لاصحاب الخبرة لكمال الاجسام

[نعمة القدوس]

السلام عليكم ورحمة الله تعالى وبركاته
المشكلة تاعك أخي عندها عدة ابعاد أنا نسميهملك ونتا لازم تكون صريح وشفاف مع نفسك ووين تلقى الخلل حاول تصلحو

اول بعد هو التغذية: لازم تعرف باللي العضلة أولا راهي متكونة من ثلاثة مكونات : البروتينات والنشويات بنسبة أكبر من البروتينات والماء بنسبة أكبر من الاثنين
معناتها لازمك توفر هاد المكونات الثلاثة لبناء العضلة تاعك
يعني يا أخي ماتاكلش غير البروتينات وتنتظر العضلة تاعك تكبرن ماتخافش من اكل النشويات خاصة إذا ماكنتش سمين ههه
والماء ثم الماء، لأنو هو المكون الاساسي الذي يملأ بيه الجسم الفجوات التي تنتج عن تمزق العضلة اثناء التمرين ثم يتم بناء نسيج عضلي جديد
اشرب الماء أثناء اليوم وخاصة في ايام التمرين لانك تعرق وتفقد الماء

ثاني بعد هو الراحة: لأنو كما تعلم العضلة باه تعاود تبني نفسها لازملها الراحة، وعضلاتن الصدر ماهيش من العضلات الكبيرة بزاف دونك ماتحتاجش الراحة مثل عضلات الجزء السفلي من الجسد ولكنها لا تزال تحتاج على الاقل يوم راحة، يعني اذا اليوم مرنت العضلة تاعكن غدوة ماتمرنهاش، ومرن عضلة اخرى
ويقوللك من الأفضل أنك تمرن العضلة تاعك على الأقل مرتين في الاسبوع

البعد الثالث والأخير هو التمرين في حد ذاته
بحيث يمكن أنك قاعد تدير في التمرين غالط تماما بحيث لاتسمع للعضلة باه تنقبض بالطريقة المثلى تاعها
وفي هذه الحالة ننصحك تستعمل أوزان أقل مما راك تستعمل الآن وتبدا تركز على الطريقة أو لافورم قبل أن تركز على الوزن في حد ذاته
وبالفعل كي تركز على الطريقة وتبني تواصل بين المخ تاعك والعضلة تاعك او مايعرف بالmind muscle connection رايح تلاحظ نتائج أفضل
كي تولي لافورم تاعك صحيحة لتما فقط تبدا تزيد في الأوزان تاعك

يمكن ايضا تكون ماراكش تمرن فالعضلات تاعك بالطريقة الكافية وكي تروح للنادي تضيع وقتك وماتخدمش بطريقة كافية وماتجهدش العضلة تاعك بطريقة كافية
أهم حاجة هي أنك تمد الوقت الكافي للحركة اللي تقوم بيها وأنت حامل الوزن تاعك سواء كي تعود تطلع فالوزن ولا تنزل فيه
ولازم تنوع فالتمارين وتركز على التمارين اللي تدخل فيها مجموعات عضلية كبيرة أو مايعرف بال compound mouvement
كيما قاللك الأخ developpement couché et incliné تبدا بيهم في تمرينك ثم تدير الحركات تاع l'isolation مثل استعمال the cable machine

ايضا ماترتاحش بين لي سيغي لمدة طويلة بزاف ههه ماتفوتش الدقيقة وارجع تكمل السيغي الجاية
والعبرة ماهيش فالكمية وإنما في النوعية

وكي تدير البانش براس تاعك مع فورم صحيحة استعمل وزن ثقيل نسبيا مع عدد عدات قليل فالسيغي الواحدة
بينما في تمارين الايزولاسيون يستحسن انك تستعمل أوزان خفيفة نسبيا مع عدد تكرارات أكبر

لأنو يستحسن الجمع بين هذين النوعين للحصول على hyperthrophie musculaire optimale

هذه مجرد نصائح اللي نعرفها ومجربة وسمعتها على السنة مدربين عديدين وناس مجربين
ان شاء الله تكون افادتك وبالتوفيق