فسخ خطبة بنت خالتي

[مشكلتي]

السلام عليكم ورحمة الهت تعالى وبركاته
أنا شاب عمري 28 عامل والحمد لله ، وكغيري من الشباب فكرت في الزواج فاخترت بنت الخالة وهي البنت الصغيرة لخالتي الكبيرة ، كان عندي مدة ما شفتهاش يا حسراه منذ أيام الطفولة وبعدها حجبوها دارهم فكنت مرة في ال3 سنين ولا اربع نشوفها كيما نشوف لمح البرق
المهم كنت دايرها في راسي هادو السنين وكي عولت نتزوج قلت لأمي شوفيلي بنت اختك .خلاص تمت الخطبة وما بقي الا الزواج
فبنت خالتي صارت خطيبتي الآن وكنت ساعة على ساعة نكلمها فكان من الاحاديث الي دارت بيناتنا أنني قلتلها اذا كان عندك ماض مالا قاتلي كانوا زوج من الناس وووو مالا قتلها الماضي خليه في ذكرياتك انسايه وعيشي للمستقبل ،
وكملنا هاك حتى جاتنا للدار بنت خالتي وحدة اخرى من خالة أخرى وهذي بنت خالتي الي جاتنا اكبر مني وموالف مداصرها يعني كيما اختي مالا قتلها احكيلي وشرايك في خطيبتي بنت خالتك
أيا قعدت تحكيلي عليها قاتلي راه هدرت مع شاب وقاتلو راني معجبة بيك وامشي معايا مالا هو مشى معاه وقت وخلاها انا تفاجئت وقتلها شكون هذا الشاب قعدت تحكيلي عليه المهم انا رحت لخطيبتي قتلها راه وصلوني اخبار وحكيتلها القصة مالا هي انكرت من الأول وبعدها قعدت تبكي زعما وقاتلي يخي قتلي انساي الماضي وكيفاه درت في رايك قتلها انا ما درتش في رايي بصح في خاطر امرأة لاباس بيها مش امرأة تروح تحلل على الرجال قتلها انا ما كنتش عارفك هاك اما كي عرفت درك صاي مانعرفك ما تعرفيني وبعدها بدات زعما تتهم فيا قاتلي مافيكمش الامان والرجال قع كيفكيف وكيفاه بعدما خطبتني دير هاك وهادي ماننسهالكش انت خداع الخ من الكلمات
انا منيش غالط الحقيقة انا قتلها انساي الماضي لانني حسبتها امرأة طبيعية مطابقة للكون مش امرأة تبادر للرجال
مشكلتي كيفاه نواجه خالتي وامي نقولهم عادي ولا نمهد ولا وش ندير درك راني حصلت

[مياسم الصمت]

وعليكم السلام ورحمة الله وبركاته

يا أخي من المفروض تسأل على الطفلة قبل ما تتقدم لها خاصة انها من صلة الرحم

يعني تشوفها لمح البصر ودرتها في رأسك هذو السنين وما فكرت تسقسي عليها وعن سيرتها
خاصة انه زواج الاقارب عند فشله يؤدي في الاغلب لقطع الرحم

وانا اقول لك امر من المفروض زوجة خالتك الثانية التي حدثتك عن خطيبتك من المفروض ان تحدثك عنها قبل الخطبة
اما حديثها عنها لاحقا فيولد تساؤلات كثيرة عليك التفكير فيها وتقصيها

نسال الله لك الخير

[* الحلم سكر *]

السلام عليكم
خويا الشك الكبير في هاذيك اللي خبراتك و وقتاه بعد الخطبة ماشي قبل ؟؟؟؟؟
الطفلة غلطت ايه مي صارحاتك من قبل و هاذيك الثانية لوكان جات نيتها صافية لوكان حتى ولو قاتلك عليها ما تحكيش التفاصيل بهاذي الدقة ؟؟؟؟؟؟؟

انا نشوف خطيبتها ما بقاش معاها مكتوب مادام دخل الشك انت الغي الخطبة و خلي السر بينكم و هي بالاك ربي تاب عليها و خليها بالاك تبدى صفحة جديدة مع واحد خلاف
اما هاذيك لي جابتلك اخبار الله اعلم كلها صحيحة او فيها مبالغة ام لا الله اعلم واش كان نيتها بعد عليها لانو الغريب في الامر انو لي حكات عليها بنت خالتها هي تاني ؟؟؟؟؟

