الجزء 126 من واش طيبتي اليوم.....مرحبا بحراير الجزائر

[lyzzabel]

وهيييبة عظم الله اجركم و رحم فقيدتكم و ثبتها عند السؤال ،، إنا لله و إنا إليه راجعوون ،، جزااك الله خيراا حبيبتي و ألهم ذويها الصبر و السلواان

عشاناا بإدن الله كبدة تااع بقري و بقاتلي الحريرة مالفطور و نزيد سلااطة و الحمد لله على نعمه

لا حول و لا قوة إلا بالله

[قمر 77]

ام هديل لاباس على وليدك اذا شفتيه كي طاح بعيد على الراس و ما هيش طيحة كبيرة ما تتقلقيش انا كانو كي يطيحو يبكو ايمالا يرقد من البكا مبصح على حساب الطيحة ربي يحفظو
ليزاتي حبيبتي راني احسن الحمد لله
وهيبة ربي يرحم خالة زوجك و يثبتها و يتقبلها انا لله و انا ايه راجعون
ام احمدي غير ما تتقلقيش دوك نمخمخولك برك قوليلنا وش عندك دوزان
كاوكا ديري كيما انا فورت البطاطا بالملح وو درت طوماطيش بالزت و الثوم تتقلي و مبعد نزيدها عليها و اذا عندك فلفل مقلي زيديه عليها ما تطيبيهش معاها تجي روووعة

[ارزاق]

المشاركة الأصلية كتبت بواسطة طالبة الجامعة

السلام عليكم ام هديل ربي يستر ان شاء الله ما يكوون غير الخير

المشاركة الأصلية كتبت بواسطة عازفة الناي

ام ماجد الله يخليك
ارزاق ان شاء الله تنجح الوصفة
ام نور الهدى ربي يعيشك ... تهنيتي من العشا انا من وقت اللي تغديت وانا نخمم هههههههههههههههههههههههه
زهروان وينك؟؟؟؟؟؟؟؟؟؟؟

والله يا عازفة الناي راني حشمانة درت الوصفة ومنجحتش هي قالت 500 غ فرينة تتلم ب2 بيضات انا درت 3 بيضات وصفار معجبنيش

[ارزاق]

المشاركة الأصلية كتبت بواسطة wahibaazel

السلام عليكم اخواتي الغاليات ،سماسيم ربي يشفيك حبيبتي .
ام هديل كيف راه ولدك ان شاء مايكون غير الخير.
اليوم توفات خالة زوجي ربي يرحمها ويثبتها عند السؤال ،ورحت غسلتها انا وسلفتي وبنت خالة زوجي .سبحان الله امر الانسان عجيب،اللهم اختم بالصالحات اعمالنا امين.

ربي يرحمها برحمته الواسعة

[ام احمدي]

قمر يا حنووووووووووووووووونة يا طيوووووبة مخمخوووو على راحتكم والله فرحتيني بزااااف راني حاصلة خخخخ حالة المبتدئات ههه
علبالك راني تايهة ومع لقيت ردك فرحت ربي يفرحك يااااااااااااااااااارب
انت دبري علي وانا نشوف مع papa واش يجيبلي والله راني متاكلة عليكم متخيبونيش
العرضة نهار الاحد بادن الله

[زهرة الريف*]

كوكا وأم أحمدي كيفكم
وهيبة زال عضم الله اجركم وربي يرحمها ويثبتها ياه وشراه يستنى فينا ان لله وأن إليه راجعون
ليزا شوية وراني مع السبور

[ام رشدى]

اختي ام هديل ماتغفليش عليه وكل ربع ساعة طلي عليه ربي يكون الخير
اختي وهيبة عظم الله اجركم وري ياتيكم الصبر انشاء الله
لحراير البارح عملت بطاطا وفيليه الدجاج بالاعشاب للاخت زهروان امممم والله جا بنييييييييييين بزاف وخليت شوية بطاطا ودجاج متبلين واليوم اعملتهم في كيش الشواء والله بنة لاتقاوم الللللف شكر عزيزتي زهروان وادا قدرت نحط الصور انشاء الله

[wahibaazel]

بارك الله فيكم يا أحلى اخوات في الله ،ربي يجازيكم على الدعاء .
ليزا واشراك اختي سايسي روحك والخدمة بلعقل .
ام حمدي بارك الله فيك ،ربي يعاونك ذك الاخوات مايبخلوكش ،المهم ماتخافيش ذك يصلحولك الاكباق باذن الله.اصدمي عليها وباذن الله تخرجيلهم احلى السفرات .
كوكا ،قمر ارزاق ام رشدي ،الريفية ولكل الملتحقات صح عشاااكم.

