وصفات عزومتي

[بريق الامل&]

البسملة1


هنا الوصفات بايجاز لمشاركتي في سفيرة العزومات
الدعوة عامة اهلا بكل اعضاء وزوار منتدانا الغالي
تفضلو وأسفة على التأخير
المقبلات
شربة بيضاء
قليت بصل رابي وشوية زيت وسمن وعود قرفة وفلفل ابيض ان توفر او فلفل اسود وملح وقرصة كركم و مرقت
حضرت لحم مرحي شوية ثوم وبصل اظفت حبة بيض ومعدنوس مقطع ملح فلفل اسود وقرفة مرحية نحلط مليح ونشكل كريات صغيرة اقل من تاع المثوم ونرميهم يطيبو ممكن اضافة شوية روز او فرميسال كي تطيب ونكون محضرة عصير قارص ومعدنوس وصفار بيضة نرميهم للشربة نخلط ونطفي مباشرة وتقدم






السمبوسة او صامصة مالحة
حضرت عجينة
كاس فرينة مغرف زيت ملح ماء ونعجن عجينة طرية ومتماسقة ولا تلتصق نقسمها على اربعة ونحل كل وحدة وحدها رقيقة بزاف نحطهم فوق بعض وندهن بقطرات زيت بيناتهم ونرش فرينة نحطهم في مقلة تيفال على نار هادية ونقلبهم ونفصل كل وحدة وحدها
ونقسم على اربعة ونحشي بفرماج شاف ونطبق ونلصق الحواف بفرينة وماء ونقليهم في لزيت ونقطرهم على ورق مطبخ وتقدم برفقة الليمون

فطائر الورود استعملت عجينة قطنية في قوالب السيليكون محشية بدجاج طايب ولحم مرحي طايب كما تاع البوراك بالطريقة المعتادة
كاس وربع فرينة ومغرف حليب غبرة مغرف صغيرة سكر ملح مغرف صغيرة خمارة خبز نصف ملعقة خمارة الحلوى وماء دافي نعجن ونخليها تخمر نحلها ونقطع دوائر في مول سيليكون مدهون بالزبدة ونحشيها فرماج ودجاج طايب او لحم مرحي طايب وفرماج ونغطيها بعجينة رقيقة وندخلها الفرن تطيب تحمار وتقدم وتزين



السلاطات

سلطة فلفل طرشي مقلي و حلقات البصل ملحت فلفل طرشي من الداخل وقليتو في الزيت ونقي نقطعو ونزيدلو شوية زيت زيتون ويقدم مع حلقات البصل


سلطة الكانيلوني
حضرت ماسيدوان وسلاطة خضر مقطعة رقيقة وحشيت بها كانيلوني مغلي في ماء وملح وبارد ونزينها بمايونيز ممزوج مع ياؤورت طبيعي ومعدنوس ممممم

سلاطة على شكل حبات برتقال وجزر وحميص حار

نفس عجينة الورود قصيتها شرائط ولفيتها على لي كورني دهنتها بصفار بيض وطيبتها في الفرن
تبرد وحشيتها بماسيدوان زينت الوجه بمايونيز وورقة معدنوس تظهر على شكل حبة جزر

وعلى شكل برتقال بطاطا مغلية مهروسة زدتلها فرماج ومايونيز وملح وزبدة وحشيتها زيتون كريات نغلفها بمايونيز ونمررها في جزر مرابي ونزينها بورقة من قشرة خيار او معدنوس

سلاطة على شكل برج دلاع
نقطع طماطم مربعات صغار ونشكل نصف دائرة في الصحن ثم بيض مغلي رابي على كامل المحيط الطبقة البيضاء ثم خيار رابي بالقشرة الطبقة الخضراء وزيتون اسود مقطع يعني بذور الدلاع


يتبع
طبق الشواء

تبلت لحم بفلفل اسود وملح ودرتو في كيس البلاستيك الخاص بالفرن والى الفرن كي يحمار مليح نفتح الكيس وندير شوية زبدة 5 دقائق ونخرجو
قدمتو في صينية مغلفة بورق الالمينيوم مع كبدة ملفوف مشوية في الفرن وكريات بطاطا محشوة جبن نديرها في الفرينة ثم بيض ثم شابليغ وتقلى
وفرشت سلاطة خضراء وزيتون وبصل وطماطم في اعواد اسنان اليكم الصور


طبق اعشاش البلبل بقلوب الدجاج
المعذرة صور مراحل الطبق حذفتها من الة التصوير بدون قصد
المهم طيبت مرقة بيضا بافخاذ الدجاج وقطعة صدر دجاج زيت وملح وفلفل اسود وعود قرفة وذرة سكنجبير وذرة كركم وشوية سمن ومعدنوس وبصل رابي
نقلي مليح ونمرق كتكون قريب تعقد نرمي زيتون منزوع الملح وفطر مقلي في الزبدة
نحضر الاعشاش بلحم مرحي مدوزن بثوم وبصلرابي ملح فلفل اسود قرفة بيض معدنوس شوية زيت وفي صينية الفرن نغلفها بورق اليمنيوم نشكل خبيزات لحم نرفع الجوانب حتى نتحصل على شكل عش
ناخذ صدر الدجاج الي طاب في المرق نقطعو مربعات نظيفلو بيض وفرماج مكعبات صغار
ونملى الاعشاش والى الفرن حتى يطيب مليح
نجي لصدر دجاج مش طايب نرحية ونظيفلو قطرات ليمون وبيض وزيت او زبدة وملح وفلفل اسود وكمون في مول السيليكون على شكل قلوب مدهون بالزبدة نضع صدر الدجاج
نحشيه بلحم مرحي طايب نقلي في مقلى بصل ولحم مرحي وثوم ومعدنوس وكمون وفلفل اسود وقرفة وفتيتة ملح وندخلو للفرن يطيب
و يحمار شوية نرجعو للكوكوت يطيب شوية مع افخاذ الدجاج والفطر والزيتون ممكن تحمري شوية الدجاج بالزبدة
ويقدم راه يجي بنين بزاف ويحمر الوجه قدام ضيوفك
حطي فوق العش حبة زيتون كانها بيضة في العش ههههه

