** وصفات الشاف مصطفلى بسعدي بإذاعة الشلف **متجدد كل يوم أربعاء بإذن الله * - الصفحة 10

دموع تائبة · 2013-03-01, 14:04

مشكورة اختي فايزة
موضوع يهبل
ربي يجازيك كل الخير على هذا المجهود

faizarbh · 2013-03-01, 14:12

اقتباس:

المشاركة الأصلية كتبت بواسطة abdou2151

اختى الفاضلة اشكرك جزيلا على وصفات مصطفى سعدى التى كنت ابحث عنها لانى يوم الاربعاء صباحا اكون مشغولة وليس عندى وقت لتتبع الاداعة انا من الشلف ايضا واصلى على فعل الخير و اتمنى منك تحضرى لنا ملف للوصفات السابقة وشكرا لك

اقتباس:

المشاركة الأصلية كتبت بواسطة دموع تائبة

مشكورة اختي فايزة
موضوع يهبل
ربي يجازيك كل الخير على هذا المجهود

ربي يخليكم اخواتي مشزرني على دعمكم لي نورتوني

صفاء الرووح · 2013-03-01, 16:53

يعطيك الصحة فايزة علي المجهودات جعلها الله في ميزان حسناتك
تستحق بالفعل التقيم

faizarbh · 2013-03-02, 21:05

اقتباس:

المشاركة الأصلية كتبت بواسطة صفاء الرووح

يعطيك الصحة فايزة علي المجهودات جعلها الله في ميزان حسناتك
تستحق بالفعل التقيم

ربي يحفظك اختي شكرا جزيلا

missahani · 2013-03-06, 14:58

ربي يجازيك كل الخير

faizarbh · 2013-03-06, 16:32

وصفات يوم الاربعاء 06/03/2013
المعكرونة كطبق رئيس
300غ مقرون حجم صغير، 250 غ لحم هبرة لحم بقري ، ملح و فلفل و كمون و فلفل عكري + مغرف اكل زبدة و باقة كرافس + ورقة رند+ حبة بصل رابي + 3 سنات ثوم رابي + حبة طماطم كبيرة+ملعقة اكل طماطم مصبرة .
العصيدة الايطالية: نص حبة طرشي اي فلفل حلو + شوية معدنوس مقطع + شوية عصير ليمون + شوية زيت زيتون و نطحن الكل فالروبو.
في مقلاة ندير 3ملاعق زيت و 300غ مقرون و نحمصها 10د حتى يولي لونها ذهبي ثم نحطها بجهة.
في طاجين نرابي البصل+الثوم+ الرند و الكرافس و مغرف زبدة و الملح و الفلفل و الكمون و فلفل عكري ثم نضيف لحم البقري مقطع مربعات صغار و نقليهم مدة 30د بعدها نرابي الطماطم و نضيف الطماطم المصبرة و نخليها تتقلى 5 د و بعدها مباشرة نزيد عليها المقرون المحمص و نخلوها اطيب 5 دقائق و نفرغ عليها ماء ساخن حتى يغطيلنا المقرون و نخليها اطيب كي تشرب داك الماء يعني طابت نفرغ عليها العصيدة الايطالية تاع الفلفل و نحليها 10د و نطفي.

الكريب المالح:
2 حبات بيض صغار + 180غ فرينة + نص كاس مايزينة + ملح + شوية جوزة الطيب + 3 ملاعق زيت + كاس حليب بارد + قطعة جبن مثلثات .
الحشو: 6 قطع باتي بالجبن + 6 حبات جبن + كاس زيتون أسود مقطع صغير + 2 علب طون زيت + كمشة معدنوس مقطع رقيق + 6 ملاعق أكل أرز طايب و بارد.
ندير البيض و الزيت و الحلب و الملح و جوزة الطيب و المايزينة و الجبن و الفرينة و نميكسيهم مليح مليح.
الحشو ندير الباتي مقطع مربعات و الجبن ايضا مقطع و الزيتون و الطون نفتتوه بعدما نصفوه من الزيت و نقطع المعدنوس و نضيف حبات الارز و نخلطهم بمغرف .
نطيب الكريب ثن نديرو الحشو و نشكلوه كيما البوراك و نديرهم في صينية فرن و ندير عليهم شوية بيشاميل و شوية جبن مبشور من فوق و ندخلها للفرن تتحمر شوية .