[lyzzabel]

ام احمدي النت تقييييلة راني بالسيييف باش نكتب رد
حبيبتي حنا في جهتنا نديرو الحريرة ولا الشوربة باللحم ولا الكفتة و نديرو سلااد فاغيي و مقبلة مثلاا بورااك ولا لي ميني كييش و الأغلب نديرو البورااك يتمشى غااية مع الحرييرة و الشوربة و نديرو طااجين حلو بدوون لحم و طبعاا طبق رئيسي على حساتب لي عندك كااين الجااج محمر مع الزيتوون ولا الشمبنيوون لا ديري الجااج ديزووسي كمونديه من عند البوشي بااش ما تدييلكش الوقت و عمرييها بالكفتة و الفرمااج و تااني اللحم محمر بالشمبنيوون ولا الجلباان بالقرنااع محشي بالكفتة و ديري معااهم اللحم و التحلية او الفوااكه لاكان عندك الوقت ديري سلطة الفوااكه و زينيهاا بالشانتيي و المشرووباات ،، بغيت نقترح علييك لي زيسكالووب محشيين بالمرقااز تااع ام امااني بغيزونتاابل ولا ديري المتوم و معااه اللحم و زينييه مافوق باللوز محمر ،، و لاكاان يقعدو يتقهوو قوليلي نزييد نمخمخلك هههه و ربي يشفيي مامااتك و يلبسها ثوب الصحة و العاافية ياارب

ام هدييييل ادخلي طمنينا على ولدك حبييبتيي

ام رشديي بصحتكم الأصاابع الدجاااجية مممممم هههه يعطييك تلصحة رااكي طبقتي معظم وصفاات المنتدى و الكوزيينة الله يبااارك

[الجمان]

اختي وهيبة عظم الله اجركم واهمكم جزيل اصبر والسلوان
عشايا باذن الله بيري بالجاج وفلفل مقلي والحمد لله

[فرح العمر]

وهيبة ربي يرحم.خالت زوجك و يثبتها عند السؤال انا لله وانا اليه راجعون

[kaouka]

اختي وهيبة ربي يرحمها ويسكنها فسيح جناته انا لله وانا اليه راجعون
صح عشاكم يبانويت

[kaouka]

قمر شكراً على تخمام رني لقيت شوي اروز من لغدا عشيت بيه وليدي وزوجي دوك نقليلو بيضات ونوض هههههههههخخخخخخخخخخخ والله عيت بزاف وبصحتك وش تعشيتي

[فرح العمر]

المشاركة الأصلية كتبت بواسطة omhadil

لبنات ادعولى ربى يستر ابنى هذا وين طاح من الدروج بسبب الكوردة تاع بنتى والله كى سمعت طاح رحت نجرى وكامل جاو يجرو
انا قلت نلقاه مدقق قلبى تقسم كى شفتو طايح النفس ماقدرتش يرجعو والان راه راقد رانى مقلقة
ومن زعافى قطعت لحبيلة تااع بنتى وهى راهى تبكى على الحبيلة تاعها
والله مازلنى نرجف من الخلعة

ام هديل على سلامة وليدك. نوضي ولدك ما تخليهش يرقد انا سمعتها من عند طبيب قالك جامي تخلي الولاد يرقدو بعد الطيحة و ما يكون غير الخير

[ام سهام 02]

وهيبة عظم الله اجركم

حبيبتي ام هديل الف لاباس للولدك مايكون غير الخير

نشكر كامل لعجبوهم اطباقي ربي يخاليكم

ام نور الهدى شوفي الخبز عيني ميزاني حوالي عبر سميد رطب وعبر ونص فرينة و1مك ونص خميرة خبز وقليل من السانوج وحبة حلاوة و2مك سكر ونلم بالحليب والماء دافى وفي نفس الوقت انضيف الملح حتي تتلم العجينة اندخل فيها وحد مك سمن طري واداكي شوي وديرها تخمر بالطريقة التحبها موالفة انديرها في كيس مبلل وهذي المرة درتها بطريقة الكوكوت بصح التكون مبتدئة تغلبها كتخمر قرصيها ورمديها في السميد او الفرينة كما اتحبي وخاليها تخمر للمرة الثانية امنبعد طيبيها