الى ام اسيد1 وكل وحدة حاصلة واش الطيب - الصفحة 102

ام حمزة22 · 2014-12-16, 11:26

لبنات اليوم طيبت العدس ومراحل الطريقة في صفحة 14
ودرت للقهوة متقبة

روح مراد · 2014-12-16, 12:41

أم حمزة ما تقلقيش روحك على بنتك كامل جزنا من المرحلة الانتقالية الصعبة بين المتوسط و الثانوي ماكاش اللي يحافظ على نفس المستوى في الثانوي في أول فصل
و لكن الفصل الثاني بنتك رايحة تتحسن و رايحة تفهم الفرق و تستوعب
و دورك كذلك في هذه التوعية و بينيلها أنه لازملها مجهود مضاعف و لازملها تحدي الأستاذة باش تتفوق
ربي ينجحهم كامل
مشكل تدني المستوى راهو مشكل كل الأسر الجزائرية و كل الأولياء يعانيو منو بشدة

صدفات · 2014-12-16, 14:45

السلام عليكم حبيباتي سامحوني مادخلتش كان عندي عمل راكم عارفين نهاية السنة المهم
أم حمزة ما يغيضكش الحال على بنتك راهم كامل كيفكيف انا كذالك ولدي لي في السنة الأولى ثانوي ما خدمش مليح أنا ولدي حسب روحه كبر رغم أنني درت له الدروس الخصوصية في الرياضيات و الفيزياء حسبت روحي فاهمة نستبق الأمور باه ما يهبطش في المستوى لكن هيهات على كل حال إنشاء الله يعوضوها في الفترة الجاية
أم سوهيل ربي يحفظك و يسقسي عليك الخير
روح مراد ربي يحفظك تفكرتي و ليداتنا و سقسيتي عليهم
كرونو توحشناك

أم أسيد لزملك تسألي قبل ما تشقاي و تخرجي وليداتك في هذا البرد ربي يحفظهم لك

كل البنات الغايبات و الحاضرات ربي يحفظكم و يهنيكم

روح مراد · 2014-12-16, 14:53

تفكرت وليداتكم على خاطر كامل المحيطين بي عندهم نفس المشكل اختبارات يمروا في ضغط كبير و من بعد الخوف من النتائج ...
أنا اختي عندها 2 بنات في المتوسط صدقوني أنها تمرض في فترة الاختبارات من القلق يطلع لها الضغط من كثرة التخمام بالرغم من أنهم الحمد لله يقراو الله يبارك
كاين صديقتي حبست الخدمة على جال أولادها مايقراوش هاد الفصل قالت لي نحبس الخدمة و نراقبهم و نقريهم بلاك يفطنو شوية و الله المسكينة ضحكتني بالرغم من كل هذا نتائجهم متوسطة زوجها قال لوكان ماحبستيش الخدمة كانت رايحة تكون كارثة تقريهوم ليل نهار و لكن الله غالب
يعني كامل الناس كيف كيف لازم يعالجو السبب الحقيقي

*أم جابر* · 2014-12-16, 15:24

السلام عليكم ورحمة الله و بركاته مساؤكم ورد و ريحان انا اليوم طيبت بطاطا بالسلق +تشكتشوكة حارة مع هذا البرد هذا ما ينفع

*أم جابر* · 2014-12-16, 15:26

اقتباس:

المشاركة الأصلية كتبت بواسطة صدفات

السلام عليكم حبيباتي سامحوني مادخلتش كان عندي عمل راكم عارفين نهاية السنة المهم
أم حمزة ما يغيضكش الحال على بنتك راهم كامل كيفكيف انا كذالك ولدي لي في السنة الأولى ثانوي ما خدمش مليح أنا ولدي حسب روحه كبر رغم أنني درت له الدروس الخصوصية في الرياضيات و الفيزياء حسبت روحي فاهمة نستبق الأمور باه ما يهبطش في المستوى لكن هيهات على كل حال إنشاء الله يعوضوها في الفترة الجاية
أم سوهيل ربي يحفظك و يسقسي عليك الخير
روح مراد ربي يحفظك تفكرتي و ليداتنا و سقسيتي عليهم
كرونو توحشناك

أم أسيد لزملك تسألي قبل ما تشقاي و تخرجي وليداتك في هذا البرد ربي يحفظهم لك

كل البنات الغايبات و الحاضرات ربي يحفظكم و يهنيكم

وعليكم السلام ورحمة الله و بركاته وشراكي الاخت صدفات و الله توحشناك ربي يعاونك و يحفظلك لوليدات

منال ومنير · 2014-12-16, 15:48

السلام عليكم يا الاحباب انا ام منال مشتركة جديدة عجبتني بزاف هذي الفكرة شاهدت كل الحلقات يعطيكم الصح ركم شهيتوني بزاف رني في الخدمة عجبني قغتا تع الشفلور مع البطاطا انشاء الله رني رايح انجربو

*أم جابر* · 2014-12-16, 15:55

وعليكم السلام ورحمة الله وبركاته مرحبا بيك معنا ام منال الدار دارك ان شاء تستفادي و تفيدي معنا

*أم جابر* · 2014-12-16, 18:51

لبنات راني جربت ميلفاي تع ام انس هاوليك الرابطhttps://www.djelfa.info/vb/showthread.php?t=1724692

أم لجين هيثم · 2014-12-16, 20:44

بارك الله فيك

ام حمزة22 · 2014-12-16, 21:25

سلام
لبنات والله عياتني النت اليوم كتبت جرنان كي بعت راحت الكونكسيون
المهم اشكر الاخوات الجدد على الردود منورين الموضوع
اشكر روح مراد
صدفات روحي غير بلعقل على وليدك ربي ينجحو
ام اسيد صحيتي على الميلفاي جاك روعة ماشاء الله
ان شاء الله هاد المرة يروح الرد

بيلسان91 · 2014-12-16, 22:53

مساء الخير ام حمزة
انا مبتدئة في تحضير الحلويات
شفت واحد الوصفة هنا فالمنتدى تاع تارت وتتزين بكرام شانتيه
ليوم شفت فالحانوت بلي تتباع غبرة كريم شانتييه
منيش عارفة كفاش نحضرها الغبرة هادي
وتاني قريت بلي تقدري تخدميها وحدك بلاما تشري الغبرة من الحانوت اصلا
طلبي ليك هو كيف يتم تحضير كريم شانتييه في كلتا الحالتين

ام حمزة22 · 2014-12-17, 06:53

صباحكم سعيد ويومكم اسعد
ان شاء الله تكونو كامل بالف خير
اختي بيلسان لتحضير الكريم
كاس حليب 50 غ كرام شنتتي مقدار 3ملاعق وخلطي مليح بالخلاط الكهربائي يكون من الاحسن بيتران اي العجانة الكهربائية راح تتحصلي على نتيجة اروع مايكون
ما تنسايش لحليب يكون بارد مليحح باه تسدقلك الكريمة

روح مراد · 2014-12-17, 09:20

صباح الخير حبيباتي مرحبا و سهلا بالمشاركات الجديدات إن شاء الله تفيدونا

صدفات · 2014-12-17, 11:24

صباحكم سعيد يا الفحلات
هذه الأيام راه البرد و المطر و حنا في تيارت البارد عندنا قارص بزاف خصوصا في الليل
و على هذا راني دخلتها مسلسل عدس للوبيا بركوكس في الفطور و العشاء غراتان و دايما رانا نعاودو في نفس الشيء
انا تبانلي في الصيف هي لنجتهدوا و نوعوا أحسن من الشتاء و لا شتى قلتوا