دورة صيفية جديدة

[ابني نور عيني]

غاليتي أم شمسو توحشناك و توحشنا طلتك الزينة ☺
والله راني كيفك كلشي نكتبو في أجندتي بالتفصيل و حتى كي نحب ندير حاجة نروح للأجندة تعطيني الأوامر ههه
لكن صراحة الحياة تتنظم و تصبح أكثر سلاسة ، سبحان الله كاين حاجات كانوا معمرين راسي و يخلوني متوترة ، و ملي وليت نكتب و نسجل كل صغيرة و كبيرة أصبحت هانية البال و مرتاحة الفكر ...
أدخلت أمور كثيرة في حياتي لوكان خليتهم في بالي ماكنتش راح ننجزهم ، كممارسة الرياضة راني مواظبة عليها من بداية السنة ، أربع مرات في الأسبوع أدخلتها مع مخططي الأسبوعي ، تعلم اللغة الإنجليزية ساعة كل صباح ، و أكثر ما أفادني هو تحديد ساعة يوميا لتعليم إبني الألوان و بعدها الحيوانات و الأشكال و الآن راني نعطيه قلم و نحفزوا باش يخربش ههه

التخطيط يخليني مسيطرة على جميع جوانب حياتي تقريبا ، طبعا مستحيل نكونوا كاملين فالكمال لله لكن على الأقل مانكونوش مشتتين بين هذا و ذاك و ممكن ننساو الأهم .
حتى الجانب الجمالي مدخلاتو في روتيناتي اليومية كل يوم ندير حاجة بسيطة ، يوم مقشر و ماسك ، و يوم عناية باليدين و القدمين ، و يوم خلطة للجسم و يوم ماسك للشعر و هكذا ...صدقوني كتبتهم و دخلتهم في مخططي الأسبوعي بتخطيط يسمحلي بتطبيقهم مع مراعاة الأعباء الاخرى ، و أصبحوا عادة عندي ، لكل يوم عندي جانب تنظيف و جانب جمالي و جانب ديني و جانب أسري و جانب عملي ، و طبعا وقت لنفسي قبل ما يستيقظ وليدي و في وقت نومو هههه

[ام شمسو محمد]

.و كمثال على وش يصير فيا كي مانكتبش نسيت بلي اليوم الساعة الاسبوعية حتان شفت سؤال ام محمد على واش درتو اليوم مع بداية الاسبوع ...بقيت نستغرب كيفاش بداية الاسبوع ...تجري الايام و ماناش حاسين بيها حرفيا ...
باش نقدم لنفسي اعذار ...هو وجودي في هذي الفترة في وضعية اجتماعية تخليني ننشغل شوية على داري و نفقد التركيز ...كما انو البيت نظيف من التنظيف الاسبوعي اللي فات و روتين المساء بحيث كي نضت الصباح نسيت تماما و اهتميت فقط بالقضية لي قتلكم عليها ..
نروح نكتب باش ماننساش هههه....والله سوايع الكتبة تولي معيق ماتقدريش تفكري هههه هذا احد سلبياتها

[ابني نور عيني]

أختي أم شمسو ما تسميش نقص الإلتزام ببعض المخططات عيب ، لانو كامل تجينا أوقات نكونوا متعبين او نفسيتنا تعبانة او عندنا ظروف خاصة ، لازم نكونو مرنين ، و نجعلو المخططات تخدمنا وتنقص علينا الأعباء ماشي العكس ، والله أنا تاني أحيانا نقصر و نقول ما درتش واش كنت حابة ننجز اليوم ، لكن نكمل عادي بعدما نحس روحي قادرة و حابة ننجز ؛ وأحيانا نضغط على روحي و نحاول ننجز قدر الإمكان ، لكن الأهم هو ماتضغطيش روحك بزاف و خلي مساحة ...
تحية ليك أم شمسو ماشاء الله تنظيم و تخطيط و عقل واعي و متزن و أخلاق
عالية ربي يحفظك و يخليلك العزاز عليك

[ام شمسو محمد]

ام محمد ....كاين مثل يعجبني يقولو الرئيس بوتفليقة ربي يشفيه ..."الرقصات في الراس بزاف و الرجلين ماقدوش "
الاهداف المليحة لا تنتهي ...و نتي ماكيش مطالبة بالكمال ...بالنسبة ليا الكمال الحقيقي يكون ضمن النقص البشري ...يعني كي تروحي لاقصى وش تقدري و ديريه هذا كمال ...اما انونحيطو بكلشي في الدنيا هذا غير منطقي ...لذلك في حدود وش وضعتي اهداف ...وواش راكي محققة نعتبرك كاملة صديقتي
من تجربتي نقولك حاجة وحدة تدرّجي في الاهداف ماتخليهاش تطغى عليك تقدر ترجعك للوراء ..و انما هدف بهدف ...ماتزاحميش نفسك و ماترهقيهاش خذيها بالعقل ...مانحكيلكش على عدد الاهداف اللي اخفقت فيها بسبب حماسي و اندفاعي و مبالغتي ...ضرك صدقيني بعققققققققلي و على مهلي و بالشوية عليا ....كل واحد و طاقتو ..