ربي يفتح عليكم انت و خطيبتك و يعوض كل واحد فيكم من جهة اخرى

[Spartacuse]

ربي يرزقك بوحدة بنت فاميلبا خويا و دائما اسئل جيدا قبل الخطبة

[rose de sable s]

سلام
لكن هي كانت محجوب وانت مكنتش تشوفها كيفاه مال مشات مع هذا الرجل
ممكن ضغط عائلة عليها جعلها تلجا لهذه الطريقة خاصة انها تري بنات سنها لهم اصدقاء
ان لا اشجعها يكلامي لكن انظر لمحاسنها و سيئاتها و ممكن امك متقبلش تقسخ خطبة لانك ستشتت عائلتين
صلي صلاة استخارة و ربي يجيب خير

[زبدة ذايبة]

شوف

راني روحت جبت لاتاي باش نجاوبك مليح

اسمعني مليح

لوكان الإنسان يطلبوا منو يحط دراهمو عند واحد يشكو فيه الناس بلي خاين وسراق -مجرد شك-

راح يقول أنا ماشي مهبول ولا مريض نحط دراهمي عند سراق

أنا وحدة مانعطيلوش 10 ألاف تاع الدزاير

نقول مانخليهش يسرقني ويستغفلني

فمابالك بيك انت رايح تحط عرضك عند وحدة تشك فيها وبالدليل والبرهان وبشاهدتها هي على نفسها بلي عندها صحاب -حشاكم-

نقولك

اهرب منها الليل قبل من النهار

الزواج يتزعزع من هذ الأمور ويوصل حت ينهار

ماتقبلش على روحك حياة الشك والريبة . بنت خالتك ولاماشي بنت خالتك أهرب

ماكاش أكثر من العرض ومن الدين ومن الحياة تاع الإنسان

المال يجي ويروح لكن العرض إذا راح مايوليش حتى لوكان تخلص عليه باش يرجع مايرجعش

ماتجيبش المرأة اللي عرفت الرجال وتهدر معاهم بلا حياء بلا حشمة

هذا النوع من النساء قاتل للرجولة

تعفسلك على شلاغمك كي والو وماديرلكش الحرمة على خاطر عفست قبل منك على نيف باباها وخاوتها

لوكان جات تعرف قيمة للشرف ماتتدناش

الحراير تموت وماتسمحش للراجل يعفس على سباطها

المؤمنات تاع الصح ريحتها مايشمهاش الراجل غير راجلها

كيفاش تتزوج من امرأة كانت تجري مور الرجال

يعني هذي ماعندهاش الكونترول والفرانات اللي تطلعهم في وقت الصح

قال عجبني سعيد أجري ليه !!!!!!!!!!!!!!!!!!!!!!!!!!!

قال عجبني بوزيد أجري !!!!!!!!!!!!!!!!!!!!!!!!!

لاحيا لاحشمة لادين لاتربية

هذي تصلح تكون زوجة وأم ؟؟؟؟؟؟؟؟؟؟؟؟؟؟؟؟؟؟؟؟؟؟؟

ماشكيتش

الغالي يجيب الغالي

ماكاش أغلى من المرأة اللي تحافظ على شرفها ودينها وكي تجي تغلط تشوف لهذاك الأب اللي رباها ودار فيها الثقة وقبل من الأب كاين رب تخاف منو.

راك كي خويا

ماعندي حتى صلاح مادي ولا معنوي من هذا الرأي اللي نعطيهولك

أخطيك منها خاصة أنك عرفت بالماضي انتاعها

لو كان كنت جاهل ماتعرفهاش وتزوجتها لو كان كان ردي غير هذا اللي راك تقرا فيه

لكن مازال الحال والحمد لله رب العالمين بينلك هذا الشي قبل ماتغرق.


بالنسبة لخالتك :

الرحم عندنا غالي خالتك ماتخسرهاش والطريقة:

ننصحك كي خويا.

رقد الأمور مع بنت خالتك هذي وحاول تفتعل المشكلات معاها بطريقة ذكية حتى هي وحدها تكره.

مثلا إذا كانت ماتلبسش الحجاب انت قوللها نديرلك جلباب ونقاب والخدمة ماكاش ولا القراية

المهم شد عليها حتى يجيبلك رب الفرج

أنا هذا رأيي واحتمال أني نكون غالطة ولكن ماحبيتش تخسر خالتك وزيد يماك وكامل العايلة.

انسحب بطريقة ذكية بلاماتخلي حتى أثر وماتخسر حتى واحد

ماتخسر روحك ماتخسر يماك ماتخسر خالتك.

