الجزء 144 من واش طيبتي اليوم ( تجهيزااتنا للعيد الاضحى بادن الله - الصفحة 101

عطرالذهب · 2015-09-20, 13:52

اشرقت انوارك يا دائمة الحمد وربي يتقبل منا ومنكم الطاعات يارب
وبصحتك لكروكي يشهي سيرتو الصباح من قهوة حليب اممممممم
هند بصحتك الحلويات في انتظار صورك

عطرالذهب · 2015-09-20, 13:55

امين اختي ام وابنة وباذن الله ترتاحي في اقرب وقت
لبنات راني هربت بصحن لكروكي ماقدرتش نقاومو نخبيه ونروح نتكى

ام سارة18 · 2015-09-20, 13:57

ام وابنة يعطيك الصحة مريضة وراكي تجري وتخممي على كل شىء في ان واحد الصح كنت كيما انت دوكا والله ماعلابالي بيها طابت ولا تحرقت
ام اماني وعبدو انا جامي عندي مشكل الصور من اول محاولة نجحت وانا نستعمل مركز مخزن
هندة بصحتك الشكشوكة
داىمة الشكر هادو كامل صح اللي يخلص 10ملاين وما يكفوهش ربي يرزق ان شاء الله الحلوى شوفي كاين الاقتصادية
دايمة الحمد بصحتك حتى انا راني نخمم فيه
سماح رانا نستناو باه دخلينا قبل لا حنان تقفل كوزنتها وتخلينا برا نتمسخر حنان ناس ملاح

Mizou123 · 2015-09-20, 13:59

السلام عليكم، اموااااااااااح كبييييرة لكل وحدة فيكم توحشششششتكم بزاف بزاااااااااااااااااااااف

دائمة الحمد · 2015-09-20, 14:08

تسلمن غالياتي
عطوري راهي سينية كاملة ما بانتش في الصور اديها بالشفاء ليك

دائمة الحمد · 2015-09-20, 14:10

لبنات ونحن في ايام كريمة ومباركة ارجو منكن تدعولي بالشفاء لشخص عزيز وغالي على قلبي فدعوة المؤمن لاخية بظهر الغيب مجابة
ما تنسونيش

دائمة الشكر · 2015-09-20, 14:10

شكرًا حبيبتي ام سارة
اطباقك روعة تعجبيني كي اتطيبي بكري
عطورة حطيلي حبة كروكي واهربي بالصحن
دائمة الكروكي هايل بصحتكم وبصحتها أميرة التبياش ربي يخليك تاج فوق رسانهم اللهم امين
ميزو مرحبا بيك اختي وين كنتي هذي غيبة

دائمة الحمد · 2015-09-20, 14:12

ام وابنة لي كالدي هي نفسها الكوكا وشبيهة بالبيتزا كوفارت ولكن الاصل تاعها يكون بصل وطماطم وفرماج وطبعا العجينة المورقة
واذاكان لي كالدي تاع هند شي اخر توضح لينا
نروح ونخليكم الى الملتقى

دائمة الحمد · 2015-09-20, 14:13

الله يخليك حبيبتي دائمة الشكر
سلامي لكل الملتحقات

ام و ابنة · 2015-09-20, 14:16

هذي غريبية عملتها الصباح

و هذي هي بالصح بالشكل التقليدي علاجال اختي
و انتبهو بنتي هي اللي راهي توريلكم فيها خخخخ

و هذي بلارة متوسطة تع فلفل حار رقدتو خفت لوكان يظهر يجي شيخي و عجوزتي يعيدو عندي شيخي يموت عالحار و انا و راجلي ما نحبوهش و ما نشروهش
و كذلك ممكن يزورني خويا تع الغربة او نعرضو بعد العيد و هو ثاني يموووت عالحار

ام سارة18 · 2015-09-20, 14:17

اهلا ميزو جيتي في بالي اليوم كيف حالك
لبنات حلت سماح الكوزينة الجديدة
حنان نشكرك على حسن الضيافة م وكانت ماشاء الله مع بداية كواليس العيد انا نقعد عندك عجبتني لاطيراس نتاعك

ام و ابنة · 2015-09-20, 14:23

دايمة الحمد ربي يشفي مريضكم و يعافيه هو و مرضى المسلمين

و الله يا اختي ام سارة حسيتي بيا كيما انا حسيت بزينب و ام سراج و كل وحدة حارت كيفاش تقسم روحها بش تادي واجباتها على اكمل وجه
و صدقيني القاطو اللي راني نعمل فيه يا ربي تصحلي منو علبة صغيرة برك خخخخ
بصح هذا هو لوشارم تع هاذ المناسبات ربي برك يقدرنا و يتقبل مننا و يجازينا خير
البنات ما تتضاربوش انا الكروكي ما نحبوش خاطر ما نشربش قهوة او حليب او تاي يعني ما نقدرش على حاجة ناشفة بزاف وشنو شهاني تع دايمة الحمد اذا حبيتو تذوقوني حبيبة برك معاكم خخخ

ام و ابنة · 2015-09-20, 14:24

يسمالاك كنت حابة نجوز العيد في دارك الله يبارك ما كتبش ربي معليش نتلاقاو عند سماح و كثر خيرك على حسن الضيافة

um alaa · 2015-09-20, 14:25

حنانو اختي العزيزة كوزينتك فاتت خفيفة ظريفة كيما شكرا على الاستضافة الرائعة

ام ريان عبدالله · 2015-09-20, 14:26

دائمة الحمد ربي يشفي مريضكم عاجلا غير اجلا
ام ةابنة واحد لغريبية تشهي انا نموت على لغريبية بصح جامي درتها