نظامي لي ماشية بيه في بيتي و حياتي

sawceno · 2014-11-14, 13:26

سلام عليكم لبنات

جمعة مباركة ليكم و عليكم

اليوم جبتلكم نظامي لي نمشي بيه في بيتي و حياتي

اولا

تنظيف البيت و تنظيمه

لازم تنوضي شوية بكري و ادا ماقدرتيش ممكن يكون عندك وقت محدد تنوضي فيه

تبداي

بغرفة نومك

تنظمي سريرك و تمسحيه من الغبرة و ادا كان محتاج تغيري الدراوات تغيريهم

تنظمي سرير بيبي ادا عندك في الغرفة معاك

تمسحي الغبرة تاع الكومودينات و التسريحة و الخزانة و التلفاز بفوطة خاصة

و شوفي المرايات ادا موسخين تمسحيهم بمنظف الزجاج و جرنان

ماتنسايش تمسحي الشباك من الغبرة

السجادة تكنسيها بالفرشاة الخاصة مثل هادي

و تكنسي الارض و تمسحيها بشويا منظف و معطر و ماء طبعا

في الاخير عطري غرفتك بالمعطر

ثم اتوجهي

لغرفة اطفالك

و ديري نفس لي درتيه في غرفة نومك

ثم تتوجهي

لغرفة المعيشة

تفتحي الشباك تهويها و ترتبي الاسرة و كاش حاجة ماشي في بلاصتها ترجعيها و تنفضي السجادة وتمسحي الغبرة و تكنسي و تسيقيها و تعطريها

بمعطر

ثم تروحي للمطبخ

تغسلي ماعن القهوة تمسحي الرخامة و الطابلة الكويزينيار و باب الثلاجة

تفتحي ثلاجتك و تنظميها من الداخل سريعا و تجبدي خضرتك و لحمك با اطيبي فطورك و كي تكملي فطورك و هو على النار ادا عندك بطاطا تقليها

قطعيها و ديريها في الماء و خليها شلاظة انتاعك اغسليها و قطعيها ووجديها هاكا تكوني تهنيتي من الفطور دربة وحدة

روحي للحمام

اول حاجة اديريها تروحي للتوالات تحطي فيها هاربيك او اغل و خليه

ثم روحي للحوض امسحي المراية و و الحوض اغسليه بشوية بريل ازيس و جافال و شليه و نشفيه بفوطة هو و الدوش او البينوار

كاش ملابس معلقة مورا الباب ديريها في سلة الغسيل

ماتنسايش تمسحي الاكسسوارات و الشمبوهات و تنظميهم و في الاغير تدعكي التوالات بالفرشة المخصصة ليه و تشليه و امبعد امسحي الحمام بمنظف

معطر و غيري المنشفة لازم كل يوم و عطريه و اخرجي

شوفي فطورك ادا طاب والا مازال

هاد الشيء كامل ممكن في الاول ياخد ساعتين من وقتك يوميا لكن مع الوقت راح تكوني سريعة و يخلاص قبل

اعيت وانا نكتب راح نكمل امبعد ادا عجبكم موضوعي قولولي نكمل او لا

الجزء 2 الصفحة 1 المشاركة 4

الجزء 3 الصفحة 1 المشاركة 8

الجزء 4 الصفحة 1 المشاركة 10

الجزء 5 الصفحة 2 المشاركة 19

الجزء 6 الصفحة 2 مشاركة 29

الجزء 7 الصفحة 3 المشاركة 43

الجزء 8 الصفحة 4 المشاركة 54

الجزء 9 الصفحة 4 المشاركة 58

الجزء الاخير الصفحة 5 المشاركة 71
يتبع

ليلى الجزائرية1 · 2014-11-14, 13:35

ـيــعــطــيــكـ آلـصــحـة آـخــتــيـ
ـمـلـيــحـ ـكــيـ ـتــكــؤـنـ آلـؤـحــدة ـفــيــنـآ ـمــنــظــمـة ـبــرـنـآـمــجــهـآ آلـيــؤـمــيـ

melissa lola · 2014-11-14, 13:50

يعطيك الصحة

sawceno · 2014-11-14, 18:41

بالنسبة للدراوات

غيرها مرة كل 3 ايام

بالنسبة لغسيل الملابس اغسلي كل يوم

انا دايرة نظام

يوم لملابس بنتي و دايتهملها في صاشي وحدو يعني نرفدهم و نرمي في الغسال ديراكت

و يوم لملابسي انا وزوجي الابيض وحدو والفاتح وحدو الغامق وحدو

ويوم للدراوات و الفوط و طراشن الكوزينة

وهكذا

يعني كل يوم نغسل حاجة معينة

مسحوق الغسيل فرغيه في علبة بلاستيكية وحطي فيها قوبلي باش تاخدي بيه المسحوق

يتبع

زهرة اللوتس31 · 2014-11-14, 20:12

شكر ا اختي على الموضوع المفيد تابعي نحن معك

sawceno · 2014-11-14, 20:58

اقتباس:

المشاركة الأصلية كتبت بواسطة ليلى الجزائرية1

ـيــعــطــيــكـ آلـصــحـة آـخــتــيـ
ـمـلـيــحـ ـكــيـ ـتــكــؤـنـ آلـؤـحــدة ـفــيــنـآ ـمــنــظــمـة ـبــرـنـآـمــجــهـآ آلـيــؤـمــيـ

اقتباس:

المشاركة الأصلية كتبت بواسطة melissa lola

يعطيك الصحة

اقتباس:

المشاركة الأصلية كتبت بواسطة ام محمد 13

chokren baraka allah fik

اقتباس:

المشاركة الأصلية كتبت بواسطة زهرة اللوتس31

شكر ا اختي على الموضوع المفيد تابعي نحن معك

شكرا على مروركن العطر نورتو موضوعي

sawceno · 2014-11-14, 21:11

الاجهزة لي مساعدتني في المطبخ

اول حاجة الميكرووند

هايل
بما اني موظفة فا يساعدني في تسخين الفطور عالسريع كي نجي من الخدمة

الخبز حليب بنتي اي حاجة محتاجة نسخنها مساعدني حقيقة

المفرمة تاع موليناكس هادي هايلة

نرحي بها البصل الثوم الزرودية آلصوص تومات البويون لبنتي يعني حقيقي مفيد

العجانة اركوديم

هايلة في العجن كي نحب ندير بيتزا و بما اني ماعنديش الوقت ندير كمية و نحطها في الكونجيلاتور و الله غير مساعدني

كوكوت ساب هايلة نصف ساعة و الماكلة طايبة

هاد الاجهزة مليحة للموظفة او لي ماعندهاش الوقت ممكن اديريلها ميزانية و تطمي ادراهمها بلعقل و كل خطرة اشري حاجة تساعدك هايلة

يتبع

الجنة الجنة · 2014-11-14, 22:06

رانا نتبعو تشوقنا للبقية شكرا ليك

sawceno · 2014-11-15, 12:48

اشياء نديرها تساعدني في المطبخ

كي نكمل غسيل لماعن في الليل نوجد اماعن القهوة تاع الصباح الشوبات و المغارف و كاس العصير لزوجي و السكرية و نحطهم فوق طابلة الكوزينة

في سنيوة و نغطيهم هاكا كي انوض الصباح نصيب كلش واجد

الحليب و القهوة حاطتهم في علب خاصة مثل هادي ودايرتهم قدام الكويزينيار

المسمن كي مانكونش مشغولة اندير كمية و نحطو في الكونجيلاتور و كل يوم الصباح نجبد نسخن في الميكرووند و الله كانو هادا وين طاب

حتى القاطو نفس الشيء

الخضار دايرتهم في سلل كيما هادو في الثلاجة والله تبقى مرتبة اطول فترة ممكنة

الاكل كي يبرد ونحب نديرو في الثلاجة انديرو في علب و نحطو في الثلاجة

لماعن لي مخرجتهم باش نستعملهم في المطبخ بما اني انا وزوجي فقط و بنتي مازالت صغيرة هادي نصيحة مني ليك خرجي غير قيسكم يعني انا

مخرجة

3 كيسان ماء 2 شوبات

2مغارف كبار 3 صغار و حدة صغيرة نرفد بيها ليزيبيس سكين مغرفة حطب و 2 اينوكس تاع الطياب

2 بولات شربة و زوج صحون غامقين و واحد للسلطة وواحد بلا

و زوج ترموسات تاع حليب و قهوة قيسي انا وزوجي

كيماهادو سواسوا مع اختلاف الالوان

و ماشي غالين

وطبعا سنيوة تاع بلاستيك للقهوة

و كسرونة للحليب و 2 طواجن واحس صغير وواحد متوسط و الكوكوط هادو حاطتهم وحدهم في بلاكار و لماعن تاع السجاج في سلة

هاكا مانقعدش غير نجبد ويتوسخو و نعصل فالماعن كي نغسلهم

دايرة كل البقوليات كيما العدس اللوبية المقارون سكر فرينة في علب بلاستيكية خير من الاكياس جربيها ترتاحي

حاطة بسينة صغيرة في المطبخ كي نحب نطيب نلبسها ساشي و ندير فيها الاوساخ و كي نكمل نرمي الساشي في السلة الكبيرة

الزيت دايراتو في قرعة صغيرة تاع زجاج و حاطتها قدامي فوق البوتاجي

خير من كل خطرة نجبد البيدون الكبير نفس شيء مع زيت الزيتون

يتبع