الجزء129من واش طيبتي اليوم - الصفحة 10

om wassim · 2015-05-04, 07:05

لبنات انا نروح لاشغالي منبعد ان شاء الله

أم ماجد · 2015-05-04, 07:08

اقتباس:

المشاركة الأصلية كتبت بواسطة مياسم75

ام ماجد مرحبا بيك

راني قريبة ليك ياسر راني وحدي الزوج والأولاد ولاو خرجو يزهاو وخلاونيي وحدي راني نقرمش ههههههه

اعطني العنوان خخخخخخخ

صباح الخير والنشاط اليوم صبحت نشيطة ندير الغدا لسلفي وروزا اليوم الباك الرياضة ربي ينجحها هي وكل الممتحنين

ديجا غليت البيطراف وفورت اللوبيا الخضراء نروح نكمل اشغالي ومرة على مرة نطل عليكم
المهم غدانا قررت لحم مفور وخضرا على طريقة ام رامي استاذتنا وبيري وسلاطة منوعة

وعصائر السخانة عندنا واععععععع وبلاك نزيد تحلية باردة على حساب الوقت خخخخخخخخخ واكيييييد كسرة اممممممممممم
هيا الى النشاااااااط
لا قدرت نحط كواليسي اول باول

ام عبودة · 2015-05-04, 07:18

صباكم سعيد
مبروووووك عليكم الكوزينة الجديدة
هاذو الايامات تطل عليكم من الكواليس برك
هههههه
وفقكم الله لما يحب ويرضى

*وردة الشرق* · 2015-05-04, 07:18

صباح الخير ام ماجد ربي يعينك يارب ونجحلك روزا وينجح كل التلاميد يارب بصحتكم حبيبتي

*وردة الشرق* · 2015-05-04, 07:19

صباح الانوار اختي ام عبودة كيف الاحوال

دائمة الحمد · 2015-05-04, 07:26

wahibaazel · 2015-05-04, 07:43

حنونتي زينب ،انت اخت ولا بطل ،ربي يحفظك ،شوفي كيما قاتلي بنتي امي مع منتدى الجلفة تعطينا احسن الاطباق .ربي يجازيكم خير ،اييييه وين كنتو في بدايات زواجي .
ام وسيم ،ام عبودة ،اختي دائمة الحمد صباح الخيرات .
ام ماجد اييييه راك فحلة ماشاء الله ،ربي يعاونم وينجح روزا وجميع الممتحنين امين .
عملت البارح مقروط لاخي ،واليوم نعمل تشاراك باذن الله ،ورايحة ننفظ الصالو والكولوار .
غدا نعمل البقلاوة ،وحبيت نسقسيكم على القطايف نقدر نعملهم ونخبيهم بلا مانعسلهم ،نوجدهم للعرضة .لان العرضة باذن الله نعملها نهار الخميس ،
اللحم ختان نهار من قبل ويشريه ،
الثلاثا ء ،نوجد لماعن ونغسلهم ونغلفهم باه نتهنى منهم .باذن الله نوجد من قبل باه مانعياش ومانهرجش .

wahibaazel · 2015-05-04, 07:52

هاكم تفطرو لكن ماشي معسل ،شريت الدقيق انتاع المقروط لكن جاني سويه خشين خلطتلو الفرينة ،شريت مولا خشن ،يعني في المرة الجاية نعمل من شكارة الدقيق مباشرة واش قلتو يا المختصات في المقروط

البنات لي جاوبوني كامل في قسم الدردشة لكم اكبر مواح على راسكم .