غريبة زمان:

500غ زبدة ذايبة و باردة + 250 غ سكر قلاص و نخلطهم مع بعض مليح مدة 20د نحبكهم مليح باليد حتى تولي بيضاء ندير شوية قرفة مطحونة و نلمها بالفرينة حسب الحاجة و اجي نص نص مش طرية و مش يابسة و نطيبها فالفرن.

المقروط:
3 عبار سميد متوسط + عبر سمن ناقص زوج صباع و نزيدهم زيت + 3 ملاعق سكر و شوية ملح و فاني و نخلطهم حتى يشرب ليدام تاعو و نخليه يبات غدوة من ذاك ننخليه يريح ساعة و نشربوه بالماء و الماء زهر و نشكل حربوش ثم ندير مقروطات و نقليه
هاد الوصفة تقريبا مثل وصفتي تلقاوها في هاد الرابط بالتفصيل الممل

https://djelfa.info/vb/showthread.php?t=982529

قلب اللوز :

500غ سميد خشن + 250 غ سكر +كاس زبدة ذايبة و انقص 2 صباع و شوية ملح
ندخل السكر مع السميد جيدا مدة خمس دقائق و نزيد الملح و الزبدة و نحبك غير بشوية بصباعتينا حتى يشرب السميد الزبدة ثم ندير عبر ماء زهر كي حتى يولي شوية مشمخ و نخلوه يرتاح ليلة من الافضل او ساعتين ايلا ما عندكش الوقت ثم بالمسطرة و نقسموه حسب الرغبة بعدما نكونو درناه في صينية و ندير حبة لوز من فوق كل حبة و نطيبوه 30 دقيقة حتى يحمار و نخرجوه احمر اللون ثم نديرلو الشربات و نعاودو ندخلوه للكوشة و نطفيها باش يتشرب مليح الشربات ثم نخرجوه
الشربات . 2 عبار سكر + عبر و ربع ماء زهر و نخلوه عشرين دقيقة عل النار.

تشاراك بالقلاصاج:

ثلاث كيلات فرينة +كيلة سمن و فاني و نحبكهم مع بعض و نشرب بشوية ماء زهر و ماء دافئين و نخلو العجينة ترتاح و ما نعجنوهاش فقط نلم
العقدة . ثلاث عبار كوكاو و عبر سكر و قرفة و ماء زهر
نحل العجينة و ندير اشكال دائرية و نديرلها الحشو و نطيب التشاراك عادي ثم نديرلو القلاصاج تاع السكر اللي نديروه للعرايش.

crono · 2013-03-06, 17:31

يعطيك الصحة فايزة علي المجهودات حت أنا كل وصفات مصطفى سعدى كي نطيبها تنجحلي ان شاء الله نصورلك بعض وصفات لي طيبتها

faizarbh · 2013-03-06, 22:50

اقتباس:

المشاركة الأصلية كتبت بواسطة crono

يعطيك الصحة فايزة علي المجهودات حت أنا كل وصفات مصطفى سعدى كي نطيبها تنجحلي ان شاء الله نصورلك بعض وصفات لي طيبتها

اهلي حبيبتي الغالية كرونو نورتي غاليتي عاشش من شافك و ماذابيا تحطيلنا وصفات ايضا و صور

وردة حظي · 2013-03-06, 18:19

اختي فايزة راني لقيت اسم الوصفة فقط اين المقادير و الطريقة

bint aljazair · 2013-03-08, 09:33

السلام عليكم ورحمة الله وبركاته
الله يجزاك الخير على كل ما تقدمينه والله هي وصفات ناجحة 100/100
فقط تلزمني مقادير الحلويات التالية :
غريبة زمان
المقروط
قلب اللوز
تشاراك بالقلاصاج