حنيونات مسكرين

حياتي نبع امل · 2013-01-23, 15:04

السلام عليكم ورحمة الله وبركاته
نعم للتجديد والتنويع الا اننا لا يمكننا الاستغناء عن الحلويات التقليدية مع اضافة عصرية
بدون اطالة اليكم المقادير
3كيلات فرينة مغربلة
1كيلة سمن دايب وبارد
قرصة ملح
شوية فاني
نص كيلة او اكثر ماء الزهر هدا يتوقف على نوعية الفرينة
طريقة التحضير
نغربل الفرينة في قصعة ونزيد عليها قرصة ملح والفاني ونخلطهم ونزيد السمن الدايب والبارد ماشي سخون لانو يعمل حبيبات ونحك مليح مليح حتان تشرب الفرينة هداك السمن لازم تشوفي انو كل الفرينة تشربت هداك السمن
من بعد ضيفي ماء الزهر غير بالشوية ولمي بلا ما تعركي العجينة وهكداك كملي حتان تتحصلي على عجينة طرية ملساء
خليها ترتاح اقل شىء 3 ساعات كلما ارتاحت مليح رايحة تساعدك في العمل
بعدما ارتاحت العجينة احكمي كمية منها حليها قطعيها دوائر وضعي كمية من الحشو واغلقي عليه وشكلي حربوش
هداك الحربوش دوريه على بوشون تاع قرعة باش الحبات يكونو كامل قد قد وتان الحفرة اللي في الوسط يكونو كامل كيف كيف
يعني البوشون تحكمي بيه لا فوغم تاع الحبة
ديريهم يطيبو في فرن سخون من قبل لكن اثناء الطهي يكون متوسط الحرارة
بعدما يطيبو خليهم يبردو
قبل ما نجوزو للقلاصاج مقادير الحشو 2 كيلات كاوكاو او لوز مرحي مع كيلة سكر رطب شوية قرفة وشوية زبدة او سمن دايب ولميه بماء الزهر لكن ما يلزمش يكون عجينة يعني يكون مشمخ برك يبقى الحشو شوية متماسك وشوية مبعثر
القلاصاج
ضربي بياض بيضة مع قرصة ملح بعدما تضربيه ضفي شوية سكر رطب وخلطي تم شوية ماء الزهر وخلطي وهكدا حتان توصلي للقوام والكثافة المطلوبة في الاخير زيدي عصير ليمونة وملعقتين زيت لللمعان ادا كان حبيتي تلونيه ضفي الملون في عصير ليمونة وادا حبيتيه ابيض خليه هكداك بعدما تخلطيه وتجربي حبة وتلقايه ماهبطش بزاف ومايبانش لون الحبة خليه يرتاح مدة 5د هكداك امبعد ابداي تقلاصي
خليه ينشف مليح وزينيه بوردة من عجينة الديكور
الان نخليكم مع الصور وان شاء الله يعجبكم
[IMG][/IMG]
[IMG][/IMG]
[IMG][/IMG]
[IMG][/IMG]
وهادو درتهم في شاربات خفيفة غطستهم وقطرتهم ورمدتهم في السكر الرطب 2 مرات في الكيس يعني بعدما يقطرو حطيهم في كيس فيه السكر الرطب وحركيه يترمدو وحدهم نحيهم وخليهم يرتاحو شوية من المعركة اللي كانو فيها وعاودي رجعيهم لحلبة المصارعة مرة تانية من بعد نحيهم وحطيهم بعد شوية جوزي عليهم بالصفاية فيها سكر رطب ودردري فوقهم وحطيهم في لي كيسات وبصحتك
[IMG][/IMG]

basmala farah · 2013-01-23, 15:15

الله يبارك ما هدا الجمال الله يعطيك الصحة

حياتي نبع امل · 2013-01-23, 15:38

اقتباس:

المشاركة الأصلية كتبت بواسطة basmala farah

الله يبارك ما هدا الجمال الله يعطيك الصحة

يبارك فيك حنونة يعطيك الصحة

ام عبيدة · 2013-01-23, 15:52

بارك الله فيك

حياتي نبع امل · 2013-01-23, 16:12

اقتباس:

المشاركة الأصلية كتبت بواسطة ام عبيدة

بارك الله فيك

شكرا وفيك بارك الله

طاعة زوجي .. · 2013-01-23, 16:30

يعطيك الصّحة حنّونة شكلها شباب ، عجبتني كثر نتاع السّكر قلاصي لاخاطرش مانحبّش القلاصاج
مشكورة حنّونة على الوصفة

meriem39 · 2013-01-23, 16:45

تسلم ايديك ربي يعطيك العافية

oum anas 69 · 2013-01-23, 17:01

الله يبارك خرج تحفة يعطيك الصحة اختي الكريمة

أم محمد تاج · 2013-01-23, 17:09

يعطيك الصحة وتسلمي بصح راحة نقولك اللمعة الأخيرة خدمتيها بلوستخاج والشيتة تاع لخدود ولا قلاصاج كيما كتبتيه برك.

sarahbouda · 2013-01-23, 17:10

yaetuk saha mais la fleur kufach dartuha

tonia · 2013-01-23, 17:16

السلام عليكم الله بارك فيك

حياتي نبع امل · 2013-01-23, 19:29

اقتباس:

المشاركة الأصلية كتبت بواسطة * أمّ محمّد يوسف *

يعطيك الصّحة حنّونة شكلها شباب ، عجبتني كثر نتاع السّكر قلاصي لاخاطرش مانحبّش القلاصاج
مشكورة حنّونة على الوصفة

الله يعزك حنونة العاقبة نهار نفرحو بيك ان شاء الله

حياتي نبع امل · 2013-01-23, 19:31

اقتباس:

المشاركة الأصلية كتبت بواسطة meriem39

تسلم ايديك ربي يعطيك العافية

الله يسلمك ربي يخليك

حياتي نبع امل · 2013-01-23, 19:32

اقتباس:

المشاركة الأصلية كتبت بواسطة oum anas 69

الله يبارك خرج تحفة يعطيك الصحة اختي الكريمة

الله يسلمك نورتي صفحتي

حياتي نبع امل · 2013-01-23, 19:35

اقتباس:

المشاركة الأصلية كتبت بواسطة أم محمد تاج

يعطيك الصحة وتسلمي بصح راحة نقولك اللمعة الأخيرة خدمتيها بلوستخاج والشيتة تاع لخدود ولا قلاصاج كيما كتبتيه برك.

شوفي القلاصاج يخرج يلمع بدون اضافات بالصح كي تزيديلو الملمع يزيد لو في اللمعان
طريقتي ندير ايبونج اسفنجة وندير فيها الملمع ونحك الحبة كامل هدي احسن من الفرشاة