[ام شمسو محمد]

شكرا على الدعاء حبيبتي ام محمند و لك بالمثل ...و انا والله بدون مجاملة نعتبرك مثال تطبيقي على الشباب الناجح المبدع المتالق الواعي تماما للضرورات و المتطلبات و تروحي باذن الله لبعيد

[ابني نور عيني]

المشاركة الأصلية كتبت بواسطة ام شمسو محمد

شكرا على الدعاء حبيبتي ام محمند و لك بالمثل ...و انا والله بدون مجاملة نعتبرك مثال تطبيقي على الشباب الناجح المبدع المتالق الواعي تماما للضرورات و المتطلبات و تروحي باذن الله لبعيد

شكرا أختي العزيزة على كلامك الذي يدل على أخلاقك العالية ...

و عندك الحق كي قلتي لازم نتدرجوا في اهدافنا و إلا راح نرجعوا خطوات كبيرة للوراء ..
أنا عن نفسي كنت ندرج الهدف تلو الآخر و كل شهر نتبنى عادات جديدة و نحاول نصلح أشياء كثيرة في حياتي بالتدريج باش ما يكونش التغيير مفاجئ

[ام هزار]

الله الله على النقاش الايجابي المفعم بالروح الحماسية التحفيزية بين الغالية المتالقة ام شمسو و الزهرة المتفتحة ام محمد ما شاء الله لما يكون الخطاب ما بين العقول اكيد النتيجة تكون مثمرة
عيشكم زيدو كملو النقاش و الله انا يا ام شمسو اللي راني نستمتع و نستفاد دون مبالغة و رايحة بادن الله نولي الى اجندتي للتخطيط و التدوين
اليوم انا ما درت والو بخلاف الروتينات الصباحية لاني خرجت مرتين في الصباح الباكر و في القيلولة مرغم اخاك لا بطل و غسلت شوية قش بيددي و الغدا مسفوف باللبن و الفقوووووووووس اللي نموت عليه

[ابني نور عيني]

مساء النوور أم هزار كيفك اليوم ؟

اممم المسفووف نموت عليه بصحتك لكن معليش تقوليلي الفقوس واش هو ؟؟

[رندة.]

مساء الخير عليكم
يظهرلي اليوم درتوه للتخطيط والكتابة يا جماعة.

المهم أنا ثاني من النوع تاع الورقة والستيلو، بصح مش في كل شيء وبالتفصيل الممّل، يعني نكتب خطوط عريضة فقط على واش راح ندير أولا باش ما ننساس وثانيا باش أنحّي على عقلي شوية التخمام.

بالنسبة للأمور إلي نكتبها ونحاول نلتزم بيها قدر الإمكان هي:
- جدول الوجبات الأسبوعية (نحّالي التخمام تاع واش نطيّب اليوم؟ على الرغم من أنو مانلتزمش بيه أحيانا حسب الرغبات).
- قائمة المصروف من المواد الغذائية والتنظيفية والتجميلية.
- جدول التنظيف الأسبوعي والشهري ( 20 دقيقة للنقاط الساخنة).
- قائمة بالزيارات الضرورية والمكالمات الهاتفية ( لو كان مانكتبش أنو لازم نتصل بخالتي ولا بعمّي يفوت الأسبوع والشهر وننسى مع الانشغالات إلي ماتنتهيش، وساعات كي نطوّل ما نتصلش نحشم باش نتصّل هكا بلا سبب ولا مناسبة، بصح من النهار إلي إلتزمت بهاذ القائمة حسب الأيام تخلصّت من عبارة "هذا وين تفكرتينا" و استبدلت بعبارة " غير أنتي إلي تتفكرينا".
- جدول العناية بالجمال (ماسكات للشعر مرة في الأسبوع و للوجه 3 مرات في الأسبوع)
- نكتب إذا كانت عندي مناسبة مُهمة عرس أو خطوبة أو عرضة واش يخصني، واش لازم نشري هدية.
- نكتب واش خاصني في الدار : فراش ولا أواني ولا أثاث باش ندير حسابي.

