لسلام عليكم اخواتي :
وتبعا لتعليقي على الاخت لي حابة وصفة المعقودة نتاع شلف .... نقوللها و نقوللكم انا ماشي من مدينة شلف لكن عندي
https://www.djelfa.info/vb/showthread.php?t=1099499
هادي وصفة المعقودة معتمدتها في سنوات و الفضل يعود للسيدة القديرة رزقي مختارية .....الله يحفظها ويطول في عمرها .....
ولي ما زلنا نفرحو كي نشوفو طلاتها على الشاشة .....الحمد لله انا واحدة من الناس تعلمت عليها وعبر الشاشة طبعا بزاف صوالح .........الله ياتيها الصحة ان شاءالله
المهم هادي المقادير وطريقة التحضير ان شاء الله :
حطيت البطاطة تغلي بالقشور مع شوية نتاع الملح .... قشرتها و مرستها .... وحطيت 2 م ك بصل مبشور + 1 م ص ثوم + 1 بيضة كاملة + صفار 1 فقط + الملح لاكان خاص+ قرصة فلفل اسود + قرصة فلفل احمر + 4 فرماج و لا ما كانش ديري 2 م ك جبن مبشور او حتى 3 مربعات كيري او نصف قطعة من الفرماج شاف ......ما تكتريش فوق الحق لانو رايح بوريه البطاطة تجرى و تتلصق و ما تصلحلكس .....
المهم قطعت شوية معدنوس وعاودت مرست كلشي .........
شكلت كويرات و رمدتهم في الفرينة مباشرة .... وخليتهم دايما على هاد الشكل
و حطيت صحن فيه البيض مخفوق و صحن فيه الشابلور ..... و درت الزيت تسخن على نار متوسطة فقط و بديت نحط في البيض و نحط في الشابلور اخر حاجة ... رمدت كمية معتبرة ( حق المقلة ) و خاصة كي تكوني وحدك اعتامدي هاد الطريقة ... باش ما دخليش يدك بارتو و تفسدلك المكونات لي راكي ترمدي فيها
المهم في هاد المرحلة وقبل ما تحطيهم يتقلاو ....ابلاتي الحبة وحاولي دايما تحافظي على الشكل الدائري نتاعها..... و عاودي فوتي الحاوشي في الشابلور باش تضمني الحبة في القليان ..... المهم نصيحة فقط تتقلى على نار متوسطة لانها ادا قليتيها على نار قليلة رايحا تشرب كامل الزيت و تثقال و ماجيكش مليحة
وادا تقلات على نار قوية رايحا تتحرق او تحمار بزاف .......على داك لا شفتي الزيت سخنت بزاف في القليان نقصيلها شوية قد ما تبرد وعاودي زيديلها ......و نصيحة اقلي ب 2 م ك ماشي بلابانس وماشي بالشوكة باش تبقى تايما لاكوش نتاع الفرينة محافظة عليها في القليان
المهم حضرت هادي المعقودة بصوص بيضاء بالدجاج و الحمص كي العادة ......
والشاطرة تحسب الحبات ......هههههههههههههههه
ما ظاعت حتى حبة
وحتى الزيت لي قليت فيه صورتولكم comme preuve
والحمد لله ..... و الشكر لله
ان شاء الله تعجبكم وتجربوها في الشهر الفضيل
سلامي ليكم حبيباتي
و ماتنساونيش في دعوة نتاع خير ......من القلـــــــــــــــــــــب
( تقرير عن مشاركة سيئة )، و الموجودة أسفل كل مشاركة .
2023-05-31, 23:15
العرض الشجري