بقلاوة بالنواد كوكو + حلوى جافة رااااااااااائعة ,

الواثقة بالله 23 · 2014-01-06, 23:03

السلام عليكم حبوباتي

عندي مدة معملتش موضوع توحشتكم كامل إن شاء الله تكونوا بخير
عندي 2 أنواع حلوى عملتهم كي غير لكن للأسف مصورتش مراحل التحضير سأكتفي بالصورة النهائية

بقلاوة بالنواد كوكو:

_ نفس عجينة البقلاوة العادية، 4 كيلات فرينة نوعية ملاحة سيم أو لابال ، كيلة زبدة ذايبة و باردة و نخلط مليح و تلمي بالماء مخلط مع الماء زهر و نتشة ملح . تتحصلي على عجينة أقسميها قرصات و خبيها في كيس بلاستيكي في الثلاجة ترتاح مدة كافية ، عن نفسي نخليها ليلة كاملة.
_ الحشوة : 3 كيلات نواد كوكو (حوالي 600 غ) كيلة سكر أرطب شوية زبيب مفور حوال 100 غ و تلمي بالماء زهر تعمليه بيدك مثل الكسكسي يعني متلبزيهش حتى يولي عجينة خلي كل حبة وحدها.
_ ندهنو السينية بالزبدة و نعملو 5 طبقات عجينة مثل البقلاوة بين كل طبقة و الأخرى ندهنو بالزبدة الذايبة ثم نضع الحشو لي هو نواد كوكو سكر أرطب زبيب و ماء زهر
ملاحظة خاصة بالحشو: عينك ميزانك و حسب السينية تاعك أنا كتبت 600 غ تقريبيا ، حاولي الطبقة تاع الحشو متكونش عالية ياسر باه ميجيش ناشف و صامت و متكونش خفيفة خلاص علو متوسط.
بالنسبة للزبيب طعمو هااااااااااااااااااايل حنا الحلوى هادي نطيبوها من بكري بصح مكناش نحطو فيها الزبيب من نهار لي ذقتها بيه وليت ديما نحطو رووووووووعة لكن متكتريش 100 غ تكفي يعني كي تقسمي كل حبة بقلاوة طيحلك فيها 2 حبات تقريبا تاع زبيب و لازم التوزيع تاعو يكون متساوي في السينية باه الحبات كل يجي فيهم الزبيب.

_ من بعد زيدي 4 طبقات عجينة و إدهني بيناتهم بالزبدة الطبقة الأخيرة إدهنيها بالسمن باه تجي تلمع (ممكن زبدة إذا معندكش) و قصيهم مقرودات مثل البقلاوة أنا هنا قصيتهم مربعات و إرشقيهم بالوردات الحمر يتباعو عن المحلات لي تبيع لوازم الحلويات . ممكن تزيني بشكل آخر ممكن تقصي العجينة بالمشينة تاع الرشتة و تلونيها و تزيني بيها من الفوق لك الإختيار.
دخليه لفرن مسبق التسخين حتى يطيب من تحت و من بعد شعلي عليه من فوق يطيب أشقر ميتحمرش ياسر. و هو سخون صبي عليه العسل بارد كيما البقلاوة حتى تتغطى الصينية كاملة و خليها تشرب ليلة كاملة و غدوة باه قصي ( البقلاوة بأنواعها ناس بكري كانو يخلوها أسبوع كامل تشرب العسل و تحكم روحا مليح باه يقصوها تجي رائعة)
أنا خيرت كيسات بلون أحمر باه يخرجو مع لون الوردات

صدقوني الطعم و لااااااااااااااااااااااااااااااأروع نحبها حتى أكثر من بقلاوة الجوز و اللوز لذيذة و إقتصادية

يتبع أحبتي الحلوى الثانية رح نحطها في الرد الأول

الواثقة بالله 23 · 2014-01-06, 23:04

حلوى جافة بالجلجلان و الكاوكو
النوع هذا كنا ديما نعملوه في العيد الصغير ممممممممممم بسيط لكن لذيذ لأنو بصفار البيض يذوب في الفم و طعم الجلجلان و الكاوكاو مع الكاكاووو مممممم

المقادير:
4 صفار بيض+ رطل زبدة طرية ( بحرارة الغرفة ) و خلطي مليح مليح + نص رطل سكر أرطب و خلطي مليح + كاس جلجلان نصفه مرحي و نصفه حب + كاس كوكاو مرحي بودر + 1 خميرة الحلوى + كاكاوو حتى تغماق ( متبالغيش في وضعو باه متجيش مرة ) + فرينة حتى تتماسك ( السر في كل الحلويات الجافة باه تجي هشوشة و خفيفة و بنينة ووووووو متكتروش الفرينة يعني العجينة في بيدك خليها طرية باه متيبسش و متجيش ناشفة ) ثم شكليه بالمحقن ( القمع تاع الحلويات ) أو ممكن لابوش أدووي إذا كان لادووي تاعها شوي واسع شكليه وردات بصح متكليش العجينة فوق بعضاها مثل الغريبة لا دوري بطريقة أنو يجي مسطح كيما في الصورة ، دخليه لفرن مسبق التسخين و كبعا متحليش عليه 10 دقائق الأولى و من بعد طفي لازم يشيح فقط متخليهوش يتحرق و راقبيه باستمرار لأنو لونو بني من الكاكاوو قادر يخدعك.
كي يطيب رشي عليه بالصفاية السكر الأرطب مليح و رشة خفيفة تاع برييون فضي اللون.

بنيييييييييييين و هشوش كي يزيد يقعد إيامات يزيد يولي أطرى و أبن