي يشفي لمريضة
منال 100 م اهلا و سهلا حنا هنا ما نستعملوش جواز السفر
نستعملو الذكر و الاستغفار فسم بسم الله و اقراي دعاء السفر
و انشاء الله تلقاي كل ما يفيدك
اليوم غسلت الباب من الداخل و برا شارعنا فارغ و مهجور
رفدت كل الفراش و عومت الماء في كل ركن انا و بنتي
انا مسحت الغبرة و غيرت الشراشف و غسلت الطابيات
و هي كملت التسياق و نشفت و درت لغدا حريرة و بيض و سلاطة
و لعشية ندير رفيس طلب من بنتي الصغيرة و للعشا باقية حريرة
و نزيد معاها معقودة و سلاطة و الحمد الله و نطوي شوية نتاع كسوة و نحظرلهم ملابس
و ادوات الغد انشاء الله ربي يوفق وليداتنا و لي عودة للمراجعة

[بعيدة المنال]

مساء الأنوار : أختي رقية شفى الله زوجك ومتعك وإياه بموفور الصحة والهناء وأعانك على طاعته وأجلّ طاعة هي الصبر مع الزوج خاصة في مرضه
أختي دائمة الحمد شكرا على كاس لاتاي قعدلي راسي خاصة أنني نموت على النعناع الأخضر يمممم يممممم ,لكنني أسفة لأني راني السبب في تأخرك - عاينتك- البارح قلت لوكان غير توصلنا بالمروحية تاعها للطيارة ، مزية أنا عندي وسيلة نقل أخرى أكثر تطورا ( عندي زوج تحبي نسلفلك وحدة )
راك أستادة لغة عربية في أي مستوى ربما نحتاجوك أو نتبادلوا الخبرات الله يبارك فيك
- أختي ماريا : عندي وصفة قديمة للكلف ( من عهد جداتي ) : وهي تحطي الودعة - تنباع عند السودان في الأسواق - والآن صاروا الشباب الي يتبعوا الموضة يعلقوها في رقابيهم للعين - قلت الودعة تتحط في عصير قارص صافي بلا ماء في بلارة وتحفظ شهر في مكان مظلم وبعدها تدهني المكان بالعصير - أنا ما جربتش ولكن الوصفة معروفة
أختي ريم دلال : يا حبيبتي أحسبك مؤمنة وما ابتلاء الله لك الا دليل على ذلك , اصبري واحتسبي وتأكدي أن دوام الحال من المحال . عصبية الزوج وصراخه بسبب وبدونه علقم تجرعت مرارته قبلك وما زلت خاصة مع وجود الأطفال . ويمكن أن أنقل لك تجربتي إذ أرى أن الحال عندي بدأت تختفي تدريجيا , لم يعد هذا الجو المكهرب يحدث إلا نادرا بعد أن كان من يومياتي . وسيلتي في ذلك نوعان حسب الظرف فإما أن أسكت نهائيا إذا رأيت أن النقاش الحاد قد يعفن الوضع أو أن أتكلم بصوت خافت أمام صراخه ( أقول خافت ليس خوفا ولا ارتباكا وإنما بمنطق الواثق من نفسه ) وتدريجيا بدأ يفهم سوء صنيعه دون أن أجرح كبرياءه الرجولي وفرضت بالتدريج منطق النقاش بعيدا عن سمع الأطفال ,قد تقولين أن هذا الحل مستحيل أو صعب فأقول أن أسرتك تستحق كل عناء وتضحية حتى في تطويع المستحيل