عموما هاذي هي الأمور إلي نكتبها في الأجندة نتاعي ونحاول نلتزم بيها قدر الإمكان، بالنسبة للجانب الديني وهو الأهم كنت نكتب في السابق بعض العادات باش نلتزم بيها كيما صلاة الضحى وقراءة صفحات من القرآن صباحا، والأذكار وقراءة سورة الملك قبل النوم، بصح من النهار إلي تعوّدت عليهم ووليّت نقوم بيهم تلقائي ما وليّتش نكتبهم. وإن شاء الله نزيد عادات أخرى ونتعوّد عليها.

[رندة.]

هذا هو الفقوس يا أم محمد

[sali kanouza]

السلام عليكن ورحمة الله تعالى وبركاته
تحية لكل الفراشات الحاضرات منهن والغاءبات واش راكم اخواتي راجعت واش فاتني الصراحة كنت مشغولة جدا هاذ الايام
مع النجاحات تاع الباك الف مبرووووووك لاجميييع وابعاقبة للي مزالو ان شاء الله
وكان عندنا ختان تاع ابن اخ الزوج
بالنسبة للتخطيط والكتابة على الاجندة انا جدول الروتينات ماقدرتش نلتزم بيه لكن كل يوم نكتب كامل واش لازم ندير فهذاك النهار ونحاول نلتزم
وااصراحة نفعتني بزاااف طىيقة التخطيط مثلا كل شهر قبل مايخلص الزوج نكتب قاءمة واش خاص كامل في جميع الجوانب
وفي المناسبات كذلك نكتب كل شيء وكل ما نقرر على حاجة لازم يكون القلم حاضر وموجود

[ابني نور عيني]

أهلا برندة و سالي يسعد مساؤكم

عجبتني أفكارك يا رندة والله أفدتيني و عطيتيني أفكار نيرة ، مثلا عندي نفس المشكل تاع المكالمات الهاتفية ننسى نكلم أقاربي كل مدة وبعدها نحشم نعيطلهم ، راكي عطيتيني فكرة ندخلهم مع مخططي الأسبوعي ، و بالنسبة لفكرة الوجبات رانا كيف كيف،نكتب قائمة إفتراضية و أنا نبدل المخطط حسب الموجود و حسب الطلب ....
آه تفكرت شكرا على صورة الفقوس أختي رندة والله ما نعرفوا كيفاش ذوقو يعني لمن قريب في الذوق ؟؟؟

الأخت سالي بالبركة على إبن خو زوجك ربي يحفظو و يشافيه و لعقوبة لزواجو ...أنا وليدي ختنتلو في شهرين ما حسيتش كامل ما تعبنيش كامل و حتى البكاء بكى هذاك الوقت و خلاص

راني نشوف بلي كامل حياتنا فيها القلم و الورقة وهاذا شيء يدل على إهتمامنا بأهدافنا وسعينا المتواصل لبذل أقصى واش نقدرو ، وكيما قالت المعلمة الغالية أم شمسو هذا هو الكمال البشري ، أنك تبذل كامل طاقتك و ما تستسلمش و ما ترجعش للوراء مهما كانت الظروف والتحديات ..


ليلة سعيدة

[ام شمسو محمد]

المشاركة الأصلية كتبت بواسطة رندة.

هذا هو الفقوس يا أم محمد

رندا حنا عندنا هذا هو الفقوس ...و انا ثاني نموت فيه تشتهر بيه منطقة عين ازال


ام هزار انت من اي المنطقتين؟

[رندة.]

مساء الخير
أم شمسو احنا عندنا الفقوس هذاك إلي حطيت الصورة تاعو قشرتو تجي خضراء. أما إلي حطيتي صورتو أنتي الأصفر احنا نسمّوه المرحوم، ماعلاباليش علاه سمّاوه هكا بصح هذا هو اسمو عندنا.
أم هزار قوليلنا واش من فقوس كنتي تقصدي الاخضر ولا الأصفر؟؟

[رندة.]

أهلا أم محمد الحمد لله كي عجباتك فكرة المكالمات الهاتفية ورانا كامل نستفيدو من بعضانا.
بالنسبة لذوق الفقوس إلي حطيتلك صورتو، يجي تقريبا كيما الخيار بصح أحلى منو.
أما الفقوس تاع أم شمسو (المرحوم تاعنا)، نظن غنّي عن التعريف مذاقو حلووو وهايل.

عودة ميمونة ياسالي، وألف مبروك الختانة تاع ولد سلفك وربي يجيبلو الشفاء ان شاء الله.