**حلويات جديـــــدة **2013

ladymillion · 2013-07-24, 15:05

>>~~~ بســــــــــم الله الرحمن الرحيـــــــــم ~~~<<

بما ان عيد الفطر قرب ونحبو دائما الجديد سواء في الاعياد او في الاعراس جبتلكم حلويات تصلح لهاذ المناسبات السعيدة وربي يدوم الافراح علينا وعليكم للعلم ان هذه الحلويات من صنع اختي الكبرى وكنت حابة نديرهم ونحطلكم الخطوات المصورة وشرح لكل خطوة لذلك انا متاسفة جدا ، لكن حبيت نفيدكم بيهم وتجربوهم ان شاء الله وتدعولي ليا ولأختي نخليكم مع الوصفات
نتمنى يعجبــــــــــوكم يارب

الوصفة الاولى :

قـــــــــــــاطو Les dômes

اولا لازملك moule silicone شكل حباته نصف كرة

و تحتاجي المقادير التالية:

شكولاطة بيضاء
كاوكاو محمص و مرجوش ( مرحي مدشش )
حليب محلى caramélisé

اما بالنسبة لبسكوي الوردات بالكاكاو هو sablé كالاتي:

125g زبدة او مارغرين بحرارة الغرفة
50غ كاكاو اسود
صفار بيضة
رشة ملح
70 g سكر ناعم
150غ فرينة

نضرب الزبدة و السكر حتى البياض ثم نضيف صفار البيض ثم الكاكاو
و شيحي بالفرينة اذا امكن زيدي الفرينة حتى الحصول على عجينة
خليها ترتاح نص ساعة و حايها بالحلال بارتفاع نصف سنتمتر و اطبعي وردات و طيبيهم في فرن حرارته 180°

نرجعو للكاوكاو لميه و nestlet caramélisé كيما حشوة سنيكرز
ذوبي الشكولاطة في حمام مائي و حطي كمية ملعقة صغير في كل نصف كرة من المول و ادهنيها بال pinceau و حطي المول في congélateur L مدة 5د تجمد وخرجيها أحشيها بحشوة الكاوكاوو الكراميل و الصقي حبة البيسكوي فوق الكرة او تقدري تلصقيها بشوي شوكولا

ملاحظة: حبة البسكوي تكون اكبر من نصف الكرة كيما في الصورة
اخرجي الحبات من المول و زينيهم بالشكولاطة السوداءديريها خطوط

الوصفة الثانية :
قـــــــــــــــــــاطو التونسيات

حلوة جديدة هايلة للاعراس تحبي ديري لون واحد أو عدة ألوان كيما في الصورة عبارة عن لوز وسكر ناعم ويطيب شوي في الفرن نخليكم مع المقادير والطريقة

~~ المقادير ~~

3 كيلات لوز مرحي رقيق بزااااف لازم يكون كي الفرينة
كيلة واحدة سكر
ZESTE DE CITRON
رشة ملح
بيض (( تلمي بيه العجينة حسب كمية اللوز لي ديريها ))

~~ الطريقة ~~

حطي اللوز + السكر + ملح + قشور الليمون في Pétrin أو بيدك
اذا راح ديري في Pétrin ركبي مضرب K وبداي تخدمي واضيفي البيض بالواحدة واعجني حتان كي تشوفي تلم وتكونت عجينة طرية وتقدري تشكليها وكملي اعجني مليييح حتى يرجع معلك شوي أي كيما عجين المطلوع كي يكون طري OK؟؟؟؟

دوركا احفظي العجينة نتاعك في الثلاجة لمدة 24سا
في الغد خرجيها وشعلي الفرن 150° يكون ناقص
اذا راكي حابة تلوني العجينة اقسميها على حساب عدد الالوان أو ديري لون واحد
بشرط قبل ماديري أي لون للعجينة ديري أولا ملون غذائي أبيض باش كي ديري الالوان الاخرى يكونو باهيين

ملاحظة : ملون الغذائي لازم تبليه في شووووي ماء زهر اذا ديري بودرة باش يتحلل ملييح

لوني العجينة ودخليها ملييح في بعضاها حتى ترجع بلون واحد
خذي كمية من العجينة كوريها واذا تشوفي شوي تلصق لازم تساعدي يدك بشوي فرينة وديري حفرة صغيرة في نصف الحبة وعدلي الحبة ملييح وبالنقاش انقشي جوانب الحبة بشكل مائل كيما في الصورة شوفي الحبة عن قرب

وحطيهم في صينية يطيبوا لمدة 15د كي تشوفيهم حماروا من تحت خرجيهم وعسليهم مباشرة في (( عسل + ماء زهر )) العسل يكون شوي خاثر وخليهم يقطروا وفي الحفرة هاذيك ديري فيها فستق او لوز او فستق مخادع

وتقدميهم

الوصفة الثالثة :

قـــــــــــــــاطو بحلوة الترك مغلف بالشوكولا

-- المقادير --

250غ زبدة بحرارة الغرفة
125غ حلوة الترك
رشة ملح
م ص فاني
فرينة تلمي بيها العجينة

-- الطريقة --
أخدمي الزبدة + حلوة الترك + ملح + فاني مليييح وحطي الفرينة تدريجيا مبدئيا راح نحتاج 500 غ تكون عندك عجينة كيما السابلي
خليها ترتاح نصف ساعة اذا كان الحر حطيها في الثلاجة أحسن

من بعد كي تخرجيها شعلي الفرن أولا بدرجة 180° والرف يكون فوق
حليها العجينة بالحلال وحطي فوقها بلاستيك وحلي بسمك حوالي 7مم وانزعي البلاستيك واطبعيها شكل لي تحبي وحطيه في الصينية ودخليها للفرن طيب حتان تحمر من تحت وتكون طايبة

خرجيها خليها تبرد ولصقي كل حبتين بالمعجون

كلاصاج الشوكولا
في حمام مائي حطي 700 غ شوكولا أنا دائما نستعمل منى كي تذوب + صفار بيضة واحدة وحركي مليح +باكي صغير من قهوة نيسكافي وحركي + 3ملاعق كبيرة كاكاو ومن بعد زيدي الماء يعني حتان تشوفي الكلاصاج سايل شوي

وغلفي حبات القاطو
والتزيين كيما تحبي

ان شاء الله يعجبوكم أحبتي