oum islem · 2015-05-04, 07:59

اسعد الله يومكن جميعا
حبيبتي ام زينب صباحك سعيد
دائمة الحمد تسلمي على الفنجان يا الغالية
ام عبودة وام وسيم صباح السعادة
ام ماجد يسعد صباحك وربي يعينك اليوم الجو حارجدا وبالتوفيق للعروس الحلوة
وهيبة صباحك طمانينة قربت المادبة ولا مازال حاولت زوجي يدي الميكرو للخدام فيه صور 20 طاولة رمضانية من توقيعي
حبيت نحطهم لك ممكن تهزي فكرة على الاطباق وخاصة السلطات روعة تزيين بسيط لكن جذاب وانيق
وفيه اصابع المرقاز والدجاج تاع ام رامي تقريبا نفس طريقة ام اماني ولكن عملتهم بلمستي من اروع ما يكون
اصبحت حوحو شفتي ؟ كان جيت نقدر نعاونك اااه انا نموت على الولائم خاصة مين يكون عندي وقت نخدم باريحية
درت حميس وعجنت المطلوع نطيبو ونروح عندي تحاليل واشعة ربي يجيب الخير
وفي المساء ان شاء الله ناوية على مخلل البذنجان تاع استاذة نخبيه للشهر الفضيل

بالتوفيق لجميع الطلبة

rahma2014 · 2015-05-04, 08:00

صباحكم فل وياسمين واسعد الله صباجكم
وهيبة حبيبتي واش راكي ربي يعينك ويعطيك الصحة والعافية ؤيقدرك على كل شئ يعطيك الصحة على المقروط يبان مليح
زينب الحبوبة صباحك معطر بالورد و الياسمين
دائمة الحمد واش راكي حنونة ربي يخليك ويعطيك الصحة
ام وسيم صباح النور ربي يعينك ويعينا على الاشغال
ام عبودة صباح الخير
ارزاق صباح النور حبيبتي وين راكي

rahma2014 · 2015-05-04, 08:02

ام وسيم صباحك فل وياسمين وربي يعطيك ماتتمناي
انا غدايا جلبانة بالقرنون وبالاك ندير كسرة والحمد لله

دائمة الحمد · 2015-05-04, 08:05

اهلين رحمة صباح الخيرات والبراكات
صباح الخير لكن جميعا
وهيبة القطايف عسليها وين تخرج من الفور كي تبرد ما تشربش العسل وخليها تقعدلك حتى شهر غطيها كي تبرد ببلاستيك وخلاص
جماعة العلمة الف مبروك
ام ماجد ربي يعينك وفي انتظار الكواليس
ام سراج الف مبروك

*وردة الشرق* · 2015-05-04, 08:05

امممم وهيبة خرجلك متحوف وطيابو كما نحب انا يعطيك الصحة والمقروظ انا ندير من الشكارة طول نهار اللي نسيرو يجي شوية يابس
وعلى لقطايف تقدري طيبيهم عادي كما متعودين وتعسلبهم بصح على حسب لكان شريتي تاعنا تاع الجزائر حطيها في العسل ولكان شريتي تاع سوريا حطيلهل غير من فوق بالملعقة ونهار التقديم زيدي حطيلها شوية عسل من فوق وانت ديري حبات زيادة باش تدوقي وترعرفي واش خاصهم والبقلاوة كون درتيها ليوم خير باش تشرب لعيل تاعها مليح هي على قد ما طول احسن والتاشاراك خلبه لغدوة خير وشوفي انت ووقتك كيفاه
ربي يوفقك حبيبتي كون جيت نقدر نجي نعاونك كون نحيت عليك كتف حبيبتي

مياسم75 · 2015-05-04, 08:06

صباح الخير على وجوه الخير
زينب ام ماجد ام وسيم داءمة الحمد وهيبة ام عبودة رحمة. صباح الخير
اختي زينب شكرا الوالد مازالو مريض والحمد لله ان شاء الله معاكم نحي شوي تخمام البارح عملتي وصفة في مول التاج فهمينا فيها خرجتلك هايلة
ام ماجد ربي يقويك ويعطيك صحيحتك ويفرحك بروزا يا رب
داءمة الحمد توحشت قهوتك ربي يفرحك باميرة
وهيبة مقروضك يبان شباب ومرمل عسليه وابعثيلنا نذوقو نموت عليه

دائمة الحمد · 2015-05-04, 08:07

وهيبة مقرضك هايل
زينب رمز الهمةوالنشاط احلى صباح
راهي عنا سخانة غير عادية
ربي يعين التلاميذ ويوفق الممتحين