طاجين المكشردة هههه....(اعشاش البطاطا)

ريتاج تيارتية · 2014-03-31, 20:51

جيتكم اليوم بطبق قديم عندي انا نقولو الشعشبونة ولا والمكشردة هههههه طاجين خفيف وهايل قاع يبغوه في الدار
او شيء نبدا بالمقادير واللي هي موضحة في الصورة

نحتاج للدجاج على حساب افراد العائلة

وحمص منفخ انا استعملت تاع البلارة درتو غير في نص الطياب حتة حسيت الجاج دخله الطياب

ونحتاج فلفل اسود وقرفة وملح وزعفران هي نورمالمو تجي صوص بيضا وانا في الدار مايبغوش الصوص البيضا على هذيك ندير زعفران ومانكثرش

ونحتاج ثانيك حبة بصل صغيرة مرابيا وزوج سنات ثوم ثانيك مرابين

وبطاطا ثانيك على حساب الكمية من بعد نرابيها

نبدا بالتحضير اولا
نقلي الجاج بشوي زيت والبصل والتوم ونضيف شوي فلفل اسود وملح وشوي قرفة مطحونة ولا عود قرفة صغير ومغرف صغيرة زعفران واللي تغي ديرها بيضا عادي هي في الاصل صوص بيضا كيما قلت

ومن بعد نمرق وندير ربطة تاع قصبر

الحمص خليتو من بعد باسكو طايب بزاف ونخليا تطيب كي يدخل الطياب للجاج نضيف الحمص واذا كان الحمص مش تاع البلارة ديروها مع لول

هنا ضفت الحص

ونروح للبطاطا نرابيها في الخشين ونديرها في كسكاس تقطر من الماء
ملاحظة من الاحسن قطروها في حاجة تاع بلاستيك اذا كاين لاخطرش الكسكاس تاع الاينوكس تكحال منو البطاطا واذا مكاش كي ترابوها اضغطو عليها حتى يهود الماء

حطوها في غرفية وزيدو ضربولها حبات بيض على حساب الكمية زوج ولا ثلاث حبات باش تتلم وشوي معدنوس
وشوي ملح كيما في الصورة وفرغوهم على البطاطا وخلطوها مليح

ديري الزيت يسخن في المقلا كي يسخن شكلي كرات واقليهم على نار متوسطة باش يدخلهم شوي طياب

نرجع للصوص لما يطيب الجاج نخلي غير شوي صوص مانشفهاش بزاف ومانخليهاش مايهة بزاف كي توجد نحط هذوك الاعشاش تاع البطاطا ونخليهم يشربو غير شوي الصوص مش بزاف ونطفي بلا ماننسى نقول انا الجاج نحيتو بجيه وحمرتو

وتقدميه كاي طبق
[

وشهية طيبة ان شاء الله نتمنى يعجبكم

ادرارية · 2014-03-31, 21:06

حنا نسموها مرقة خوخو زمان كنا نديروها وخويا صغير كي خاف منها قالنا اخوخو سمينها خوخو يعطيك الصحة

ريتاج تيارتية · 2014-03-31, 21:13

اقتباس:

المشاركة الأصلية كتبت بواسطة adrari

حنا نسموها مرقة خوخو زمان كنا نديروها وخويا صغير كي خاف منها قالنا اخوخو سمينها خوخو يعطيك الصحة

ههههه خوخو اسم خير من مكشردة هههههههه
شكرااا حبيبتي نورتي

ladymillion · 2014-03-31, 22:08

كشرودة نتاع الصح هههههههههه طبق هايل بارك الله فيك كي عرفتي بيه الحق حنا مانديروهاش
بارك الله فيك

om roumaissa · 2014-03-31, 22:14

يعطيك الصحة اول مرة نشوفها باين بلي بنينة عجبتني الوصفة 44444444444

ريتاج تيارتية · 2014-03-31, 22:15

اقتباس:

المشاركة الأصلية كتبت بواسطة ladymillion

كشرودة نتاع الصح هههههههههه طبق هايل بارك الله فيك كي عرفتي بيه الحق حنا مانديروهاش
بارك الله فيك

ههههه شفتي كشرودة بصح بنينة
ربي يخليك حبيبتي

دائمة الحمد · 2014-03-31, 23:13

يعطيك الصحة عزيزتي الطبق انا عمري ماعملتو بالصح مرة بعثتهولي وحدة صديقة عجبني ياسر يجي بنين

بالصح المرة الجاية سشوري ليها هههههههههههههه
مشكورة عزيزتي