ونزيد نعطيك مفتاح كبير يفتح الأقفال كلها :

اللاستغفار والدعاء

ماكاش خير منهم . أطرق باب رب العالمين تجده قريبا مجيبا.

إن أصبت فمن الله وإن أخطأت فمن نفسي ومن الشيطان

[NIGHTINGALE]

قبل كل شيء أريد أن ألفت انتباهك أخي إلى أمر أراه مهما
وهو الداعي الذي أدى بك إلى اختيار تلك الفتاة في البداية
ذلك أنه يُخشى عليك أن تقع مرة أخرى في امرأة مشابهة لها إلم تغير ما بنفسك
فلا تظنن أن ارتباطك بامرأة تبادر بالخطوة الأولى نحو الرجل محض صدفة
فما بداخلك من رغبات وميولات وأماني وأحلام عادة ما تشتغل في الخفاء وتدفعك إلى اختيار فتاة دون أخرى
فأنت الآن عقدت العزم على ترك ابنة خالتك
ولكن لم تترك ذلك الشيء الذي بداخلك الذي كان يجذبك نحوها والذي قد يوقعك لاحقا في فتاة مشابهة لها
فلذلك أنصحك نصيحة مجرب عندما تقع على شخص غير مستقيم في أخلاقه لا تتهمه ولكن اتهم نفسك واتهم خطواتك التي أوصلتك إليه

هذا من جهة ومن جهة أخرى أقول لك كلاما لم أكن لأقوله لك لو لم أقرأ بعض الأحكام الشرعية التي تتحدث عن التوبة
ذلك أننا معشر المسلمين في بعض الأحيان نزكي أنفسنا ( يعني ننسى ذنوبنا الكثيرة ) وننزل على من اقترف الذنب الواحد بالأحكام القاسية ونغلق أمامه باب التوبة
رغم أن المولى تبارك وتعالى عفو غفور ويتقبل التوبة النصوح عن عباده الذين ندموا بعد الزلل وأصلحوا
لذلك أرى - والله أعلم - ألا تتسرع في قطع الصلة مع خطيبتك التي هي ابنة خالتك أي من لحمك ودمك
وأن تسعى إلى نصحها وحثها على الندم والتوبة على ما كانت قد فعلته في الماضي
فما قالته لك عندما واجهتها بالحقائق يوحي بأنها تنظر إلى نفسها على أنها الضحية وأنها لا تتحمل مسؤولية أفعالها
أو بمعنى آخر أنها تتجاوز بكل سهولة عن عثراتها وتعتقد أن الحياة كذلك
وذلك خطأ، إن ابنة خالتك في حاجة إلى من يفتح عينيها على حقيقة الحياة
ويجعلها تفهم أن ما يقبل عليه المرء من أفعال هو الذي يحدد طريقه ورفاق دربه في هذه الحياة
فأفعال السوء تجلب رفاق السوء وأفعال الخير تجلب رفاق الخير
فهي أساءت في قبولها التذلل من أجل رجل وإن لم تندم وتتب يصبح الذل يلاحقها كلما حاولت الارتباط
يا أخي إن كان في وسعك الإصلاح فأصلح ثم فكر بروية في طريقة الانفصال
ولكن لا تتبرأ منها وتتركها لقمة سائغة للشيطان فهي مهما كان قريبتك وأولى بك نصحها وإرشادها وسترها !
وأنا متأكدة أنها لو تابت واعترفت بذنوبها وكرهت ما أقدمت عليه في الماضي سوف تتقبل قرار الانفصال وتساعدك عليه وتحفظ بذلك شمل العائلة
وإن شاء الله ربي يكون في العون ويصلح القلوب

[عين الصقر]

زواج الاقارب فيه مشاكل كبييرة وكبييرة وبعد فسخ الخطبة ستكون عواقب للعلاقة بين امك وخالتك
هي قاتلك خرجت مع شخصين في السابق وانت قلتلها انساي الماضي وخمي في المستقبل ؟ الخطأ خطأك يا أخي
اذا انت في عمرك 28 سنة فهي في العشرينيات وممكن غلطت وتابت
وانت المفروض تسأل على الطفلة قبل ما يطيح الفاس في الراس وبنت خالتك اللي خبراتك بالقصة المفروض تحشم على عرضها مادام شافتها انخطبت وعلاش تفتح قصص الماضي؟ زعما هي كبيرة عليك وفي الثلاثينيات من العمر. الله يهدي ما خلق.
اذا عندك شك في العلاقة بينكما فمن الأفضل أن تلغي الخطبة لأنك ستعيش دائما في الشك
الله يرزقك ببنت الحلال

