الوصفة السحرية لمطلوع بدون لباب

[إلهام07]

الوصفة 11

واش راكم يالفحلات
اليوم الحلقة الثانية نتاع مسلسل اللعب بالعجين
راني دخلت المختبر نهار الجمعة باش نصورلكم مطلوعي العزيز ، على بالي كل واحدة عندها وصفتها للمطلوع اللي ماتحبش تغيرها و كاين بزاف أخوات حاطين وصفات مطلوع هنا في المنتدى، بصح حبيتكم تشوفو الوصفة نتاعي بعد التعديلات المخبرية لاخاطر أنا نحب المطلوع يكون رقيق و مافيهش اللباب ( مطلوع نتاع فحلات أحم أحم هههههه ) ، بدلت في المقادير حتى جا روووعة، تبعو معايا و شوفو النتيجة :

المقادير: ( درت غير 2 قرصات باش نصورلكم الطريقة ، كان عندي كمية كبيرة نتاع خبز في الدار، درت المطلوع من أجل عيونكم فقط )

* كيلة فرينة ( مقدار قرصة )
* كيلة سميد ( مقدار قرصة )
* 1/2 ملعقة كبيرة خميرة لكل قرصة
* 1 ملعقة صغيرة ملح لكل قرصة
* سينوج
* 1 ملعقة كبيرة سكر لكل قرصة
* 1/2 ملعقة كبيرة زيت لكل قرصة
* محسن الخبز ما ننصحش بيه لأنه مضر بالصحة و نديرو فقط لما نجرب دقيق جديد و نخاف منو ( خاصة إذا كانو عندي ضياف و نخاف نتبهدل ) وممكن اللي يحب يقدر يعوض محسن الخبز بشوية من خميرة الحلويات
* ماء دافئ للعجن



الطريقة :
1- نخلط المكونات الجافة أولا ، ثم نضيف الزيت ثم الماء الدافئ حتى نتحصل على عجين طري


نعجن 5 دقائق و نستعمل طريقة الكيس المبلل للوهرانية : نبلل كيس نظيف و نحط العجين فيه و نغلق الكيس و نخلي العجين يختمر ( أنا خليتها خمرت 2 ساعات لأن المطبخ عندي بارد شتاء و ساخن صيفا يعني الخدمة فيه ميزيرية صيف وشتاء )


2- بعد ما تخمر نعجنها 5-10 دقائق و نشوف إذا تحتاج ماء نزيدلها ( أنا زدت حوالي فنجان فقط )
3- نقسم العجين على 2 ( لأنني أنا درت 2 قرصات ) و نعجنهم في شوية زيت ( مقدار 1ملعقة كبيرة زيت )
4- نحط القرصات في مناديل و نغطيهم حوالي 5-10د حتى يرتاحو ومايتعبوناش في التقراص
5- نقرص القرصات رقاق ( باش ما يجيش فيهم اللباب ) ونغطيهم و نخليهم يخمرو ( أنا خليتهم 40د لأن المطبخ بااااارد )


6- كي يخمرو مليح طيبيهم في طاجين تكوني سخنتيه مليح من قبل ( حواي 20 د )
7- أنا شفت أخت دارت موضوع عنوانو مطلوع البيترا و شفت قبيل موضوع الوهرانية نتاع المطلوع ، قالت أنها تغطي الطاجين بصينية لما ترمي فيه القرص و القرصات ينتفخو أكثر لان الحرارة تكون محيطة بالقرصة من كل ناحية ، لذلك قلت نجرب ، وصحيح ، المطلوع انتفخ روعة ، شوفو هنا رميت القرصة الأولى :

وهنا غطيت الطاجين بصينية أكبر منو :


شوفو كي طاب راهو خفيف والله العظيم مثقب أكثر مما يبان في الصورة ، ماقدرتش نبينهالكم في الصورة لان المطبخ عندي ضاوي بزاف :



ياخي بكري كانو يقولو الحرة اللي مطلوعها من الخفة بزاف يطبق على 2 ، شوفو طبقتها غير بإصبع واحد :


وكي مابانوش الثقوب مليح ، حليت قطعة على زوج باش تشوفوه من داخل كيفاه خفيف و مثقب ، شوفو :


وهذه قطعة أخرى ، شوفو ما فيهاش اللباب خلاص :


ممكن اللي يحب يدهن القرصة كي الطيب بشوية زبدة و لكن صدقوني هشوشة وطرية جدا ما تحتاج والو

* ملاحظة : أنا درت بحث هذي مدة على المطلوع باش نلقى أحسن وصفة ، يعني ما رانيش نحاول سرقة افكار الغير وننسبها لنفسي و لكن كل ما نشوف أخت عندها إضافة أو طريقة نتاع طياب جديدة كيما طريقة الكيس المبلل او طريقة الصينية اللي فوق الطاجين نجرب و لكن المقادير هاذو أنا ما هزيتهم من حتى وصفة وإنما نتيجة نتاع تجارب كثيرة ، كل مرة ندير المطلوع نبدل في المقادير حتى لقيت الوصفة المثالية .

أتمنى جربوها و تعجبكم ، تحياتي

[الأمنيات]

[سلسبيل11]

مشكورة يالفحلة جوعتينا

[أم ياسين الزهراء]

راح ننتحر كتبت وتفلسفت وعلى الاخير راح كلش


نشكرك ونحيك على تجاربك الناجحة راكي مبدعة وفنانة

[nounoudjs]

بارك الله فيك

[أم أسامة 07]

بارك الله فيك

[الحركاتية]

يعطيك الصحة

يظهرلي تقريبا نتبعو نفس الطريقة

سلمت يداك

مطلوع هايل ويشهي

بصحتكم

[ام ملاك.]

يعطيك الصحة خرجلك هايل وروعة

[أم شيماءْ]

ههههههههههههه والله دمك خفيف ومطلوعك اخف قلتها ونعاودها عمرية ونص
تبالي نديك عروس لخويا هو الي يحب المطلوع هكذا :d

[الوهرانية 1]

تحياتي ليك اختي الهام وشكرا على الاهتمام بمواضيعي
مسكين مطلوعي دخل للمختبر تاعك ماعليش راكي تهليتي فيه
نفس طريقتي حنونة فقط تعديلات بسيطة في المقادير
رابط مطلوعي
https://www.djelfa.info/vb/showthread...2#post11387852
تاكليه بالصحة حبيبتي

[kokotg]

فحلة ونص ماشاءالله

[ام الهضاب]

هاااااايل يعطيك الصحة

[ome mohamed]

الله يبار فيك ياختي خرجلك هايل ما شاء الله

[كريمة كوكة]

على حساب الشرح و رد الأخوات يبان هايل و سخفتيني لكن أنا حبيت نشوف الصور باه نزيد نجوه أكثر ابعثيلي قرصة سخونة ناكلها بزيت الزيتون عيشك...

[oum imane]

ya3tik assaha rayha njarbou ounradlek lakhbar ana tani rani koul mara njarab nzid ounakass iji mlih mais mazal maranich radiya
ikoulou matlou3nta3 medea mlih li tkader tdirelna les photos kima anti man medea nkounou machkourinlha bazaf