جديدي في المقبلات: ميني تارت مالحين... تفضلو مرحبا ;)

أنا أمهم · 2012-11-20, 15:36

السلام عليكم و رحمة الله و بركاته
بسم الله

هذه الوصفة فيها مرحلتين : تحضير les barquettes بالعجينة البريزي, و تحضير الميني تارت كاملين.

تحضير les barquettes : أول شيء لازم نحضرو العجينة البريزي و هذه مكوناتها :

250غ فرينة, 150غ زبدة باردة مقطعة , أصفر بيضة, 1 م ص ملح, و لمستي الخاصة و الخاصة جدا 1 م ك اكليل و زعتر مرحين, و نصف كاس ماء بارد. تكفي تقريبا ل 30 قالب صغير.

التحضير : نخلط الفرينة مع الملح و الكليل و الزعتر, و بعد نخلط مع الزبدة و اصفر البيضة بأطراف الأصابع و كإنك تقرصي (ردو بالكم ما تعجنوش!!!!!) حتى تتحصلو على مزيج متجانس ترابي يشبه للكسكسي :

و بعد زيدي الماء بالشوية و حاولي فقط تجمعي بيه العجينة موش تعجني, حتى تتلم العجينة :

حطي العجينة في كيس و خليها ترتاح من ربع ساعة لنصف ساعة في الثلاجة , و بعد خرجيها خليها شوية و بعد حليها مع استعمال الفرينة باش ما تلصقش

حطي القوالب الصغار من تحت , دخلي العجينة شوية و قصيها بالضغط متاع ايدك :

نقبيهم بالفرشيتة :

سخني الفرن على درجة 200 من فوق و تحت, حطي الطبق في الوسط. تقريبا 20 دق و هذه النتيجة :

ملاحظة : كل ما يكون عندك أكثر عدد من القوالب يكون الشغل أسهل.

لما تكملي كل الكمية , خليهم يبردو و حطيهم في علبة في الثلاجة لحين الاستعمال:

المرحلة الثانية نحطها إن شاء الله في الرد الثاني ...... إنتظروني

أنا أمهم · 2012-11-20, 15:37

بسم الله

هذه المرحلة الثانية : تحضير الحشو و الديكور

للديكور : جبن شرائح, زيتون شرائح و حبات ذرة مالحين. و كل حد حسب ذوقه.

الجبن شرائح قصوهم بهذه الطريقة : قوالب الحلويات :

حاولو تغطية الأشكال بالبلاستيك من جديد حتى لا تنشف

تحضير الحشو : انا حطيت برشة مكونات و انتم كل حد و ذوقه , إذا تحبو تضيفو مكونات أخرى أو تنقصو .

مكونات : 2 صدر دجاج مطبوخين و مقطعين بعد ما خرجتهم من الصالصة يعني ناشفين . (طبختهم في ماء, زيت زيتون, بصل و ثوم رقيقين, كركم , ملح, كليل و زعتر مرحين, فلفل أسود)
2 بطاطا مسلوقة في ماء و ملح
3 بيضات مسلوقة و مقطعة
معدنوس مقطع
شوية تن
زيتون مقطع
الجبن شرائح اللي بقى بعد ما نحيت الأشكال للديكور.
جبن مرحي

خلطت كل المكونات بالشوكة :

خذيت من الحشو هذا شوية استعملتو في ميني سندويتشات, و زينتهم بالحبة السوداء و الذرة المملحة.

و أضفت لبقية الحشو 3 بيضات نية, (لأن الكمية ضهرتلي قليلة)
إذا تحبو ما تضيفوش البيض الني تقدرو

هذا الخليط اللي تحصلت عليه , فوحوه بالملح و فلفل أسود :

نعبيو الباركات بالحشو :

أنا هنا عملت غلطة إني دخلتهم للفرن و بعد ما خرجتهم حطيت الجبن الشرائح , لذلك الجبن ما عطاش منظر حلو برشة , نصيحة : الجبن اللي حضرتوه للديكور حطوه فوق الحشو قبل لا تدخلوهم للفرن.
الفرن 200 درجة من تحت و فوق.
ما يطولوش برشة في الفرن, على حسب كمية البيض الني اللي استعملتيه.

و لما تخرجيهم زيني بأنصاف أعواد الأسنان : حطي في كل واحد شريحة زيتون و حبة ذرة.

و هذه النتيجة الأخيرة : 30 ميني تارت مالحة و شوية ميني سندويتشات.

يمكن تضهرلكم الوصفة طويلة لكنها ساهلة و تحمر الوجه على قولتكم , و اللي تحب تختصر الوقت عندي ليها نصائح :

حضري الباركات قبل بنهار أو أكثر, و إذا تحبي تشري الباركات الجاهزين موش مشكل لكن تفكري ان شغل البيت دايما أنظف و أحلى ههههه

الحشو تمكن تستعملي التن فقط إذا انت كسولة على طبخ الدجاج

و إذا انت كسولة جدا جدا يمكن في اي أكلة انت تطبخي فيها في نفس الوقت (كسكسي و الا مرقة .....) ارمي فيها صدور دجاج و بطاطا إضافية و اخرجيهم و استعمليهم في خليط حشو التارت

و يا ربي تعجبكم الوصفة و تدعيولي.

الأمنيات · 2012-11-20, 16:06

انا اول من يرد حتى ولو لم تكملي غاليتي
ماشاء الله .....................في انتظار البقية هههههههههههههههههههههههههه

أنا أمهم · 2012-11-20, 16:36

أختي العزيزة الأمنيات دايما قايمة بالواجب هههههه ربي يخليك ليا. و يا ربي ما نكونش تعبتك و انت تهزيلي في المورال ههههه
و الوصفة كملتها الحمد لله في الرد الثاني. إن شاء الله تعجبك.