التحليات



https://www.djelfa.info/vb/showthread.php?t=1045039


كاس حليب
200غ فراز وحبات كرز منزوعة البذور مرحين مع بعض اي بيري
مغرف سكر
50 غ مايزينة
100 غ شيكولا بيضا
حبة بيض
20غ زبدة
كرام شونتيي للتزيين وحبات فراز وسوغيز للتزيين


قاطو بيمو مرحي
جوز هند محمص
4مغارف اكل سكر
8 ملاعق اكل عصير اناناس نستعمل اناناس العلب
6 شرائح اناناس مقطعة رقيقة
للكريمة
كاس وربع ماء
نصف كاس عصير ليمون
150 غ سكر و50 غ زبدة
قشور قارص
50غ مايزينة
4 صفار بيض
خلطي جوز الهند محمص وبيمو مرحي وعصير الاناناس وقسميه على الكؤوس حطي في القاع 6 كؤوس
ثم ضعي طبقة من قطع اناناس رقيقة
حضري الكريمة
كل مقادير الكريمة فوق النار حتى تثقال فوق النار وخلطي انزعيها وخليها تبرد
ممكن اضافة قطع اناناس مع الكريمة انا اظفت
فرغي في الكؤوس
حطيها تبرد مليح
زينيها بشونتيي
وقطعة اناناس ورشة جوز هند محمص وورقة نعناع وقطعة ليمون انا ما كنش متوفر النعناع
تجي بنينة بزاف ولازم باردة بزاف مكن تحضريها يوم قبل
الحلويات

المبرومة السورية
https://www.djelfa.info/vb/showthread.php?t=1302682

قطايف بقمر الدين اي المشمش

عجينة قطايف حطيها في مول التارتولات وفرغي 2مغرف سمن ذايب وطيبيهم ما تعسليهمش تكوني وجدتي كرام ديسار بمعجون المشمش وهي معجون وماء ومايزينة فوق النار تثقال و عمري بها تارتولات القطايف ورشي بيستاش
قطايف بالكرام شونتيي والبيستاش

قطايف عجينة جاهزة تاع البليدة رشيهم بشوية سمن لويهم على لي كوني حطي في بلا وسقي كل حبة ب2مغرف سمن ذايب طيبيهم و فرغي عليهم عسل او شاربات واحشيهم بكرام شونتيي بعد ما يبردو مليح وزيني بالبيستاش
مقروط معسل

3كيلات سميد
كيلة فرينة ملح
2 باكي خمارة فاني
كيلة سمن دايب وبارد و4 صفار بيض
كيلة ماء الزهر وشوية ماء غطيه 10 دقائق
حضري حشو اللوز او تمر او كوكاو انا درت لوز
شكليه درت طابع الشهدة وانت كما تحبي ممكن بالنقاش او طابع اخر وممكن تزيني بحبة لوز
حطيه في بلا بجانب بعضو وطيبيه وعسليه في البلا تاعو كي يطيب فور خروجه من الفرن
يتشرب العسل تاعو وحطيه في ليكيسات

شكرا لكل من تمر من هنا
قبلاتي وتحياتي الحارة
سلاااام

[lyna2007]

بارك الله فيك على كل هذه الأطباق الرائعة

شكرا لك

[غزة في عيوني]

بارك الله فيك يا سفيرة العزومات مزيدا من التالق

[sidali 2007]

بارك الله فيك مبروووووووك

[zineb_saib]

ممممممم يشهووو يعطيك الصحة شااااااااااطرة

[*أم كوثر*]

الله يبارك ماشاء الله
ينقل للقسم المناسب

[soriaalg]

ممممممممممممممممممم بارك اله فيك ما شاء الله عليك ربي يبارك ويزيد

[موج و صخر]

ما شاء الله
الله يبارك عليك و يحفظك من العين
عزومة هايلة
الاطباق كلها في القمة
يعطيك الصحة

[oum 3abdou]

الله ابارك و يسلم يديك اختي العزيزة

[بشرى2008]

بارك الله فيك

[ikhlasse25]

روعة يعطيك الصحة

[انتي بلون الورد]

بارك الله فيك

[بيلسان11]

ما شاء الله .يعطيك الصحة على الاطباق الهايلين بارك الله فيك و ربي يحفظك

[اَلْنَّفْسُــــ اَلْمُطْــمَــئِـنَّـةღ♥ღ]

اطباق كلها بتشهي .........واحد ينسيك فلخر .ربي يوفقك اختي ماشاء الله شطورة

[zineb 4am]

كامل تشهي يعطيك الصحة