[0ibtissam]

كان من المفروض تسأل قبل الخطبة كانت خطبتك ريح تصرحك انت لي منعتها انا نقول الحق في بنت خالتك كان من الاصح متخبركش ممكن غير منها اصغر منها تزوجت كبرة الموضوع بزاف ربي يهديها درك انت ريح دير تفرق بين خالتك وامك وزيد صلي صلاة استخارة ولي فيها الخير ربي يقدمها

[Spartacuse]

bravo اختي زبدة دايبة كفيت ووفيت

[Jazairi210]

المشكل ان بعض البنات يستهن بمسالة العلاقات قبل الزواج ويدعين التوبة عندما يتقدم اهدهم لخطبتهن ة في بعض الحالات يكدبن علي الخطيب ويدعين العفة تحت غطاء السترة (يعرفن الدين الا في السترة) و نسو انهن يكدبن و يخدعن زوج المستقبل و في بعض الحالات يحدث الطلاق بسبب الكذب و الخداع قبل الزواج

[cgoumab6]

السلام عليكم
اسف على ماساقوله ولكن رجولتي وكبريائي لاي سمح لي بان اختبئ وراء قناع
اخي العزيز ادهب الى ابنت خالتك التانية التي تقصد انك مداصرها وارسل لها كلامات مني وانا مسؤول على كلامي
انها انسانة ليست مهدبة
انها انسانة حقودة انها انسانة لا تريد الخير لك
فلو كانت تريد الخير لك لما اخبرتك بماضي خطيبتك واتمنى ان لا تكون السبب في تعاستك وتعاسة خطيبتك لانها ستجني الكثير من وراء دلك
سلام

[soumia bougaa]

السلام عليكم ورحمة الله تعالى وبركاته
الخطاء من ابنة خالتك التي تقول انك مداصرها لانو من المفروض حكاية مرة عليها سنوات تكتمها وتستر عليها

وثاني حاجة بما انها كبيرة عليكم في زوج كان من المفروض عليها انها توعي خطيبتك بدل ما انها تفضحها

واهم حاجة انها لو كان نيتها صح مصصلحتك ومصلحة اهلك كون قاتلك في الايام الاولى مش حتى خطبت وتوطدت العلاقة بين عايلتك وعايلة خالتك-ام خطيبتك-

جل من لا يخطا
ومن ستر مؤمنا في الدنيا يسترو ربي يوم القيامة

ممكن انها كانت صغيرة او لعبولها بعقلها

ومام انت قتلها انساي الماضي كيفاش تقوللها انساي الماضي ومن بعد تولي نت تنبش فيه؟

بالعكس كون نت الانسان الي يرجعها للحق وينورلها طريقها

واكيد انك راك عاقل وراك راح تعرف اذا كانت تابت صح والا راهي غير تتمسخر

واهم حاجة صلي الاستخارة اخويا وادعي ربي يوريلك طريق النور

ماتدريش ممكن صلاح في انو الزواج يتم

تقبل مروري

["راجية الجنة"]

السلام عليكم

اخي الكريم
لم اريد الرد على موضوعك
ولكن ما هز في نفسي هو بنت خالتك الثانية التي لو كانت بنت اصل و فامليا لما اخبرتك بكل هذه القصة عن خطيبتك
و الكلام هذا ممكن يكون صح و ممكن يكون ناتج عن حسد
و هذا يحدث في احسن العائلات
لا تتسرع
اعطي فرصة للبنت
اعرفها جيدا
قبل اقدام على خطوة الفسخ
لا تدع الشك يسيطر عليك
صحيح هي صارحتك انها في يوم ما كانت مع اثنين
لو كانت يا اخي الكريم فيها ذرت انعدام الثقة فيك لما صارحتك
شوف هذي النقطة من ناحية الاجابية
وانصحك نصيحة جميلة
استخير ثم استخير ثم استخير
و داود على الدعاء انه عبادة التي نتجيك اكيد
هذا ما لدي و لا تتسرع
وفقك الله

[الأستاذ الصغير]

اسمحلي أخي انت في روحك مشكلة
عالج روحك ثم توله لبنت خالتك

منها تقوللها ما تحكيليش ومنها تروح تقسي على ماضيها