قسم الحلويات

سيرينا لبنينا · 2012-01-17, 20:24

السلام عليكم

اول مشاركة لي هذه الحلويات من صنعي ولو كان هناك رد ساضيف المزيد وطريق التحضير.

اتمنى انها تعجبكم.

سلالالالالالالالالالالالالالالالام.السلام عليكم جميعا
هذه الوصفات كما وعدتكم
اولا..ديرولو اسم

هذا سهل ومايكلفش وماياخذش الوقت ومافيهش مقادير كثيرة ومن اختراعي الخاص.
-هوعبارة عن كيكة صغيرة تباع الحبة ب10دج. mon gouter خدي العدد اللي تحبي من
اقسميها على اثنين واغطسي في الشوكولا وحطي فوقها حبة الجوز ولما تنشف ديريلها البريواو اللماع
اتمنى نكون وصلتلك المعلومة صح لانني اول مرة نشارك في منتدى
ملاحضة بعد ماتقسمي الحبات ضعيهم الثلاجة باه مع السخانة تاع الشكولا ما يتفتتش.
ثانيا
قاطو الميرانق
مقاديرالعجينة=250غ مارغرين صول
نصف كاس سكر قلاصي
3صفار بيض
1خميرة –فاني
التحضير=خذي البيض مع السكر والفاني وخلطيهم عادي زيدي المارقرين وخلطي شوية+الخميرة ثم نشفي بالفرينة حتى تتحصلي على عجينة تتحلل خليها ترتاح .
وحضري الميرانق ومقاديرها =3 البياض -250غ سكر عادي--1/2 ملعقة صغيرة عصير ليمون –قرصة ملح و فاني.
التحضير- ضعي البياض في صحن–بشرط يكون ناشف والبياض مافيه ولاقطرة ماء ولا صفار- وقرصة ملح مع الخط بالخلاط واضافة السكر على كميات ثم ضعي الصحن نتاعك في الحمام المائي مع الخلط حتى تلاحضي الخليط انه جمد ضفي القارص وارفعي صحنك وضعيه مباشرة في الماء بارد مع الخلط حتى يبرد.وبعد ذلك ديري الميرانق في لابوش واذهبي للعجينة.وضعيه في مكان بارد.
اقسمي العجينةعلى اثنين الاولى حليها دوائروديري وردات بالميرانق وطيبيه على نارهادية جدا باه الميرانق اطيب وتبقى بيضاء والنصف الاخر ديريه دوائر بدون ميرانق وطيبيه عادي بعد مايبرد لصقه بالمعجون وادهني الحاشية ساير داير ورمديها في اللوز او الكوكاو محمص مرحي رقيق.وفي الوسط المعجون مع ملون احمر ضعيه في ساشي واثقبيها وكبي في الوسط.
ملاحضةلاشفتي الميرانق فوق الحمام المائي مجمدتش زيديلها شوية سكر لكن قلاصي- العادي ميذوبش في المراحل الاخيرة.
ثالثا
الشامية
مقادير العجينة
400غ لابال-200غ سكر قلاصي -4 ملاعق كبار حليب غبرة-3 ملاعق كبار لوز مرحي.فرينة.
الحشو
200غ لوز-100 جوز-100 سكر قلاصي بلي بشوية صفار بيض+مغرفة زبدة ذائبة.
التحضير
احضري لابال من الثلاجة مباشرة+السكر وخلطي مليح بالعجان او بالخلاط +اللوز +حليب الغبرةونشفي بالفرينة بدون عجن لميها فقط اتركيها ترتاح وكربعي الحشو كريات صغار وضعيهم في وسط كرية من العجينة وضعيها في المول الخاص بالمعمول هذا

ضعيهم يطيبو في فرن عادي بدون مايحمارو بعد ذلك ادهني سطح الحبة بالمعجون وغمصيها بالبيستاش المرحي وذري البريو
ملاحضة لاحبيتي تكون الشامية ناجحة الزبدة تكون باردة –ماتعجنيهش –ماطيبهاش بزاف مجرد تصفار خريها.
رابعا
السيقار
المقادير 3كيلات فرينة 1كيلة لابال ذائبة فاني+(3مغارف كبار سكر قلاصي لاكانت كيلة لابال 250غ) وبلي بماء الزهر حتى تتحصلي على عجينة خليها ترتاح ثم حليها بعد ذلك جيبي المول وهو عبارة عن قصب من الحديد –يتباعو- ورولي عليهم العجينة وحطيهم في الفرن يطيبو لمايطيبو انزعي القصبات وعمريهم بحليب نسلي (بعدما تحطيه في الكوكوت 45د لما يبرد افتحيه وضربيه بالباتار وزيديلو حفنة تاع لوز محمص ومرحي)
بعد ذلك اغطسي الحبات في الشكولا ذائبة ولما تبرد ديري قلاساج عادي بياض +سكرقلاصي في بوش يكون راسها رقيق ودير تلك النقوش ووردات بلابات داموند وحدة بيضة وحدة سوداء.وحبة تاع عقاش.ولماع(بريو).
ملاحضة لاحبيتي ديري النقوش بالشكولا البيضاء ماتعمليش كمية كبرة من الشكولا في لابوش باه متجمدلكش في لابوش

omo mazen · 2012-01-17, 20:27

اين الوصفات

سيرينا لبنينا · 2012-01-17, 20:57

الوصفات راه كاينة مازلت شوية مانيش عارفة نشارك .

غدا انشاء الله نحاول نحطها ومزال عند حلويات اخرى.

lofi · 2012-01-17, 21:07

سلام
أشكال رائعة خاصة شكل الباتوني
لكن ضعي موضوعك في قسم الحلويات
مزيد من التألق

remadna · 2012-01-17, 21:13

الله يبارك
يعطيك الصحة

هات الوصفة

سيرينا لبنينا · 2012-01-18, 06:37

اخجلتمونــــــــــــــــــــــــــــــــــــــــــ ـــــــــــــي و شجعتمونـــــــــــــــــــــــــــــــــــــــــــ ـــــي

شكــــــــــــــــــــــــــــــــــــــــرا...... ..شكــــــــــــــــــــــــــــــــــــــرا...

سيرينا لبنينا · 2012-01-18, 10:15

سلام
الى OMO MAZEN-LOFI-REMADNA راني كتبت الوصفات في Microsoft Office Word مع الصور ولما انجي نبعثها

جيني رسالة بان الوقت بين المشاركة الاخيرة يجب انيكون 24 سا.

MERCI

linat · 2012-01-18, 10:37

اين الوصفات

remadna · 2012-01-18, 12:57

اقتباس:

المشاركة الأصلية كتبت بواسطة سيرينا لبنينا

سلام
الى OMO MAZEN-LOFI-REMADNA راني كتبت الوصفات في Microsoft Office Word مع الصور ولما انجي نبعثها

جيني رسالة بان الوقت بين المشاركة الاخيرة يجب انيكون 24 سا.

MERCI

لا تبعثي الملفات
ديري copier et coller