إلى معلمتي التي أهانتني و لن أذكر اسمها أبدا ....
انا من جيل 95 كنت نقرا 3 ابتدائي و كان نهاية الفصل 2 قاتلنا المعلمة جيبو فطورات غدوة و لازم فطور زين راح نعرض صحباتي غدوة من ذاك انا ديت قرعة تاع تشن تشن لي تتخلط بكري كان ق هو .... أيا ديتها و لقيت القسم كااامل لداخل و لي يدخل يحط فطورو و يقعد انا دخلت مديت للمعلمة القرعة في عمارة و قتلها معلمة اسمحيلي و الله ماعندنا و بحكم تعرف ظروفنا زييين قدام كااامل القسم قاتلي افتحي القرعة و شافتها و قاتلهم قتلكم جيبو فطور زين وشوفو ذي واش جابت بداو يضحكوا عليا و ممبعد راحت فرغتها في التراب لي مقابل باب القسم من برا جاية مساحة فيها اشجار و انا نبكي و كامل القسم يضحك و رجعت مدتلي القرعة فارغة وقاتلي كي عدتي زوالية احكمي الدار ماتحشمينيش قدام المعلمات الزوالي مانظنش ينجح بجي معمر في القرع و قاتلي روحي.
🔹 نقلك من ذاك العام و انا كي نتفكرك نبكي و ممكن انت نسيتيها بصح انا مزالت في ذاكرتي و نقلك اذا راكي هنا بلي راني نجحت وليت أستاذة وراني نخدم و تزوجت و رفعت راس أبي و راني عايشة في نعيم كل خير متوفر عندي ناكل و نتقلش و نصدق على الناس حبيت نقلك خرجت نبكي ورحت لدار وحكيت لأمي وقاتلي عادي معلمتك ممكن راه واحد مزعفها و خرجت زعافها ماتكرهيش معلمتك .... الصح دمعتي حرقتني و دعيت عليك وقتها بصح الذاكرة و الموقف بقالي يحتضر للان راه عندي 28 سنة مزالت في راسي الجي ماشربتوش في كرشي وكفحتيه وزيدتي أهنتيني جامي ننساها و الان نقلك ربي يهديك و رسالة للمعلمين و الاساتذة ماتجرحوش التلاميذ راه موقف بسيط منك يخلي تلميذ في دواااامة كبيرة و يتعقد الحمد لله راني نقري و تعلمت جامي نقيس تلميذ وقاع يحبوني و متعلقين بيا و الزواولة نشريلهم الادوات مش نعلن في خيري بصح الحمد لله لي تعلمت منك قيمة الحقرة
🔹 حقرتيني و ذيك الجملة تاع الزوالي ماينجحش بقرعة تشن تشن نقلك بيها راني نجحت و راني عايشة ممكن خير من كل الناس و لي ذكرتني بالموقف نفس التاريخ لي حقرتيني فيه راني ديت فيه الدكتوراه يا آنستي و شكرا لكِ و إن شاء الله تقراي منشوري وتعرفي بلي نجحت وراني في أعلى المراتب
🔹 ارجو من كااافة من هم في قطاع التعليم أن يرأفو بالتلاميذ عامة و الفقراء خاصة سلام
#منقوووووووولة
( تقرير عن مشاركة سيئة )، و الموجودة أسفل كل مشاركة .
2023-04-07, 17:42
إلى معلمتي التي أهانتني و لن أذكر اسمها أبدا ....
العرض الشجري